੩. ਮਹਾਕਪ੍ਪਿਨਤ੍ਥੇਰਅਪਦਾਨਂ

੬੬. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਉਦਿਤੋ ਅਜਟਾਕਾਸੇ [ਜਗਦਾਕਾਸੇ (ਸੀ.), ਜਲਦਾਕਾਸੇ (ਪੀ.)], ਰਵੀਵ ਸਰਦਮ੍ਬਰੇ.

੬੭. ‘‘ਵਚਨਾਭਾਯ ਬੋਧੇਤਿ, ਵੇਨੇਯ੍ਯਪਦੁਮਾਨਿ ਸੋ;

ਕਿਲੇਸਪਙ੍ਕਂ ਸੋਸੇਤਿ, ਮਤਿਰਂਸੀਹਿ ਨਾਯਕੋ.

੬੮. ‘‘ਤਿਤ੍ਥਿਯਾਨਂ ਯਸੇ [ਯਸੋ (ਸੀ. ਪੀ.)] ਹਨ੍ਤਿ, ਖਜ੍ਜੋਤਾਭਾ ਯਥਾ ਰਵਿ;

ਸਚ੍ਚਤ੍ਥਾਭਂ ਪਕਾਸੇਤਿ, ਰਤਨਂਵ ਦਿਵਾਕਰੋ.

੬੯. ‘‘ਗੁਣਾਨਂ ਆਯਤਿਭੂਤੋ, ਰਤਨਾਨਂਵ ਸਾਗਰੋ;

ਪਜ੍ਜੁਨ੍ਨੋਰਿਵ ਭੂਤਾਨਿ, ਧਮ੍ਮਮੇਘੇਨ ਵਸ੍ਸਤਿ.

੭੦. ‘‘ਅਕ੍ਖਦਸ੍ਸੋ ਤਦਾ ਆਸਿਂ, ਨਗਰੇ ਹਂਸਸਵ੍ਹਯੇ;

ਉਪੇਚ੍ਚ ਧਮ੍ਮਮਸ੍ਸੋਸਿਂ, ਜਲਜੁਤ੍ਤਮਨਾਮਿਨੋ.

੭੧. ‘‘ਓਵਾਦਕਸ੍ਸ ਭਿਕ੍ਖੂਨਂ, ਸਾਵਕਸ੍ਸ ਕਤਾਵਿਨੋ;

ਗੁਣਂ ਪਕਾਸਯਨ੍ਤਸ੍ਸ, ਤਪ੍ਪਯਨ੍ਤਸ੍ਸ [ਤੋਸਯਨ੍ਤਸ੍ਸ (ਸੀ.), ਹਾਸਯਨ੍ਤਸ੍ਸ (ਸ੍ਯਾ.), ਵਾਸਯਨ੍ਤਸ੍ਸ (ਪੀ.)] ਮੇ ਮਨਂ.

੭੨. ‘‘ਸੁਤ੍ਵਾ ਪਤੀਤੋ ਸੁਮਨੋ, ਨਿਮਨ੍ਤੇਤ੍ਵਾ ਤਥਾਗਤਂ;

ਸਸਿਸ੍ਸਂ ਭੋਜਯਿਤ੍ਵਾਨ, ਤਂ ਠਾਨਮਭਿਪਤ੍ਥਯਿਂ.

੭੩. ‘‘ਤਦਾ ਹਂਸਸਮਭਾਗੋ, ਹਂਸਦੁਨ੍ਦੁਭਿਨਿਸ੍ਸਨੋ [ਹਂਸਦੁਨ੍ਦੁਭਿਸੁਸ੍ਸਰੋ (ਸੀ.)];

ਪਸ੍ਸਥੇਤਂ ਮਹਾਮਤ੍ਤਂ, ਵਿਨਿਚ੍ਛਯਵਿਸਾਰਦਂ.

੭੪. ‘‘ਪਤਿਤਂ ਪਾਦਮੂਲੇ ਮੇ, ਸਮੁਗ੍ਗਤਤਨੂਰੁਹਂ;

ਜੀਮੂਤਵਣ੍ਣਂ ਪੀਣਂਸਂ, ਪਸਨ੍ਨਨਯਨਾਨਨਂ.

੭੫. ‘‘ਪਰਿਵਾਰੇਨ ਮਹਤਾ, ਰਾਜਯੁਤ੍ਤਂ ਮਹਾਯਸਂ;

ਏਸੋ ਕਤਾਵਿਨੋ ਠਾਨਂ, ਪਤ੍ਥੇਤਿ ਮੁਦਿਤਾਸਯੋ.

