੫. ਕੁਮਾਰਕਸ੍ਸਪਤ੍ਥੇਰਅਪਦਾਨਂ

੧੫੦. ‘‘ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ;

ਸਬ੍ਬਲੋਕਹਿਤੋ ਵੀਰੋ, ਪਦੁਮੁਤ੍ਤਰਨਾਮਕੋ.

੧੫੧. ‘‘ਤਦਾਹਂ ਬ੍ਰਾਹ੍ਮਣੋ ਹੁਤ੍ਵਾ, ਵਿਸ੍ਸੁਤੋ ਵੇਦਪਾਰਗੂ;

ਦਿਵਾਵਿਹਾਰਂ ਵਿਚਰਂ, ਅਦ੍ਦਸਂ ਲੋਕਨਾਯਕਂ.

੧੫੨. ‘‘ਚਤੁਸਚ੍ਚਂ ਪਕਾਸੇਨ੍ਤਂ, ਬੋਧਯਨ੍ਤਂ ਸਦੇਵਕਂ;

ਵਿਚਿਤ੍ਤਕਥਿਕਾਨਗ੍ਗਂ, ਵਣ੍ਣਯਨ੍ਤਂ ਮਹਾਜਨੇ.

੧੫੩. ‘‘ਤਦਾ ਮੁਦਿਤਚਿਤ੍ਤੋਹਂ, ਨਿਮਨ੍ਤੇਤ੍ਵਾ ਤਥਾਗਤਂ;

ਨਾਨਾਰਤ੍ਤੇਹਿ ਵਤ੍ਥੇਹਿ, ਅਲਙ੍ਕਰਿਤ੍ਵਾਨ ਮਣ੍ਡਪਂ.

੧੫੪. ‘‘ਨਾਨਾਰਤਨਪਜ੍ਜੋਤਂ, ਸਸਙ੍ਘਂ ਭੋਜਯਿਂ ਤਹਿਂ;

ਭੋਜਯਿਤ੍ਵਾਨ ਸਤ੍ਤਾਹਂ, ਨਾਨਗ੍ਗਰਸਭੋਜਨਂ.

੧੫੫. ‘‘ਨਾਨਾਚਿਤ੍ਤੇਹਿ [ਨਾਨਾਵਣ੍ਣੇਹਿ (ਸੀ.)] ਪੁਪ੍ਫੇਹਿ, ਪੂਜਯਿਤ੍ਵਾ ਸਸਾਵਕਂ [ਮਹਾਵੀਰਂ (ਕ.)];

ਨਿਪਚ੍ਚ ਪਾਦਮੂਲਮ੍ਹਿ, ਤਂ ਠਾਨਂ ਪਤ੍ਥਯਿਂ ਅਹਂ.

੧੫੬. ‘‘ਤਦਾ ਮੁਨਿਵਰੋ ਆਹ, ਕਰੁਣੇਕਰਸਾਸਯੋ [ਕਰੁਣੋ ਕਰੁਣਾਲਯੋ (ਸ੍ਯਾ.)];

‘ਪਸ੍ਸਥੇਤਂ ਦਿਜਵਰਂ, ਪਦੁਮਾਨਨਲੋਚਨਂ.

੧੫੭. ‘‘‘ਪੀਤਿਪਾਮੋਜ੍ਜਬਹੁਲਂ, ਸਮੁਗ੍ਗਤਤਨੂਰੁਹਂ;

ਹਾਸਮ੍ਹਿਤਵਿਸਾਲਕ੍ਖਂ, ਮਮ ਸਾਸਨਲਾਲਸਂ.

੧੫੮. ‘‘‘ਪਤਿਤਂ ਪਾਦਮੂਲੇ ਮੇ, ਏਕਾਵਤ੍ਥਸੁਮਾਨਸਂ [ਏਕਵਤ੍ਥਂ ਸੁਮਾਨਸਂ (ਸ੍ਯਾ. ਕ.)];

ਏਸ ਪਤ੍ਥੇਤਿ ਤਂ ਠਾਨਂ, ਵਿਚਿਤ੍ਤਕਥਿਕਤ੍ਤਨਂ [ਵਿਚਿਤ੍ਤਕਥਿਕਤ੍ਤਦਂ (ਸੀ. ਪੀ.)].

੧੫੯. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੧੬੦. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਕੁਮਾਰਕਸ੍ਸਪੋ ਨਾਮ, ਹੇਸ੍ਸਤਿ ਸਤ੍ਥੁ ਸਾਵਕੋ.

੧੬੧. ‘‘‘ਵਿਚਿਤ੍ਤਪੁਪ੍ਫਦੁਸ੍ਸਾਨਂ, ਰਤਨਾਨਞ੍ਚ ਵਾਹਸਾ;

ਵਿਚਿਤ੍ਤਕਥਿਕਾਨਂ ਸੋ, ਅਗ੍ਗਤਂ ਪਾਪੁਣਿਸ੍ਸਤਿ’.

੧੬੨. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੧੬੩. ‘‘ਪਰਿਬ੍ਭਮਂ ਭਵਾਭਵੇ [ਭਵਾਕਾਸੇ (ਸੀ. ਪੀ.)], ਰਙ੍ਗਮਜ੍ਝੇ ਯਥਾ ਨਟੋ;

ਸਾਖਮਿਗਤ੍ਰਜੋ ਹੁਤ੍ਵਾ, ਮਿਗਿਯਾ ਕੁਚ੍ਛਿਮੋਕ੍ਕਮਿਂ.

