੪. ਦਬ੍ਬਮਲ੍ਲਪੁਤ੍ਤਤ੍ਥੇਰਅਪਦਾਨਂ

੧੦੮. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਲੋਕਵਿਦੂ ਮੁਨਿ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਚਕ੍ਖੁਮਾ.

੧੦੯. ‘‘ਓਵਾਦਕੋ ਵਿਞ੍ਞਾਪਕੋ, ਤਾਰਕੋ ਸਬ੍ਬਪਾਣਿਨਂ;

ਦੇਸਨਾਕੁਸਲੋ ਬੁਦ੍ਧੋ, ਤਾਰੇਸਿ ਜਨਤਂ ਬਹੁਂ.

੧੧੦. ‘‘ਅਨੁਕਮ੍ਪਕੋ ਕਾਰੁਣਿਕੋ, ਹਿਤੇਸੀ ਸਬ੍ਬਪਾਣਿਨਂ;

ਸਮ੍ਪਤ੍ਤੇ ਤਿਤ੍ਥਿਯੇ ਸਬ੍ਬੇ, ਪਞ੍ਚਸੀਲੇ ਪਤਿਟ੍ਠਪਿ [ਪਤਿਟ੍ਠਹਿ (ਸ੍ਯਾ. ਕ.)].

੧੧੧. ‘‘ਏਵਂ ਨਿਰਾਕੁਲਂ ਆਸਿ, ਸੁਞ੍ਞਤਂ [ਸੁਞ੍ਞਕਂ (ਸੀ.) ਏਵਮੁਪਰਿਪਿ] ਤਿਤ੍ਥਿਯੇਹਿ ਚ;

ਵਿਚਿਤ੍ਤਂ ਅਰਹਨ੍ਤੇਹਿ, ਵਸੀਭੂਤੇਹਿ ਤਾਦਿਭਿ.

੧੧੨. ‘‘ਰਤਨਾਨਟ੍ਠਪਞ੍ਞਾਸਂ, ਉਗ੍ਗਤੋ ਸੋ ਮਹਾਮੁਨਿ;

ਕਞ੍ਚਨਗ੍ਘਿਯਸਙ੍ਕਾਸੋ, ਬਾਤ੍ਤਿਂਸਵਰਲਕ੍ਖਣੋ.

੧੧੩. ‘‘ਵਸ੍ਸਸਤਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੧੧੪. ‘‘ਤਦਾਹਂ ਹਂਸਵਤਿਯਂ, ਸੇਟ੍ਠਿਪੁਤ੍ਤੋ ਮਹਾਯਸੋ;

ਉਪੇਤ੍ਵਾ ਲੋਕਪਜ੍ਜੋਤਂ, ਅਸ੍ਸੋਸਿਂ ਧਮ੍ਮਦੇਸਨਂ.

੧੧੫. ‘‘ਸੇਨਾਸਨਾਨਿ ਭਿਕ੍ਖੂਨਂ, ਪਞ੍ਞਾਪੇਨ੍ਤਂ ਸਸਾਵਕਂ;

ਕਿਤ੍ਤਯਨ੍ਤਸ੍ਸ ਵਚਨਂ, ਸੁਣਿਤ੍ਵਾ ਮੁਦਿਤੋ ਅਹਂ.

੧੧੬. ‘‘ਅਧਿਕਾਰਂ ਸਸਙ੍ਘਸ੍ਸ, ਕਤ੍ਵਾ ਤਸ੍ਸ ਮਹੇਸਿਨੋ;

ਨਿਪਚ੍ਚ ਸਿਰਸਾ ਪਾਦੇ, ਤਂ ਠਾਨਮਭਿਪਤ੍ਥਯਿਂ.

੧੧੭. ‘‘ਤਦਾਹ ਸ ਮਹਾਵੀਰੋ, ਮਮ ਕਮ੍ਮਂ ਪਕਿਤ੍ਤਯਂ;

‘ਯੋ ਸਸਙ੍ਘਮਭੋਜੇਸਿ, ਸਤ੍ਤਾਹਂ ਲੋਕਨਾਯਕਂ.

