੧੦. ਅਸਨਬੋਧਿਯਤ੍ਥੇਰਅਪਦਾਨਂ

੭੮. ‘‘ਜਾਤਿਯਾ ਸਤ੍ਤਵਸ੍ਸੋਹਂ, ਅਦ੍ਦਸਂ ਲੋਕਨਾਯਕਂ;

ਪਸਨ੍ਨਚਿਤ੍ਤੋ ਸੁਮਨੋ, ਉਪਗਚ੍ਛਿਂ ਨਰੁਤ੍ਤਮਂ.

੭੯. ‘‘ਤਿਸ੍ਸਸ੍ਸਾਹਂ ਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਰੋਪਯਿਂ ਬੋਧਿਮੁਤ੍ਤਮਂ.

੮੦. ‘‘ਅਸਨੋ ਨਾਮਧੇਯ੍ਯੇਨ, ਧਰਣੀਰੁਹਪਾਦਪੋ;

ਪਞ੍ਚਵਸ੍ਸੇ ਪਰਿਚਰਿਂ, ਅਸਨਂ ਬੋਧਿਮੁਤ੍ਤਮਂ.

੮੧. ‘‘ਪੁਪ੍ਫਿਤਂ ਪਾਦਪਂ ਦਿਸ੍ਵਾ, ਅਬ੍ਭੁਤਂ ਲੋਮਹਂਸਨਂ;

ਸਕਂ ਕਮ੍ਮਂ ਪਕਿਤ੍ਤੇਨ੍ਤੋ, ਬੁਦ੍ਧਸੇਟ੍ਠਂ ਉਪਾਗਮਿਂ.

੮੨. ‘‘ਤਿਸ੍ਸੋ ਤਦਾ ਸੋ ਸਮ੍ਬੁਦ੍ਧੋ, ਸਯਮ੍ਭੂ ਅਗ੍ਗਪੁਗ੍ਗਲੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੮੩. ‘‘‘ਯੇਨਾਯਂ ਰੋਪਿਤਾ ਬੋਧਿ, ਬੁਦ੍ਧਪੂਜਾ ਚ ਸਕ੍ਕਤਾ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੮੪. ‘‘‘ਤਿਂਸਕਪ੍ਪਾਨਿ ਦੇਵੇਸੁ, ਦੇਵਰਜ੍ਜਂ ਕਰਿਸ੍ਸਤਿ;

ਚਤੁਸਟ੍ਠਿ ਚਕ੍ਖਤ੍ਤੁਂ ਸੋ, ਚਕ੍ਕਵਤ੍ਤੀ ਭਵਿਸ੍ਸਤਿ.

੮੫. ‘‘‘ਤੁਸਿਤਾ ਹਿ ਚਵਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਦ੍ਵੇ ਸਮ੍ਪਤ੍ਤੀ ਅਨੁਭੋਤ੍ਵਾ, ਮਨੁਸ੍ਸਤ੍ਤੇ ਰਮਿਸ੍ਸਤਿ.

੮੬. ‘‘‘ਪਧਾਨਪਹਿਤਤ੍ਤੋ ਸੋ, ਉਪਸਨ੍ਤੋ ਨਿਰੂਪਧਿ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ’.

੮੭. ‘‘ਵਿਵੇਕਮਨੁਯੁਤ੍ਤੋਹਂ, ਉਪਸਨ੍ਤੋ ਨਿਰੂਪਧਿ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੮੮. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਬੋਧਿਂ ਰੋਪੇਸਹਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੋਧਿਰੋਪਸ੍ਸਿਦਂ ਫਲਂ.

੮੯. ‘‘ਚਤੁਸਤ੍ਤਤਿਤੋ ਕਪ੍ਪੇ, ਦਣ੍ਡਸੇਨੋਤਿ ਵਿਸ੍ਸੁਤੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਤਦਾ ਅਹੁਂ.

੯੦. ‘‘ਤੇਸਤ੍ਤਤਿਮ੍ਹਿਤੋ ਕਪ੍ਪੇ, ਸਤ੍ਤਾਹੇਸੁਂ ਮਹੀਪਤੀ;

ਸਮਨ੍ਤਨੇਮਿਨਾਮੇਨ, ਰਾਜਾਨੋ ਚਕ੍ਕਵਤ੍ਤਿਨੋ.

੯੧. ‘‘ਪਣ੍ਣਵੀਸਤਿਤੋ ਕਪ੍ਪੇ, ਪੁਣ੍ਣਕੋ ਨਾਮ ਖਤ੍ਤਿਯੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੯੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਸਨਬੋਧਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਸਨਬੋਧਿਯਤ੍ਥੇਰਸ੍ਸਾਪਦਾਨਂ ਦਸਮਂ.

ਬੀਜਨਿਵਗ੍ਗੋ ਛਟ੍ਠੋ.