੮. ਨਾਗਸਮਾਲਵਗ੍ਗੋ
੧. ਨਾਗਸਮਾਲਤ੍ਥੇਰਅਪਦਾਨਂ
੧. ‘‘ਅਪਾਟਲਿਂ ਅਹਂ ਪੁਪ੍ਫਂ, ਉਜ੍ਝਿਤਂ ਸੁਮਹਾਪਥੇ;
ਥੂਪਮ੍ਹਿ ਅਭਿਰੋਪੇਸਿਂ, ਸਿਖਿਨੋ ਲੋਕਬਨ੍ਧੁਨੋ.
੨. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਥੂਪਪੂਜਾਯਿਦਂ ਫਲਂ.
੩. ‘‘ਇਤੋ ਪਨ੍ਨਰਸੇ ਕਪ੍ਪੇ, ਭੂਮਿਯੋ [ਪੁਪ੍ਫਿਯੋ (ਸ੍ਯਾ.)] ਨਾਮ ਖਤ੍ਤਿਯੋ;
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੪. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਨਾਗਸਮਾਲੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਨਾਗਸਮਾਲਤ੍ਥੇਰਸ੍ਸਾਪਦਾਨਂ ਪਠਮਂ.
੨. ਪਦਸਞ੍ਞਕਤ੍ਥੇਰਅਪਦਾਨਂ
੫. ‘‘ਅਕ੍ਕਨ੍ਤਞ੍ਚ ਪਦਂ ਦਿਸ੍ਵਾ, ਤਿਸ੍ਸਸ੍ਸਾਦਿਚ੍ਚਬਨ੍ਧੁਨੋ;
ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਪਦੇ ਚਿਤ੍ਤਂ ਪਸਾਦਯਿਂ.
੬. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪਦਸਞ੍ਞਾਯਿਦਂ ਫਲਂ.
੭. ‘‘ਇਤੋ ਸਤ੍ਤਮਕੇ ਕਪ੍ਪੇ, ਸੁਮੇਧੋ ਨਾਮ ਖਤ੍ਤਿਯੋ;
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤੀ ਮਹਬ੍ਬਲੋ.
੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਪਦਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਪਦਸਞ੍ਞਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.
੩. ਬੁਦ੍ਧਸਞ੍ਞਕਤ੍ਥੇਰਅਪਦਾਨਂ
੯. ‘‘ਦੁਮਗ੍ਗੇ ਪਂਸੁਕੂਲਿਕਂ, ਲਗ੍ਗਂ ਦਿਸ੍ਵਾਨ ਸਤ੍ਥੁਨੋ;
ਤਤੋ ਤਮਞ੍ਜਲਿਂ ਕਤ੍ਵਾ, ਪਂਸੁਕੂਲਂ ਅਵਨ੍ਦਹਂ.
੧੦. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਸਞ੍ਞਾਯਿਦਂ ਫਲਂ.
੧੧. ‘‘ਇਤੋ ਚਤੁਤ੍ਥਕੇ ਕਪ੍ਪੇ, ਦੁਮਸਾਰੋਸਿ ਖਤ੍ਤਿਯੋ;
ਚਾਤੁਰਨ੍ਤੋ ਵਿਜਿਤਾਵੀ, ਚਕ੍ਕਵਤ੍ਤੀ ਮਹਬ੍ਬਲੋ.
੧੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਬੁਦ੍ਧਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਬੁਦ੍ਧਸਞ੍ਞਕਤ੍ਥੇਰਸ੍ਸਾਪਦਾਨਂ ਤਤਿਯਂ.
੪. ਭਿਸਾਲੁਵਦਾਯਕਤ੍ਥੇਰਅਪਦਾਨਂ
੧੩. ‘‘ਕਾਨਨਂ ਵਨਮੋਗਯ੍ਹ, ਵਸਾਮਿ ਵਿਪਿਨੇ ਅਹਂ;
ਵਿਪਸ੍ਸਿਂ ਅਦ੍ਦਸਂ ਬੁਦ੍ਧਂ, ਆਹੁਤੀਨਂ ਪਟਿਗ੍ਗਹਂ.
੧੪. ‘‘ਭਿਸਾਲੁਵਞ੍ਚ ਪਾਦਾਸਿਂ, ਉਦਕਂ ਹਤ੍ਥਧੋਵਨਂ;
ਵਨ੍ਦਿਤ੍ਵਾ ਸਿਰਸਾ ਪਾਦੇ, ਪਕ੍ਕਾਮਿ ਉਤ੍ਤਰਾਮੁਖੋ.
