੧੦. ਸੁਗਨ੍ਧਤ੍ਥੇਰਅਪਦਾਨਂ

੮੧. ‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ [ਨਾਮੇਨ (ਸਬ੍ਬਤ੍ਥ)], ਉਪ੍ਪਜ੍ਜਿ ਵਦਤਂ ਵਰੋ.

੮੨. ‘‘ਅਨੁਬ੍ਯਞ੍ਜਨਸਮ੍ਪਨ੍ਨੋ, ਬਾਤ੍ਤਿਂਸਵਰਲਕ੍ਖਣੋ;

ਬ੍ਯਾਮਪ੍ਪਭਾਪਰਿਵੁਤੋ, ਰਂਸਿਜਾਲਸਮੋਤ੍ਥਟੋ [ਰਂਸਿਜਾਲਸਮੋਸਟੋ (ਸੀ. ਪੀ.)].

੮੩. ‘‘ਅਸ੍ਸਾਸੇਤਾ ਯਥਾ ਚਨ੍ਦੋ, ਸੂਰਿਯੋਵ ਪਭਙ੍ਕਰੋ;

ਨਿਬ੍ਬਾਪੇਤਾ ਯਥਾ ਮੇਘੋ, ਸਾਗਰੋਵ ਗੁਣਾਕਰੋ.

੮੪. ‘‘ਧਰਣੀਰਿਵ ਸੀਲੇਨ, ਹਿਮਵਾਵ ਸਮਾਧਿਨਾ;

ਆਕਾਸੋ ਵਿਯ ਪਞ੍ਞਾਯ, ਅਸਙ੍ਗੋ ਅਨਿਲੋ ਯਥਾ.

੮੫. ‘‘ਸ ਕਦਾਚਿ ਮਹਾਵੀਰੋ, ਪਰਿਸਾਸੁ ਵਿਸਾਰਦੋ;

ਸਚ੍ਚਾਨਿ ਸਮ੍ਪਕਾਸੇਤਿ, ਉਦ੍ਧਰਨ੍ਤੋ ਮਹਾਜਨਂ.

੮੬. ‘‘ਤਦਾ ਹਿ ਬਾਰਾਣਸਿਯਂ, ਸੇਟ੍ਠਿਪੁਤ੍ਤੋ ਮਹਾਯਸੋ;

ਆਸਹਂ ਧਨਧਞ੍ਞਸ੍ਸ [ਅਨਨ੍ਤਧਨਧਞ੍ਞਸ੍ਸ (ਕ.)], ਪਹੂਤਸ੍ਸ ਬਹੂ ਤਦਾ.

੮੭. ‘‘ਜਙ੍ਘਾਵਿਹਾਰਂ ਵਿਚਰਂ, ਮਿਗਦਾਯਮੁਪੇਚ੍ਚਹਂ [ਮੁਪੇਸਹਂ (ਕ.)];

ਅਦ੍ਦਸਂ ਵਿਰਜਂ ਬੁਦ੍ਧਂ, ਦੇਸੇਨ੍ਤਂ ਅਮਤਂ ਪਦਂ.

੮੮. ‘‘ਵਿਸਟ੍ਠਕਨ੍ਤਵਚਨਂ, ਕਰਵੀਕਸਮਸ੍ਸਰਂ;

ਹਂਸਰੁਤੇਹਿ [ਹਂਸਦੁਨ੍ਦੁਭਿ (ਸ੍ਯਾ. ਪੀ.)] ਨਿਗ੍ਘੋਸਂ, ਵਿਞ੍ਞਾਪੇਨ੍ਤਂ ਮਹਾਜਨਂ.

੮੯. ‘‘ਦਿਸ੍ਵਾ ਦੇਵਾਤਿਦੇਵਂ ਤਂ, ਸੁਤ੍ਵਾਵ ਮਧੁਰਂ ਗਿਰਂ;

ਪਹਾਯਨਪ੍ਪਕੇ ਭੋਗੇ, ਪਬ੍ਬਜਿਂ ਅਨਗਾਰਿਯਂ.

੯੦. ‘‘ਏਵਂ ਪਬ੍ਬਜਿਤੋ ਚਾਹਂ, ਨ ਚਿਰੇਨ ਬਹੁਸ੍ਸੁਤੋ;

ਅਹੋਸਿਂ ਧਮ੍ਮਕਥਿਕੋ, ਵਿਚਿਤ੍ਤਪਟਿਭਾਣਵਾ.