੧੧੮. ‘‘‘ਸੋਯਂ ਕਮਲਪਤ੍ਤਕ੍ਖੋ, ਸੀਹਂਸੋ ਕਨਕਤ੍ਤਚੋ;

ਮਮ ਪਾਦਮੂਲੇ ਨਿਪਤਿ [ਪਤਿਤੋ (ਪੀ.)], ਪਤ੍ਥਯਂ ਠਾਨਮੁਤ੍ਤਮਂ.

੧੧੯. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੧੨੦. ‘‘‘ਸਾਵਕੋ ਤਸ੍ਸ ਬੁਦ੍ਧਸ੍ਸ, ਦਬ੍ਬੋ ਨਾਮੇਨ ਵਿਸ੍ਸੁਤੋ;

ਸੇਨਾਸਨਪਞ੍ਞਾਪਕੋ, ਅਗ੍ਗੋ ਹੇਸ੍ਸਤਿਯਂ ਤਦਾ’.

੧੨੧. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੧੨੨. ‘‘ਸਤਾਨਂ ਤੀਣਿਕ੍ਖਤ੍ਤੁਞ੍ਚ, ਦੇਵਰਜ੍ਜਮਕਾਰਯਿਂ;

ਸਤਾਨਂ ਪਞ੍ਚਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ.

੧੨੩. ‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਸਬ੍ਬਤ੍ਥ ਸੁਖਿਤੋ ਆਸਿਂ, ਤਸ੍ਸ ਕਮ੍ਮਸ੍ਸ ਵਾਹਸਾ.

੧੨੪. ‘‘ਏਕਨਵੁਤਿਤੋ ਕਪ੍ਪੇ, ਵਿਪਸ੍ਸੀ ਨਾਮ ਨਾਯਕੋ;

ਉਪ੍ਪਜ੍ਜਿ ਚਾਰੁਦਸ੍ਸਨੋ [ਚਾਰੁਨਯਨੋ (ਸੀ. ਸ੍ਯਾ. ਪੀ.)], ਸਬ੍ਬਧਮ੍ਮਵਿਪਸ੍ਸਕੋ.

੧੨੫. ‘‘ਦੁਟ੍ਠਚਿਤ੍ਤੋ ਉਪਵਦਿਂ, ਸਾਵਕਂ ਤਸ੍ਸ ਤਾਦਿਨੋ;

ਸਬ੍ਬਾਸਵਪਰਿਕ੍ਖੀਣਂ, ਸੁਦ੍ਧੋਤਿ ਚ ਵਿਜਾਨਿਯ.

੧੨੬. ‘‘ਤਸ੍ਸੇਵ ਨਰਵੀਰਸ੍ਸ, ਸਾਵਕਾਨਂ ਮਹੇਸਿਨਂ;

ਸਲਾਕਞ੍ਚ ਗਹੇਤ੍ਵਾਨ [ਸਲਾਕਂ ਪਗ੍ਗਹੇਤ੍ਵਾਨ (ਸੀ. ਪੀ.)], ਖੀਰੋਦਨਮਦਾਸਹਂ.

੧੨੭. ‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

੧੨੮. ‘‘ਸਾਸਨਂ ਜੋਤਯਿਤ੍ਵਾਨ, ਅਭਿਭੁਯ੍ਯ ਕੁਤਿਤ੍ਥਿਯੇ;

ਵਿਨੇਯ੍ਯੇ ਵਿਨਯਿਤ੍ਵਾਵ, ਨਿਬ੍ਬੁਤੋ ਸੋ ਸਸਾਵਕੋ.

੧੨੯. ‘‘ਸਸਿਸ੍ਸੇ ਨਿਬ੍ਬੁਤੇ ਨਾਥੇ, ਅਤ੍ਥਮੇਨ੍ਤਮ੍ਹਿ ਸਾਸਨੇ;

ਦੇਵਾ ਕਨ੍ਦਿਂਸੁ ਸਂਵਿਗ੍ਗਾ, ਮੁਤ੍ਤਕੇਸਾ ਰੁਦਮ੍ਮੁਖਾ.

