੯. ਪਦੁਮਤ੍ਥੇਰਅਪਦਾਨਂ

੬੭. ‘‘ਚਤੁਸਚ੍ਚਂ ਪਕਾਸੇਨ੍ਤੋ, ਵਰਧਮ੍ਮਪ੍ਪਵਤ੍ਤਕੋ;

ਵਸ੍ਸਤੇ [ਵਸ੍ਸੇਤਿ (?)] ਅਮਤਂ ਵੁਟ੍ਠਿਂ, ਨਿਬ੍ਬਾਪੇਨ੍ਤੋ ਮਹਾਜਨਂ.

੬੮. ‘‘ਸਧਜਂ [ਸਦਣ੍ਡਂ (ਸੀ.)] ਪਦੁਮਂ ਗਯ੍ਹ, ਅਡ੍ਢਕੋਸੇ ਠਿਤੋ ਅਹਂ;

ਪਦੁਮੁਤ੍ਤਰਮੁਨਿਸ੍ਸ, ਪਹਟ੍ਠੋ ਉਕ੍ਖਿਪਿਮਮ੍ਬਰੇ.

੬੯. ‘‘ਆਗਚ੍ਛਨ੍ਤੇ ਚ ਪਦੁਮੇ, ਅਬ੍ਭੁਤੋ ਆਸਿ ਤਾਵਦੇ;

ਮਮ ਸਙ੍ਕਪ੍ਪਮਞ੍ਞਾਯ, ਪਗ੍ਗਣ੍ਹਿ ਵਦਤਂ ਵਰੋ.

੭੦. ‘‘ਕਰਸੇਟ੍ਠੇਨ ਪਗ੍ਗਯ੍ਹ, ਜਲਜਂ ਪੁਪ੍ਫਮੁਤ੍ਤਮਂ;

ਭਿਕ੍ਖੁਸਙ੍ਘੇ ਠਿਤੋ ਸਤ੍ਥਾ, ਇਮਾ ਗਾਥਾ ਅਭਾਸਥ.

੭੧. ‘‘‘ਯੇਨਿਦਂ ਪਦੁਮਂ ਖਿਤ੍ਤਂ, ਸਬ੍ਬਞ੍ਞੁਮ੍ਹਿ ਵਿਨਾਯਕੇ [ਸਬ੍ਬਞ੍ਞੁਤਮਨਾਯਕੇ (ਸ੍ਯਾ. ਕ.)];

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੭੨. ‘‘‘ਤਿਂਸਕਪ੍ਪਾਨਿ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ;

ਪਥਬ੍ਯਾ ਰਜ੍ਜਂ ਸਤ੍ਤਸਤਂ, ਵਸੁਧਂ ਆਵਸਿਸ੍ਸਤਿ.

੭੩. ‘‘‘ਤਤ੍ਥ ਪਤ੍ਤਂ ਗਣੇਤ੍ਵਾਨ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਆਕਾਸਤੋ ਪੁਪ੍ਫਵੁਟ੍ਠਿ, ਅਭਿਵਸ੍ਸਿਸ੍ਸਤੀ ਤਦਾ.

੭੪. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਨਾਮੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੭੫. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ’.

੭੬. ‘‘ਨਿਕ੍ਖਮਿਤ੍ਵਾਨ ਕੁਚ੍ਛਿਮ੍ਹਾ, ਸਮ੍ਪਜਾਨੋ ਪਤਿਸ੍ਸਤੋ;

ਜਾਤਿਯਾ ਪਞ੍ਚਵਸ੍ਸੋਹਂ, ਅਰਹਤ੍ਤਂ ਅਪਾਪੁਣਿਂ.

੭੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਦੁਮੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਦੁਮਤ੍ਥੇਰਸ੍ਸਾਪਦਾਨਂ ਨਵਮਂ.