੭. ਸਕਚਿਨ੍ਤਨਿਯਵਗ੍ਗੋ

੧. ਸਕਚਿਨ੍ਤਨਿਯਤ੍ਥੇਰਅਪਦਾਨਂ

੧. ‘‘ਪਵਨਂ ਕਾਨਨਂ ਦਿਸ੍ਵਾ, ਅਪ੍ਪਸਦ੍ਦਮਨ੍ਨਾਵਿਲਂ;

ਇਸੀਨਂ ਅਨੁਚਿਣ੍ਣਂਵ, ਆਹੁਤੀਨਂ ਪਟਿਗ੍ਗਹਂ.

੨. ‘‘ਥੂਪਂ ਕਤ੍ਵਾਨ ਪੁਲਿਨਂ [ਵੇਲ਼ੁਨਾ (ਅਟ੍ਠ.), ਵੇਲ਼ਿਨਂ (ਸ੍ਯਾ.)], ਨਾਨਾਪੁਪ੍ਫਂ ਸਮੋਕਿਰਿਂ;

ਸਮ੍ਮੁਖਾ ਵਿਯ ਸਮ੍ਬੁਦ੍ਧਂ, ਨਿਮ੍ਮਿਤਂ ਅਭਿਵਨ੍ਦਹਂ.

੩. ‘‘ਸਤ੍ਤਰਤਨਸਮ੍ਪਨ੍ਨੋ, ਰਾਜਾ ਰਟ੍ਠਮ੍ਹਿ ਇਸ੍ਸਰੋ;

ਸਕਕਮ੍ਮਾਭਿਰਦ੍ਧੋਹਂ, ਪੁਪ੍ਫਪੂਜਾਯਿਦਂ [ਥੂਪਪੂਜਾਯਿਦਂ (ਸੀ.)] ਫਲਂ.

੪. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਪੂਜਾਯਿਦਂ [ਥੂਪਪੂਜਾਯਿਦਂ (ਸੀ.)] ਫਲਂ.

੫. ‘‘ਅਸੀਤਿਕਪ੍ਪੇਨਨ੍ਤਯਸੋ, ਚਕ੍ਕਵਤ੍ਤੀ ਅਹੋਸਹਂ;

ਸਤ੍ਤਰਤਨਸਮ੍ਪਨ੍ਨੋ, ਚਤੁਦੀਪਮ੍ਹਿ ਇਸ੍ਸਰੋ.

੬. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਕਚਿਨ੍ਤਨਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਕਚਿਨ੍ਤਨਿਯਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਅਵੋਪੁਪ੍ਫਿਯਤ੍ਥੇਰਅਪਦਾਨਂ

੭. ‘‘ਵਿਹਾਰਾ ਅਭਿਨਿਕ੍ਖਮ੍ਮ, ਅਬ੍ਭੁਟ੍ਠਹਿਯ [ਅਬ੍ਭੁਟ੍ਠਾਸਿ ਚ (ਸ੍ਯਾ. ਕ.)] ਚਙ੍ਕਮੇ;

ਚਤੁਸਚ੍ਚਂ ਪਕਾਸਨ੍ਤੋ, ਦੇਸੇਤਿ [ਦੇਸੇਨ੍ਤੋ (ਸ੍ਯਾ. ਕ.)] ਅਮਤਂ ਪਦਂ.

੮. ‘‘ਸਿਖਿਸ੍ਸ ਗਿਰਮਞ੍ਞਾਯ, ਬੁਦ੍ਧਸੇਟ੍ਠਸ੍ਸ ਤਾਦਿਨੋ;

ਨਾਨਾਪੁਪ੍ਫਂ ਗਹੇਤ੍ਵਾਨ, ਆਕਾਸਮ੍ਹਿ ਸਮੋਕਿਰਿਂ.

੯. ‘‘ਤੇਨ ਕਮ੍ਮੇਨ ਦ੍ਵਿਪਦਿਨ੍ਦ, ਲੋਕਜੇਟ੍ਠ ਨਰਾਸਭ;

ਪਤ੍ਤੋਮ੍ਹਿ ਅਚਲਂ ਠਾਨਂ, ਹਿਤ੍ਵਾ ਜਯਪਰਾਜਯਂ.

੧੦. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਪੂਜਾਯਿਦਂ ਫਲਂ.