੭੬. ‘‘‘ਇਮਿਨਾ ਪਣਿਪਾਤੇਨ, ਚਾਗੇਨ ਪਣਿਧੀਹਿ ਚ [ਪਿਣ੍ਡਪਾਤੇਨ, ਚੇਤਨਾ ਪਣਿਧੀਹਿ ਚ (ਸੀ.)];

ਕਪ੍ਪਸਤਸਹਸ੍ਸਾਨਿ, ਨੁਪਪਜ੍ਜਤਿ ਦੁਗ੍ਗਤਿਂ.

੭੭. ‘‘‘ਦੇਵੇਸੁ ਦੇਵਸੋਭਗ੍ਗਂ, ਮਨੁਸ੍ਸੇਸੁ ਮਹਨ੍ਤਤਂ;

ਅਨੁਭੋਤ੍ਵਾਨ ਸੇਸੇਨ [ਅਭੁਤ੍ਵਾਵ ਸੇਸੇਨ (ਸੀ.), ਅਨੁਭੋਤ੍ਵਾਵ ਸੇਸੇਨ (ਸ੍ਯਾ.)], ਨਿਬ੍ਬਾਨਂ ਪਾਪੁਣਿਸ੍ਸਤਿ.

੭੮. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੭੯. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਕਪ੍ਪਿਨੋ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ’.

੮੦. ‘‘ਤਤੋਹਂ ਸੁਕਤਂ ਕਾਰਂ, ਕਤ੍ਵਾਨ ਜਿਨਸਾਸਨੇ;

ਜਹਿਤ੍ਵਾ ਮਾਨੁਸਂ ਦੇਹਂ, ਤੁਸਿਤਂ ਅਗਮਾਸਹਂ.

੮੧. ‘‘ਦੇਵਮਾਨੁਸਰਜ੍ਜਾਨਿ, ਸਤਸੋ ਅਨੁਸਾਸਿਯ;

ਬਾਰਾਣਸਿਯਮਾਸਨ੍ਨੇ, ਜਾਤੋ ਕੇਨਿਯਜਾਤਿਯਂ.

੮੨. ‘‘ਸਹਸ੍ਸਪਰਿਵਾਰੇਨ [ਸਤਸਹਸ੍ਸਪਰਿਵਾਰੋ (ਸ੍ਯਾ.)], ਸਪਜਾਪਤਿਕੋ ਅਹਂ;

ਪਞ੍ਚ ਪਚ੍ਚੇਕਬੁਦ੍ਧਾਨਂ, ਸਤਾਨਿ ਸਮੁਪਟ੍ਠਹਿਂ.

੮੩. ‘‘ਤੇਮਾਸਂ ਭੋਜਯਿਤ੍ਵਾਨ, ਪਚ੍ਛਾਦਮ੍ਹ ਤਿਚੀਵਰਂ;

ਤਤੋ ਚੁਤਾ ਮਯਂ ਸਬ੍ਬੇ, ਅਹੁਮ੍ਹ ਤਿਦਸੂਪਗਾ.

੮੪. ‘‘ਪੁਨੋ ਸਬ੍ਬੇ ਮਨੁਸ੍ਸਤ੍ਤਂ, ਅਗਮਿਮ੍ਹ ਤਤੋ ਚੁਤਾ;

ਕੁਕ੍ਕੁਟਮ੍ਹਿ ਪੁਰੇ ਜਾਤਾ, ਹਿਮਵਨ੍ਤਸ੍ਸ ਪਸ੍ਸਤੋ.

੮੫. ‘‘ਕਪ੍ਪਿਨੋ ਨਾਮਹਂ ਆਸਿਂ, ਰਾਜਪੁਤ੍ਤੋ ਮਹਾਯਸੋ;

ਸੇਸਾਮਚ੍ਚਕੁਲੇ ਜਾਤਾ, ਮਮੇਵ ਪਰਿਵਾਰਯੁਂ.

੮੬. ‘‘ਮਹਾਰਜ੍ਜਸੁਖਂ ਪਤ੍ਤੋ, ਸਬ੍ਬਕਾਮਸਮਿਦ੍ਧਿਮਾ;

ਵਾਣਿਜੇਹਿ ਸਮਕ੍ਖਾਤਂ, ਬੁਦ੍ਧੁਪ੍ਪਾਦਮਹਂ ਸੁਣਿਂ.

