੬. ਬਾਹਿਯਤ੍ਥੇਰਅਪਦਾਨਂ

੧੭੮. ‘‘ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ;

ਮਹਪ੍ਪਭੋ ਤਿਲੋਕਗ੍ਗੋ, ਨਾਮੇਨ ਪਦੁਮੁਤ੍ਤਰੋ.

੧੭੯. ‘‘ਖਿਪ੍ਪਾਭਿਞ੍ਞਸ੍ਸ ਭਿਕ੍ਖੁਸ੍ਸ, ਗੁਣਂ ਕਿਤ੍ਤਯਤੋ ਮੁਨੇ;

ਸੁਤ੍ਵਾ ਉਦਗ੍ਗਚਿਤ੍ਤੋਹਂ, ਕਾਰਂ ਕਤ੍ਵਾ ਮਹੇਸਿਨੋ.

੧੮੦. ‘‘ਦਤ੍ਵਾ ਸਤ੍ਤਾਹਿਕਂ ਦਾਨਂ, ਸਸਿਸ੍ਸਸ੍ਸ ਮੁਨੇ ਅਹਂ;

ਅਭਿਵਾਦਿਯ ਸਮ੍ਬੁਦ੍ਧਂ, ਤਂ ਠਾਨਂ ਪਤ੍ਥਯਿਂ ਤਦਾ.

੧੮੧. ‘‘ਤਤੋ ਮਂ ਬ੍ਯਾਕਰਿ ਬੁਦ੍ਧੋ, ‘ਏਤਂ ਪਸ੍ਸਥ ਬ੍ਰਾਹ੍ਮਣਂ;

ਪਤਿਤਂ ਪਾਦਮੂਲੇ ਮੇ, ਚਰਿਯਂ ਪਚ੍ਚਵੇਕ੍ਖਣਂ [ਪਸਨ੍ਨਨਯਨਾਨਨਂ (ਸੀ.), ਪੀਨਸਮ੍ਪਨ੍ਨਵੇਕ੍ਖਣਂ (ਸ੍ਯਾ.), ਪੀਣਂਸਂ ਪਚ੍ਚਵੇਕ੍ਖਣਂ (ਪੀ.)].

੧੮੨. ‘‘‘ਹੇਮਯਞ੍ਞੋਪਚਿਤਙ੍ਗਂ, ਅਵਦਾਤਤਨੁਤ੍ਤਚਂ;

ਪਲਮ੍ਬਬਿਮ੍ਬਤਮ੍ਬੋਟ੍ਠਂ, ਸੇਤਤਿਣ੍ਹਸਮਂ ਦਿਜਂ.

੧੮੩. ‘‘‘ਗੁਣਥਾਮਬਹੁਤਰਂ, ਸਮੁਗ੍ਗਤਤਨੂਰੁਹਂ;

ਗੁਣੋਘਾਯਤਨੀਭੂਤਂ, ਪੀਤਿਸਮ੍ਫੁਲ੍ਲਿਤਾਨਨਂ.

੧੮੪. ‘‘‘ਏਸੋ ਪਤ੍ਥਯਤੇ ਠਾਨਂ, ਖਿਪ੍ਪਾਭਿਞ੍ਞਸ੍ਸ ਭਿਕ੍ਖੁਨੋ;

ਅਨਾਗਤੇ ਮਹਾਵੀਰੋ, ਗੋਤਮੋ ਨਾਮ ਹੇਸ੍ਸਤਿ.

੧੮੫. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਬਾਹਿਯੋ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ’.

੧੮੬. ‘‘ਤਦਾ ਹਿ ਤੁਟ੍ਠੋ ਵੁਟ੍ਠਾਯ, ਯਾਵਜੀਵਂ ਮਹਾਮੁਨੇ;

ਕਾਰਂ ਕਤ੍ਵਾ ਚੁਤੋ ਸਗ੍ਗਂ, ਅਗਂ ਸਭਵਨਂ ਯਥਾ.

