੫੪. ਕਚ੍ਚਾਯਨਵਗ੍ਗੋ

੧. ਮਹਾਕਚ੍ਚਾਯਨਤ੍ਥੇਰਅਪਦਾਨਂ

੧. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਅਨੇਜੋ ਅਜਿਤਂ ਜਯੋ;

ਸਤਸਹਸ੍ਸੇ ਕਪ੍ਪਾਨਂ, ਇਤੋ ਉਪ੍ਪਜ੍ਜਿ ਨਾਯਕੋ.

੨. ‘‘ਵੀਰੋ ਕਮਲਪਤ੍ਤਕ੍ਖੋ, ਸਸਙ੍ਕਵਿਮਲਾਨਨੋ;

ਕਨਕਾਚਲਸਙ੍ਕਾਸੋ [ਕਞ੍ਚਨਤਚਸਙ੍ਕਾਸੋ (ਸ੍ਯਾ.)], ਰਵਿਦਿਤ੍ਤਿਸਮਪ੍ਪਭੋ.

੩. ‘‘ਸਤ੍ਤਨੇਤ੍ਤਮਨੋਹਾਰੀ, ਵਰਲਕ੍ਖਣਭੂਸਿਤੋ;

ਸਬ੍ਬਵਾਕ੍ਯਪਥਾਤੀਤੋ, ਮਨੁਜਾਮਰਸਕ੍ਕਤੋ.

੪. ‘‘ਸਮ੍ਬੁਦ੍ਧੋ ਬੋਧਯਂ ਸਤ੍ਤੇ, ਵਾਗੀਸੋ ਮਧੁਰਸ੍ਸਰੋ;

ਕਰੁਣਾਨਿਬਨ੍ਧਸਨ੍ਤਾਨੋ, ਪਰਿਸਾਸੁ ਵਿਸਾਰਦੋ.

੫. ‘‘ਦੇਸੇਤਿ ਮਧੁਰਂ ਧਮ੍ਮਂ, ਚਤੁਸਚ੍ਚੂਪਸਂਹਿਤਂ;

ਨਿਮੁਗ੍ਗੇ ਮੋਹਪਙ੍ਕਮ੍ਹਿ, ਸਮੁਦ੍ਧਰਤਿ ਪਾਣਿਨੇ.

੬. ‘‘ਤਦਾ ਏਕਚਰੋ ਹੁਤ੍ਵਾ, ਤਾਪਸੋ ਹਿਮਵਾਲਯੋ;

ਨਭਸਾ ਮਾਨੁਸਂ ਲੋਕਂ, ਗਚ੍ਛਨ੍ਤੋ ਜਿਨਮਦ੍ਦਸਂ.

੭. ‘‘ਉਪੇਚ੍ਚ ਸਨ੍ਤਿਕਂ ਤਸ੍ਸ, ਅਸ੍ਸੋਸਿਂ ਧਮ੍ਮਦੇਸਨਂ;

ਵਣ੍ਣਯਨ੍ਤਸ੍ਸ ਵੀਰਸ੍ਸ, ਸਾਵਕਸ੍ਸ ਮਹਾਗੁਣਂ.

੮. ‘‘ਸਙ੍ਖਿਤ੍ਤੇਨ ਮਯਾ ਵੁਤ੍ਤਂ, ਵਿਤ੍ਥਾਰੇਨ ਪਕਾਸਯਂ;

ਪਰਿਸਂ ਮਞ੍ਚ ਤੋਸੇਤਿ, ਯਥਾ ਕਚ੍ਚਾਯਨੋ ਅਯਂ.

੯. ‘‘‘ਨਾਹਂ ਏਵਮਿਧੇਕਚ੍ਚਂ [ਏਵਂਵਿਧਂ ਕਞ੍ਚਿ (ਸੀ. ਪੀ.)], ਅਞ੍ਞਂ ਪਸ੍ਸਾਮਿ ਸਾਵਕਂ;

ਤਸ੍ਮਾਤਦਗ੍ਗੇ [ਤਸ੍ਮੇਤਦਗ੍ਗੇ (ਸੀ.)] ਏਸਗ੍ਗੋ, ਏਵਂ ਧਾਰੇਥ ਭਿਕ੍ਖਵੋ’.