੧੬੪. ‘‘ਤਦਾ ਮਯਿ ਕੁਚ੍ਛਿਗਤੇ, ਵਜ੍ਝਵਾਰੋ ਉਪਟ੍ਠਿਤੋ;

ਸਾਖੇਨ ਚਤ੍ਤਾ ਮੇ ਮਾਤਾ, ਨਿਗ੍ਰੋਧਂ ਸਰਣਂ ਗਤਾ.

੧੬੫. ‘‘ਤੇਨ ਸਾ ਮਿਗਰਾਜੇਨ, ਮਰਣਾ ਪਰਿਮੋਚਿਤਾ;

ਪਰਿਚ੍ਚਜਿਤ੍ਵਾ ਸਪਾਣਂ [ਸਂਪਾਣਂ (ਸੀ. ਪੀ.)], ਮਮੇਵਂ ਓਵਦੀ ਤਦਾ.

੧੬੬. ‘‘‘ਨਿਗ੍ਰੋਧਮੇਵ ਸੇਵੇਯ੍ਯ, ਨ ਸਾਖਮੁਪਸਂਵਸੇ;

ਨਿਗ੍ਰੋਧਸ੍ਮਿਂ ਮਤਂ ਸੇਯ੍ਯੋ, ਯਞ੍ਚੇ ਸਾਖਮ੍ਹਿ ਜੀਵਿਤਂ’.

੧੬੭. ‘‘ਤੇਨਾਨੁਸਿਟ੍ਠਾ ਮਿਗਯੂਥਪੇਨ, ਅਹਞ੍ਚ ਮਾਤਾ ਚ ਤਥੇਤਰੇ ਚ [ਚਿਤਰੇ ਚ (ਸ੍ਯਾ.), ਤਸ੍ਸੋਵਾਦੇਨ (ਪੀ.), ਚਿਤਰੇ ਚ ਤਸ੍ਸੋਵਾਦਂ (ਕ.)];

ਆਗਮ੍ਮ ਰਮ੍ਮਂ ਤੁਸਿਤਾਧਿਵਾਸਂ, ਗਤਾ ਪਵਾਸਂ ਸਘਰਂ ਯਥੇਵ.

੧੬੮. ‘‘ਪੁਨੋ ਕਸ੍ਸਪਵੀਰਸ੍ਸ, ਅਤ੍ਥਮੇਨ੍ਤਮ੍ਹਿ ਸਾਸਨੇ;

ਆਰੁਯ੍ਹ ਸੇਲਸਿਖਰਂ, ਯੁਞ੍ਜਿਤ੍ਵਾ ਜਿਨਸਾਸਨਂ.

੧੬੯. ‘‘ਇਦਾਨਾਹਂ ਰਾਜਗਹੇ, ਜਾਤੋ ਸੇਟ੍ਠਿਕੁਲੇ ਅਹੁਂ;

ਆਪਨ੍ਨਸਤ੍ਤਾ ਮੇ ਮਾਤਾ, ਪਬ੍ਬਜਿ ਅਨਗਾਰਿਯਂ.

੧੭੦. ‘‘ਸਗਬ੍ਭਂ ਤਂ ਵਿਦਿਤ੍ਵਾਨ, ਦੇਵਦਤ੍ਤਮੁਪਾਨਯੁਂ;

ਸੋ ਅਵੋਚ ‘ਵਿਨਾਸੇਥ, ਪਾਪਿਕਂ ਭਿਕ੍ਖੁਨਿਂ ਇਮਂ’.

੧੭੧. ‘‘ਇਦਾਨਿਪਿ ਮੁਨਿਨ੍ਦੇਨ, ਜਿਨੇਨ ਅਨੁਕਮ੍ਪਿਤਾ;

ਸੁਖਿਨੀ ਅਜਨੀ ਮਯ੍ਹਂ, ਮਾਤਾ ਭਿਕ੍ਖੁਨੁਪਸ੍ਸਯੇ.

੧੭੨. ‘‘ਤਂ ਵਿਦਿਤ੍ਵਾ ਮਹੀਪਾਲੋ, ਕੋਸਲੋ ਮਂ ਅਪੋਸਯਿ;

ਕੁਮਾਰਪਰਿਹਾਰੇਨ, ਨਾਮੇਨਾਹਞ੍ਚ ਕਸ੍ਸਪੋ.

੧੭੩. ‘‘ਮਹਾਕਸ੍ਸਪਮਾਗਮ੍ਮ, ਅਹਂ ਕੁਮਾਰਕਸ੍ਸਪੋ;

ਵਮ੍ਮਿਕਸਦਿਸਂ ਕਾਯਂ, ਸੁਤ੍ਵਾ ਬੁਦ੍ਧੇਨ ਦੇਸਿਤਂ.

੧੭੪. ‘‘ਤਤੋ ਚਿਤ੍ਤਂ ਵਿਮੁਚ੍ਚਿ ਮੇ, ਅਨੁਪਾਦਾਯ ਸਬ੍ਬਸੋ;

ਪਾਯਾਸਿਂ ਦਮਯਿਤ੍ਵਾਹਂ, ਏਤਦਗ੍ਗਮਪਾਪੁਣਿਂ.

੧੭੫. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੭੬. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੭੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕੁਮਾਰਕਸ੍ਸਪੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਕੁਮਾਰਕਸ੍ਸਪਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

ਚਤੁਵੀਸਤਿਮਂ ਭਾਣਵਾਰਂ.