੧੮੭. ‘‘ਦੇਵਭੂਤੋ ਮਨੁਸ੍ਸੋ ਵਾ, ਸੁਖਿਤੋ ਤਸ੍ਸ ਕਮ੍ਮੁਨੋ;

ਵਾਹਸਾ ਸਂਸਰਿਤ੍ਵਾਨ, ਸਮ੍ਪਤ੍ਤਿਮਨੁਭੋਮਹਂ.

੧੮੮. ‘‘ਪੁਨ ਕਸ੍ਸਪਵੀਰਸ੍ਸ, ਅਤ੍ਥਮੇਨ੍ਤਮ੍ਹਿ [ਅਤ੍ਥਙ੍ਗਤਮ੍ਹਿ (ਸ੍ਯਾ.)] ਸਾਸਨੇ;

ਆਰੁਯ੍ਹ ਸੇਲਸਿਖਰਂ, ਯੁਞ੍ਜਿਤ੍ਵਾ ਜਿਨਸਾਸਨਂ.

੧੮੯. ‘‘ਵਿਸੁਦ੍ਧਸੀਲੋ ਸਪ੍ਪਞ੍ਞੋ, ਜਿਨਸਾਸਨਕਾਰਕੋ;

ਤਤੋ ਚੁਤਾ ਪਞ੍ਚ ਜਨਾ, ਦੇਵਲੋਕਂ ਅਗਮ੍ਹਸੇ.

੧੯੦. ‘‘ਤਤੋਹਂ ਬਾਹਿਯੋ ਜਾਤੋ, ਭਾਰੁਕਚ੍ਛੇ ਪੁਰੁਤ੍ਤਮੇ;

ਤਤੋ ਨਾਵਾਯ ਪਕ੍ਖਨ੍ਦੋ [ਪਕ੍ਖਨ੍ਤੋ (ਸੀ.), ਪਕ੍ਕਨ੍ਤੋ (ਪੀ.)], ਸਾਗਰਂ ਅਪ੍ਪਸਿਦ੍ਧਿਯਂ [ਅਤ੍ਥਸਿਦ੍ਧਿਯਂ (ਕ.)].

੧੯੧. ‘‘ਤਤੋ ਨਾਵਾ ਅਭਿਜ੍ਜਿਤ੍ਥ, ਗਨ੍ਤ੍ਵਾਨ ਕਤਿਪਾਹਕਂ;

ਤਦਾ ਭੀਸਨਕੇ ਘੋਰੇ, ਪਤਿਤੋ ਮਕਰਾਕਰੇ.

੧੯੨. ‘‘ਤਦਾਹਂ ਵਾਯਮਿਤ੍ਵਾਨ, ਸਨ੍ਤਰਿਤ੍ਵਾ ਮਹੋਦਧਿਂ;

ਸੁਪ੍ਪਾਦਪਟ੍ਟਨਵਰਂ [ਸੁਪ੍ਪਾਰਪਟ੍ਟਨਵਰਂ (ਸੀ. ਪੀ.)], ਸਮ੍ਪਤ੍ਤੋ ਮਨ੍ਦਵੇਧਿਤੋ [ਮਨ੍ਦਮੇਧਿਕੋ (ਸੀ.), ਮਨ੍ਦਵੇਦਿਤੋ (ਸ੍ਯਾ.), ਮਦ੍ਦਵੇਰਤਂ (ਕ.)].

੧੯੩. ‘‘ਦਾਰੁਚੀਰਂ ਨਿਵਾਸੇਤ੍ਵਾ, ਗਾਮਂ ਪਿਣ੍ਡਾਯ ਪਾਵਿਸਿਂ;

ਤਦਾਹ ਸੋ ਜਨੋ ਤੁਟ੍ਠੋ, ਅਰਹਾਯਮਿਧਾਗਤੋ.

੧੯੪. ‘‘ਇਮਂ ਅਨ੍ਨੇਨ ਪਾਨੇਨ, ਵਤ੍ਥੇਨ ਸਯਨੇਨ ਚ;

ਭੇਸਜ੍ਜੇਨ ਚ ਸਕ੍ਕਤ੍ਵਾ, ਹੇਸ੍ਸਾਮ ਸੁਖਿਤਾ ਮਯਂ.

