੬. ਬੀਜਨਿਵਗ੍ਗੋ

੧. ਵਿਧੂਪਨਦਾਯਕਤ੍ਥੇਰਅਪਦਾਨਂ

੧. ‘‘ਪਦੁਮੁਤ੍ਤਰਬੁਦ੍ਧਸ੍ਸ, ਲੋਕਜੇਟ੍ਠਸ੍ਸ ਤਾਦਿਨੋ;

ਬੀਜਨਿਕਾ [ਵੀਜਨਿਕਾ (ਸੀ. ਸ੍ਯਾ.)] ਮਯਾ ਦਿਨ੍ਨਾ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ.

੨. ‘‘ਸਕਂ ਚਿਤ੍ਤਂ ਪਸਾਦੇਤ੍ਵਾ, ਪਗ੍ਗਹੇਤ੍ਵਾਨ ਅਞ੍ਜਲਿਂ;

ਸਮ੍ਬੁਦ੍ਧਮਭਿਵਾਦੇਤ੍ਵਾ, ਪਕ੍ਕਮਿਂ ਉਤ੍ਤਰਾਮੁਖੋ.

੩. ‘‘ਬੀਜਨਿਂ ਪਗ੍ਗਹੇਤ੍ਵਾਨ, ਸਤ੍ਥਾ ਲੋਕਗ੍ਗਨਾਯਕੋ [ਲੋਕੇ ਅਨੁਤ੍ਤਰੋ (ਸੀ.)];

ਭਿਕ੍ਖੁਸਙ੍ਘੇ ਠਿਤੋ ਸਨ੍ਤੋ, ਇਮਾ ਗਾਥਾ ਅਭਾਸਥ.

੪. ‘‘‘ਇਮਿਨਾ ਬੀਜਨਿਦਾਨੇਨ, ਚਿਤ੍ਤਸ੍ਸ ਪਣਿਧੀਹਿ [ਚੇਤਨਾਪਣਿਧੀਹਿ (ਅਞ੍ਞਤ੍ਥ)] ਚ;

ਕਪ੍ਪਾਨਂ ਸਤਸਹਸ੍ਸਂ, ਵਿਨਿਪਾਤਂ ਨ ਗਚ੍ਛਤਿ’.

੫. ‘‘ਆਰਦ੍ਧਵੀਰਿਯੋ ਪਹਿਤਤ੍ਤੋ, ਚੇਤੋਗੁਣਸਮਾਹਿਤੋ;

ਜਾਤਿਯਾ ਸਤ੍ਤਵਸ੍ਸੋਹਂ, ਅਰਹਤ੍ਤਂ ਅਪਾਪੁਣਿਂ.

੬. ‘‘ਸਟ੍ਠਿਕਪ੍ਪਸਹਸ੍ਸਮ੍ਹਿ, ਬੀਜਮਾਨਸਨਾਮਕਾ;

ਸੋਲ਼ਸਾਸਿਂਸੁ ਰਾਜਾਨੋ, ਚਕ੍ਕਵਤ੍ਤੀ ਮਹਬ੍ਬਲਾ.

੭. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਵਿਧੂਪਨਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਵਿਧੂਪਨਦਾਯਕਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਸਤਰਂਸਿਤ੍ਥੇਰਅਪਦਾਨਂ

੮. ‘‘ਉਬ੍ਬਿਦ੍ਧਂ ਸੇਲਮਾਰੁਯ੍ਹ, ਨਿਸੀਦਿ ਪੁਰਿਸੁਤ੍ਤਮੋ;

ਪਬ੍ਬਤਸ੍ਸਾਵਿਦੂਰਮ੍ਹਿ, ਬ੍ਰਾਹ੍ਮਣੋ ਮਨ੍ਤਪਾਰਗੂ.

