੧੦. ਪੁਪ੍ਫਚਙ੍ਕੋਟਿਯਤ੍ਥੇਰਅਪਦਾਨਂ

੬੮. ‘‘ਅਭੀਤਰੂਪਂ ਸੀਹਂਵ, ਗਰੁਲ਼ਗ੍ਗਂਵ ਪਕ੍ਖਿਨਂ;

ਬ੍ਯਗ੍ਘੂਸਭਂਵ ਪਵਰਂ, ਅਭਿਜਾਤਂਵ ਕੇਸਰਿਂ.

੬੯. ‘‘ਸਿਖਿਂ ਤਿਲੋਕਸਰਣਂ, ਅਨੇਜਂ ਅਪਰਾਜਿਤਂ;

ਨਿਸਿਨ੍ਨਂ ਸਮਣਾਨਗ੍ਗਂ, ਭਿਕ੍ਖੁਸਙ੍ਘਪੁਰਕ੍ਖਤਂ.

੭੦. ‘‘ਚਙ੍ਕੋਟਕੇ [ਚਙ੍ਗੋਟਕੇ (ਸੀ.)] ਠਪੇਤ੍ਵਾਨ, ਅਨੋਜਂ ਪੁਪ੍ਫਮੁਤ੍ਤਮਂ;

ਸਹ ਚਙ੍ਕੋਟਕੇਨੇਵ, ਬੁਦ੍ਧਸੇਟ੍ਠਂ ਸਮੋਕਿਰਿਂ.

੭੧. ‘‘ਤੇਨ ਚਿਤ੍ਤਪ੍ਪਸਾਦੇਨ, ਦ੍ਵਿਪਦਿਨ੍ਦ ਨਰਾਸਭ;

ਪਤ੍ਤੋਮ੍ਹਿ ਅਚਲਂ ਠਾਨਂ, ਹਿਤ੍ਵਾ ਜਯਪਰਾਜਯਂ.

੭੨. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੭੩. ‘‘ਸਮ੍ਪੁਣ੍ਣੇ ਤਿਂਸਕਪ੍ਪਮ੍ਹਿ, ਦੇਵਭੂਤਿਸਨਾਮਕਾ;

ਸਤ੍ਤਰਤਨਸਮ੍ਪਨ੍ਨਾ, ਪਞ੍ਚਾਸੁਂ ਚਕ੍ਕਵਤ੍ਤਿਨੋ.

੭੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪੁਪ੍ਫਚਙ੍ਕੋਟਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪੁਪ੍ਫਚਙ੍ਕੋਟਿਯਤ੍ਥੇਰਸ੍ਸਾਪਦਾਨਂ ਦਸਮਂ.

ਸਕਚਿਨ੍ਤਨਿਯਵਗ੍ਗੋ ਸਤ੍ਤਮੋ.