੯. ਰਾਧਤ੍ਥੇਰਅਪਦਾਨਂ

੨੯੬. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਲੋਕਵਿਦੂ ਮੁਨਿ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਚਕ੍ਖੁਮਾ.

੨੯੭. ‘‘ਓਵਾਦਕੋ ਵਿਞ੍ਞਾਪਕੋ, ਤਾਰਕੋ ਸਬ੍ਬਪਾਣਿਨਂ;

ਦੇਸਨਾਕੁਸਲੋ ਬੁਦ੍ਧੋ, ਤਾਰੇਸਿ ਜਨਤਂ ਬਹੁਂ.

੨੯੮. ‘‘ਅਨੁਕਮ੍ਪਕੋ ਕਾਰੁਣਿਕੋ, ਹਿਤੇਸੀ ਸਬ੍ਬਪਾਣਿਨਂ;

ਸਮ੍ਪਤ੍ਤੇ ਤਿਤ੍ਥਿਯੇ ਸਬ੍ਬੇ, ਪਞ੍ਚਸੀਲੇ ਪਤਿਟ੍ਠਪਿ.

੨੯੯. ‘‘ਏਵਂ ਨਿਰਾਕੁਲਂ ਆਸਿ, ਸੁਞ੍ਞਤਂ ਤਿਤ੍ਥਿਯੇਹਿ ਚ;

ਵਿਚਿਤ੍ਤਂ ਅਰਹਨ੍ਤੇਹਿ, ਵਸੀਭੂਤੇਹਿ ਤਾਦਿਭਿ.

੩੦੦. ‘‘ਰਤਨਾਨਟ੍ਠਪਞ੍ਞਾਸਂ, ਉਗ੍ਗਤੋ ਸੋ ਮਹਾਮੁਨਿ;

ਕਞ੍ਚਨਗ੍ਘਿਯਸਙ੍ਕਾਸੋ, ਬਾਤ੍ਤਿਂਸਵਰਲਕ੍ਖਣੋ.

੩੦੧. ‘‘ਵਸ੍ਸਸਤਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੩੦੨. ‘‘ਤਦਾਹਂ ਹਂਸਵਤਿਯਂ, ਬ੍ਰਾਹ੍ਮਣੋ ਮਨ੍ਤਪਾਰਗੂ;

ਉਪੇਚ੍ਚ ਤਂ ਨਰਵਰਂ, ਅਸ੍ਸੋਸਿਂ ਧਮ੍ਮਦੇਸਨਂ.

੩੦੩. ‘‘ਪਞ੍ਞਪੇਨ੍ਤਂ ਮਹਾਵੀਰਂ, ਪਰਿਸਾਸੁ ਵਿਸਾਰਦਂ;

ਪਟਿਭਾਨੇਯ੍ਯਕਂ ਭਿਕ੍ਖੁਂ, ਏਤਦਗ੍ਗੇ ਵਿਨਾਯਕਂ.

੩੦੪. ‘‘ਤਦਾਹਂ ਕਾਰਂ ਕਤ੍ਵਾਨ, ਸਸਙ੍ਘੇ ਲੋਕਨਾਯਕੇ;

ਨਿਪਚ੍ਚ ਸਿਰਸਾ ਪਾਦੇ, ਤਂ ਠਾਨਂ ਅਭਿਪਤ੍ਥਯਿਂ.

੩੦੫. ‘‘ਤਤੋ ਮਂ ਭਗਵਾ ਆਹ, ਸਿਙ੍ਗੀਨਿਕ੍ਖਸਮਪ੍ਪਭੋ;

ਸਰੇਨ ਰਜਨੀਯੇਨ, ਕਿਲੇਸਮਲਹਾਰਿਨਾ.

੩੦੬. ‘‘‘ਸੁਖੀ ਭਵਸ੍ਸੁ ਦੀਘਾਯੁ, ਸਿਜ੍ਝਤੁ ਪਣਿਧੀ ਤਵ;

ਸਸਙ੍ਘੇ ਮੇ ਕਤਂ ਕਾਰਂ, ਅਤੀਵ ਵਿਪੁਲਂ ਤਯਾ.

੩੦੭. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੩੦੮. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਰਾਧੋਤਿ ਨਾਮਧੇਯ੍ਯੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ.

੩੦੯. ‘‘‘ਸ ਤੇ ਹੇਤੁਗੁਣੇ ਤੁਟ੍ਠੋ, ਸਕ੍ਯਪੁਤ੍ਤੋ ਨਰਾਸਭੋ [ਇਦਂ ਪਾਦਦ੍ਵਯਂ ਸ੍ਯਾਮਮੂਲੇ ਨਤ੍ਥੀ];

ਪਟਿਭਾਨੇਯ੍ਯਕਾਨਗ੍ਗਂ, ਪਞ੍ਞਪੇਸ੍ਸਤਿ ਨਾਯਕੋ’.

੩੧੦. ‘‘ਤਂ ਸੁਤ੍ਵਾ ਮੁਦਿਤੋ ਹੁਤ੍ਵਾ, ਯਾਵਜੀਵਂ ਤਦਾ ਜਿਨਂ;

ਮੇਤ੍ਤਚਿਤ੍ਤੋ ਪਰਿਚਰਿਂ, ਸਤੋ ਪਞ੍ਞਾਸਮਾਹਿਤੋ.