੧੦. ‘‘ਤਦਾਹਂ ਵਿਮ੍ਹਿਤੋ ਹੁਤ੍ਵਾ, ਸੁਤ੍ਵਾ ਵਾਕ੍ਯਂ ਮਨੋਰਮਂ;

ਹਿਮਵਨ੍ਤਂ ਗਮਿਤ੍ਵਾਨ, ਆਹਿਤ੍ਵਾ [ਆਹਤ੍ਵਾ (ਸੀ. ਪੀ.)] ਪੁਪ੍ਫਸਞ੍ਚਯਂ.

੧੧. ‘‘ਪੂਜੇਤ੍ਵਾ ਲੋਕਸਰਣਂ, ਤਂ ਠਾਨਮਭਿਪਤ੍ਥਯਿਂ;

ਤਦਾ ਮਮਾਸਯਂ ਞਤ੍ਵਾ, ਬ੍ਯਾਕਾਸਿ ਸ ਰਣਞ੍ਜਹੋ.

੧੨. ‘‘‘ਪਸ੍ਸਥੇਤਂ ਇਸਿਵਰਂ, ਨਿਦ੍ਧਨ੍ਤਕਨਕਤ੍ਤਚਂ;

ਉਦ੍ਧਗ੍ਗਲੋਮਂ ਪੀਣਂਸਂ, ਅਚਲਂ ਪਞ੍ਜਲਿਂ ਠਿਤਂ.

੧੩. ‘‘‘ਹਾਸਂ ਸੁਪੁਣ੍ਣਨਯਨਂ, ਬੁਦ੍ਧਵਣ੍ਣਗਤਾਸਯਂ;

ਧਮ੍ਮਜਂ ਉਗ੍ਗਹਦਯਂ [ਧਮ੍ਮਂਵ ਵਿਗ੍ਗਹਵਰਂ (ਸੀ.), ਧਮ੍ਮਪਟਿਗ੍ਗਹਵਰਂ (ਪੀ.)], ਅਮਤਾਸਿਤ੍ਤਸਨ੍ਨਿਭਂ’.

੧੪. ‘‘ਕਚ੍ਚਾਨਸ੍ਸ ਗੁਣਂ ਸੁਤ੍ਵਾ, ਤਂ ਠਾਨਂ ਪਤ੍ਥਯਂ ਠਿਤੋ;

ਅਨਾਗਤਮ੍ਹਿ ਅਦ੍ਧਾਨੇ, ਗੋਤਮਸ੍ਸ ਮਹਾਮੁਨੇ.

੧੫. ‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਕਚ੍ਚਾਨੋ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ.

੧੬. ‘‘ਬਹੁਸ੍ਸੁਤੋ ਮਹਾਞਾਣੀ, ਅਧਿਪ੍ਪਾਯਵਿਦੂ ਮੁਨੇ;

ਪਾਪੁਣਿਸ੍ਸਤਿ ਤਂ ਠਾਨਂ, ਯਥਾਯਂ ਬ੍ਯਾਕਤੋ ਮਯਾ.

੧੭. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੮. ‘‘ਦੁਵੇ ਭਵੇ ਸਂਸਰਾਮਿ, ਦੇਵਤ੍ਤੇ ਅਥ ਮਾਨੁਸੇ;

ਅਞ੍ਞਂ ਗਤਿਂ ਨ ਗਚ੍ਛਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੯. ‘‘ਦੁਵੇ ਕੁਲੇ ਪਜਾਯਾਮਿ, ਖਤ੍ਤਿਯੇ ਅਥ ਬ੍ਰਾਹ੍ਮਣੇ;

ਨੀਚੇ ਕੁਲੇ ਨ ਜਾਯਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੦. ‘‘ਪਚ੍ਛਿਮੇ ਚ ਭਵੇ ਦਾਨਿ, ਜਾਤੋ ਉਜ੍ਜੇਨਿਯਂ ਪੁਰੇ [ਜਾਤੋ, ਉਜ੍ਜੇਨਿਯਂ ਪੁਰੇ ਰਮੇ (ਸ੍ਯਾ.)];

ਪਜ੍ਜੋਤਸ੍ਸ ਚ ਚਣ੍ਡਸ੍ਸ, ਪੁਰੋਹਿਤਦਿਜਾਧਿਨੋ [ਪੁਰੋਹਿਤਦਿਜਾਤਿਨੋ (ਸੀ. ਪੀ.)].

