੮. ਧਜਦਾਯਕਤ੍ਥੇਰਅਪਦਾਨਂ

੫੭. ‘‘ਪਦੁਮੁਤ੍ਤਰਬੁਦ੍ਧਸ੍ਸ, ਬੋਧਿਯਾ ਪਾਦਪੁਤ੍ਤਮੇ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਧਜਮਾਰੋਪਯਿਂ ਅਹਂ.

੫੮. ‘‘ਪਤਿਤਪਤ੍ਤਾਨਿ ਗਣ੍ਹਿਤ੍ਵਾ, ਬਹਿਦ੍ਧਾ ਛਡ੍ਡਯਿਂ ਅਹਂ;

ਅਨ੍ਤੋਸੁਦ੍ਧਂ ਬਹਿਸੁਦ੍ਧਂ, ਅਧਿਮੁਤ੍ਤਮਨਾਸਵਂ.

੫੯. ‘‘ਸਮ੍ਮੁਖਾ ਵਿਯ ਸਮ੍ਬੁਦ੍ਧਂ, ਅਵਨ੍ਦਿਂ ਬੋਧਿਮੁਤ੍ਤਮਂ;

ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ.

੬੦. ‘‘ਭਿਕ੍ਖੁਸਙ੍ਘੇ ਠਿਤੋ ਸਤ੍ਥਾ, ਇਮਾ ਗਾਥਾ ਅਭਾਸਥ;

‘‘‘ਇਮਿਨਾ ਧਜਦਾਨੇਨ, ਉਪਟ੍ਠਾਨੇਨ ਚੂਭਯਂ.

੬੧. ‘‘‘ਕਪ੍ਪਾਨਂ ਸਤਸਹਸ੍ਸਂ, ਦੁਗ੍ਗਤਿਂ ਸੋ ਨ ਗਚ੍ਛਤਿ;

ਦੇਵੇਸੁ ਦੇਵਸੋਭਗ੍ਯਂ, ਅਨੁਭੋਸ੍ਸਤਿਨਪ੍ਪਕਂ.

੬੨. ‘‘‘ਅਨੇਕਸਤਕ੍ਖਤ੍ਤੁਞ੍ਚ, ਰਾਜਾ ਰਟ੍ਠੇ ਭਵਿਸ੍ਸਤਿ;

ਉਗ੍ਗਤੋ ਨਾਮ ਨਾਮੇਨ, ਚਕ੍ਕਵਤ੍ਤੀ ਭਵਿਸ੍ਸਤਿ.

੬੩. ‘‘‘ਸਮ੍ਪਤ੍ਤਿਂ ਅਨੁਭੋਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਗੋਤਮਸ੍ਸ ਭਗਵਤੋ, ਸਾਸਨੇਭਿਰਮਿਸ੍ਸਤਿ’.

੬੪. ‘‘ਪਧਾਨਪਹਿਤਤ੍ਤੋਮ੍ਹਿ, ਉਪਸਨ੍ਤੋ ਨਿਰੂਪਧਿ;

ਧਾਰੇਮਿ ਅਨ੍ਤਿਮਂ ਦੇਹਂ, ਸਮ੍ਮਾਸਮ੍ਬੁਦ੍ਧਸਾਸਨੇ.

੬੫. ‘‘ਏਕਪਞ੍ਞਾਸਸਹਸ੍ਸੇ, ਕਪ੍ਪੇ ਉਗ੍ਗਤਸਵ੍ਹਯੋ [ਸਵ੍ਹਯਾ (ਸ੍ਯਾ.)];

ਪਞ੍ਞਾਸਸਤਸਹਸ੍ਸੇ, ਖਤ੍ਤਿਯੋ ਮੇਘਸਵ੍ਹਯੋ [ਖਤ੍ਤਿਯਾ ਖੇਮਸਵ੍ਹਯਾ (ਸ੍ਯਾ.)].

੬੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਧਜਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਧਜਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.