੯. ‘‘ਉਪਵਿਟ੍ਠਂ ਮਹਾਵੀਰਂ, ਦੇਵਦੇਵਂ ਨਰਾਸਭਂ;

ਅਞ੍ਜਲਿਂ ਪਗ੍ਗਹੇਤ੍ਵਾਨ, ਸਨ੍ਥਵਿਂ ਲੋਕਨਾਯਕਂ.

੧੦. ‘‘‘ਏਸ ਬੁਦ੍ਧੋ ਮਹਾਵੀਰੋ, ਵਰਧਮ੍ਮਪ੍ਪਕਾਸਕੋ;

ਜਲਤਿ ਅਗ੍ਗਿਖਨ੍ਧੋਵ, ਭਿਕ੍ਖੁਸਙ੍ਘਪੁਰਕ੍ਖਤੋ.

੧੧. ‘‘‘ਮਹਾਸਮੁਦ੍ਦੋਵ‘ਕ੍ਖੁਬ੍ਭੋ [’ਕ੍ਖੋਭੋ (ਸੀ. ਸ੍ਯਾ.)], ਅਣ੍ਣਵੋਵ ਦੁਰੁਤ੍ਤਰੋ;

ਮਿਗਰਾਜਾਵਸਮ੍ਭੀਤੋ [ਛਮ੍ਭਿਤੋ (ਕ.)], ਧਮ੍ਮਂ ਦੇਸੇਤਿ ਚਕ੍ਖੁਮਾ’.

੧੨. ‘‘ਮਮ ਸਙ੍ਕਪ੍ਪਮਞ੍ਞਾਯ, ਪਦੁਮੁਤ੍ਤਰਨਾਯਕੋ;

ਭਿਕ੍ਖੁਸਙ੍ਘੇ ਠਿਤੋ ਸਤ੍ਥਾ, ਇਮਾ ਗਾਥਾ ਅਭਾਸਥ.

੧੩. ‘‘‘ਯੇਨਾਯਂ [ਯੇਨਾਹਂ (ਕ.)] ਅਞ੍ਜਲੀ ਦਿਨ੍ਨੋ, ਬੁਦ੍ਧਸੇਟ੍ਠੋ ਚ ਥੋਮਿਤੋ;

ਤਿਂਸਕਪ੍ਪਸਹਸ੍ਸਾਨਿ, ਦੇਵਰਜ੍ਜਂ ਕਰਿਸ੍ਸਤਿ.

੧੪. ‘‘‘ਕਪ੍ਪਸਤਸਹਸ੍ਸਮ੍ਹਿ, ਅਙ੍ਗੀਰਸਸਨਾਮਕੋ;

ਵਿਵਟ੍ਟਚ੍ਛਦੋ [ਵਿਵਤ੍ਥਚ੍ਛਦ੍ਦੋ (ਸੀ.)] ਸਮ੍ਬੁਦ੍ਧੋ, ਉਪ੍ਪਜ੍ਜਿਸ੍ਸਤਿ ਤਾਵਦੇ.

੧੫. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਸਤਰਂਸੀਤਿ ਨਾਮੇਨ, ਅਰਹਾ ਸੋ ਭਵਿਸ੍ਸਤਿ’.

੧੬. ‘‘ਜਾਤਿਯਾ ਸਤ੍ਤਵਸ੍ਸੋਹਂ, ਪਬ੍ਬਜਿਂ ਅਨਗਾਰਿਯਂ;

ਸਤਰਂਸਿਮ੍ਹਿ ਨਾਮੇਨ, ਪਭਾ ਨਿਦ੍ਧਾਵਤੇ ਮਮ.

੧੭. ‘‘ਮਣ੍ਡਪੇ ਰੁਕ੍ਖਮੂਲੇ ਵਾ, ਝਾਯੀ ਝਾਨਰਤੋ ਅਹਂ;

ਧਾਰੇਮਿ ਅਨ੍ਤਿਮਂ ਦੇਹਂ, ਸਮ੍ਮਾਸਮ੍ਬੁਦ੍ਧਸਾਸਨੇ.