੨੧. ‘‘ਪੁਤ੍ਤੋ ਤਿਰਿਟਿਵਚ੍ਛਸ੍ਸ [ਤਿਰਿਟਵਚ੍ਛਸ੍ਸ (ਸੀ.), ਤਿਪਿਤਿਵਚ੍ਛਸ੍ਸ (ਸ੍ਯਾ.)], ਨਿਪੁਣੋ ਵੇਦਪਾਰਗੂ;

ਮਾਤਾ ਚ ਚਨ੍ਦਿਮਾ ਨਾਮ, ਕਚ੍ਚਾਨੋਹਂ ਵਰਤ੍ਤਚੋ.

੨੨. ‘‘ਵੀਮਂਸਨਤ੍ਥਂ ਬੁਦ੍ਧਸ੍ਸ, ਭੂਮਿਪਾਲੇਨ ਪੇਸਿਤੋ;

ਦਿਸ੍ਵਾ ਮੋਕ੍ਖਪੁਰਦ੍ਵਾਰਂ, ਨਾਯਕਂ ਗੁਣਸਞ੍ਚਯਂ.

੨੩. ‘‘ਸੁਤ੍ਵਾ ਚ ਵਿਮਲਂ ਵਾਕ੍ਯਂ, ਗਤਿਪਙ੍ਕਵਿਸੋਸਨਂ;

ਪਾਪੁਣਿਂ ਅਮਤਂ ਸਨ੍ਤਂ, ਸੇਸੇਹਿ ਸਹ ਸਤ੍ਤਹਿ.

੨੪. ‘‘ਅਧਿਪ੍ਪਾਯਵਿਦੂ ਜਾਤੋ, ਸੁਗਤਸ੍ਸ ਮਹਾਮਤੇ;

ਠਪਿਤੋ ਏਤਦਗ੍ਗੇ ਚ, ਸੁਸਮਿਦ੍ਧਮਨੋਰਥੋ.

੨੫. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੨੬. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ; ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੨੭. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮਹਾਕਚ੍ਚਾਯਨੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਮਹਾਕਚ੍ਚਾਯਨਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਵਕ੍ਕਲਿਤ੍ਥੇਰਅਪਦਾਨਂ

੨੮. ‘‘ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ;

ਅਨੋਮਨਾਮੋ ਅਮਿਤੋ, ਨਾਮੇਨ ਪਦੁਮੁਤ੍ਤਰੋ.

੨੯. ‘‘ਪਦੁਮਾਕਾਰਵਦਨੋ, ਪਦੁਮਾਮਲਸੁਚ੍ਛਵੀ;

ਲੋਕੇਨਾਨੁਪਲਿਤ੍ਤੋਵ ਤੋਯੇਨ ਪਦੁਮਂ ਯਥਾ.

੩੦. ‘‘ਵੀਰੋ ਪਦੁਮਪਤ੍ਤਕ੍ਖੋ, ਕਨ੍ਤੋ ਚ ਪਦੁਮਂ ਯਥਾ;

ਪਦੁਮੁਤ੍ਤਰਗਨ੍ਧੋਵ, ਤਸ੍ਮਾ ਸੋ ਪਦੁਮੁਤ੍ਤਰੋ.

੩੧. ‘‘ਲੋਕਜੇਟ੍ਠੋ ਚ ਨਿਮ੍ਮਾਨੋ, ਅਨ੍ਧਾਨਂ ਨਯਨੂਪਮੋ;

ਸਨ੍ਤਵੇਸੋ ਗੁਣਨਿਧਿ, ਕਰੁਣਾਮਤਿਸਾਗਰੋ.