੯੧. ‘‘ਮਹਾਪਰਿਸਮਜ੍ਝੇਹਂ, ਹਟ੍ਠਚਿਤ੍ਤੋ ਪੁਨਪ੍ਪੁਨਂ;

ਵਣ੍ਣਯਿਂ ਹੇਮਵਣ੍ਣਸ੍ਸ, ਵਣ੍ਣਂ ਵਣ੍ਣਵਿਸਾਰਦੋ.

੯੨. ‘‘ਏਸ ਖੀਣਾਸਵੋ ਬੁਦ੍ਧੋ, ਅਨੀਘੋ ਛਿਨ੍ਨਸਂਸਯੋ;

ਸਬ੍ਬਕਮ੍ਮਕ੍ਖਯਂ ਪਤ੍ਤੋ, ਵਿਮੁਤ੍ਤੋਪਧਿਸਙ੍ਖਯੇ.

੯੩. ‘‘ਏਸ ਸੋ ਭਗਵਾ ਬੁਦ੍ਧੋ, ਏਸ ਸੀਹੋ ਅਨੁਤ੍ਤਰੋ;

ਸਦੇਵਕਸ੍ਸ ਲੋਕਸ੍ਸ, ਬ੍ਰਹ੍ਮਚਕ੍ਕਪ੍ਪਵਤ੍ਤਕੋ.

੯੪. ‘‘ਦਨ੍ਤੋ ਦਮੇਤਾ ਸਨ੍ਤੋ ਚ, ਸਮੇਤਾ ਨਿਬ੍ਬੁਤੋ ਇਸਿ;

ਨਿਬ੍ਬਾਪੇਤਾ ਚ ਅਸ੍ਸਤ੍ਥੋ, ਅਸ੍ਸਾਸੇਤਾ ਮਹਾਜਨਂ.

੯੫. ‘‘ਵੀਰੋ ਸੂਰੋ ਚ ਵਿਕ੍ਕਨ੍ਤੋ [ਧੀਰੋ ਚ (ਸੀ. ਪੀ.)], ਪਞ੍ਞੋ ਕਾਰੁਣਿਕੋ ਵਸੀ;

ਵਿਜਿਤਾਵੀ ਚ ਸ ਜਿਨੋ, ਅਪ੍ਪਗਬ੍ਬੋ ਅਨਾਲਯੋ.

੯੬. ‘‘ਅਨੇਞ੍ਜੋ ਅਚਲੋ ਧੀਮਾ, ਅਮੋਹੋ ਅਸਮੋ ਮੁਨਿ;

ਧੋਰਯ੍ਹੋ ਉਸਭੋ ਨਾਗੋ, ਸੀਹੋ ਸਕ੍ਕੋ ਗਰੂਸੁਪਿ.

੯੭. ‘‘ਵਿਰਾਗੋ ਵਿਮਲੋ ਬ੍ਰਹ੍ਮਾ, ਵਾਦੀ ਸੂਰੋ ਰਣਞ੍ਜਹੋ;

ਅਖਿਲੋ ਚ ਵਿਸਲ੍ਲੋ ਚ, ਅਸਮੋ ਸਂਯਤੋ [ਵੁਸਭੋ (ਸ੍ਯਾ.), ਪਯਤੋ (ਪੀ.)] ਸੁਚਿ.

੯੮. ‘‘ਬ੍ਰਾਹ੍ਮਣੋ ਸਮਣੋ ਨਾਥੋ, ਭਿਸਕ੍ਕੋ ਸਲ੍ਲਕਤ੍ਤਕੋ;

ਯੋਧੋ ਬੁਦ੍ਧੋ ਸੁਤਾਸੁਤੋ [ਸੁਤੋ ਸੁਤੋ (ਸੀ. ਪੀ.)], ਅਚਲੋ ਮੁਦਿਤੋ ਸਿਤੋ [ਦਿਤੋ (ਸੀ.)].

੯੯. ‘‘ਧਾਤਾ ਧਤਾ ਚ ਸਨ੍ਤਿ ਚ, ਕਤ੍ਤਾ ਨੇਤਾ ਪਕਾਸਿਤਾ;

ਸਮ੍ਪਹਂਸਿਤਾ ਭੇਤ੍ਤਾ ਚ, ਛੇਤ੍ਤਾ ਸੋਤਾ ਪਸਂਸਿਤਾ.