੧੮. ‘‘ਸਟ੍ਠਿਕਪ੍ਪਸਹਸ੍ਸਮ੍ਹਿ, ਚਤੁਰੋ ਰਾਮਨਾਮਕਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੧੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਤਰਂਸਿ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਤਰਂਸਿਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਸਯਨਦਾਯਕਤ੍ਥੇਰਅਪਦਾਨਂ

੨੦. ‘‘ਪਦੁਮੁਤ੍ਤਰਬੁਦ੍ਧਸ੍ਸ, ਸਬ੍ਬਲੋਕਾਨੁਕਮ੍ਪਿਨੋ;

ਸਯਨਂ ਤਸ੍ਸ ਪਾਦਾਸਿਂ, ਵਿਪ੍ਪਸਨ੍ਨੇਨ ਚੇਤਸਾ.

੨੧. ‘‘ਤੇਨ ਸਯਨਦਾਨੇਨ, ਸੁਖੇਤ੍ਤੇ ਬੀਜਸਮ੍ਪਦਾ;

ਭੋਗਾ ਨਿਬ੍ਬਤ੍ਤਰੇ ਤਸ੍ਸ, ਸਯਨਸ੍ਸ ਇਦਂ ਫਲਂ.

੨੨. ‘‘ਆਕਾਸੇ ਸੇਯ੍ਯਂ ਕਪ੍ਪੇਮਿ, ਧਾਰੇਮਿ ਪਥਵਿਂ ਇਮਂ;

ਪਾਣੇਸੁ ਮੇ ਇਸ੍ਸਰਿਯਂ, ਸਯਨਸ੍ਸ ਇਦਂ ਫਲਂ.

੨੩. ‘‘ਪਞ੍ਚਕਪ੍ਪਸਹਸ੍ਸਮ੍ਹਿ, ਅਟ੍ਠ ਆਸੁਂ ਮਹਾਤੇਜਾ [ਮਹਾਵਰਾ (ਸੀ.), ਮਹਾਵੀਰਾ (ਸ੍ਯਾ.)];

ਚਤੁਤ੍ਤਿਂਸੇ ਕਪ੍ਪਸਤੇ, ਚਤੁਰੋ ਚ ਮਹਬ੍ਬਲਾ.

੨੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਯਨਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਯਨਦਾਯਕਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਗਨ੍ਧੋਦਕਿਯਤ੍ਥੇਰਅਪਦਾਨਂ

੨੫. ‘‘ਪਦੁਮੁਤ੍ਤਰਬੁਦ੍ਧਸ੍ਸ, ਮਹਾਬੋਧਿਮਹੋ ਅਹੁ;

ਵਿਚਿਤ੍ਤਂ ਘਟਮਾਦਾਯ, ਗਨ੍ਧੋਦਕਮਦਾਸਹਂ.

੨੬. ‘‘ਨ੍ਹਾਨਕਾਲੇ ਚ ਬੋਧਿਯਾ, ਮਹਾਮੇਘੋ ਪਵਸ੍ਸਥ;

ਨਿਨ੍ਨਾਦੋ ਚ ਮਹਾ ਆਸਿ, ਅਸਨਿਯਾ ਫਲਨ੍ਤਿਯਾ.

੨੭. ‘‘ਤੇਨੇਵਾਸਨਿਵੇਗੇਨ, ਤਤ੍ਥ ਕਾਲਙ੍ਕਤੋ [ਕਾਲਕਤੋ (ਸੀ. ਸ੍ਯਾ.)] ਅਹਂ [ਅਹੁਂ (ਸੀ.)];

ਦੇਵਲੋਕੇ ਠਿਤੋ ਸਨ੍ਤੋ, ਇਮਾ ਗਾਥਾ ਅਭਾਸਹਂ.

੨੮. ‘‘‘ਅਹੋ ਬੁਦ੍ਧੋ ਅਹੋ ਧਮ੍ਮੋ, ਅਹੋ ਨੋ ਸਤ੍ਥੁਸਮ੍ਪਦਾ;

ਕਲ਼ੇਵਰਂ [ਕਲੇਬਰਂ (ਸੀ.)] ਮੇ ਪਤਿਤਂ, ਦੇਵਲੋਕੇ ਰਮਾਮਹਂ.