੧੯੫. ‘‘ਪਚ੍ਚਯਾਨਂ ਤਦਾ ਲਾਭੀ, ਤੇਹਿ ਸਕ੍ਕਤਪੂਜਿਤੋ;

ਅਰਹਾਹਨ੍ਤਿ ਸਙ੍ਕਪ੍ਪਂ, ਉਪ੍ਪਾਦੇਸਿਂ ਅਯੋਨਿਸੋ.

੧੯੬. ‘‘ਤਤੋ ਮੇ ਚਿਤ੍ਤਮਞ੍ਞਾਯ, ਚੋਦਯੀ ਪੁਬ੍ਬਦੇਵਤਾ;

‘ਨ ਤ੍ਵਂ ਉਪਾਯਮਗ੍ਗਞ੍ਞੂ, ਕੁਤੋ ਤ੍ਵਂ ਅਰਹਾ ਭਵੇ’.

੧੯੭. ‘‘ਚੋਦਿਤੋ ਤਾਯ ਸਂਵਿਗ੍ਗੋ, ਤਦਾਹਂ ਪਰਿਪੁਚ੍ਛਿ ਤਂ;

‘ਕੇ ਵਾ ਏਤੇ ਕੁਹਿਂ ਲੋਕੇ, ਅਰਹਨ੍ਤੋ ਨਰੁਤ੍ਤਮਾ.

੧੯੮. ‘‘‘ਸਾਵਤ੍ਥਿਯਂ ਕੋਸਲਮਨ੍ਦਿਰੇ ਜਿਨੋ, ਪਹੂਤਪਞ੍ਞੋ ਵਰਭੂਰਿਮੇਧਸੋ;

ਸੋ ਸਕ੍ਯਪੁਤ੍ਤੋ ਅਰਹਾ ਅਨਾਸਵੋ, ਦੇਸੇਤਿ ਧਮ੍ਮਂ ਅਰਹਤ੍ਤਪਤ੍ਤਿਯਾ.

੧੯੯. ‘‘‘ਤਦਸ੍ਸ ਸੁਤ੍ਵਾ ਵਚਨਂ ਸੁਪੀਣਿਤੋ [ਪੀਣਿਤ੍ਵਾ (ਕ.)], ਨਿਧਿਂਵ ਲਦ੍ਧਾ ਕਪਣੋਤਿ ਵਿਮ੍ਹਿਤੋ;

ਉਦਗ੍ਗਚਿਤ੍ਤੋ ਅਰਹਤ੍ਤਮੁਤ੍ਤਮਂ, ਸੁਦਸ੍ਸਨਂ ਦਟ੍ਠੁਮਨਨ੍ਤਗੋਚਰਂ.

੨੦੦. ‘‘‘ਤਦਾ ਤਤੋ ਨਿਕ੍ਖਮਿਤ੍ਵਾਨ ਸਤ੍ਥੁਨੋ [ਨਿਕ੍ਖਮਿਤੁਨ ਸਤ੍ਥੁਵਰਂ (ਸੀ.)], ਸਦਾ ਜਿਨਂ ਪਸ੍ਸਾਮਿ ਵਿਮਲਾਨਨਂ [ਪਰਾਜਿਨਂ ਪਸ੍ਸਾਮਿ ਕਮਲਾਨਨਂ (ਕ.)];

ਉਪੇਚ੍ਚ ਰਮ੍ਮਂ ਵਿਜਿਤਵ੍ਹਯਂ ਵਨਂ, ਦਿਜੇ ਅਪੁਚ੍ਛਿਂ ਕੁਹਿਂ ਲੋਕਨਨ੍ਦਨੋ.

੨੦੧. ‘‘‘ਤਤੋ ਅਵੋਚੁਂ ਨਰਦੇਵਵਨ੍ਦਿਤੋ, ਪੁਰਂ ਪਵਿਟ੍ਠੋ ਅਸਨੇਸਨਾਯ ਸੋ;

ਸਸੋਵ [ਪਚ੍ਚੇਹਿ (ਸੀ. ਸ੍ਯਾ.)] ਖਿਪ੍ਪਂ ਮੁਨਿਦਸ੍ਸਨੁਸ੍ਸੁਕੋ, ਉਪੇਚ੍ਚ ਵਨ੍ਦਾਹਿ ਤਮਗ੍ਗਪੁਗ੍ਗਲਂ’.