੧੧. ‘‘ਇਤੋ ਵੀਸਤਿਕਪ੍ਪਮ੍ਹਿ, ਸੁਮੇਧੋ ਨਾਮ ਖਤ੍ਤਿਯੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੧੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਵੋਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਵੋਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਪਚ੍ਚਾਗਮਨਿਯਤ੍ਥੇਰਅਪਦਾਨਂ

੧੩. ‘‘ਸਿਨ੍ਧੁਯਾ ਨਦਿਯਾ ਤੀਰੇ, ਚਕ੍ਕਵਾਕੋ ਅਹਂ ਤਦਾ;

ਸੁਦ੍ਧਸੇਵਾਲਭਕ੍ਖੋਹਂ, ਪਾਪੇਸੁ ਚ ਸੁਸਞ੍ਞਤੋ.

੧੪. ‘‘ਅਦ੍ਦਸਂ ਵਿਰਜਂ ਬੁਦ੍ਧਂ, ਗਚ੍ਛਨ੍ਤਂ ਅਨਿਲਞ੍ਜਸੇ;

ਤੁਣ੍ਡੇਨ ਸਾਲਂ ਪਗ੍ਗਯ੍ਹ, ਵਿਪਸ੍ਸਿਸ੍ਸਾਭਿਰੋਪਯਿਂ.

੧੫. ‘‘ਯਸ੍ਸ ਸਦ੍ਧਾ ਤਥਾਗਤੇ, ਅਚਲਾ ਸੁਪਤਿਟ੍ਠਿਤਾ;

ਤੇਨ ਚਿਤ੍ਤਪ੍ਪਸਾਦੇਨ, ਦੁਗ੍ਗਤਿਂ ਸੋ ਨ ਗਚ੍ਛਤਿ.

੧੬. ‘‘ਸ੍ਵਾਗਤਂ ਵਤ ਮੇ ਆਸਿ, ਬੁਦ੍ਧਸੇਟ੍ਠਸ੍ਸ ਸਨ੍ਤਿਕੇ;

ਵਿਹਙ੍ਗਮੇਨ ਸਨ੍ਤੇਨ, ਸੁਬੀਜਂ ਰੋਪਿਤਂ ਮਯਾ.

੧੭. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ [ਪੁਪ੍ਫਪੂਜਾਯਿਦਂ (ਸੀ.)] ਫਲਂ.

੧੮. ‘‘ਸੁਚਾਰੁਦਸ੍ਸਨਾ ਨਾਮ, ਅਟ੍ਠੇਤੇ ਏਕਨਾਮਕਾ;

ਕਪ੍ਪੇ ਸਤ੍ਤਰਸੇ ਆਸੁਂ, ਚਕ੍ਕਵਤ੍ਤੀ ਮਹਬ੍ਬਲਾ.

੧੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਚ੍ਚਾਗਮਨਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਚ੍ਚਾਗਮਨਿਯਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਪਰਪ੍ਪਸਾਦਕਤ੍ਥੇਰਅਪਦਾਨਂ

੨੦. ‘‘ਉਸਭਂ ਪਵਰਂ ਵੀਰਂ, ਮਹੇਸਿਂ ਵਿਜਿਤਾਵਿਨਂ;

ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਕੋ ਦਿਸ੍ਵਾ ਨਪ੍ਪਸੀਦਤਿ.

੨੧. ‘‘ਹਿਮਵਾਵਾਪਰਿਮੇਯ੍ਯੋ, ਸਾਗਰੋਵ ਦੁਰੁਤ੍ਤਰੋ;

ਤਥੇਵ ਝਾਨਂ ਬੁਦ੍ਧਸ੍ਸ, ਕੋ ਦਿਸ੍ਵਾ ਨਪ੍ਪਸੀਦਤਿ.

੨੨. ‘‘ਵਸੁਧਾ ਯਥਾਪ੍ਪਮੇਯ੍ਯਾ, ਚਿਤ੍ਤਾ ਵਨਵਟਂਸਕਾ;

ਤਥੇਵ ਸੀਲਂ ਬੁਦ੍ਧਸ੍ਸ, ਕੋ ਦਿਸ੍ਵਾ ਨਪ੍ਪਸੀਦਤਿ.