੧੫. ‘‘ਏਕਨਵੁਤਿਤੋ ਕਪ੍ਪੇ, ਭਿਸਾਲੁਵਮਦਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.
੧੬. ‘‘ਇਤੋ ਤਤਿਯਕੇ ਕਪ੍ਪੇ, ਭਿਸਸਮ੍ਮਤਖਤ੍ਤਿਯੋ;
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੧੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਭਿਸਾਲੁਵਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਭਿਸਾਲੁਵਦਾਯਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.
ਛਟ੍ਠਭਾਣਵਾਰਂ.
੫. ਏਕਸਞ੍ਞਕਤ੍ਥੇਰਅਪਦਾਨਂ
੧੮. ‘‘ਖਣ੍ਡੋ ਨਾਮਾਸਿ ਨਾਮੇਨ, ਵਿਪਸ੍ਸਿਸ੍ਸਗ੍ਗਸਾਵਕੋ;
ਏਕਾ ਭਿਕ੍ਖਾ ਮਯਾ ਦਿਨ੍ਨਾ, ਲੋਕਾਹੁਤਿਪਟਿਗ੍ਗਹੇ.
੧੯. ‘‘ਤੇਨ ਚਿਤ੍ਤਪ੍ਪਸਾਦੇਨ, ਦ੍ਵਿਪਦਿਨ੍ਦ ਨਰਾਸਭ;
ਦੁਗ੍ਗਤਿਂ ਨਾਭਿਜਾਨਾਮਿ, ਏਕਭਿਕ੍ਖਾਯਿਦਂ ਫਲਂ.
੨੦. ‘‘ਚਤ੍ਤਾਲੀਸਮ੍ਹਿਤੋ ਕਪ੍ਪੇ, ਵਰੁਣੋ ਨਾਮ ਖਤ੍ਤਿਯੋ;
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੨੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਏਕਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਏਕਸਞ੍ਞਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.
੬. ਤਿਣਸਨ੍ਥਰਦਾਯਕਤ੍ਥੇਰਅਪਦਾਨਂ
੨੨. ‘‘ਹਿਮਵਨ੍ਤਸ੍ਸਾਵਿਦੂਰੇ, ਮਹਾਜਾਤਸ੍ਸਰੋ ਅਹੁ;
ਸਤਪਤ੍ਤੇਹਿ ਸਞ੍ਛਨ੍ਨੋ, ਨਾਨਾਸਕੁਣਮਾਲਯੋ.
੨੩. ‘‘ਤਮ੍ਹਿ ਨ੍ਹਤ੍ਵਾ ਚ ਪਿਤ੍ਵਾ [ਪੀਤ੍ਵਾ (ਸੀ. ਸ੍ਯਾ.)] ਚ, ਅਵਿਦੂਰੇ ਵਸਾਮਹਂ;
ਅਦ੍ਦਸਂ ਸਮਣਾਨਗ੍ਗਂ, ਗਚ੍ਛਨ੍ਤਂ ਅਨਿਲਞ੍ਜਸੇ.
੨੪. ‘‘ਮਮ ਸਙ੍ਕਪ੍ਪਮਞ੍ਞਾਯ, ਸਤ੍ਥਾ ਲੋਕੇ ਅਨੁਤ੍ਤਰੋ;
ਅਬ੍ਭਤੋ ਓਰੁਹਿਤ੍ਵਾਨ, ਭੂਮਿਯਂਠਾਸਿ ਤਾਵਦੇ.
੨੫. ‘‘ਵਿਸਾਣੇਨ [ਲਾਯਨੇਨ (ਸ੍ਯਾ.)] ਤਿਣਂ ਗਯ੍ਹ, ਨਿਸੀਦਨਮਦਾਸਹਂ;
ਨਿਸੀਦਿ ਭਗਵਾ ਤਤ੍ਥ, ਤਿਸ੍ਸੋ ਲੋਕਗ੍ਗਨਾਯਕੋ.
੨੬. ‘‘ਸਕਂ ਚਿਤ੍ਤਂ ਪਸਾਦੇਤ੍ਵਾ, ਅਵਨ੍ਦਿ ਲੋਕਨਾਯਕਂ;
ਪਟਿਕੁਟਿਕੋ [ਉਕ੍ਕੁਟਿਕੋ (ਸ੍ਯਾ. ਕ.)] ਅਪਸਕ੍ਕਿਂ, ਨਿਜ੍ਝਾਯਨ੍ਤੋ ਮਹਾਮੁਨਿਂ.