੩੨. ‘‘ਸ ਕਦਾਚਿ ਮਹਾਵੀਰੋ, ਬ੍ਰਹ੍ਮਾਸੁਰਸੁਰਚ੍ਚਿਤੋ;

ਸਦੇਵਮਨੁਜਾਕਿਣ੍ਣੇ, ਜਨਮਜ੍ਝੇ ਜਿਨੁਤ੍ਤਮੋ [ਜਨੁਤ੍ਤਮੋ (ਸ੍ਯਾ. ਪੀ.), ਅਨੁਤ੍ਤਮੋ (ਕ.) ਵਙ੍ਗੀਸਤ੍ਥੇਰਾਪਦਾਨੇਪਿ].

੩੩. ‘‘ਵਦਨੇਨ ਸੁਗਨ੍ਧੇਨ, ਮਧੁਰੇਨ ਰੁਤੇਨ ਚ;

ਰਞ੍ਜਯਂ ਪਰਿਸਂ ਸਬ੍ਬਂ, ਸਨ੍ਥਵੀ ਸਾਵਕਂ ਸਕਂ.

੩੪. ‘‘ਸਦ੍ਧਾਧਿਮੁਤ੍ਤੋ ਸੁਮਤਿ, ਮਮ ਦਸ੍ਸਨਲਾਲਸੋ [ਦਸ੍ਸਨਸਾਲਯੋ (ਸ੍ਯਾ.)];

ਨਤ੍ਥਿ ਏਤਾਦਿਸੋ ਅਞ੍ਞੋ, ਯਥਾਯਂ ਭਿਕ੍ਖੁ ਵਕ੍ਕਲਿ.

੩੫. ‘‘ਤਦਾਹਂ ਹਂਸਵਤਿਯਂ, ਨਗਰੇ ਬ੍ਰਾਹ੍ਮਣਤ੍ਰਜੋ;

ਹੁਤ੍ਵਾ ਸੁਤ੍ਵਾ ਚ ਤਂ ਵਾਕ੍ਯਂ, ਤਂ ਠਾਨਮਭਿਰੋਚਯਿਂ.

੩੬. ‘‘ਸਸਾਵਕਂ ਤਂ ਵਿਮਲਂ, ਨਿਮਨ੍ਤੇਤ੍ਵਾ ਤਥਾਗਤਂ;

ਸਤ੍ਤਾਹਂ ਭੋਜਯਿਤ੍ਵਾਨ, ਦੁਸ੍ਸੇਹਚ੍ਛਾਦਯਿਂ ਤਦਾ.

੩੭. ‘‘ਨਿਪਚ੍ਚ ਸਿਰਸਾ ਤਸ੍ਸ, ਅਨਨ੍ਤਗੁਣਸਾਗਰੇ;

ਨਿਮੁਗ੍ਗੋ ਪੀਤਿਸਮ੍ਪੁਣ੍ਣੋ, ਇਦਂ ਵਚਨਮਬ੍ਰਵਿਂ.

੩੮. ‘‘‘ਯੋ ਸੋ ਤਯਾ ਸਨ੍ਥਵਿਤੋ, ਇਤੋ ਸਤ੍ਤਮਕੇ ਮੁਨਿ [ਇਧ ਸਦ੍ਧਾਧਿਮੁਤ੍ਤੋ ਇਸਿ (ਸ੍ਯਾ.), ਇਤੋ ਸਤ੍ਤਮਕੇਹਨਿ (ਸੀ. ਪੀ.)];

ਭਿਕ੍ਖੁ ਸਦ੍ਧਾਵਤਂ ਅਗ੍ਗੋ, ਤਾਦਿਸੋ ਹੋਮਹਂ ਮੁਨੇ’.

੩੯. ‘‘ਏਵਂ ਵੁਤ੍ਤੇ ਮਹਾਵੀਰੋ, ਅਨਾਵਰਣਦਸ੍ਸਨੋ;

ਇਮਂ ਵਾਕ੍ਯਂ ਉਦੀਰੇਸਿ, ਪਰਿਸਾਯ ਮਹਾਮੁਨਿ.