੧੦੦. ‘‘ਅਖਿਲੋ ਚ ਵਿਸਲ੍ਲੋ ਚ, ਅਨੀਘੋ ਅਕਥਂਕਥੀ;

ਅਨੇਜੋ ਵਿਰਜੋ ਕਤ੍ਤਾ, ਗਨ੍ਧਾ ਵਤ੍ਤਾ ਪਸਂਸਿਤਾ.

੧੦੧. ‘‘ਤਾਰੇਤਾ ਅਤ੍ਥਕਾਰੇਤਾ, ਕਾਰੇਤਾ ਸਮ੍ਪਦਾਰਿਤਾ;

ਪਾਪੇਤਾ ਸਹਿਤਾ ਕਨ੍ਤਾ, ਹਨ੍ਤਾ ਆਤਾਪੀ ਤਾਪਸੋ [ਹਨ੍ਤਾ, ਤਾਪਿਤਾ ਚ ਵਿਸੋਸਿਤਾ (ਸ੍ਯਾ.)].

੧੦੨. ‘‘ਸਮਚਿਤ੍ਤੋ [ਸਚ੍ਚਟ੍ਠਿਤੋ (ਸ੍ਯਾ.)] ਸਮਸਮੋ, ਅਸਹਾਯੋ ਦਯਾਲਯੋ [ਦਯਾਸਯੋ (ਸੀ.)];

ਅਚ੍ਛੇਰਸਤ੍ਤੋ [ਅਚ੍ਛੇਰਮਨ੍ਤੋ (ਸ੍ਯਾ.)] ਅਕੁਹੋ, ਕਤਾਵੀ ਇਸਿਸਤ੍ਤਮੋ.

੧੦੩. ‘‘ਨਿਤ੍ਤਿਣ੍ਣਕਙ੍ਖੋ ਨਿਮ੍ਮਾਨੋ, ਅਪ੍ਪਮੇਯ੍ਯੋ ਅਨੂਪਮੋ;

ਸਬ੍ਬਵਾਕ੍ਯਪਥਾਤੀਤੋ, ਸਚ੍ਚ ਨੇਯ੍ਯਨ੍ਤਗੂ [ਸਬ੍ਬਨੇਯ੍ਯਨ੍ਤਿਕੋ (ਸ੍ਯਾ.)] ਜਿਨੋ.

੧੦੪. ‘‘ਸਤ੍ਤਸਾਰਵਰੇ [ਸਤਰਂਸੀਵਰੇ (ਸ੍ਯਾ.)] ਤਸ੍ਮਿਂ, ਪਸਾਦੋ ਅਮਤਾਵਹੋ;

ਤਸ੍ਮਾ ਬੁਦ੍ਧੇ ਚ ਧਮ੍ਮੇ ਚ, ਸਙ੍ਘੇ ਸਦ੍ਧਾ ਮਹਤ੍ਥਿਕਾ [ਮਹਿਦ੍ਧਿਕਾ (ਸੀ. ਕ.)].

੧੦੫. ‘‘ਗੁਣੇਹਿ ਏਵਮਾਦੀਹਿ, ਤਿਲੋਕਸਰਣੁਤ੍ਤਮਂ;

ਵਣ੍ਣੇਨ੍ਤੋ ਪਰਿਸਾਮਜ੍ਝੇ, ਅਕਂ [ਕਥਿਂ (ਸ੍ਯਾ.)] ਧਮ੍ਮਕਥਂ ਅਹਂ.

੧੦੬. ‘‘ਤਤੋ ਚੁਤਾਹਂ ਤੁਸਿਤੇ, ਅਨੁਭੋਤ੍ਵਾ ਮਹਾਸੁਖਂ;

ਤਤੋ ਚੁਤੋ ਮਨੁਸ੍ਸੇਸੁ, ਜਾਤੋ ਹੋਮਿ ਸੁਗਨ੍ਧਿਕੋ.

੧੦੭. ‘‘ਨਿਸ੍ਸਾਸੋ ਮੁਖਗਨ੍ਧੋ ਚ, ਦੇਹਗਨ੍ਧੋ ਤਥੇਵ ਮੇ;

ਸੇਦਗਨ੍ਧੋ ਚ ਸਤਤਂ, ਸਬ੍ਬਗਨ੍ਧੋਵ ਹੋਤਿ ਮੇ [ਸਬ੍ਬਗਨ੍ਧੋਤਿਸੇਤਿ ਮੇ (ਸੀ. ਪੀ.)].