੨੭. ‘‘ਤੇਨ ਚਿਤ੍ਤਪ੍ਪਸਾਦੇਨ, ਨਿਮ੍ਮਾਨਂ ਉਪਪਜ੍ਜਹਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਸਨ੍ਥਰਸ੍ਸ ਇਦਂ ਫਲਂ.
੨੮. ‘‘ਇਤੋ ਦੁਤਿਯਕੇ ਕਪ੍ਪੇ, ਮਿਗ [ਮਿਤ੍ਤ (ਸ੍ਯਾ.)] ਸਮ੍ਮਤਖਤ੍ਤਿਯੋ;
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੨੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਤਿਣਸਨ੍ਥਰਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਤਿਣਸਨ੍ਥਰਦਾਯਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.
੭. ਸੂਚਿਦਾਯਕਤ੍ਥੇਰਅਪਦਾਨਂ
੩੦. ‘‘ਤਿਂਸਕਪ੍ਪਸਹਸ੍ਸਮ੍ਹਿ, ਸਮ੍ਬੁਦ੍ਧੋ ਲੋਕਨਾਯਕੋ;
ਸੁਮੇਧੋ ਨਾਮ ਨਾਮੇਨ, ਬਾਤ੍ਤਿਂਸਵਰਲਕ੍ਖਣੋ.
੩੧. ‘‘ਤਸ੍ਸ ਕਞ੍ਚਨਵਣ੍ਣਸ੍ਸ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ;
ਪਞ੍ਚ ਸੂਚੀ ਮਯਾ ਦਿਨ੍ਨਾ, ਸਿਬ੍ਬਨਤ੍ਥਾਯ ਚੀਵਰਂ.
੩੨. ‘‘ਤੇਨੇਵ ਸੂਚਿਦਾਨੇਨ, ਨਿਪੁਣਤ੍ਥਵਿਪਸ੍ਸਕਂ;
ਤਿਕ੍ਖਂ ਲਹੁਞ੍ਚ ਫਾਸੁਞ੍ਚ, ਞਾਣਂ ਮੇ ਉਦਪਜ੍ਜਥ.
੩੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;
ਧਾਰੇਮਿ ਅਨ੍ਤਿਮਂ ਦੇਹਂ, ਸਮ੍ਮਾਸਮ੍ਬੁਦ੍ਧਸਾਸਨੇ.
੩੪. ‘‘ਦ੍ਵਿਪਦਾਧਿਪਤੀ ਨਾਮ, ਰਾਜਾਨੋ ਚਤੁਰੋ ਅਹੁਂ;
ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.
੩੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸੂਚਿਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਸੂਚਿਦਾਯਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.
੮. ਪਾਟਲਿਪੁਪ੍ਫਿਯਤ੍ਥੇਰਅਪਦਾਨਂ
੩੬. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਗਚ੍ਛਨ੍ਤਂ ਅਨ੍ਤਰਾਪਣੇ;
ਕਞ੍ਚਨਗ੍ਘਿਯਸਙ੍ਕਾਸਂ, ਬਾਤ੍ਤਿਂਸਵਰਲਕ੍ਖਣਂ.
੩੭. ‘‘ਸੇਟ੍ਠਿਪੁਤ੍ਤੋ ਤਦਾ ਆਸਿਂ, ਸੁਖੁਮਾਲੋ ਸੁਖੇਧਿਤੋ;
ਉਚ੍ਛਙ੍ਗੇ ਪਾਟਲਿਪੁਪ੍ਫਂ, ਕਤ੍ਵਾਨ [ਕਤ੍ਵਾ ਤਂ (ਸੀ. ਸ੍ਯਾ.)] ਅਭਿਸਂਹਰਿਂ.
੩੮. ‘‘ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਪੁਪ੍ਫੇਹਿ ਅਭਿਪੂਜਯਿਂ;
ਤਿਸ੍ਸਂ ਲੋਕਵਿਦੁਂ ਨਾਥਂ, ਨਰਦੇਵਂ ਨਮਸ੍ਸਹਂ.
੩੯. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਪੂਜਾਯਿਦਂ ਫਲਂ.
੪੦. ‘‘ਇਤੋ ਤੇਸਟ੍ਠਿਕਪ੍ਪਮ੍ਹਿ, ਅਭਿਸਮ੍ਮਤਨਾਮਕੋ;
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੪੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਪਾਟਲਿਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਪਾਟਲਿਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.