੪੦. ‘‘‘ਪਸ੍ਸਥੇਤਂ ਮਾਣਵਕਂ, ਪੀਤਮਟ੍ਠਨਿਵਾਸਨਂ;

ਹੇਮਯਞ੍ਞੋਪਚਿਤਙ੍ਗਂ [ਹੇਮਯਞ੍ਞੋਪਵੀਤਙ੍ਗਂ (ਸੀ.)], ਜਨਨੇਤ੍ਤਮਨੋਹਰਂ.

੪੧. ‘‘‘ਏਸੋ ਅਨਾਗਤਦ੍ਧਾਨੇ, ਗੋਤਮਸ੍ਸ ਮਹੇਸਿਨੋ;

ਅਗ੍ਗੋ ਸਦ੍ਧਾਧਿਮੁਤ੍ਤਾਨਂ, ਸਾਵਕੋਯਂ ਭਵਿਸ੍ਸਤਿ.

੪੨. ‘‘‘ਦੇਵਭੂਤੋ ਮਨੁਸ੍ਸੋ ਵਾ, ਸਬ੍ਬਸਨ੍ਤਾਪਵਜ੍ਜਿਤੋ;

ਸਬ੍ਬਭੋਗਪਰਿਬ੍ਯੂਲ਼੍ਹੋ, ਸੁਖਿਤੋ ਸਂਸਰਿਸ੍ਸਤਿ.

੪੩. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੪੪. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਵਕ੍ਕਲਿ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ’.

੪੫. ‘‘ਤੇਨ ਕਮ੍ਮਵਿਸੇਸੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੪੬. ‘‘ਸਬ੍ਬਤ੍ਥ ਸੁਖਿਤੋ ਹੁਤ੍ਵਾ, ਸਂਸਰਨ੍ਤੋ ਭਵਾਭਵੇ;

ਸਾਵਤ੍ਥਿਯਂ ਪੁਰੇ ਜਾਤੋ, ਕੁਲੇ ਅਞ੍ਞਤਰੇ ਅਹਂ.

੪੭. ‘‘ਨੋਨੀਤਸੁਖੁਮਾਲਂ ਮਂ, ਜਾਤਪਲ੍ਲਵਕੋਮਲਂ;

ਮਨ੍ਦਂ ਉਤ੍ਤਾਨਸਯਨਂ, ਪਿਸਾਚਭਯਤਜ੍ਜਿਤਾ.

੪੮. ‘‘ਪਾਦਮੂਲੇ ਮਹੇਸਿਸ੍ਸ, ਸਾਯੇਸੁਂ ਦੀਨਮਾਨਸਾ;

ਇਮਂ ਦਦਾਮ ਤੇ ਨਾਥ, ਸਰਣਂ ਹੋਹਿ ਨਾਯਕ.

੪੯. ‘‘ਤਦਾ ਪਟਿਗ੍ਗਹਿ ਸੋ ਮਂ, ਭੀਤਾਨਂ ਸਰਣੋ ਮੁਨਿ;

ਜਾਲਿਨਾ ਚਕ੍ਕਙ੍ਕਿਤੇਨ [ਸਙ੍ਕਲਙ੍ਕੇਨ (ਸੀ.)], ਮੁਦੁਕੋਮਲਪਾਣਿਨਾ.

੫੦. ‘‘ਤਦਾ ਪਭੁਤਿ ਤੇਨਾਹਂ, ਅਰਕ੍ਖੇਯ੍ਯੇਨ ਰਕ੍ਖਿਤੋ;

ਸਬ੍ਬਵੇਰਵਿਨਿਮੁਤ੍ਤੋ [ਸਬ੍ਬਬ੍ਯਾਧਿਵਿਨਿਮੁਤ੍ਤੋ (ਸ੍ਯਾ.), ਸਬ੍ਬੂਪਧਿਵਿਨਿਮੁਤ੍ਤੋ (ਪੀ.)], ਸੁਖੇਨ ਪਰਿਵੁਦ੍ਧਿਤੋ.

੫੧. ‘‘ਸੁਗਤੇਨ ਵਿਨਾ ਭੂਤੋ, ਉਕ੍ਕਣ੍ਠਾਮਿ ਮੁਹੁਤ੍ਤਕਂ;

ਜਾਤਿਯਾ ਸਤ੍ਤਵਸ੍ਸੋਹਂ, ਪਬ੍ਬਜਿਂ ਅਨਗਾਰਿਯਂ.