੧੩੦. ‘‘ਨਿਬ੍ਬਾਯਿਸ੍ਸਤਿ ਧਮ੍ਮਕ੍ਖੋ, ਨ ਪਸ੍ਸਿਸ੍ਸਾਮ ਸੁਬ੍ਬਤੇ;

ਨ ਸੁਣਿਸ੍ਸਾਮ ਸਦ੍ਧਮ੍ਮਂ, ਅਹੋ ਨੋ ਅਪ੍ਪਪੁਞ੍ਞਤਾ.

੧੩੧. ‘‘ਤਦਾਯਂ ਪਥਵੀ ਸਬ੍ਬਾ, ਅਚਲਾ ਸਾ ਚਲਾਚਲਾ [ਚਲਾਚਲੀ (ਸੀ.), ਪੁਲਾਪੁਲੀ (ਸ੍ਯਾ.)];

ਸਾਗਰੋ ਚ ਸਸੋਕੋਵ, ਵਿਨਦੀ ਕਰੁਣਂ ਗਿਰਂ.

੧੩੨. ‘‘ਚਤੁਦ੍ਦਿਸਾ ਦੁਨ੍ਦੁਭਿਯੋ, ਨਾਦਯਿਂਸੁ ਅਮਾਨੁਸਾ;

ਸਮਨ੍ਤਤੋ ਅਸਨਿਯੋ, ਫਲਿਂਸੁ ਚ ਭਯਾਵਹਾ.

੧੩੩. ‘‘ਉਕ੍ਕਾ ਪਤਿਂਸੁ ਨਭਸਾ, ਧੂਮਕੇਤੁ ਚ ਦਿਸ੍ਸਤਿ;

ਸਧੂਮਾ ਜਾਲਵਟ੍ਟਾ ਚ [ਸਬ੍ਬਥਲਜਸਤ੍ਤਾ ਚ (ਸੀ.)], ਰਵਿਂਸੁ ਕਰੁਣਂ ਮਿਗਾ.

੧੩੪. ‘‘ਉਪ੍ਪਾਦੇ ਦਾਰੁਣੇ ਦਿਸ੍ਵਾ, ਸਾਸਨਤ੍ਥਙ੍ਗਸੂਚਕੇ;

ਸਂਵਿਗ੍ਗਾ ਭਿਕ੍ਖਵੋ ਸਤ੍ਤ, ਚਿਨ੍ਤਯਿਮ੍ਹ ਮਯਂ ਤਦਾ.

੧੩੫. ‘‘ਸਾਸਨੇਨ ਵਿਨਾਮ੍ਹਾਕਂ, ਜੀਵਿਤੇਨ ਅਲਂ ਮਯਂ;

ਪਵਿਸਿਤ੍ਵਾ ਮਹਾਰਞ੍ਞਂ, ਯੁਞ੍ਜਾਮ ਜਿਨਸਾਸਨਂ.

੧੩੬. ‘‘ਅਦ੍ਦਸਮ੍ਹ ਤਦਾਰਞ੍ਞੇ, ਉਬ੍ਬਿਦ੍ਧਂ ਸੇਲਮੁਤ੍ਤਮਂ;

ਨਿਸ੍ਸੇਣਿਯਾ ਤਮਾਰੁਯ੍ਹ, ਨਿਸ੍ਸੇਣਿਂ ਪਾਤਯਿਮ੍ਹਸੇ.

੧੩੭. ‘‘ਤਦਾ ਓਵਦਿ ਨੋ ਥੇਰੋ, ਬੁਦ੍ਧੁਪ੍ਪਾਦੋ ਸੁਦੁਲ੍ਲਭੋ;

ਸਦ੍ਧਾਤਿਦੁਲ੍ਲਭਾ ਲਦ੍ਧਾ, ਥੋਕਂ ਸੇਸਞ੍ਚ ਸਾਸਨਂ.