੨੩. ‘‘ਅਨਿਲਞ੍ਜਸਾਸਙ੍ਖੁਬ੍ਭੋ [ਅਨਿਲਜੋਵ ਅਸਙ੍ਖੋਭੋ (ਸੀ.)], ਯਥਾਕਾਸੋ ਅਸਙ੍ਖਿਯੋ;

ਤਥੇਵ ਞਾਣਂ ਬੁਦ੍ਧਸ੍ਸ, ਕੋ ਦਿਸ੍ਵਾ ਨਪ੍ਪਸੀਦਤਿ.

੨੪. ‘‘ਇਮਾਹਿ ਚਤੁਗਾਥਾਹਿ, ਬ੍ਰਾਹ੍ਮਣੋ ਸੇਨਸਵ੍ਹਯੋ;

ਬੁਦ੍ਧਸੇਟ੍ਠਂ ਥਵਿਤ੍ਵਾਨ, ਸਿਦ੍ਧਤ੍ਥਂ ਅਪਰਾਜਿਤਂ.

੨੫. ‘‘ਚਤੁਨ੍ਨਵੁਤਿਕਪ੍ਪਾਨਿ, ਦੁਗ੍ਗਤਿਂ ਨੁਪਪਜ੍ਜਥ;

ਸੁਗਤਿਂ ਸੁਖਸਮ੍ਪਤ੍ਤਿਂ [ਸੁਗਤੀਸੁ ਸੁਸੁਮ੍ਪਤ੍ਤਿਂ (ਸੀ. ਸ੍ਯਾ.)], ਅਨੁਭੋਸਿਮਨਪ੍ਪਕਂ.

੨੬. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਥਵਿਤ੍ਵਾ ਲੋਕਨਾਯਕਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਥੋਮਨਾਯ [ਥੋਮਨਸ੍ਸ (ਸ੍ਯਾ.)] ਇਦਂ ਫਲਂ.

੨੭. ‘‘ਚਾਤੁਦ੍ਦਸਮ੍ਹਿ ਕਪ੍ਪਮ੍ਹਿ, ਚਤੁਰੋ ਆਸੁਮੁਗ੍ਗਤਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੨੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਰਪ੍ਪਸਾਦਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਰਪ੍ਪਸਾਦਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਭਿਸਦਾਯਕਤ੍ਥੇਰਅਪਦਾਨਂ

੨੯. ‘‘ਵੇਸ੍ਸਭੂ ਨਾਮ ਨਾਮੇਨ, ਇਸੀਨਂ ਤਤਿਯੋ ਅਹੁ;

ਕਾਨਨਂ ਵਨਮੋਗਯ੍ਹ, ਵਿਹਾਸਿ ਪੁਰਿਸੁਤ੍ਤਮੋ.

੩੦. ‘‘ਭਿਸਮੁਲ਼ਾਲਂ ਗਣ੍ਹਿਤ੍ਵਾ, ਅਗਮਂ ਬੁਦ੍ਧਸਨ੍ਤਿਕਂ;

ਤਞ੍ਚ ਬੁਦ੍ਧਸ੍ਸ ਪਾਦਾਸਿਂ, ਪਸਨ੍ਨੋ ਸੇਹਿ ਪਾਣਿਭਿ.

੩੧. ‘‘ਕਰੇਨ ਚ ਪਰਾਮਟ੍ਠੋ, ਵੇਸ੍ਸਭੂਵਰਬੁਦ੍ਧਿਨਾ;

ਸੁਖਾਹਂ ਨਾਭਿਜਾਨਾਮਿ, ਸਮਂ ਤੇਨ ਕੁਤੋਤ੍ਤਰਿਂ.

੩੨. ‘‘ਚਰਿਮੋ ਵਤ੍ਤਤੇ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਹਤ੍ਥਿਨਾਗੇਨ ਸਨ੍ਤੇਨ, ਕੁਸਲਂ ਰੋਪਿਤਂ ਮਯਾ [ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ (ਸ੍ਯਾ.)].

੩੩. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਭਿਸਦਾਨਸ੍ਸਿਦਂ ਫਲਂ.