੨੯. ‘‘‘ਉਬ੍ਬਿਦ੍ਧਂ ਭਵਨਂ ਮਯ੍ਹਂ, ਸਤਭੂਮਂ ਸਮੁਗ੍ਗਤਂ;

ਕਞ੍ਞਾਸਤਸਹਸ੍ਸਾਨਿ, ਪਰਿਵਾਰੇਨ੍ਤਿ ਮਂ ਸਦਾ.

੩੦. ‘‘‘ਆਬਾਧਾ ਮੇ ਨ ਵਿਜ੍ਜਨ੍ਤਿ, ਸੋਕੋ ਮਯ੍ਹਂ ਨ ਵਿਜ੍ਜਤਿ;

ਪਰਿਲ਼ਾਹਂ ਨ ਪਸ੍ਸਾਮਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.

੩੧. ‘‘‘ਅਟ੍ਠਵੀਸੇ ਕਪ੍ਪਸਤੇ, ਰਾਜਾ ਸਂਵਸਿਤੋ ਅਹੁਂ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ’.

੩੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਗਨ੍ਧੋਦਕਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਗਨ੍ਧੋਦਕਿਯਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਓਪਵਯ੍ਹਤ੍ਥੇਰਅਪਦਾਨਂ

੩੩. ‘‘ਪਦੁਮੁਤ੍ਤਰਬੁਦ੍ਧਸ੍ਸ, ਆਜਾਨੀਯਮਦਾਸਹਂ;

ਨਿਯ੍ਯਾਦੇਤ੍ਵਾਨ ਸਮ੍ਬੁਦ੍ਧੇ [ਸਮ੍ਬੁਦ੍ਧਂ (ਸੀ. ਕ.)], ਅਗਮਾਸਿਂ ਸਕਂ ਘਰਂ.

੩੪. ‘‘ਦੇਵਲੋ ਨਾਮ ਨਾਮੇਨ, ਸਤ੍ਥੁਨੋ ਅਗ੍ਗਸਾਵਕੋ;

ਵਰਧਮ੍ਮਸ੍ਸ ਦਾਯਾਦੋ, ਆਗਚ੍ਛਿ ਮਮ ਸਨ੍ਤਿਕਂ.

੩੫. ‘‘ਸਪਤ੍ਤਭਾਰੋ ਭਗਵਾ, ਆਜਾਨੇਯ੍ਯੋ ਨ ਕਪ੍ਪਤਿ;

ਤਵ ਸਙ੍ਕਪ੍ਪਮਞ੍ਞਾਯ, ਅਧਿਵਾਸੇਸਿ ਚਕ੍ਖੁਮਾ.

੩੬. ‘‘ਅਗ੍ਘਾਪੇਤ੍ਵਾ ਵਾਤਜਵਂ, ਸਿਨ੍ਧਵਂ ਸੀਘਵਾਹਨਂ;

ਪਦੁਮੁਤ੍ਤਰਬੁਦ੍ਧਸ੍ਸ, ਖਮਨੀਯਮਦਾਸਹਂ.

੩੭. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ [ਦੇਵੇ ਚ ਮਾਨੁਸੇ ਭਵੇ (ਸੀ. ਕ.)];

ਖਮਨੀਯਂ ਵਾਤਜਵਂ, ਚਿਤ੍ਤਂ ਨਿਬ੍ਬਤ੍ਤਤੇ [ਆਜਾਨੀਯਾ ਵਾਤਜਵਾ, ਵਿਤ੍ਤਿ ਨਿਬ੍ਬਤ੍ਤਰੇ (ਸ੍ਯਾ.), ਖਮਨੀਯਾ ਵਾਤਜਵਾ, ਚਿਤ੍ਤਾ ਨਿਬ੍ਬਤ੍ਤਰੇ (ਸੀ.)] ਮਮ.