੧੦੮. ‘‘ਮੁਖਗਨ੍ਧੋ ਸਦਾ ਮਯ੍ਹਂ, ਪਦੁਮੁਪ੍ਪਲਚਮ੍ਪਕੋ;

ਪਰਿਸਨ੍ਤੋ [ਆਦਿਸਨ੍ਤੋ (ਸੀ.), ਅਤਿਕਨ੍ਤੋ (ਸ੍ਯਾ.), ਅਤਿਸਨ੍ਤੋ (ਪੀ.)] ਸਦਾ ਵਾਤਿ, ਸਰੀਰੋ ਚ ਤਥੇਵ ਮੇ.

੧੦੯. ‘‘ਗੁਣਤ੍ਥਵਸ੍ਸ ਸਬ੍ਬਨ੍ਤਂ, ਫਲਂ ਤੁ [ਫਲਨ੍ਤਂ (ਸ੍ਯਾ.)] ਪਰਮਬ੍ਭੁਤਂ;

ਏਕਗ੍ਗਮਨਸਾ ਸਬ੍ਬੇ, ਵਣ੍ਣਯਿਸ੍ਸਂ [ਭਾਸਿਤਸ੍ਸ (ਸ੍ਯਾ.)] ਸੁਣਾਥ ਮੇ.

੧੧੦. ‘‘ਗੁਣਂ ਬੁਦ੍ਧਸ੍ਸ ਵਤ੍ਵਾਨ, ਹਿਤਾਯ ਚ ਨ ਸਦਿਸਂ [ਹਿਤਾਯ ਜਨਸਨ੍ਧਿਸੁ (ਸੀ. ਪੀ.), ਹਿਤਾਯ ਨਂ ਸੁਖਾਵਹਂ (ਸ੍ਯਾ.)];

ਸੁਖਿਤੋ [ਸੁਚਿਤ੍ਤੋ (ਸ੍ਯਾ.)] ਹੋਮਿ ਸਬ੍ਬਤ੍ਥ, ਸਙ੍ਘੋ ਵੀਰਸਮਾਯੁਤੋ [ਸਰਦ੍ਧਨਿਸਮਾਯੁਤੋ (ਸੀ.)].

੧੧੧. ‘‘ਯਸਸ੍ਸੀ ਸੁਖਿਤੋ ਕਨ੍ਤੋ, ਜੁਤਿਮਾ ਪਿਯਦਸ੍ਸਨੋ;

ਵਤ੍ਤਾ ਅਪਰਿਭੂਤੋ ਚ, ਨਿਦ੍ਦੋਸੋ ਪਞ੍ਞਵਾ ਤਥਾ.

੧੧੨. ‘‘ਖੀਣੇ ਆਯੁਸਿ [ਪਾਸੁਸਿ (ਸ੍ਯਾ.)] ਨਿਬ੍ਬਾਨਂ, ਸੁਲਭਂ ਬੁਦ੍ਧਭਤ੍ਤਿਨੋ;

ਤੇਸਂ ਹੇਤੁਂ ਪਵਕ੍ਖਾਮਿ, ਤਂ ਸੁਣਾਥ ਯਥਾਤਥਂ.

੧੧੩. ‘‘ਸਨ੍ਤਂ ਯਸਂ ਭਗਵਤੋ, ਵਿਧਿਨਾ ਅਭਿਵਾਦਯਂ;

ਤਤ੍ਥ ਤਤ੍ਥੂਪਪਨ੍ਨੋਪਿ [ਯਤ੍ਥ ਤਤ੍ਥੂਪਪਨ੍ਨੋਪਿ (ਸੀ. ਪੀ.)], ਯਸਸ੍ਸੀ ਤੇਨ ਹੋਮਹਂ.

੧੧੪. ‘‘ਦੁਕ੍ਖਸ੍ਸਨ੍ਤਕਰਂ ਬੁਦ੍ਧਂ, ਧਮ੍ਮਂ ਸਨ੍ਤਮਸਙ੍ਖਤਂ;

ਵਣ੍ਣਯਂ ਸੁਖਦੋ ਆਸਿਂ, ਸਤ੍ਤਾਨਂ ਸੁਖਿਤੋ ਤਤੋ.

੧੧੫. ‘‘ਗੁਣਂ ਵਦਨ੍ਤੋ ਬੁਦ੍ਧਸ੍ਸ, ਬੁਦ੍ਧਪੀਤਿਸਮਾਯੁਤੋ;

ਸਕਨ੍ਤਿਂ ਪਰਕਨ੍ਤਿਞ੍ਚ, ਜਨਯਿਂ ਤੇਨ ਕਨ੍ਤਿਮਾ.