੩੪. ‘‘ਸਮੋਧਾਨਾ ਚ ਰਾਜਾਨੋ, ਸੋਲ਼ਸ ਮਨੁਜਾਧਿਪਾ;

ਕਪ੍ਪਮ੍ਹਿ ਚੁਦ੍ਦਸੇ [ਤੇਰਸੇ (ਸੀ. ਸ੍ਯਾ.)] ਆਸੁਂ, ਚਕ੍ਕਵਤ੍ਤੀ ਮਹਬ੍ਬਲਾ.

੩੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਭਿਸਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਭਿਸਦਾਯਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਸੁਚਿਨ੍ਤਿਤਤ੍ਥੇਰਅਪਦਾਨਂ

੩੬. ‘‘ਗਿਰਿਦੁਗ੍ਗਚਰੋ ਆਸਿਂ, ਅਭਿਜਾਤੋਵ ਕੇਸਰੀ;

ਮਿਗਸਙ੍ਘਂ ਵਧਿਤ੍ਵਾਨ, ਜੀਵਾਮਿ ਪਬ੍ਬਤਨ੍ਤਰੇ.

੩੭. ‘‘ਅਤ੍ਥਦਸ੍ਸੀ ਤੁ ਭਗਵਾ, ਸਬ੍ਬਞ੍ਞੂ ਵਦਤਂ ਵਰੋ;

ਮਮੁਦ੍ਧਰਿਤੁਕਾਮੋ ਸੋ, ਆਗਚ੍ਛਿ ਪਬ੍ਬਤੁਤ੍ਤਮਂ.

੩੮. ‘‘ਪਸਦਞ੍ਚ ਮਿਗਂ ਹਨ੍ਤ੍ਵਾ, ਭਕ੍ਖਿਤੁਂ ਸਮੁਪਾਗਮਿਂ;

ਭਗਵਾ ਤਮ੍ਹਿ ਸਮਯੇ, ਭਿਕ੍ਖਮਾਨੋ [ਸਿਕ੍ਖਾਚਾਰੋ (ਸ੍ਯਾ.)] ਉਪਾਗਮਿ.

੩੯. ‘‘ਵਰਮਂਸਾਨਿ ਪਗ੍ਗਯ੍ਹ, ਅਦਾਸਿਂ ਤਸ੍ਸ ਸਤ੍ਥੁਨੋ;

ਅਨੁਮੋਦਿ ਮਹਾਵੀਰੋ, ਨਿਬ੍ਬਾਪੇਨ੍ਤੋ ਮਮਂ ਤਦਾ.

੪੦. ‘‘ਤੇਨ ਚਿਤ੍ਤਪ੍ਪਸਾਦੇਨ, ਗਿਰਿਦੁਗ੍ਗਂ ਪਵਿਸਿਂ ਅਹਂ;

ਪੀਤਿਂ ਉਪ੍ਪਾਦਯਿਤ੍ਵਾਨ, ਤਤ੍ਥ ਕਾਲਙ੍ਕਤੋ ਅਹਂ.

੪੧. ‘‘ਏਤੇਨ ਮਂਸਦਾਨੇਨ, ਚਿਤ੍ਤਸ੍ਸ ਪਣਿਧੀਹਿ ਚ;

ਪਨ੍ਨਰਸੇ ਕਪ੍ਪਸਤੇ, ਦੇਵਲੋਕੇ ਰਮਿਂ ਅਹਂ.

੪੨. ‘‘ਅਵਸੇਸੇਸੁ ਕਪ੍ਪੇਸੁ, ਕੁਸਲਂ ਚਿਨ੍ਤਿਤਂ [ਨਿਚਿਤਂ (ਸੀ.), ਕਰਿਤਂ (ਸ੍ਯਾ.)] ਮਯਾ;

ਤੇਨੇਵ ਮਂਸਦਾਨੇਨ, ਬੁਦ੍ਧਾਨੁਸ੍ਸਰਣੇਨ ਚ.

੪੩. ‘‘ਅਟ੍ਠਤ੍ਤਿਂਸਮ੍ਹਿ ਕਪ੍ਪਮ੍ਹਿ, ਅਟ੍ਠ ਦੀਘਾਯੁਨਾਮਕਾ;

ਸਟ੍ਠਿਮ੍ਹਿਤੋ ਕਪ੍ਪਸਤੇ, ਦੁਵੇ ਵਰੁਣਨਾਮਕਾ [ਸਰਣਨਾਮਕਾ (ਸ੍ਯਾ.)].

