੭. ਵਤ੍ਥਦਾਯਕਤ੍ਥੇਰਅਪਦਾਨਂ

੪੫. ‘‘ਪਕ੍ਖਿਜਾਤੋ ਤਦਾ ਆਸਿਂ, ਸੁਪਣ੍ਣੋ ਗਰੁਲ਼ਾਧਿਪੋ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਗਚ੍ਛਨ੍ਤਂ ਗਨ੍ਧਮਾਦਨਂ.

੪੬. ‘‘ਜਹਿਤ੍ਵਾ ਗਰੁਲ਼ਵਣ੍ਣਂ, ਮਾਣਵਕਂ ਅਧਾਰਯਿਂ;

ਏਕਂ ਵਤ੍ਥਂ ਮਯਾ ਦਿਨ੍ਨਂ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ.

੪੭. ‘‘ਤਞ੍ਚ ਦੁਸ੍ਸਂ ਪਟਿਗ੍ਗਯ੍ਹ, ਬੁਦ੍ਧੋ ਲੋਕਗ੍ਗਨਾਯਕੋ;

ਅਨ੍ਤਲਿਕ੍ਖੇ ਠਿਤੋ ਸਤ੍ਥਾ, ਇਮਾ ਗਾਥਾ ਅਭਾਸਥ.

੪੮. ‘‘‘ਇਮਿਨਾ ਵਤ੍ਥਦਾਨੇਨ, ਚਿਤ੍ਤਸ੍ਸ ਪਣਿਧੀਹਿ ਚ;

ਪਹਾਯ ਗਰੁਲ਼ਂ ਯੋਨਿਂ, ਦੇਵਲੋਕੇ ਰਮਿਸ੍ਸਤਿ’.

੪੯. ‘‘ਅਤ੍ਥਦਸ੍ਸੀ ਤੁ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਵਤ੍ਥਦਾਨਂ ਪਸਂਸਿਤ੍ਵਾ, ਪਕ੍ਕਾਮਿ ਉਤ੍ਤਰਾਮੁਖੋ.

੫੦. ‘‘ਭਵੇ ਨਿਬ੍ਬਤ੍ਤਮਾਨਮ੍ਹਿ, ਹੋਨ੍ਤਿ ਮੇ ਵਤ੍ਥਸਮ੍ਪਦਾ;

ਆਕਾਸੇ ਛਦਨਂ ਹੋਤਿ, ਵਤ੍ਥਦਾਨਸ੍ਸਿਦਂ ਫਲਂ.

੫੧. ‘‘ਅਰੁਣਵਾ [ਅਰੁਣਕਾ (ਸੀ.), ਅਰੁਣਸਾ (ਸ੍ਯਾ.)] ਸਤ੍ਤ ਜਨਾ, ਚਕ੍ਕਵਤ੍ਤੀ ਮਹਬ੍ਬਲਾ;

ਛਤ੍ਤਿਂਸਤਿਮ੍ਹਿ ਆਸਿਂਸੁ, ਕਪ੍ਪਮ੍ਹਿ ਮਨੁਜਾਧਿਪਾ.

੫੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਵਤ੍ਥਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਵਤ੍ਥਦਾਯਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.