੬. ਸੁਚਿਨ੍ਤਿਤਤ੍ਥੇਰਅਪਦਾਨਂ

੩੬. ‘‘ਗਿਰਿਦੁਗ੍ਗਚਰੋ ਆਸਿਂ, ਅਭਿਜਾਤੋਵ ਕੇਸਰੀ;

ਮਿਗਸਙ੍ਘਂ ਵਧਿਤ੍ਵਾਨ, ਜੀਵਾਮਿ ਪਬ੍ਬਤਨ੍ਤਰੇ.

੩੭. ‘‘ਅਤ੍ਥਦਸ੍ਸੀ ਤੁ ਭਗਵਾ, ਸਬ੍ਬਞ੍ਞੂ ਵਦਤਂ ਵਰੋ;

ਮਮੁਦ੍ਧਰਿਤੁਕਾਮੋ ਸੋ, ਆਗਚ੍ਛਿ ਪਬ੍ਬਤੁਤ੍ਤਮਂ.

੩੮. ‘‘ਪਸਦਞ੍ਚ ਮਿਗਂ ਹਨ੍ਤ੍ਵਾ, ਭਕ੍ਖਿਤੁਂ ਸਮੁਪਾਗਮਿਂ;

ਭਗਵਾ ਤਮ੍ਹਿ ਸਮਯੇ, ਭਿਕ੍ਖਮਾਨੋ [ਸਿਕ੍ਖਾਚਾਰੋ (ਸ੍ਯਾ.)] ਉਪਾਗਮਿ.

੩੯. ‘‘ਵਰਮਂਸਾਨਿ ਪਗ੍ਗਯ੍ਹ, ਅਦਾਸਿਂ ਤਸ੍ਸ ਸਤ੍ਥੁਨੋ;

ਅਨੁਮੋਦਿ ਮਹਾਵੀਰੋ, ਨਿਬ੍ਬਾਪੇਨ੍ਤੋ ਮਮਂ ਤਦਾ.

੪੦. ‘‘ਤੇਨ ਚਿਤ੍ਤਪ੍ਪਸਾਦੇਨ, ਗਿਰਿਦੁਗ੍ਗਂ ਪਵਿਸਿਂ ਅਹਂ;

ਪੀਤਿਂ ਉਪ੍ਪਾਦਯਿਤ੍ਵਾਨ, ਤਤ੍ਥ ਕਾਲਙ੍ਕਤੋ ਅਹਂ.

੪੧. ‘‘ਏਤੇਨ ਮਂਸਦਾਨੇਨ, ਚਿਤ੍ਤਸ੍ਸ ਪਣਿਧੀਹਿ ਚ;

ਪਨ੍ਨਰਸੇ ਕਪ੍ਪਸਤੇ, ਦੇਵਲੋਕੇ ਰਮਿਂ ਅਹਂ.

੪੨. ‘‘ਅਵਸੇਸੇਸੁ ਕਪ੍ਪੇਸੁ, ਕੁਸਲਂ ਚਿਨ੍ਤਿਤਂ [ਨਿਚਿਤਂ (ਸੀ.), ਕਰਿਤਂ (ਸ੍ਯਾ.)] ਮਯਾ;

ਤੇਨੇਵ ਮਂਸਦਾਨੇਨ, ਬੁਦ੍ਧਾਨੁਸ੍ਸਰਣੇਨ ਚ.

੪੩. ‘‘ਅਟ੍ਠਤ੍ਤਿਂਸਮ੍ਹਿ ਕਪ੍ਪਮ੍ਹਿ, ਅਟ੍ਠ ਦੀਘਾਯੁਨਾਮਕਾ;

ਸਟ੍ਠਿਮ੍ਹਿਤੋ ਕਪ੍ਪਸਤੇ, ਦੁਵੇ ਵਰੁਣਨਾਮਕਾ [ਸਰਣਨਾਮਕਾ (ਸ੍ਯਾ.)].

੪੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਚਿਨ੍ਤਿਤੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਚਿਨ੍ਤਿਤਤ੍ਥੇਰਸ੍ਸਾਪਦਾਨਂ ਛਟ੍ਠਂ.