੯. ਠਿਤਞ੍ਜਲਿਯਤ੍ਥੇਰਅਪਦਾਨਂ
੪੨. ‘‘ਮਿਗਲੁਦ੍ਦੋ ਪੁਰੇ ਆਸਿਂ, ਅਰਞ੍ਞੇ ਕਾਨਨੇ ਅਹਂ;
ਤਤ੍ਥ ਅਦ੍ਦਸਂ [ਤਤ੍ਥਦ੍ਦਸਾਸਿਂ (ਸੀ. ਸ੍ਯਾ.)] ਸਮ੍ਬੁਦ੍ਧਂ, ਬਾਤ੍ਤਿਂਸਵਰਲਕ੍ਖਣਂ.
੪੩. ‘‘ਤਤ੍ਥਾਹਂ ਅਞ੍ਜਲਿਂ ਕਤ੍ਵਾ, ਪਕ੍ਕਾਮਿਂ ਪਾਚਿਨਾਮੁਖੋ;
ਅਵਿਦੂਰੇ ਨਿਸਿਨ੍ਨਸ੍ਸ, ਨਿਯਕੇ ਪਣ੍ਣਸਨ੍ਥਰੇ.
੪੪. ‘‘ਤਤੋ ਮੇ ਅਸਨੀਪਾਤੋ, ਮਤ੍ਥਕੇ ਨਿਪਤੀ ਤਦਾ;
ਸੋਹਂ ਮਰਣਕਾਲਮ੍ਹਿ, ਅਕਾਸਿਂ ਪੁਨਰਞ੍ਜਲਿਂ.
੪੫. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਅਞ੍ਜਲਿਂ ਅਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਅਞ੍ਜਲਿਸ੍ਸ ਇਦਂ ਫਲਂ.
੪੬. ‘‘ਚਤੁਪਣ੍ਣਾਸਕਪ੍ਪਮ੍ਹਿ, ਮਿਗਕੇਤੁਸਨਾਮਕੋ;
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੪੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਠਿਤਞ੍ਜਲਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਠਿਤਞ੍ਜਲਿਯਤ੍ਥੇਰਸ੍ਸਾਪਦਾਨਂ ਨਵਮਂ.
੧੦. ਤਿਪਦੁਮਿਯਤ੍ਥੇਰਅਪਦਾਨਂ
੪੮. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;
ਦਨ੍ਤੋ ਦਨ੍ਤਪਰਿਵੁਤੋ, ਨਗਰਾ ਨਿਕ੍ਖਮੀ ਤਦਾ.
੪੯. ‘‘ਨਗਰੇ ਹਂਸਵਤਿਯਂ, ਅਹੋਸਿਂ ਮਾਲਿਕੋ ਤਦਾ;
ਯਂ ਤਤ੍ਥ ਉਤ੍ਤਮਂ ਤੋਣਿ, ਪਦ੍ਮਪੁਪ੍ਫਾਨਿ [ਉਤ੍ਤਮਂ ਪੁਪ੍ਫਂ, ਤੀਣਿ ਪੁਪ੍ਫਾਨਿ (ਸੀ.)] ਅਗ੍ਗਹਿਂ.
੫੦. ‘‘ਅਦ੍ਦਸਂ ਵਿਰਜਂ ਬੁਦ੍ਧਂ, ਪਟਿਮਗ੍ਗਨ੍ਤਰਾਪਣੇ;
ਸਹ [ਸੋਹਂ (ਸੀ.)] ਦਿਸ੍ਵਾਨ ਸਮ੍ਬੁਦ੍ਧਂ, ਏਵਂ ਚਿਨ੍ਤੇਸਹਂ ਤਦਾ.
੫੧. ‘‘ਕਿਂ ਮੇ ਇਮੇਹਿ ਪੁਪ੍ਫੇਹਿ, ਰਞ੍ਞੋ ਉਪਨਿਤੇਹਿ ਮੇ;
ਗਾਮਂ ਵਾ ਗਾਮਖੇਤ੍ਤਂ ਵਾ, ਸਹਸ੍ਸਂ ਵਾ ਲਭੇਯ੍ਯਹਂ.
੫੨. ‘‘ਅਦਨ੍ਤਦਮਨਂ ਵੀਰਂ, ਸਬ੍ਬਸਤ੍ਤਸੁਖਾਵਹਂ;
ਲੋਕਨਾਥਂ ਪੂਜਯਿਤ੍ਵਾ, ਲਚ੍ਛਾਮਿ ਅਮਤਂ ਧਨਂ.
੫੩. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਸਕਂ ਚਿਤ੍ਤਂ ਪਸਾਦਯਿਂ;
ਤੀਣਿ ਲੋਹਿਤਕੇ ਗਯ੍ਹ, ਆਕਾਸੇ ਉਕ੍ਖਿਪਿਂ ਤਦਾ.