੫੨. ‘‘ਸਬ੍ਬਪਾਰਮਿਸਮ੍ਭੂਤਂ, ਨੀਲਕ੍ਖਿਨਯਨਂ [ਲਙ੍ਕਿਨੀਲਯਨਂ (ਸੀ.)] ਵਰਂ;

ਰੂਪਂ ਸਬ੍ਬਸੁਭਾਕਿਣ੍ਣਂ, ਅਤਿਤ੍ਤੋ ਵਿਹਰਾਮਹਂ [ਵਿਹਯਾਮਹਂ (ਸੀ. ਪੀ.)].

੫੩. ‘‘ਬੁਦ੍ਧਰੂਪਰਤਿਂ [ਬੁਦ੍ਧੋ ਰੂਪਰਤਿਂ (ਸੀ.)] ਞਤ੍ਵਾ, ਤਦਾ ਓਵਦਿ ਮਂ ਜਿਨੋ;

‘ਅਲਂ ਵਕ੍ਕਲਿ ਕਿਂ ਰੂਪੇ, ਰਮਸੇ ਬਾਲਨਨ੍ਦਿਤੇ.

੫੪. ‘‘‘ਯੋ ਹਿ ਪਸ੍ਸਤਿ ਸਦ੍ਧਮ੍ਮਂ, ਸੋ ਮਂ ਪਸ੍ਸਤਿ ਪਣ੍ਡਿਤੋ;

ਅਪਸ੍ਸਮਾਨੋ ਸਦ੍ਧਮ੍ਮਂ, ਮਂ ਪਸ੍ਸਮ੍ਪਿ ਨ ਪਸ੍ਸਤਿ.

੫੫. ‘‘‘ਅਨਨ੍ਤਾਦੀਨਵੋ ਕਾਯੋ, ਵਿਸਰੁਕ੍ਖਸਮੂਪਮੋ;

ਆਵਾਸੋ ਸਬ੍ਬਰੋਗਾਨਂ, ਪੁਞ੍ਜੋ ਦੁਕ੍ਖਸ੍ਸ ਕੇਵਲੋ.

੫੬. ‘‘‘ਨਿਬ੍ਬਿਨ੍ਦਿਯ ਤਤੋ ਰੂਪੇ, ਖਨ੍ਧਾਨਂ ਉਦਯਬ੍ਬਯਂ;

ਪਸ੍ਸ ਉਪਕ੍ਕਿਲੇਸਾਨਂ, ਸੁਖੇਨਨ੍ਤਂ ਗਮਿਸ੍ਸਤਿ’.

੫੭. ‘‘ਏਵਂ ਤੇਨਾਨੁਸਿਟ੍ਠੋਹਂ, ਨਾਯਕੇਨ ਹਿਤੇਸਿਨਾ;

ਗਿਜ੍ਝਕੂਟਂ ਸਮਾਰੁਯ੍ਹ, ਝਾਯਾਮਿ ਗਿਰਿਕਨ੍ਦਰੇ.

੫੮. ‘‘ਠਿਤੋ ਪਬ੍ਬਤਪਾਦਮ੍ਹਿ, ਅਸ੍ਸਾਸਯਿ [ਮਮਾਹਸੋ (ਸੀ.)] ਮਹਾਮੁਨਿ;

ਵਕ੍ਕਲੀਤਿ ਜਿਨੋ ਵਾਚਂ, ਤਂ ਸੁਤ੍ਵਾ ਮੁਦਿਤੋ ਅਹਂ.

੫੯. ‘‘ਪਕ੍ਖਨ੍ਦਿਂ ਸੇਲਪਬ੍ਭਾਰੇ, ਅਨੇਕਸਤਪੋਰਿਸੇ;

ਤਦਾ ਬੁਦ੍ਧਾਨੁਭਾਵੇਨ, ਸੁਖੇਨੇਵ ਮਹਿਂ ਗਤੋ.