੪੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਚਿਨ੍ਤਿਤੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਚਿਨ੍ਤਿਤਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਵਤ੍ਥਦਾਯਕਤ੍ਥੇਰਅਪਦਾਨਂ

੪੫. ‘‘ਪਕ੍ਖਿਜਾਤੋ ਤਦਾ ਆਸਿਂ, ਸੁਪਣ੍ਣੋ ਗਰੁਲ਼ਾਧਿਪੋ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਗਚ੍ਛਨ੍ਤਂ ਗਨ੍ਧਮਾਦਨਂ.

੪੬. ‘‘ਜਹਿਤ੍ਵਾ ਗਰੁਲ਼ਵਣ੍ਣਂ, ਮਾਣਵਕਂ ਅਧਾਰਯਿਂ;

ਏਕਂ ਵਤ੍ਥਂ ਮਯਾ ਦਿਨ੍ਨਂ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ.

੪੭. ‘‘ਤਞ੍ਚ ਦੁਸ੍ਸਂ ਪਟਿਗ੍ਗਯ੍ਹ, ਬੁਦ੍ਧੋ ਲੋਕਗ੍ਗਨਾਯਕੋ;

ਅਨ੍ਤਲਿਕ੍ਖੇ ਠਿਤੋ ਸਤ੍ਥਾ, ਇਮਾ ਗਾਥਾ ਅਭਾਸਥ.

੪੮. ‘‘‘ਇਮਿਨਾ ਵਤ੍ਥਦਾਨੇਨ, ਚਿਤ੍ਤਸ੍ਸ ਪਣਿਧੀਹਿ ਚ;

ਪਹਾਯ ਗਰੁਲ਼ਂ ਯੋਨਿਂ, ਦੇਵਲੋਕੇ ਰਮਿਸ੍ਸਤਿ’.

੪੯. ‘‘ਅਤ੍ਥਦਸ੍ਸੀ ਤੁ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਵਤ੍ਥਦਾਨਂ ਪਸਂਸਿਤ੍ਵਾ, ਪਕ੍ਕਾਮਿ ਉਤ੍ਤਰਾਮੁਖੋ.

੫੦. ‘‘ਭਵੇ ਨਿਬ੍ਬਤ੍ਤਮਾਨਮ੍ਹਿ, ਹੋਨ੍ਤਿ ਮੇ ਵਤ੍ਥਸਮ੍ਪਦਾ;

ਆਕਾਸੇ ਛਦਨਂ ਹੋਤਿ, ਵਤ੍ਥਦਾਨਸ੍ਸਿਦਂ ਫਲਂ.

੫੧. ‘‘ਅਰੁਣਵਾ [ਅਰੁਣਕਾ (ਸੀ.), ਅਰੁਣਸਾ (ਸ੍ਯਾ.)] ਸਤ੍ਤ ਜਨਾ, ਚਕ੍ਕਵਤ੍ਤੀ ਮਹਬ੍ਬਲਾ;

ਛਤ੍ਤਿਂਸਤਿਮ੍ਹਿ ਆਸਿਂਸੁ, ਕਪ੍ਪਮ੍ਹਿ ਮਨੁਜਾਧਿਪਾ.

੫੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਵਤ੍ਥਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਵਤ੍ਥਦਾਯਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਅਮ੍ਬਦਾਯਕਤ੍ਥੇਰਅਪਦਾਨਂ

੫੩. ‘‘ਅਨੋਮਦਸ੍ਸੀ ਭਗਵਾ, ਨਿਸਿਨ੍ਨੋ ਪਬ੍ਬਤਨ੍ਤਰੇ;

ਮੇਤ੍ਤਾਯ ਅਫਰਿ ਲੋਕੇ, ਅਪ੍ਪਮਾਣੇ ਨਿਰੂਪਧਿ.

੫੪. ‘‘ਕਪਿ ਅਹਂ ਤਦਾ ਆਸਿਂ, ਹਿਮਵਨ੍ਤੇ ਨਗੁਤ੍ਤਮੇ;

ਦਿਸ੍ਵਾ ਅਨੋਮਦਸ੍ਸਿਂ ਤਂ [ਅਨੋਮਂ ਅਮਿਤਂ (ਸੀ.), ਅਨੋਮਮਧਿਤਂ (ਸ੍ਯਾ.)], ਬੁਦ੍ਧੇ ਚਿਤ੍ਤਂ ਪਸਾਦਯਿਂ.