੮੭. ‘‘‘ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਅਸਮੋ ਏਕਪੁਗ੍ਗਲੋ;

ਸੋ ਪਕਾਸੇਤਿ ਸਦ੍ਧਮ੍ਮਂ, ਅਮਤਂ ਸੁਖਮੁਤ੍ਤਮਂ.

੮੮. ‘‘‘ਸੁਯੁਤ੍ਤਾ ਤਸ੍ਸ ਸਿਸ੍ਸਾ ਚ, ਸੁਮੁਤ੍ਤਾ ਚ ਅਨਾਸਵਾ’;

‘‘ਸੁਤ੍ਵਾ ਨੇਸਂ ਸੁਵਚਨਂ, ਸਕ੍ਕਰਿਤ੍ਵਾਨ ਵਾਣਿਜੇ.

੮੯. ‘‘ਪਹਾਯ ਰਜ੍ਜਂ ਸਾਮਚ੍ਚੋ, ਨਿਕ੍ਖਮਿਂ ਬੁਦ੍ਧਮਾਮਕੋ;

ਨਦਿਂ ਦਿਸ੍ਵਾ ਮਹਾਚਨ੍ਦਂ, ਪੂਰਿਤਂ ਸਮਤਿਤ੍ਤਿਕਂ.

੯੦. ‘‘ਅਪ੍ਪਤਿਟ੍ਠਂ ਅਨਾਲਮ੍ਬਂ, ਦੁਤ੍ਤਰਂ ਸੀਘਵਾਹਿਨਿਂ;

ਗੁਣਂ ਸਰਿਤ੍ਵਾ ਬੁਦ੍ਧਸ੍ਸ, ਸੋਤ੍ਥਿਨਾ ਸਮਤਿਕ੍ਕਮਿਂ.

੯੧. ‘‘‘ਭਵਸੋਤਂ ਸਚੇ ਬੁਦ੍ਧੋ, ਤਿਣ੍ਣੋ ਲੋਕਨ੍ਤਗੂ ਵਿਦੂ [ਵਿਭੂ (ਕ.)];

ਏਤੇਨ ਸਚ੍ਚਵਜ੍ਜੇਨ, ਗਮਨਂ ਮੇ ਸਮਿਜ੍ਝਤੁ.

੯੨. ‘‘‘ਯਦਿ ਸਨ੍ਤਿਗਮੋ ਮਗ੍ਗੋ, ਮੋਕ੍ਖੋ ਚਚ੍ਚਨ੍ਤਿਕਂ [ਮੋਕ੍ਖਦਂ ਸਨ੍ਤਿਕਂ (ਸ੍ਯਾ.)] ਸੁਖਂ;

ਏਤੇਨ ਸਚ੍ਚਵਜ੍ਜੇਨ, ਗਮਨਂ ਮੇ ਸਮਿਜ੍ਝਤੁ.

੯੩. ‘‘‘ਸਙ੍ਘੋ ਚੇ ਤਿਣ੍ਣਕਨ੍ਤਾਰੋ, ਪੁਞ੍ਞਕ੍ਖੇਤ੍ਤੋ ਅਨੁਤ੍ਤਰੋ;

ਏਤੇਨ ਸਚ੍ਚਵਜ੍ਜੇਨ, ਗਮਨਂ ਮੇ ਸਮਿਜ੍ਝਤੁ’.

੯੪. ‘‘ਸਹ ਕਤੇ ਸਚ੍ਚਵਰੇ, ਮਗ੍ਗਾ ਅਪਗਤਂ ਜਲਂ;

ਤਤੋ ਸੁਖੇਨ ਉਤ੍ਤਿਣ੍ਣੋ, ਨਦੀਤੀਰੇ ਮਨੋਰਮੇ.

੯੫. ‘‘ਨਿਸਿਨ੍ਨਂ ਅਦ੍ਦਸਂ ਬੁਦ੍ਧਂ, ਉਦੇਨ੍ਤਂਵ ਪਭਙ੍ਕਰਂ;

ਜਲਨ੍ਤਂ ਹੇਮਸੇਲਂਵ, ਦੀਪਰੁਕ੍ਖਂਵ ਜੋਤਿਤਂ.

੯੬. ‘‘ਸਸਿਂਵ ਤਾਰਾਸਹਿਤਂ, ਸਾਵਕੇਹਿ ਪੁਰਕ੍ਖਤਂ;

ਵਾਸਵਂ ਵਿਯ ਵਸ੍ਸਨ੍ਤਂ, ਦੇਸਨਾਜਲਦਨ੍ਤਰਂ [ਦੇਵੇਨ ਜਲਨਨ੍ਦਨਂ (ਸ੍ਯਾ. ਪੀ.)].

