੮. ਉਰੁਵੇਲ਼ਕਸ੍ਸਪਤ੍ਥੇਰਅਪਦਾਨਂ

੨੫੧. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਲੋਕਵਿਦੂ ਮੁਨਿ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਚਕ੍ਖੁਮਾ.

੨੫੨. ‘‘ਓਵਾਦਕੋ ਵਿਞ੍ਞਾਪਕੋ, ਤਾਰਕੋ ਸਬ੍ਬਪਾਣਿਨਂ;

ਦੇਸਨਾਕੁਸਲੋ ਬੁਦ੍ਧੋ, ਤਾਰੇਸਿ ਜਨਤਂ ਬਹੁਂ.

੨੫੩. ‘‘ਅਨੁਕਮ੍ਪਕੋ ਕਾਰੁਣਿਕੋ, ਹਿਤੇਸੀ ਸਬ੍ਬਪਾਣਿਨਂ;

ਸਮ੍ਪਤ੍ਤੇ ਤਿਤ੍ਥਿਯੇ ਸਬ੍ਬੇ, ਪਞ੍ਚਸੀਲੇ ਪਤਿਟ੍ਠਪਿ.

੨੫੪. ‘‘ਏਵਂ ਨਿਰਾਕੁਲਂ ਆਸਿ, ਸੁਞ੍ਞਤਂ ਤਿਤ੍ਥਿਯੇਹਿ ਚ;

ਵਿਚਿਤ੍ਤਂ ਅਰਹਨ੍ਤੇਹਿ, ਵਸੀਭੂਤੇਹਿ ਤਾਦਿਭਿ.

੨੫੫. ‘‘ਰਤਨਾਨਟ੍ਠਪਞ੍ਞਾਸਂ, ਉਗ੍ਗਤੋ ਸੋ ਮਹਾਮੁਨਿ;

ਕਞ੍ਚਨਗ੍ਘਿਯਸਙ੍ਕਾਸੋ, ਬਾਤ੍ਤਿਂਸਵਰਲਕ੍ਖਣੋ.

੨੫੬. ‘‘ਵਸ੍ਸਸਤਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੨੫੭. ‘‘ਤਦਾਹਂ ਹਂਸਵਤਿਯਾ, ਬ੍ਰਾਹ੍ਮਣੋ ਸਾਧੁਸਮ੍ਮਤੋ;

ਉਪੇਚ੍ਚ ਲੋਕਪਜ੍ਜੋਤਂ, ਅਸ੍ਸੋਸਿਂ ਧਮ੍ਮਦੇਸਨਂ.

੨੫੮. ‘‘ਤਦਾ ਮਹਾਪਰਿਸਤਿਂ, ਮਹਾਪਰਿਸਸਾਵਕਂ;

ਠਪੇਨ੍ਤਂ ਏਤਦਗ੍ਗਮ੍ਹਿ, ਸੁਤ੍ਵਾਨ ਮੁਦਿਤੋ ਅਹਂ.

੨੫੯. ‘‘ਮਹਤਾ ਪਰਿਵਾਰੇਨ, ਨਿਮਨ੍ਤੇਤ੍ਵਾ ਮਹਾਜਿਨਂ;

ਬ੍ਰਾਹ੍ਮਣਾਨਂ ਸਹਸ੍ਸੇਨ, ਸਹਦਾਨਮਦਾਸਹਂ.

੨੬੦. ‘‘ਮਹਾਦਾਨਂ ਦਦਿਤ੍ਵਾਨ, ਅਭਿਵਾਦਿਯ ਨਾਯਕਂ;

ਏਕਮਨ੍ਤਂ ਠਿਤੋ ਹਟ੍ਠੋ, ਇਦਂ ਵਚਨਮਬ੍ਰਵਿਂ.

੨੬੧. ‘‘‘ਤਯਿ ਸਦ੍ਧਾਯ ਮੇ ਵੀਰ, ਅਧਿਕਾਰਗੁਣੇਨ ਚ;

ਪਰਿਸਾ ਮਹਤੀ ਹੋਤੁ, ਨਿਬ੍ਬਤ੍ਤਸ੍ਸ ਤਹਿਂ ਤਹਿਂ’.

੨੬੨. ‘‘ਤਦਾ ਅਵੋਚ ਪਰਿਸਂ, ਗਜਗਜ੍ਜਿਤਸੁਸ੍ਸਰੋ;

ਕਰਵੀਕਰੁਤੋ ਸਤ੍ਥਾ, ‘ਏਤਂ ਪਸ੍ਸਥ ਬ੍ਰਾਹ੍ਮਣਂ.