੨੦੨. ‘‘ਤਤੋਹਂ ਤੁਵਟਂ ਗਨ੍ਤ੍ਵਾ, ਸਾਵਤ੍ਥਿਂ ਪੁਰਮੁਤ੍ਤਮਂ;

ਵਿਚਰਨ੍ਤਂ ਤਮਦ੍ਦਕ੍ਖਿਂ, ਪਿਣ੍ਡਤ੍ਥਂ ਅਪਿਹਾਗਿਧਂ.

੨੦੩. ‘‘ਪਤ੍ਤਪਾਣਿਂ ਅਲੋਲਕ੍ਖਂ, ਪਾਚਯਨ੍ਤਂ ਪੀਤਾਕਰਂ [ਭਾਜਯਨ੍ਤਂ ਵਿਯਾਮਤਂ (ਸੀ.), ਜੋਤਯਨ੍ਤਂ ਇਧਾਮਤਂ (ਸ੍ਯਾ.), ਭਾਜਯਨ੍ਤਂ ਇਦਂਮਤਂ (ਪੀ.)];

ਸਿਰੀਨਿਲਯਸਙ੍ਕਾਸਂ, ਰਵਿਦਿਤ੍ਤਿਹਰਾਨਨਂ.

੨੦੪. ‘‘ਤਂ ਸਮੇਚ੍ਚ ਨਿਪਚ੍ਚਾਹਂ, ਇਦਂ ਵਚਨਮਬ੍ਰਵਿਂ;

‘ਕੁਪਥੇ ਵਿਪ੍ਪਨਟ੍ਠਸ੍ਸ, ਸਰਣਂ ਹੋਹਿ ਗੋਤਮ.

੨੦੫. ‘‘‘ਪਾਣਸਨ੍ਤਾਰਣਤ੍ਥਾਯ, ਪਿਣ੍ਡਾਯ ਵਿਚਰਾਮਹਂ;

ਨ ਤੇ ਧਮ੍ਮਕਥਾਕਾਲੋ, ਇਚ੍ਚਾਹ ਮੁਨਿਸਤ੍ਤਮੋ’.

੨੦੬. ‘‘ਤਦਾ ਪੁਨਪ੍ਪੁਨਂ ਬੁਦ੍ਧਂ, ਆਯਾਚਿਂ ਧਮ੍ਮਲਾਲਸੋ;

ਯੋ ਮੇ ਧਮ੍ਮਮਦੇਸੇਸਿ, ਗਮ੍ਭੀਰਂ ਸੁਞ੍ਞਤਂ ਪਦਂ.

੨੦੭. ‘‘ਤਸ੍ਸ ਧਮ੍ਮਂ ਸੁਣਿਤ੍ਵਾਨ, ਪਾਪੁਣਿਂ ਆਸਵਕ੍ਖਯਂ;

ਪਰਿਕ੍ਖੀਣਾਯੁਕੋ ਸਨ੍ਤੋ, ਅਹੋ ਸਤ੍ਥਾਨੁਕਮ੍ਪਕੋ.

੨੦੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੦੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੧੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੧੧. ‘‘ਏਵਂ ਥੇਰੋ ਵਿਯਾਕਾਸਿ, ਬਾਹਿਯੋ ਦਾਰੁਚੀਰਿਯੋ;

ਸਙ੍ਕਾਰਕੂਟੇ ਪਤਿਤੋ, ਭੂਤਾਵਿਟ੍ਠਾਯ ਗਾਵਿਯਾ.

੨੧੨. ‘‘ਅਤ੍ਤਨੋ ਪੁਬ੍ਬਚਰਿਯਂ, ਕਿਤ੍ਤਯਿਤ੍ਵਾ ਮਹਾਮਤਿ;

ਪਰਿਨਿਬ੍ਬਾਯਿ ਸੋ ਥੇਰੋ [ਵੀਰੋ (ਸੀ.), ਧੀਰੋ (ਸ੍ਯਾ.)], ਸਾਵਤ੍ਥਿਯਂ ਪੁਰੁਤ੍ਤਮੇ.

