੧੦. ਮੋਘਰਾਜਤ੍ਥੇਰਅਪਦਾਨਂ

੩੨੭. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਲੋਕਵਿਦੂ ਮੁਨਿ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਚਕ੍ਖੁਮਾ.

੩੨੮. ‘‘ਓਵਾਦਕੋ ਵਿਞ੍ਞਾਪਕੋ, ਤਾਰਕੋ ਸਬ੍ਬਪਾਣਿਨਂ;

ਦੇਸਨਾਕੁਸਲੋ ਬੁਦ੍ਧੋ, ਤਾਰੇਸਿ ਜਨਤਂ ਬਹੁਂ.

੩੨੯. ‘‘ਅਨੁਕਮ੍ਪਕੋ ਕਾਰੁਣਿਕੋ, ਹਿਤੇਸੀ ਸਬ੍ਬਪਾਣਿਨਂ;

ਸਮ੍ਪਤ੍ਤੇ ਤਿਤ੍ਥਿਯੇ ਸਬ੍ਬੇ, ਪਞ੍ਚਸੀਲੇ ਪਤਿਟ੍ਠਪਿ.

੩੩੦. ‘‘ਏਵਂ ਨਿਰਾਕੁਲਂ ਆਸਿ, ਸੁਞ੍ਞਤਂ ਤਿਤ੍ਥਿਯੇਹਿ ਚ;

ਵਿਚਿਤ੍ਤਂ ਅਰਹਨ੍ਤੇਹਿ, ਵਸੀਭੂਤੇਹਿ ਤਾਦਿਭਿ.

੩੩੧. ‘‘ਰਤਨਾਨਟ੍ਠਪਞ੍ਞਾਸਂ, ਉਗ੍ਗਤੋ ਸੋ ਮਹਾਮੁਨਿ;

ਕਞ੍ਚਨਗ੍ਘਿਯਸਙ੍ਕਾਸੋ, ਬਾਤ੍ਤਿਂਸਵਰਲਕ੍ਖਣੋ.

੩੩੨. ‘‘ਵਸ੍ਸਸਤਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੩੩੩. ‘‘ਤਦਾਹਂ ਹਂਸਵਤਿਯਂ, ਕੁਲੇ ਅਞ੍ਞਤਰੇ ਅਹੁਂ;

ਪਰਕਮ੍ਮਾਯਨੇ ਯੁਤ੍ਤੋ, ਨਤ੍ਥਿ ਮੇ ਕਿਞ੍ਚਿ ਸਂਧਨਂ.

੩੩੪. ‘‘ਪਟਿਕ੍ਕਮਨਸਾਲਾਯਂ, ਵਸਨ੍ਤੋ ਕਤਭੂਮਿਯਂ;

ਅਗ੍ਗਿਂ ਉਜ੍ਜਾਲਯਿਂ ਤਤ੍ਥ, ਦਲ਼੍ਹਂ ਕਣ੍ਹਾਸਿ ਸਾ [ਕਣ੍ਹਾ ਸਿਯਾ (ਸੀ. ਪੀ.), ਡਯ੍ਹਕਣ੍ਹਾ ਸਿਲਾ (ਸ੍ਯਾ.)] ਹੀ.

੩੩੫. ‘‘ਤਦਾ ਪਰਿਸਤਿਂ ਨਾਥੋ, ਚਤੁਸਚ੍ਚਪਕਾਸਕੋ;

ਸਾਵਕਂ ਸਮ੍ਪਕਿਤ੍ਤੇਸਿ, ਲੂਖਚੀਵਰਧਾਰਕਂ.

੩੩੬. ‘‘ਤਸ੍ਸ ਤਮ੍ਹਿ ਗੁਣੇ ਤੁਟ੍ਠੋ, ਪਣਿਪਚ੍ਚ [ਪਤਿਪਜ੍ਜ (ਸ੍ਯਾ.)] ਤਥਾਗਤਂ;

ਲੂਖਚੀਵਰਧਾਰਗ੍ਗਂ, ਪਤ੍ਥਯਿਂ ਠਾਨਮੁਤ੍ਤਮਂ.

੩੩੭. ‘‘ਤਦਾ ਅਵੋਚ ਭਗਵਾ, ਸਾਵਕੇ ਪਦੁਮੁਤ੍ਤਰੋ;

‘ਪਸ੍ਸਥੇਤਂ ਪੁਰਿਸਕਂ, ਕੁਚੇਲਂ ਤਨੁਦੇਹਕਂ.

੩੩੮. ‘‘‘ਪੀਤਿਪ੍ਪਸਨ੍ਨਵਦਨਂ, ਸਦ੍ਧਾਧਨਸਮਨ੍ਵਿਤਂ [ਸਦ੍ਧਾਸ੍ਨੇਹਸਮਨ੍ਵਤਂ (ਕ.)];

ਉਦਗ੍ਗਤਨੁਜਂ ਹਟ੍ਠਂ, ਅਚਲਂ ਸਾਲਪਿਣ੍ਡਿਤਂ.