੨੬੩. ‘‘‘ਹੇਮਵਣ੍ਣਂ ਮਹਾਬਾਹੁਂ, ਕਮਲਾਨਨਲੋਚਨਂ;

ਉਦਗ੍ਗਤਨੁਜਂ ਹਟ੍ਠਂ, ਸਦ੍ਧਵਨ੍ਤਂ ਗੁਣੇ ਮਮ.

੨੬੪. ‘‘‘ਏਸ ਪਤ੍ਥਯਤੇ ਠਾਨਂ [ਪਤ੍ਥਯਿ ਤਂ ਠਾਨਂ (ਸ੍ਯਾ.)], ਸੀਹਘੋਸਸ੍ਸ ਭਿਕ੍ਖੁਨੋ;

ਅਨਾਗਤਮ੍ਹਿ ਅਦ੍ਧਾਨੇ, ਲਚ੍ਛਸੇ ਤਂ ਮਨੋਰਥਂ.

੨੬੫. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੨੬੬. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ’.

੨੬੭. ‘‘ਇਤੋ ਦ੍ਵੇਨਵੁਤੇ ਕਪ੍ਪੇ, ਅਹੁ ਸਤ੍ਥਾ ਅਨੁਤ੍ਤਰੋ;

ਅਨੂਪਮੋ ਅਸਦਿਸੋ, ਫੁਸ੍ਸੋ ਲੋਕਗ੍ਗਨਾਯਕੋ.

੨੬੮. ‘‘ਸੋ ਚ ਸਬ੍ਬਂ ਤਮਂ ਹਨ੍ਤ੍ਵਾ, ਵਿਜਟੇਤ੍ਵਾ ਮਹਾਜਟਂ;

ਵਸ੍ਸਤੇ ਅਮਤਂ ਵੁਟ੍ਠਿਂ, ਤਪ੍ਪਯਨ੍ਤੋ ਸਦੇਵਕਂ.

੨੬੯. ‘‘ਤਦਾ ਹਿ ਬਾਰਾਣਸਿਯਂ, ਰਾਜਾ ਪਚ੍ਚਾ ਅਹੁਮ੍ਹਸੇ;

ਭਾਤਰੋਮ੍ਹ ਤਯੋ ਸਬ੍ਬੇ, ਸਂਵਿਸਟ੍ਠਾਵ ਰਾਜਿਨੋ.

੨੭੦. ‘‘ਵੀਰਙ੍ਗਰੂਪਾ ਬਲਿਨੋ, ਸਙ੍ਗਾਮੇ ਅਪਰਾਜਿਤਾ;

ਤਦਾ ਕੁਪਿਤਪਚ੍ਚਨ੍ਤੋ [ਕੁਪ੍ਪਤਿ ਪਚ੍ਚਨ੍ਤੋ (ਕ.)], ਅਮ੍ਹੇ ਆਹ ਮਹੀਪਤਿ.

੨੭੧. ‘‘‘ਏਥ ਗਨ੍ਤ੍ਵਾਨ ਪਚ੍ਚਨ੍ਤਂ, ਸੋਧੇਤ੍ਵਾ ਅਟ੍ਟਵੀਬਲਂ;

ਖੇਮਂ ਵਿਜਿਰਿਤਂ ਕਤ੍ਵਾ, ਪੁਨ ਦੇਥਾਤਿ ਭਾਸਥ’.

੨੭੨. ‘‘ਤਤੋ ਮਯਂ ਅਵੋਚੁਮ੍ਹ, ਯਦਿ ਦੇਯ੍ਯਾਸਿ ਨਾਯਕਂ;

ਉਪਟ੍ਠਾਨਾਯ ਅਮ੍ਹਾਕਂ, ਸਾਧਯਿਸ੍ਸਾਮ ਵੋ ਤਤੋ.

੨੭੩. ‘‘ਤਤੋ ਮਯਂ ਲਦ੍ਧਵਰਾ, ਭੂਮਿਪਾਲੇਨ ਪੇਸਿਤਾ;

ਨਿਕ੍ਖਿਤ੍ਤਸਤ੍ਥਂ ਪਚ੍ਚਨ੍ਤਂ, ਕਤ੍ਵਾ ਪੁਨਰੁਪਚ੍ਚ ਤਂ.