੩੮. ‘‘ਲਾਭਂ ਤੇਸਂ ਸੁਲਦ੍ਧਂਵ, ਯੇ ਲਭਨ੍ਤੁਪਸਮ੍ਪਦਂ;

ਪੁਨਪਿ ਪਯਿਰੁਪਾਸੇਯ੍ਯਂ, ਬੁਦ੍ਧੋ ਲੋਕੇ ਸਚੇ ਭਵੇ.

੩੯. ‘‘ਅਟ੍ਠਵੀਸਤਿਕ੍ਖਤ੍ਤੁਂਹਂ, ਰਾਜਾ ਆਸਿਂ ਮਹਬ੍ਬਲੋ;

ਚਾਤੁਰਨ੍ਤੋ ਵਿਜਿਤਾਵੀ, ਜਮ੍ਬੁਸਣ੍ਡਸ੍ਸ [ਜਮ੍ਬੁਦੀਪਸ੍ਸ (ਸ੍ਯਾ.), ਜਮ੍ਬੁਮਣ੍ਡਸ੍ਸ (ਕ.)] ਜਮ੍ਬੁਇਸ੍ਸਰੋ.

੪੦. ‘‘ਇਦਂ ਪਚ੍ਛਿਮਕਂ ਮਯ੍ਹਂ, ਚਰਿਮੋ ਵਤ੍ਤਤੇ ਭਵੋ;

ਪਤ੍ਤੋਸ੍ਮਿ ਅਚਲਂ ਠਾਨਂ, ਹਿਤ੍ਵਾ ਜਯਪਰਾਜਯਂ.

੪੧. ‘‘ਚਤੁਤਿਂਸਸਹਸ੍ਸਮ੍ਹਿ, ਮਹਾਤੇਜੋਸਿ ਖਤ੍ਤਿਯੋ;

ਸਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੪੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਓਪਵਯ੍ਹੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਓਪਵਯ੍ਹਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਸਪਰਿਵਾਰਾਸਨਤ੍ਥੇਰਅਪਦਾਨਂ

੪੩. ‘‘ਪਦੁਮੁਤ੍ਤਰਬੁਦ੍ਧਸ੍ਸ, ਪਿਣ੍ਡਪਾਤਂ ਅਦਾਸਹਂ;

ਗਨ੍ਤ੍ਵਾ ਕਿਲਿਟ੍ਠਕਂ ਠਾਨਂ [ਤਂ ਭੋਜਨਟ੍ਠਾਨਂ (ਸੀ.)], ਮਲ੍ਲਿਕਾਹਿ ਪਰਿਕ੍ਖਿਤਂ [ਪਰਿਕ੍ਖਿਪਿਂ (ਸੀ.)].

੪੪. ‘‘ਤਮ੍ਹਾਸਨਮ੍ਹਿ ਆਸੀਨੋ, ਬੁਦ੍ਧੋ ਲੋਕਗ੍ਗਨਾਯਕੋ;

ਅਕਿਤ੍ਤਯਿ ਪਿਣ੍ਡਪਾਤਂ, ਉਜੁਭੂਤੋ ਸਮਾਹਿਤੋ.

੪੫. ‘‘ਯਥਾਪਿ ਭਦ੍ਦਕੇ ਖੇਤ੍ਤੇ, ਬੀਜਂ ਅਪ੍ਪਮ੍ਪਿ ਰੋਪਿਤਂ;

ਸਮ੍ਮਾ ਧਾਰਂ ਪਵੇਚ੍ਛਨ੍ਤੇ, ਫਲਂ ਤੋਸੇਤਿ ਕਸ੍ਸਕਂ.