੩੧੧. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੩੧੨. ‘‘ਸਤਾਨਂ ਤੀਣਿਕ੍ਖਤ੍ਤੁਞ੍ਚ, ਦੇਵਰਜ੍ਜਮਕਾਰਯਿਂ;

ਸਤਾਨਂ ਪਞ੍ਚਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ.

੩੧੩. ‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਸਬ੍ਬਤ੍ਥ ਸੁਖਿਤੋ ਆਸਿਂ, ਤਸ੍ਸ ਕਮ੍ਮਸ੍ਸ ਵਾਹਸਾ.

੩੧੪. ‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਗਿਰਿਬ੍ਬਜਪੁਰੁਤ੍ਤਮੇ;

ਜਾਤੋ ਵਿਪ੍ਪਕੁਲੇ ਨਿਦ੍ਧੇ, ਵਿਕਲਚ੍ਛਾਦਨਾਸਨੇ.

੩੧੫. ‘‘ਕਟਚ੍ਛੁਭਿਕ੍ਖਂ ਪਾਦਾਸਿਂ, ਸਾਰਿਪੁਤ੍ਤਸ੍ਸ ਤਾਦਿਨੋ;

ਯਦਾ ਜਿਣ੍ਣੋ ਚ ਵੁਦ੍ਧੋ ਚ, ਤਦਾਰਾਮਮੁਪਾਗਮਿਂ.

੩੧੬. ‘‘ਪਬ੍ਬਜਤਿ ਨ ਮਂ ਕੋਚਿ [ਪਬ੍ਬਾਜੇਨ੍ਤਿ ਨ ਮਂ ਕੇਚਿ (ਸੀ. ਸ੍ਯਾ ਪੀ.)], ਜਿਣ੍ਣਦੁਬ੍ਬਲਥਾਮਕਂ;

ਤੇਨ ਦੀਨੋ ਵਿਵਣ੍ਣਙ੍ਗੋ [ਵਿਵਣ੍ਣਕੋ (ਕ.)], ਸੋਕੋ ਚਾਸਿਂ ਤਦਾ ਅਹਂ.

੩੧੭. ‘‘ਦਿਸ੍ਵਾ ਮਹਾਕਾਰੁਣਿਕੋ, ਮਮਮਾਹ [ਮਮਾਹ ਸੋ (ਸੀ.), ਮਮਾਹ ਚ (ਪੀ.)] ਮਹਾਮੁਨਿ;

‘ਕਿਮਤ੍ਥਂ ਪੁਤ੍ਤਸੋਕਟ੍ਟੋ, ਬ੍ਰੂਹਿ ਤੇ ਚਿਤ੍ਤਜਂ ਰੁਜਂ’.

੩੧੮. ‘‘‘ਪਬ੍ਬਜ੍ਜਂ ਨ ਲਭੇ ਵੀਰ, ਸ੍ਵਾਕ੍ਖਾਤੇ ਤਵ ਸਾਸਨੇ;

ਤੇਨ ਸੋਕੇਨ ਦੀਨੋਸ੍ਮਿ, ਸਰਣਂ ਹੋਹਿ ਨਾਯਕ’.

੩੧੯. ‘‘ਤਦਾ ਭਿਕ੍ਖੂ ਸਮਾਨੇਤ੍ਵਾ, ਅਪੁਚ੍ਛਿ ਮੁਨਿਸਤ੍ਤਮੋ;

‘ਇਮਸ੍ਸ ਅਧਿਕਾਰਂ ਯੇ, ਸਰਨ੍ਤਿ ਬ੍ਯਾਹਰਨ੍ਤੁ ਤੇ’.

੩੨੦. ‘‘ਸਾਰਿਪੁਤ੍ਤੋ ਤਦਾਵੋਚ, ‘ਕਾਰਮਸ੍ਸ ਸਰਾਮਹਂ;

ਕਟਚ੍ਛੁਭਿਕ੍ਖਂ ਦਾਪੇਸਿ, ਪਿਣ੍ਡਾਯ ਚਰਤੋ ਮਮ’.

੩੨੧. ‘‘‘ਸਾਧੁ ਸਾਧੁ ਕਤਞ੍ਞੂਸਿ, ਸਾਰਿਪੁਤ੍ਤ ਇਮਂ ਤੁਵਂ;

ਪਬ੍ਬਾਜੇਹਿ ਦਿਜਂ ਵੁਡ੍ਢਂ, ਹੇਸ੍ਸਤਾਜਾਨਿਯੋ ਅਯਂ’.

੩੨੨. ‘‘ਤਤੋ ਅਲਤ੍ਥਂ ਪਬ੍ਬਜ੍ਜਂ, ਕਮ੍ਮਵਾਚੋਪਸਮ੍ਪਦਂ;

ਨ ਚਿਰੇਨੇਵ ਕਾਲੇਨ, ਪਾਪੁਣਿਂ ਆਸਵਕ੍ਖਯਂ.

੩੨੩. ‘‘ਸਕ੍ਕਚ੍ਚਂ ਮੁਨਿਨੋ ਵਾਕ੍ਯਂ, ਸੁਣਾਮਿ ਮੁਦਿਤੋ ਯਤੋ;

ਪਟਿਭਾਨੇਯ੍ਯਕਾਨਗ੍ਗਂ, ਤਤੋ ਮਂ ਠਪਯੀ ਜਿਨੋ.

੩੨੪. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੩੨੫. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੨੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਰਾਧੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਰਾਧਤ੍ਥੇਰਸ੍ਸਾਪਦਾਨਂ ਨਵਮਂ.