੬੦. ‘‘ਪੁਨੋਪਿ [ਪੁਨਾਪਿ (ਸ੍ਯਾ.), ਮੁਨਿ ਮਂ (ਕ.)] ਧਮ੍ਮਂ ਦੇਸੇਤਿ, ਖਨ੍ਧਾਨਂ ਉਦਯਬ੍ਬਯਂ;

ਤਮਹਂ ਧਮ੍ਮਮਞ੍ਞਾਯ, ਅਰਹਤ੍ਤਮਪਾਪੁਣਿਂ.

੬੧. ‘‘ਸੁਮਹਾਪਰਿਸਮਜ੍ਝੇ, ਤਦਾ ਮਂ ਚਰਣਨ੍ਤਗੋ;

ਅਗ੍ਗਂ ਸਦ੍ਧਾਧਿਮੁਤ੍ਤਾਨਂ, ਪਞ੍ਞਪੇਸਿ ਮਹਾਮਤਿ.

੬੨. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੬੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੬੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੬੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਵਕ੍ਕਲਿਤ੍ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਵਕ੍ਕਲਿਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਮਹਾਕਪ੍ਪਿਨਤ੍ਥੇਰਅਪਦਾਨਂ

੬੬. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਉਦਿਤੋ ਅਜਟਾਕਾਸੇ [ਜਗਦਾਕਾਸੇ (ਸੀ.), ਜਲਦਾਕਾਸੇ (ਪੀ.)], ਰਵੀਵ ਸਰਦਮ੍ਬਰੇ.

੬੭. ‘‘ਵਚਨਾਭਾਯ ਬੋਧੇਤਿ, ਵੇਨੇਯ੍ਯਪਦੁਮਾਨਿ ਸੋ;

ਕਿਲੇਸਪਙ੍ਕਂ ਸੋਸੇਤਿ, ਮਤਿਰਂਸੀਹਿ ਨਾਯਕੋ.

੬੮. ‘‘ਤਿਤ੍ਥਿਯਾਨਂ ਯਸੇ [ਯਸੋ (ਸੀ. ਪੀ.)] ਹਨ੍ਤਿ, ਖਜ੍ਜੋਤਾਭਾ ਯਥਾ ਰਵਿ;

ਸਚ੍ਚਤ੍ਥਾਭਂ ਪਕਾਸੇਤਿ, ਰਤਨਂਵ ਦਿਵਾਕਰੋ.

੬੯. ‘‘ਗੁਣਾਨਂ ਆਯਤਿਭੂਤੋ, ਰਤਨਾਨਂਵ ਸਾਗਰੋ;

ਪਜ੍ਜੁਨ੍ਨੋਰਿਵ ਭੂਤਾਨਿ, ਧਮ੍ਮਮੇਘੇਨ ਵਸ੍ਸਤਿ.

੭੦. ‘‘ਅਕ੍ਖਦਸ੍ਸੋ ਤਦਾ ਆਸਿਂ, ਨਗਰੇ ਹਂਸਸਵ੍ਹਯੇ;

ਉਪੇਚ੍ਚ ਧਮ੍ਮਮਸ੍ਸੋਸਿਂ, ਜਲਜੁਤ੍ਤਮਨਾਮਿਨੋ.

੭੧. ‘‘ਓਵਾਦਕਸ੍ਸ ਭਿਕ੍ਖੂਨਂ, ਸਾਵਕਸ੍ਸ ਕਤਾਵਿਨੋ;

ਗੁਣਂ ਪਕਾਸਯਨ੍ਤਸ੍ਸ, ਤਪ੍ਪਯਨ੍ਤਸ੍ਸ [ਤੋਸਯਨ੍ਤਸ੍ਸ (ਸੀ.), ਹਾਸਯਨ੍ਤਸ੍ਸ (ਸ੍ਯਾ.), ਵਾਸਯਨ੍ਤਸ੍ਸ (ਪੀ.)] ਮੇ ਮਨਂ.

੭੨. ‘‘ਸੁਤ੍ਵਾ ਪਤੀਤੋ ਸੁਮਨੋ, ਨਿਮਨ੍ਤੇਤ੍ਵਾ ਤਥਾਗਤਂ;