੫੫. ‘‘ਅਵਿਦੂਰੇ ਹਿਮਵਨ੍ਤਸ੍ਸ, ਅਮ੍ਬਾਸੁਂ ਫਲਿਨੋ ਤਦਾ;

ਤਤੋ ਪਕ੍ਕਂ ਗਹੇਤ੍ਵਾਨ, ਅਮ੍ਬਂ ਸਮਧੁਕਂ ਅਦਂ.

੫੬. ‘‘ਤਂ ਮੇ ਬੁਦ੍ਧੋ ਵਿਯਾਕਾਸਿ, ਅਨੋਮਦਸ੍ਸੀ ਮਹਾਮੁਨਿ;

ਇਮਿਨਾ ਮਧੁਦਾਨੇਨ, ਅਮ੍ਬਦਾਨੇਨ ਚੂਭਯਂ.

੫੭. ‘‘ਸਤ੍ਤਪਞ੍ਞਾਸਕਪ੍ਪਮ੍ਹਿ, ਦੇਵਲੋਕੇ ਰਮਿਸ੍ਸਤਿ;

ਅਵਸੇਸੇਸੁ ਕਪ੍ਪੇਸੁ, ਵੋਕਿਣ੍ਣਂ ਸਂਸਰਿਸ੍ਸਤਿ.

੫੮. ‘‘ਖੇਪੇਤ੍ਵਾ ਪਾਪਕਂ ਕਮ੍ਮਂ, ਪਰਿਪਕ੍ਕਾਯ ਬੁਦ੍ਧਿਯਾ;

ਵਿਨਿਪਾਤਮਗਨ੍ਤ੍ਵਾਨ, ਕਿਲੇਸੇ ਝਾਪਯਿਸ੍ਸਤਿ.

੫੯. ‘‘ਦਮੇਨ ਉਤ੍ਤਮੇਨਾਹਂ, ਦਮਿਤੋਮ੍ਹਿ ਮਹੇਸਿਨਾ;

ਪਤ੍ਤੋਮ੍ਹਿ ਅਚਲਂ ਠਾਨਂ, ਹਿਤ੍ਵਾ ਜਯਪਰਾਜਯਂ.

੬੦. ‘‘ਸਤ੍ਤਸਤ੍ਤਤਿਕਪ੍ਪਸਤੇ, ਅਮ੍ਬਟ੍ਠਜਸਨਾਮਕਾ;

ਚਤੁਦ੍ਦਸ ਤੇ ਰਾਜਾਨੋ, ਚਕ੍ਕਵਤ੍ਤੀ ਮਹਬ੍ਬਲਾ.

੬੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਮ੍ਬਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਮ੍ਬਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਸੁਮਨਤ੍ਥੇਰਅਪਦਾਨਂ

੬੨. ‘‘ਸੁਮਨੋ ਨਾਮ ਨਾਮੇਨ, ਮਾਲਾਕਾਰੋ ਅਹਂ ਤਦਾ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਲੋਕਾਹੁਤਿਪਟਿਗ੍ਗਹਂ.

੬੩. ‘‘ਉਭੋ ਹਤ੍ਥੇਹਿ ਪਗ੍ਗਯ੍ਹ, ਸੁਮਨਂ ਪੁਪ੍ਫਮੁਤ੍ਤਮਂ;

ਬੁਦ੍ਧਸ੍ਸ ਅਭਿਰੋਪੇਸਿਂ, ਸਿਖਿਨੋ ਲੋਕਬਨ੍ਧੁਨੋ.

੬੪. ‘‘ਇਮਾਯ ਪੁਪ੍ਫਪੂਜਾਯ, ਚੇਤਨਾਪਣਿਧੀਹਿ ਚ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੬੫. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ [ਪੁਪ੍ਫਪੂਜਾਯਿਦਂ (ਸੀ.)] ਫਲਂ.

੬੬. ‘‘ਛਬ੍ਬੀਸਤਿਮ੍ਹਿ ਕਪ੍ਪਮ੍ਹਿ, ਚਤ੍ਤਾਰੋਸੁਂ ਮਹਾਯਸਾ;