੪੬. ‘‘ਤਥੇਵਾਯਂ ਪਿਣ੍ਡਪਾਤੋ, ਸੁਖੇਤ੍ਤੇ ਰੋਪਿਤੋ ਤਯਾ;

ਭਵੇ ਨਿਬ੍ਬਤ੍ਤਮਾਨਮ੍ਹਿ, ਫਲਂ ਤੇ [ਨਿਬ੍ਬਤ੍ਤਮਾਨਂ ਹਿ, ਫਲਤੋ (ਸੀ.)] ਤੋਸਯਿਸ੍ਸਤਿ [ਤਪ੍ਪਯਿਸ੍ਸਤਿ (ਕ.)].

੪੭. ‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਜਲਜੁਤ੍ਤਮਨਾਮਕੋ;

ਪਿਣ੍ਡਪਾਤਂ ਗਹੇਤ੍ਵਾਨ, ਪਕ੍ਕਾਮਿ ਉਤ੍ਤਰਾਮੁਖੋ.

੪੮. ‘‘ਸਂਵੁਤੋ ਪਾਤਿਮੋਕ੍ਖਸ੍ਮਿਂ, ਇਨ੍ਦ੍ਰਿਯੇਸੁ ਚ ਪਞ੍ਚਸੁ;

ਪਵਿਵੇਕਮਨੁਯੁਤ੍ਤੋ, ਵਿਹਰਾਮਿ ਅਨਾਸਵੋ.

੪੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਪਰਿਵਾਰਾਸਨੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਪਰਿਵਾਰਾਸਨਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਪਞ੍ਚਦੀਪਕਤ੍ਥੇਰਅਪਦਾਨਂ

੫੦. ‘‘ਪਦੁਮੁਤ੍ਤਰਬੁਦ੍ਧਸ੍ਸ, ਸਬ੍ਬਭੂਤਾਨੁਕਮ੍ਪਿਨੋ;

ਸਦ੍ਦਹਿਤ੍ਵਾਨ [ਸੁਸਣ੍ਠਹਿਤ੍ਵਾ (ਸੀ.)] ਸਦ੍ਧਮ੍ਮੇ, ਉਜੁਦਿਟ੍ਠਿ ਅਹੋਸਹਂ.

੫੧. ‘‘ਪਦੀਪਦਾਨਂ ਪਾਦਾਸਿਂ, ਪਰਿਵਾਰੇਤ੍ਵਾਨ ਬੋਧਿਯਂ;

ਸਦ੍ਦਹਨ੍ਤੋ ਪਦੀਪਾਨਿ, ਅਕਰਿਂ ਤਾਵਦੇ ਅਹਂ.

੫੨. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਆਕਾਸੇ ਉਕ੍ਕਂ ਧਾਰੇਨ੍ਤਿ, ਦੀਪਦਾਨਸ੍ਸਿਦਂ ਫਲਂ.

੫੩. ‘‘ਤਿਰੋਕੁਟ੍ਟਂ ਤਿਰੋਸੇਲਂ, ਸਮਤਿਗ੍ਗਯ੍ਹ ਪਬ੍ਬਤਂ;

ਸਮਨ੍ਤਾ ਯੋਜਨਸਤਂ, ਦਸ੍ਸਨਂ ਅਨੁਭੋਮਹਂ.

੫੪. ‘‘ਤੇਨ ਕਮ੍ਮਾਵਸੇਸੇਨ, ਪਤ੍ਤੋਮ੍ਹਿ ਆਸਵਕ੍ਖਯਂ;

ਧਾਰੇਮਿ ਅਨ੍ਤਿਮਂ ਦੇਹਂ, ਦ੍ਵਿਪਦਿਨ੍ਦਸ੍ਸ ਸਾਸਨੇ.

੫੫. ‘‘ਚਤੁਤ੍ਤਿਂਸੇ ਕਪ੍ਪਸਤੇ, ਸਤਚਕ੍ਖੁਸਨਾਮਕਾ;

ਰਾਜਾਹੇਸੁਂ ਮਹਾਤੇਜਾ, ਚਕ੍ਕਵਤ੍ਤੀ ਮਹਬ੍ਬਲਾ.