੧੧੬. ‘‘ਜਿਨੋ ਤੇ ਤਿਤ੍ਥਿਕਾਕਿਣ੍ਣੇ [ਜਨੋਘੇ ਤਿਤ੍ਥਕਾਕਿਣ੍ਣੇ (ਸੀ. ਪੀ.), ਜਿਨੋ ਯੋ ਤਿਤ੍ਥਿਕਾਤਿਣ੍ਣੋ (ਸ੍ਯਾ.)], ਅਭਿਭੁਯ੍ਯ ਕੁਤਿਤ੍ਥਿਯੇ;

ਗੁਣਂ ਵਦਨ੍ਤੋ ਜੋਤੇਸਿਂ [ਥੋਮੇਸਿਂ (ਸ੍ਯਾ.)], ਨਾਯਕਂ ਜੁਤਿਮਾ ਤਤੋ.

੧੧੭. ‘‘ਪਿਯਕਾਰੀ ਜਨਸ੍ਸਾਪਿ, ਸਮ੍ਬੁਦ੍ਧਸ੍ਸ ਗੁਣਂ ਵਦਂ;

ਸਰਦੋਵ ਸਸਙ੍ਕੋਹਂ, ਤੇਨਾਸਿਂ ਪਿਯਦਸ੍ਸਨੋ.

੧੧੮. ‘‘ਯਥਾਸਤ੍ਤਿਵਸੇਨਾਹਂ, ਸਬ੍ਬਵਾਚਾਹਿ ਸਨ੍ਥਵਿਂ;

ਸੁਗਤਂ ਤੇਨ ਵਾਗਿਸੋ, ਵਿਚਿਤ੍ਤਪਟਿਭਾਨਵਾ.

੧੧੯. ‘‘ਯੇ ਬਾਲਾ ਵਿਮਤਿਂ ਪਤ੍ਤਾ, ਪਰਿਭੋਨ੍ਤਿ ਮਹਾਮੁਨਿਂ;

ਨਿਗ੍ਗਹਿਂ ਤੇ ਸਦ੍ਧਮ੍ਮੇਨ, ਪਰਿਭੂਤੋ ਨ ਤੇਨਹਂ [ਪਰਿਭੂਤੇਨ ਤੇਨਹਂ (ਸ੍ਯਾ.)].

੧੨੦. ‘‘ਬੁਦ੍ਧਵਣ੍ਣੇਨ ਸਤ੍ਤਾਨਂ, ਕਿਲੇਸੇ ਅਪਨੇਸਹਂ;

ਨਿਕ੍ਕਿਲੇਸਮਨੋ ਹੋਮਿ, ਤਸ੍ਸ ਕਮ੍ਮਸ੍ਸ ਵਾਹਸਾ.

੧੨੧. ‘‘ਸੋਤੂਨਂ ਵੁਦ੍ਧਿਮਜਨਿਂ [ਬੁਦ੍ਧਿਮਜਨਿਂ (ਸੀ. ਪੀ.)], ਬੁਦ੍ਧਾਨੁਸ੍ਸਤਿਦੇਸਕੋ;

ਤੇਨਾਹਮਾਸਿਂ [ਤੇਨਾਪਿ ਚਾਸਿਂ (ਸ੍ਯਾ.)] ਸਪ੍ਪਞ੍ਞੋ, ਨਿਪੁਣਤ੍ਥਵਿਪਸ੍ਸਕੋ.

੧੨੨. ‘‘ਸਬ੍ਬਾਸਵਪਰਿਕ੍ਖੀਣੋ, ਤਿਣ੍ਣਸਂਸਾਰਸਾਗਰੋ;

ਸਿਖੀਵ ਅਨੁਪਾਦਾਨੋ, ਪਾਪੁਣਿਸ੍ਸਾਮਿ ਨਿਬ੍ਬੁਤਿਂ.

੧੨੩. ‘‘ਇਮਸ੍ਮਿਂਯੇਵ ਕਪ੍ਪਸ੍ਮਿਂ, ਯਮਹਂ ਸਨ੍ਥਵਿਂ ਜਿਨਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਵਣ੍ਣਸ੍ਸਿਦਂ ਫਲਂ.

੧੨੪. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੨੫. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੨੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਗਨ੍ਧੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਸੁਗਨ੍ਧਤ੍ਥੇਰਸ੍ਸਾਪਦਾਨਂ ਦਸਮਂ.

ਤਿਣਦਾਯਕਵਗ੍ਗੋ ਤੇਪਞ੍ਞਾਸਮੋ.