੩੩੯. ‘‘‘ਏਸੋ ਪਤ੍ਥੇਤਿ ਤਂ ਠਾਨਂ, ਸਚ੍ਚਸੇਨਸ੍ਸ ਭਿਕ੍ਖੁਨੋ;

ਲੂਖਚੀਵਰਧਾਰਿਸ੍ਸ, ਤਸ੍ਸ ਵਣ੍ਣਸਿਤਾਸਯੋ [ਵਣ੍ਣਗਤਾਸਯੋ (ਸੀ. ਸ੍ਯਾ. ਪੀ.)].

੩੪੦. ‘‘ਤਂ ਸੁਤ੍ਵਾ ਮੁਦਿਤੋ ਹੁਤ੍ਵਾ, ਨਿਪਚ੍ਚ ਸਿਰਸਾ ਜਿਨਂ;

ਯਾਵਜੀਵਂ ਸੁਭਂ ਕਮ੍ਮਂ, ਕਰਿਤ੍ਵਾ ਜਿਨਸਾਸਨੇ.

੩੪੧. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸੂਪਗੋ ਅਹਂ.

੩੪੨. ‘‘ਪਟਿਕ੍ਕਮਨਸਾਲਾਯਂ, ਭੂਮਿਦਾਹਕਕਮ੍ਮੁਨਾ;

ਸਮਸਹਸ੍ਸਂ ਨਿਰਯੇ, ਅਦਯ੍ਹਿਂ ਵੇਦਨਾਟ੍ਟਿਤੋ.

੩੪੩. ‘‘ਤੇਨ ਕਮ੍ਮਾਵਸੇਸੇਨ, ਪਞ੍ਚ ਜਾਤਿਸਤਾਨਿਹਂ;

ਮਨੁਸ੍ਸੋ ਕੁਲਜੋ ਹੁਤ੍ਵਾ, ਜਾਤਿਯਾ ਲਕ੍ਖਣਙ੍ਕਿਤੋ.

੩੪੪. ‘‘ਪਞ੍ਚ ਜਾਤਿਸਤਾਨੇਵ, ਕੁਟ੍ਠਰੋਗਸਮਪ੍ਪਿਤੋ;

ਮਹਾਦੁਕ੍ਖਂ ਅਨੁਭਵਿਂ, ਤਸ੍ਸ ਕਮ੍ਮਸ੍ਸ ਵਾਹਸਾ.

੩੪੫. ‘‘ਇਮਸ੍ਮਿਂ ਭਦ੍ਦਕੇ ਕਪ੍ਪੇ, ਉਪਰਿਟ੍ਠਂ ਯਸਸ੍ਸਿਨਂ;

ਪਿਣ੍ਡਪਾਤੇਨ ਤਪ੍ਪੇਸਿਂ, ਪਸਨ੍ਨਮਾਨਸੋ ਅਹਂ.

੩੪੬. ‘‘ਤੇਨ ਕਮ੍ਮਵਿਸੇਸੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੩੪੭. ‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਅਜਾਯਿਂ ਖਤ੍ਤਿਯੇ ਕੁਲੇ;

ਪਿਤੁਨੋ ਅਚ੍ਚਯੇਨਾਹਂ, ਮਹਾਰਜ੍ਜਸਮਪ੍ਪਿਤੋ.

੩੪੮. ‘‘ਕੁਟ੍ਠਰੋਗਾਧਿਭੂਤੋਹਂ, ਨ ਰਤਿਂ ਨ ਸੁਖਂ ਲਭੇ;

ਮੋਘਂ ਰਜ੍ਜਂ ਸੁਖਂ ਯਸ੍ਮਾ, ਮੋਘਰਾਜਾ ਤਤੋ ਅਹਂ.

੩੪੯. ‘‘ਕਾਯਸ੍ਸ ਦੋਸਂ ਦਿਸ੍ਵਾਨ, ਪਬ੍ਬਜਿਂ ਅਨਗਾਰਿਯਂ;

ਬਾਵਰਿਸ੍ਸ ਦਿਜਗ੍ਗਸ੍ਸ, ਸਿਸ੍ਸਤ੍ਤਂ ਅਜ੍ਝੁਪਾਗਮਿਂ.

੩੫੦. ‘‘ਮਹਤਾ ਪਰਿਵਾਰੇਨ, ਉਪੇਚ੍ਚ ਨਰਨਾਯਕਂ;

ਅਪੁਚ੍ਛਿਂ ਨਿਪੁਣਂ ਪਞ੍ਹਂ, ਤਂ ਵੀਰਂ ਵਾਦਿਸੂਦਨਂ.