੨੧੩. ‘‘ਨਗਰਾ ਨਿਕ੍ਖਮਨ੍ਤੋ ਤਂ, ਦਿਸ੍ਵਾਨ ਇਸਿਸਤ੍ਤਮੋ;

ਦਾਰੁਚੀਰਧਰਂ ਧੀਰਂ, ਬਾਹਿਯਂ ਬਾਹਿਤਾਗਮਂ.

੨੧੪. ‘‘ਭੂਮਿਯਂ ਪਤਿਤਂ ਦਨ੍ਤਂ, ਇਨ੍ਦਕੇਤੂਵ ਪਾਤਿਤਂ;

ਗਤਾਯੁਂ ਸੁਕ੍ਖਕਿਲੇਸਂ [ਗਤਾਯੁ ਸਂਗਤਕ੍ਲੇਸਂ (ਸੀ. ਪੀ.), ਤਦਾਯੁ ਸਙ੍ਕਤਾਲੇਸਂ (ਕ.)], ਜਿਨਸਾਸਨਕਾਰਕਂ.

੨੧੫. ‘‘ਤਤੋ ਆਮਨ੍ਤਯੀ ਸਤ੍ਥਾ, ਸਾਵਕੇ ਸਾਸਨੇ ਰਤੇ;

‘ਗਣ੍ਹਥ ਨੇਤ੍ਵਾ [ਹੁਤ੍ਵਾ (ਸ੍ਯਾ. ਪੀ. ਕ.)] ਝਾਪੇਥ, ਤਨੁਂ ਸਬ੍ਰਹ੍ਮਚਾਰਿਨੋ.

੨੧੬. ‘‘‘ਥੂਪਂ ਕਰੋਥ ਪੂਜੇਥ, ਨਿਬ੍ਬੁਤੋ ਸੋ ਮਹਾਮਤਿ;

ਖਿਪ੍ਪਾਭਿਞ੍ਞਾਨਮੇਸਗ੍ਗੋ, ਸਾਵਕੋ ਮੇ ਵਚੋਕਰੋ.

੨੧੭. ‘‘‘ਸਹਸ੍ਸਮਪਿ ਚੇ ਗਾਥਾ, ਅਨਤ੍ਥਪਦਸਞ੍ਹਿਤਾ;

ਏਕਂ ਗਾਥਾਪਦਂ ਸੇਯ੍ਯੋ, ਯਂ ਸੁਤ੍ਵਾ ਉਪਸਮ੍ਮਤਿ.

੨੧੮. ‘‘‘ਯਤ੍ਥ ਆਪੋ ਚ ਪਥਵੀ, ਤੇਜੋ ਵਾਯੋ ਨ ਗਾਧਤਿ;

ਨ ਤਤ੍ਥ ਸੁਕ੍ਕਾ ਜੋਤਨ੍ਤਿ, ਆਦਿਚ੍ਚੋ ਨ ਪਕਾਸਤਿ.

੨੧੯. ‘‘‘ਨ ਤਤ੍ਥ ਚਨ੍ਦਿਮਾ ਭਾਤਿ, ਤਮੋ ਤਤ੍ਥ ਨ ਵਿਜ੍ਜਤਿ;

ਯਦਾ ਚ ਅਤ੍ਤਨਾ ਵੇਦਿ, ਮੁਨਿਮੋਨੇਨ ਬ੍ਰਾਹ੍ਮਣੋ.

੨੨੦. ‘‘‘ਅਥ ਰੂਪਾ ਅਰੂਪਾ ਚ, ਸੁਖਦੁਕ੍ਖਾ ਵਿਮੁਚ੍ਚਤਿ’;

ਇਚ੍ਚੇਵਂ ਅਭਣੀ ਨਾਥੋ, ਤਿਲੋਕਸਰਣੋ ਮੁਨਿ’’.

ਇਤ੍ਥਂ ਸੁਦਂ ਆਯਸ੍ਮਾ ਬਾਹਿਯੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਬਾਹਿਯਤ੍ਥੇਰਸ੍ਸਾਪਦਾਨਂ ਛਟ੍ਠਂ.