੯੭. ‘‘ਵਨ੍ਦਿਤ੍ਵਾਨ ਸਹਾਮਚ੍ਚੋ, ਏਕਮਨ੍ਤਮੁਪਾਵਿਸਿਂ;

ਤਤੋ ਨੋ ਆਸਯਂ [ਤਤੋ ਅਜ੍ਝਾਸਯਂ (ਸ੍ਯਾ.)] ਞਤ੍ਵਾ, ਬੁਦ੍ਧੋ ਧਮ੍ਮਮਦੇਸਯਿ.

੯੮. ‘‘ਸੁਤ੍ਵਾਨ ਧਮ੍ਮਂ ਵਿਮਲਂ, ਅਵੋਚੁਮ੍ਹ ਮਯਂ ਜਿਨਂ;

‘ਪਬ੍ਬਾਜੇਹਿ ਮਹਾਵੀਰ, ਨਿਬ੍ਬਿਨ੍ਦਾਮ੍ਹ [ਨਿਬ੍ਬਿਨ੍ਨਾਮ੍ਹ (ਸੀ. ਪੀ.), ਓਤਿਣ੍ਣਮ੍ਹ (ਸ੍ਯਾ.)] ਮਯਂ ਭਵੇ’.

੯੯. ‘‘‘ਸ੍ਵਕ੍ਖਾਤੋ ਭਿਕ੍ਖਵੇ ਧਮ੍ਮੋ, ਦੁਕ੍ਖਨ੍ਤਕਰਣਾਯ ਵੋ;

ਚਰਥ ਬ੍ਰਹ੍ਮਚਰਿਯਂ’, ਇਚ੍ਚਾਹ ਮੁਨਿਸਤ੍ਤਮੋ.

੧੦੦. ‘‘ਸਹ ਵਾਚਾਯ ਸਬ੍ਬੇਪਿ, ਭਿਕ੍ਖੁਵੇਸਧਰਾ ਮਯਂ;

ਅਹੁਮ੍ਹ ਉਪਸਮ੍ਪਨ੍ਨਾ, ਸੋਤਾਪਨ੍ਨਾ ਚ ਸਾਸਨੇ.

੧੦੧. ‘‘ਤਤੋ ਜੇਤਵਨਂ ਗਨ੍ਤ੍ਵਾ, ਅਨੁਸਾਸਿ ਵਿਨਾਯਕੋ;

ਅਨੁਸਿਟ੍ਠੋ ਜਿਨੇਨਾਹਂ, ਅਰਹਤ੍ਤਮਪਾਪੁਣਿਂ.

੧੦੨. ‘‘ਤਤੋ ਭਿਕ੍ਖੁਸਹਸ੍ਸਾਨਿ [ਭਿਕ੍ਖੁਸਹਸ੍ਸਂ ਤਂ (ਸੀ. ਪੀ.)], ਅਨੁਸਾਸਿਮਹਂ ਤਦਾ;

ਮਮਾਨੁਸਾਸਨਕਰਾ, ਤੇਪਿ ਆਸੁਂ ਅਨਾਸਵਾ.

੧੦੩. ‘‘ਜਿਨੋ ਤਸ੍ਮਿਂ ਗੁਣੇ ਤੁਟ੍ਠੋ, ਏਤਦਗ੍ਗੇ ਠਪੇਸਿ ਮਂ;

ਭਿਕ੍ਖੁਓਵਾਦਕਾਨਗ੍ਗੋ, ਕਪ੍ਪਿਨੋਤਿ ਮਹਾਜਨੇ.

੧੦੪. ‘‘ਸਤਸਹਸ੍ਸੇ ਕਤਂ ਕਮ੍ਮਂ, ਫਲਂ ਦਸ੍ਸੇਸਿ ਮੇ ਇਧ;

ਪਮੁਤ੍ਤੋ ਸਰਵੇਗੋਵ, ਕਿਲੇਸੇ ਝਾਪਯਿਂ [ਝਾਪਯੀ (ਸੀ.)] ਮਮ.

੧੦੫. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੦੬. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੦੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮਹਾਕਪ੍ਪਿਨੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਮਹਾਕਪ੍ਪਿਨਤ੍ਥੇਰਸ੍ਸਾਪਦਾਨਂ ਤਤਿਯਂ.