੧੩੮. ‘‘ਨਿਪਤਨ੍ਤਿ ਖਣਾਤੀਤਾ, ਅਨਨ੍ਤੇ ਦੁਕ੍ਖਸਾਗਰੇ;

ਤਸ੍ਮਾ ਪਯੋਗੋ ਕਤ੍ਤਬ੍ਬੋ, ਯਾਵ ਠਾਤਿ ਮੁਨੇ ਮਤਂ [ਯਾਵ ਤਿਟ੍ਠਤਿ ਸਾਸਨਂ (ਸ੍ਯਾ.)].

੧੩੯. ‘‘ਅਰਹਾ ਆਸਿ ਸੋ ਥੇਰੋ, ਅਨਾਗਾਮੀ ਤਦਾਨੁਗੋ;

ਸੁਸੀਲਾ ਇਤਰੇ ਯੁਤ੍ਤਾ, ਦੇਵਲੋਕਂ ਅਗਮ੍ਹਸੇ.

੧੪੦. ‘‘ਨਿਬ੍ਬੁਤੋ ਤਿਣ੍ਣਸਂਸਾਰੋ, ਸੁਦ੍ਧਾਵਾਸੇ ਚ ਏਕਕੋ;

ਅਹਞ੍ਚ ਪਕ੍ਕੁਸਾਤਿ ਚ, ਸਭਿਯੋ ਬਾਹਿਯੋ ਤਥਾ.

੧੪੧. ‘‘ਕੁਮਾਰਕਸ੍ਸਪੋ ਚੇਵ, ਤਤ੍ਥ ਤਤ੍ਥੂਪਗਾ ਮਯਂ;

ਸਂਸਾਰਬਨ੍ਧਨਾ ਮੁਤ੍ਤਾ, ਗੋਤਮੇਨਾਨੁਕਮ੍ਪਿਤਾ.

੧੪੨. ‘‘ਮਲ੍ਲੇਸੁ ਕੁਸਿਨਾਰਾਯਂ, ਜਾਤੋ ਗਬ੍ਭੇਵ ਮੇ ਸਤੋ;

ਮਾਤਾ ਮਤਾ ਚਿਤਾਰੁਲ਼੍ਹਾ, ਤਤੋ ਨਿਪ੍ਪਤਿਤੋ ਅਹਂ.

੧੪੩. ‘‘ਪਤਿਤੋ ਦਬ੍ਬਪੁਞ੍ਜਮ੍ਹਿ, ਤਤੋ ਦਬ੍ਬੋਤਿ ਵਿਸ੍ਸੁਤੋ;

ਬ੍ਰਹ੍ਮਚਾਰੀਬਲੇਨਾਹਂ, ਵਿਮੁਤ੍ਤੋ ਸਤ੍ਤਵਸ੍ਸਿਕੋ.

੧੪੪. ‘‘ਖੀਰੋਦਨਬਲੇਨਾਹਂ, ਪਞ੍ਚਹਙ੍ਗੇਹੁਪਾਗਤੋ;

ਖੀਣਾਸਵੋਪਵਾਦੇਨ, ਪਾਪੇਹਿ ਬਹੁਚੋਦਿਤੋ.

੧੪੫. ‘‘ਉਭੋ ਪੁਞ੍ਞਞ੍ਚ ਪਾਪਞ੍ਚ, ਵੀਤਿਵਤ੍ਤੋਮ੍ਹਿ ਦਾਨਿਹਂ;

ਪਤ੍ਵਾਨ ਪਰਮਂ ਸਨ੍ਤਿਂ, ਵਿਹਰਾਮਿ ਅਨਾਸਵੋ.

੧੪੬. ‘‘ਸੇਨਾਸਨਂ ਪਞ੍ਞਾਪਯਿਂ, ਹਾਸਯਿਤ੍ਵਾਨ ਸੁਬ੍ਬਤੇ;

ਜਿਨੋ ਤਸ੍ਮਿਂ ਗੁਣੇ ਤੁਟ੍ਠੋ, ਏਤਦਗ੍ਗੇ ਠਪੇਸਿ ਮਂ.

੧੪੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੪੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੪੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਦਬ੍ਬਮਲ੍ਲਪੁਤ੍ਤੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਦਬ੍ਬਮਲ੍ਲਪੁਤ੍ਤਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.