੫੪. ‘‘ਮਯਾ ਉਕ੍ਖਿਤ੍ਤਮਤ੍ਤਮ੍ਹਿ, ਆਕਾਸੇ ਪਤ੍ਥਰਿਂਸੁ ਤੇ;
ਧਾਰਿਂਸੁ ਮਤ੍ਥਕੇ ਤਤ੍ਥ, ਉਦ੍ਧਂਵਣ੍ਟਾ ਅਧੋਮੁਖਾ.
੫੫. ‘‘ਯੇ ਕੇਚਿ ਮਨੁਜਾ ਦਿਸ੍ਵਾ, ਉਕ੍ਕੁਟ੍ਠਿਂ ਸਮ੍ਪਵਤ੍ਤਯੁਂ;
ਦੇਵਤਾ ਅਨ੍ਤਲਿਕ੍ਖਮ੍ਹਿ, ਸਾਧੁਕਾਰਂ ਪਵਤ੍ਤਯੁਂ.
੫੬. ‘‘ਅਚ੍ਛੇਰਂ ਲੋਕੇ ਉਪ੍ਪਨ੍ਨਂ, ਬੁਦ੍ਧਸੇਟ੍ਠਸ੍ਸ ਵਾਹਸਾ;
ਸਬ੍ਬੇ ਧਮ੍ਮਂ ਸੁਣਿਸ੍ਸਾਮ, ਪੁਪ੍ਫਾਨਂ ਵਾਹਸਾ ਮਯਂ.
੫੭. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;
ਵੀਥਿਯਞ੍ਹਿ ਠਿਤੋ ਸਨ੍ਤੋ, ਇਮਾ ਗਾਥਾ ਅਭਾਸਥ.
੫੮. ‘‘‘ਯੋ ਸੋ ਬੁਦ੍ਧਂ ਅਪੂਜੇਸਿ, ਰਤ੍ਤਪਦ੍ਮੇਹਿ [ਰਤ੍ਤਪਦੁਮੇਹਿ (ਸੀ. ਸ੍ਯਾ.)] ਮਾਣਵੋ;
ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.
੫੯. ‘‘‘ਤਿਂਸਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਤਿ;
ਤਿਂਸਕਪ੍ਪਾਨਿ [ਤਿਂਸਕ੍ਖਤ੍ਤੁਞ੍ਚ (ਸ੍ਯਾ.)] ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ.
੬੦. ‘‘‘ਮਹਾਵਿਤ੍ਥਾਰਿਕਂ ਨਾਮ, ਬ੍ਯਮ੍ਹਂ ਹੇਸ੍ਸਤਿ ਤਾਵਦੇ;
ਤਿਯੋਜਨਸਤੁਬ੍ਬਿਦ੍ਧਂ, ਦਿਯਡ੍ਢਸਤਵਿਤ੍ਥਤਂ.
੬੧. ‘‘‘ਚਤ੍ਤਾਰਿਸਤਸਹਸ੍ਸਾਨਿ, ਨਿਯ੍ਯੂਹਾ ਚ ਸੁਮਾਪਿਤਾ;
ਕੂਟਾਗਾਰਵਰੂਪੇਤਾ, ਮਹਾਸਯਨਮਣ੍ਡਿਤਾ.
੬੨. ‘‘‘ਕੋਟਿਸਤਸਹਸ੍ਸਿਯੋ, ਪਰਿਵਾਰੇਸ੍ਸਨ੍ਤਿ ਅਚ੍ਛਰਾ;
ਕੁਸਲਾ ਨਚ੍ਚਗੀਤਸ੍ਸ, ਵਾਦਿਤੇਪਿ ਪਦਕ੍ਖਿਣਾ.
੬੩. ‘‘‘ਏਤਾਦਿਸੇ ਬ੍ਯਮ੍ਹਵਰੇ, ਨਾਰੀਗਣਸਮਾਕੁਲੇ;
ਵਸ੍ਸਿਸ੍ਸਤਿ ਪੁਪ੍ਫਵਸ੍ਸੋ, ਦਿਬ੍ਬੋ [ਪਦ (ਕ.)] ਲੋਹਿਤਕੋ ਸਦਾ.
੬੪. ‘‘‘ਭਿਤ੍ਤਿਖੀਲੇ ਨਾਗਦਨ੍ਤੇ, ਦ੍ਵਾਰਬਾਹਾਯ ਤੋਰਣੇ;
ਚਕ੍ਕਮਤ੍ਤਾ ਲੋਹਿਤਕਾ, ਓਲਮ੍ਬਿਸ੍ਸਨ੍ਤਿ ਤਾਵਦੇ.