੨੭੪. ‘‘ਯਾਚਿਤ੍ਵਾ ਸਤ੍ਥੁਪਟ੍ਠਾਨਂ, ਰਾਜਾਨਂ ਲੋਕਨਾਯਕਂ;

ਮੁਨਿਵੀਰਂ ਲਭਿਤ੍ਵਾਨ, ਯਾਵਜੀਵਂ ਯਜਿਮ੍ਹ ਤਂ.

੨੭੫. ‘‘ਮਹਗ੍ਘਾਨਿ ਚ ਵਤ੍ਥਾਨਿ, ਪਣੀਤਾਨਿ ਰਸਾਨਿ ਚ;

ਸੇਨਾਸਨਾਨਿ ਰਮ੍ਮਾਨਿ, ਭੇਸਜ੍ਜਾਨਿ ਹਿਤਾਨਿ ਚ.

੨੭੬. ‘‘ਦਤ੍ਵਾ ਸਸਙ੍ਘਮੁਨਿਨੋ [ਸਸਂਘਸ੍ਸ ਮੁਨੇ (ਸੀ. ਪੀ.)], ਧਮ੍ਮੇਨੁਪ੍ਪਾਦਿਤਾਨਿ ਨੋ;

ਸੀਲਵਨ੍ਤੋ ਕਾਰੁਣਿਕਾ, ਭਾਵਨਾਯੁਤ੍ਤਮਾਨਸਾ.

੨੭੭. ‘‘ਸਦ੍ਧਾ ਪਰਿਚਰਿਤ੍ਵਾਨ, ਮੇਤ੍ਤਚਿਤ੍ਤੇਨ ਨਾਯਕਂ;

ਨਿਬ੍ਬੁਤੇ ਤਮ੍ਹਿ ਲੋਕਗ੍ਗੇ, ਪੂਜਂ ਕਤ੍ਵਾ ਯਥਾਬਲਂ.

੨੭੮. ‘‘ਤਤੋ ਚੁਤਾ ਸਨ੍ਤੁਸਿਤਂ [ਤਾਵਤਿਂਸਂ (ਸ੍ਯਾ.)], ਗਤਾ ਤਤ੍ਥ ਮਹਾਸੁਖਂ;

ਅਨੁਭੂਤਾ ਮਯਂ ਸਬ੍ਬੇ, ਬੁਦ੍ਧਪੂਜਾਯਿਦਂ ਫਲਂ.

੨੭੯. ‘‘ਮਾਯਾਕਾਰੋ ਯਥਾ ਰਙ੍ਗੇ [ਲਦ੍ਧੋ (ਸ੍ਯਾ. ਪੀ.)], ਦਸ੍ਸੇਸਿ ਵਿਕਤਿਂ ਬਹੁਂ;

ਤਥਾ ਭਵੇ ਭਮਨ੍ਤੋਹਂ [ਗਮੇਨ੍ਤੋਹਂ (ਕ.), ਭਵਨ੍ਤੋਹਂ (ਸ੍ਯਾ.)], ਵਿਦੇਹਾਧਿਪਤੀ ਅਹੁਂ.

੨੮੦. ‘‘ਗੁਣਾਚੇਲ਼ਸ੍ਸ ਵਾਕ੍ਯੇਨ, ਮਿਚ੍ਛਾਦਿਟ੍ਠਿਗਤਾਸਯੋ;

ਨਰਕਂ ਮਗ੍ਗਮਾਰੂਲ਼੍ਹੋ, ਰੁਚਾਯ ਮਮ ਧੀਤੁਯਾ.

੨੮੧. ‘‘ਓਵਾਦਂ ਨਾਦਿਯਿਤ੍ਵਾਨ, ਬ੍ਰਹ੍ਮੁਨਾ ਨਾਰਦੇਨਹਂ;

ਬਹੁਧਾ ਸਂਸਿਤੋ ਸਨ੍ਤੋ, ਦਿਟ੍ਠਿਂ ਹਿਤ੍ਵਾਨ ਪਾਪਿਕਂ.

੨੮੨. ‘‘ਪੂਰਯਿਤ੍ਵਾ ਵਿਸੇਸੇਨ, ਦਸ ਕਮ੍ਮਪਥਾਨਿਹਂ;

ਹਿਤ੍ਵਾਨ ਦੇਹਮਗਮਿਂ, ਸਗ੍ਗਂ ਸਭਵਨਂ ਯਥਾ.

੨੮੩. ‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਬ੍ਰਹ੍ਮਬਨ੍ਧੁ ਅਹੋਸਹਂ;

ਬਾਰਾਣਸਿਯਂ ਫੀਤਾਯਂ, ਜਾਤੋ ਵਿਪ੍ਪਮਹਾਕੁਲੇ.