੫੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਞ੍ਚਦੀਪਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਞ੍ਚਦੀਪਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਧਜਦਾਯਕਤ੍ਥੇਰਅਪਦਾਨਂ

੫੭. ‘‘ਪਦੁਮੁਤ੍ਤਰਬੁਦ੍ਧਸ੍ਸ, ਬੋਧਿਯਾ ਪਾਦਪੁਤ੍ਤਮੇ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਧਜਮਾਰੋਪਯਿਂ ਅਹਂ.

੫੮. ‘‘ਪਤਿਤਪਤ੍ਤਾਨਿ ਗਣ੍ਹਿਤ੍ਵਾ, ਬਹਿਦ੍ਧਾ ਛਡ੍ਡਯਿਂ ਅਹਂ;

ਅਨ੍ਤੋਸੁਦ੍ਧਂ ਬਹਿਸੁਦ੍ਧਂ, ਅਧਿਮੁਤ੍ਤਮਨਾਸਵਂ.

੫੯. ‘‘ਸਮ੍ਮੁਖਾ ਵਿਯ ਸਮ੍ਬੁਦ੍ਧਂ, ਅਵਨ੍ਦਿਂ ਬੋਧਿਮੁਤ੍ਤਮਂ;

ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ.

੬੦. ‘‘ਭਿਕ੍ਖੁਸਙ੍ਘੇ ਠਿਤੋ ਸਤ੍ਥਾ, ਇਮਾ ਗਾਥਾ ਅਭਾਸਥ;

‘‘‘ਇਮਿਨਾ ਧਜਦਾਨੇਨ, ਉਪਟ੍ਠਾਨੇਨ ਚੂਭਯਂ.

੬੧. ‘‘‘ਕਪ੍ਪਾਨਂ ਸਤਸਹਸ੍ਸਂ, ਦੁਗ੍ਗਤਿਂ ਸੋ ਨ ਗਚ੍ਛਤਿ;

ਦੇਵੇਸੁ ਦੇਵਸੋਭਗ੍ਯਂ, ਅਨੁਭੋਸ੍ਸਤਿਨਪ੍ਪਕਂ.

੬੨. ‘‘‘ਅਨੇਕਸਤਕ੍ਖਤ੍ਤੁਞ੍ਚ, ਰਾਜਾ ਰਟ੍ਠੇ ਭਵਿਸ੍ਸਤਿ;

ਉਗ੍ਗਤੋ ਨਾਮ ਨਾਮੇਨ, ਚਕ੍ਕਵਤ੍ਤੀ ਭਵਿਸ੍ਸਤਿ.

੬੩. ‘‘‘ਸਮ੍ਪਤ੍ਤਿਂ ਅਨੁਭੋਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਗੋਤਮਸ੍ਸ ਭਗਵਤੋ, ਸਾਸਨੇਭਿਰਮਿਸ੍ਸਤਿ’.

੬੪. ‘‘ਪਧਾਨਪਹਿਤਤ੍ਤੋਮ੍ਹਿ, ਉਪਸਨ੍ਤੋ ਨਿਰੂਪਧਿ;

ਧਾਰੇਮਿ ਅਨ੍ਤਿਮਂ ਦੇਹਂ, ਸਮ੍ਮਾਸਮ੍ਬੁਦ੍ਧਸਾਸਨੇ.

੬੫. ‘‘ਏਕਪਞ੍ਞਾਸਸਹਸ੍ਸੇ, ਕਪ੍ਪੇ ਉਗ੍ਗਤਸਵ੍ਹਯੋ [ਸਵ੍ਹਯਾ (ਸ੍ਯਾ.)];

ਪਞ੍ਞਾਸਸਤਸਹਸ੍ਸੇ, ਖਤ੍ਤਿਯੋ ਮੇਘਸਵ੍ਹਯੋ [ਖਤ੍ਤਿਯਾ ਖੇਮਸਵ੍ਹਯਾ (ਸ੍ਯਾ.)].

੬੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਧਜਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਧਜਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.