੩੫੧. ‘‘‘ਅਯਂ ਲੋਕੋ ਪਰੋ ਲੋਕੋ, ਬ੍ਰਹ੍ਮਲੋਕੋ ਸਦੇਵਕੋ;

ਦਿਟ੍ਠਿਂ ਨੋ [ਦਿਟ੍ਠਾ ਨੋ (ਸੀ.), ਦਿਟ੍ਠਂ ਨੋ (ਪੀ.), ਦਿਟ੍ਠਿਂ ਤੇ (ਸ੍ਯਾ.)] ਨਾਭਿਜਾਨਾਮਿ, ਗੋਤਮਸ੍ਸ ਯਸਸ੍ਸਿਨੋ.

੩੫੨. ‘‘‘ਏਵਾਭਿਕ੍ਕਨ੍ਤਦਸ੍ਸਾਵਿਂ, ਅਤ੍ਥਿ ਪਞ੍ਹੇਨ ਆਗਮਂ;

ਕਥਂ ਲੋਕਂ ਅਵੇਕ੍ਖਨ੍ਤਂ, ਮਚ੍ਚੁਰਾਜਾ ਨ ਪਸ੍ਸਤਿ’.

੩੫੩. ‘‘‘ਸੁਞ੍ਞਤੋ ਲੋਕਂ ਅਵੇਕ੍ਖਸ੍ਸੁ, ਮੋਘਰਾਜ ਸਦਾ ਸਤੋ;

ਅਤ੍ਤਾਨੁਦਿਟ੍ਠਿਂ ਉਹਚ੍ਚ, ਏਵਂ ਮਚ੍ਚੁਤਰੋ ਸਿਯਾ.

੩੫੪. ‘‘‘ਏਵਂ ਲੋਕਂ ਅਵੇਕ੍ਖਨ੍ਤਂ, ਮਚ੍ਚੁਰਾਜਾ ਨ ਪਸ੍ਸਤਿ’;

ਇਤਿ ਮਂ ਅਭਣਿ ਬੁਦ੍ਧੋ, ਸਬ੍ਬਰੋਗਤਿਕਿਚ੍ਛਕੋ.

੩੫੫. ‘‘ਸਹ ਗਾਥਾਵਸਾਨੇਨ, ਕੇਸਮਸ੍ਸੁਵਿਵਜ੍ਜਿਤੋ;

ਕਾਸਾਵਵਤ੍ਥਵਸਨੋ, ਆਸਿਂ ਭਿਕ੍ਖੁ ਤਥਾਰਹਾ.

੩੫੬. ‘‘ਸਙ੍ਘਿਕੇਸੁ ਵਿਹਾਰੇਸੁ, ਨ ਵਸਿਂ ਰੋਗਪੀਲ਼ਿਤੋ;

ਮਾ ਵਿਹਾਰੋ ਪਦੁਸ੍ਸੀਤਿ, ਵਾਤਰੋਗੇਹਿ ਪੀਲ਼ਿਤੋ [ਵਾਚਾਯਾਭਿਸੁਪੀਲ਼ਿਤੋ (ਸ੍ਯਾ. ਪੀ.), ਵਾਤਰੋਗੀ ਸੁਪੀਲ਼ਿਤੋ (ਕ.)].

੩੫੭. ‘‘ਸਙ੍ਕਾਰਕੂਟਾ ਆਹਿਤ੍ਵਾ, ਸੁਸਾਨਾ ਰਥਿਕਾਹਿ ਚ;

ਤਤੋ ਸਙ੍ਘਾਟਿਂ ਕਰਿਤ੍ਵਾ, ਧਾਰਯਿਂ ਲੂਖਚੀਵਰਂ.

੩੫੮. ‘‘ਮਹਾਭਿਸਕ੍ਕੋ ਤਸ੍ਮਿਂ ਮੇ, ਗੁਣੇ ਤੁਟ੍ਠੋ ਵਿਨਾਯਕੋ;

ਲੂਖਚੀਵਰਧਾਰੀਨਂ, ਏਤਦਗ੍ਗੇ ਠਪੇਸਿ ਮਂ.

੩੫੯. ‘‘ਪੁਞ੍ਞਪਾਪਪਰਿਕ੍ਖੀਣੋ, ਸਬ੍ਬਰੋਗਵਿਵਜ੍ਜਿਤੋ;

ਸਿਖੀਵ ਅਨੁਪਾਦਾਨੋ, ਨਿਬ੍ਬਾਯਿਸ੍ਸਮਨਾਸਵੋ.

੩੬੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੩੬੧. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੬੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮੋਘਰਾਜਾ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਮੋਘਰਾਜਤ੍ਥੇਰਸ੍ਸਾਪਦਾਨਂ ਦਸਮਂ.

ਕਚ੍ਚਾਯਨਵਗ੍ਗੋ ਚਤੁਪਞ੍ਞਾਸਮੋ.