੨੮੪. ‘‘ਮਚ੍ਚੁਬ੍ਯਾਧਿਜਰਾ ਭੀਤੋ, ਓਗਾਹੇਤ੍ਵਾ ਮਹਾਵਨਂ [ਜਹਿਤ੍ਵਾਨ ਮਹਾਧਨਂ (ਸੀ.), ਜਹਿਤ੍ਵਾ ਚ ਮਹਾਧਨਂ (ਪੀ.)];

ਨਿਬ੍ਬਾਨਂ ਪਦਮੇਸਨ੍ਤੋ, ਜਟਿਲੇਸੁ ਪਰਿਬ੍ਬਜਿਂ.

੨੮੫. ‘‘ਤਦਾ ਦ੍ਵੇ ਭਾਤਰੋ ਮਯ੍ਹਂ, ਪਬ੍ਬਜਿਂਸੁ ਮਯਾ ਸਹ;

ਉਰੁਵੇਲ਼ਾਯਂ ਮਾਪੇਤ੍ਵਾ, ਅਸ੍ਸਮਂ ਨਿਵਸਿਂ ਅਹਂ.

੨੮੬. ‘‘ਕਸ੍ਸਪੋ ਨਾਮ ਗੋਤ੍ਤੇਨ, ਉਰੁਵੇਲ਼ਨਿਵਾਸਿਕੋ [ਉਰੁਵੇਲ਼ਾਯ ਨਿਵਸਿਂ (ਸ੍ਯਾ.)];

ਤਤੋ ਮੇ ਆਸਿ ਪਞ੍ਞਤ੍ਤਿ, ਉਰੁਵੇਲ਼ਕਸ੍ਸਪੋ ਇਤਿ.

੨੮੭. ‘‘ਨਦੀਸਕਾਸੇ ਭਾਤਾ ਮੇ, ਨਦੀਕਸ੍ਸਪਸਵ੍ਹਯੋ;

ਆਸੀ ਸਕਾਸਨਾਮੇਨ, ਗਯਾਯਂ ਗਯਾਕਸ੍ਸਪੋ.

੨੮੮. ‘‘ਦ੍ਵੇ ਸਤਾਨਿ ਕਨਿਟ੍ਠਸ੍ਸ, ਤੀਣਿ ਮਜ੍ਝਸ੍ਸ ਭਾਤੁਨੋ;

ਮਮ ਪਞ੍ਚ ਸਤਾਨੂਨਾ, ਸਿਸ੍ਸਾ ਸਬ੍ਬੇ ਮਮਾਨੁਗਾ.

੨੮੯. ‘‘ਤਦਾ ਉਪੇਚ੍ਚ ਮਂ ਬੁਦ੍ਧੋ, ਕਤ੍ਵਾਨ ਵਿਵਿਧਾਨਿ ਮੇ [ਕਤ੍ਵਾ ਨਾਨਾਵਿਧਾਨਿ ਮੇ (ਸੀ.)];

ਪਾਟਿਹੀਰਾਨਿ ਲੋਕਗ੍ਗੋ, ਵਿਨੇਸਿ ਨਰਸਾਰਥਿ.

੨੯੦. ‘‘ਸਹਸ੍ਸਪਰਿਵਾਰੇਨ, ਅਹੋਸਿਂ ਏਹਿਭਿਕ੍ਖੁਕੋ;

ਤੇਹੇਵ ਸਹ ਸਬ੍ਬੇਹਿ, ਅਰਹਤ੍ਤਮਪਾਪੁਣਿਂ.

੨੯੧. ‘‘ਤੇ ਚੇਵਞ੍ਞੇ ਚ ਬਹਵੋ, ਸਿਸ੍ਸਾ ਮਂ ਪਰਿਵਾਰਯੁਂ;

ਸਾਸਿਤੁਞ੍ਚ ਸਮਤ੍ਥੋਹਂ, ਤਤੋ ਮਂ ਇਸਿਸਤ੍ਤਮੋ.

੨੯੨. ‘‘ਮਹਾਪਰਿਸਭਾਵਸ੍ਮਿਂ, ਏਤਦਗ੍ਗੇ ਠਪੇਸਿ ਮਂ;

ਅਹੋ ਬੁਦ੍ਧੇ ਕਤਂ ਕਾਰਂ, ਸਫਲਂ ਮੇ ਅਜਾਯਥ.

੨੯੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੯੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੯੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਰੁਵੇਲ਼ਕਸ੍ਸਪੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਉਰੁਵੇਲ਼ਕਸ੍ਸਪਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.