੫੩. ਤਿਣਦਾਯਕਵਗ੍ਗੋ
੧. ਤਿਣਮੁਟ੍ਠਿਦਾਯਕਤ੍ਥੇਰਅਪਦਾਨਂ
੧. ‘‘ਹਿਮਵਨ੍ਤਸ੍ਸਾਵਿਦੂਰੇ, ਲਮ੍ਬਕੋ ਨਾਮ ਪਬ੍ਬਤੋ;
ਤਤ੍ਥੇਵ ਤਿਸ੍ਸੋ [ਤਤ੍ਥੋਪਤਿਸ੍ਸੋ (ਸੀ. ਪੀ. ਕ.)] ਸਮ੍ਬੁਦ੍ਧੋ, ਅਬ੍ਭੋਕਾਸਮ੍ਹਿ ਚਙ੍ਕਮਿ.
੨. ‘‘ਮਿਗਲੁਦ੍ਦੋ ਪੁਰੇ ਆਸਿਂ, ਅਰਞ੍ਞੇ ਕਾਨਨੇ ਅਹਂ;
ਦਿਸ੍ਵਾਨ ਤਂ ਦੇਵਦੇਵਂ, ਤਿਣਮੁਟ੍ਠਿਮਦਾਸਹਂ.
੩. ‘‘ਨਿਸੀਦਨਤ੍ਥਂ ਬੁਦ੍ਧਸ੍ਸ, ਦਤ੍ਵਾ ਚਿਤ੍ਤਂ ਪਸਾਦਯਿਂ;
ਸਮ੍ਬੁਦ੍ਧਂ ਅਭਿਵਾਦੇਤ੍ਵਾ, ਪਕ੍ਕਾਮਿਂ [ਪਕ੍ਕਮਿਂ (ਕ.)] ਉਤ੍ਤਰਾਮੁਖੋ.
੪. ‘‘ਅਚਿਰਂ ਗਤਮਤ੍ਤਸ੍ਸ [ਗਤਮਤ੍ਤਂ ਮਂ (ਸੀ. ਸ੍ਯਾ.)], ਮਿਗਰਾਜਾ ਅਪੋਥਯਿ [ਅਹੇਠਯਿ (ਸੀ. ਸ੍ਯਾ. ਪੀ.)];
ਸੀਹੇਨ ਪੋਥਿਤੋ [ਪਾਤਿਤੋ (ਸੀ. ਪੀ.), ਘਾਟਿਤੋ (ਸ੍ਯਾ.)] ਸਨ੍ਤੋ, ਤਤ੍ਥ ਕਾਲਙ੍ਕਤੋ ਅਹਂ.
੫. ‘‘ਆਸਨ੍ਨੇ ਮੇ ਕਤਂ ਕਮ੍ਮਂ, ਬੁਦ੍ਧਸੇਟ੍ਠੇ ਅਨਾਸਵੇ;
ਸੁਮੁਤ੍ਤੋ ਸਰਵੇਗੋਵ, ਦੇਵਲੋਕਮਗਚ੍ਛਹਂ.
੬. ‘‘ਯੂਪੋ ਤਤ੍ਥ ਸੁਭੋ ਆਸਿ, ਪੁਞ੍ਞਕਮ੍ਮਾਭਿਨਿਮ੍ਮਿਤੋ;
ਸਹਸ੍ਸਕਣ੍ਡੋ ਸਤਭੇਣ੍ਡੁ, ਧਜਾਲੁ ਹਰਿਤਾਮਯੋ.
੭. ‘‘ਪਭਾ ਨਿਦ੍ਧਾਵਤੇ ਤਸ੍ਸ, ਸਤਰਂਸੀਵ ਉਗ੍ਗਤੋ;
ਆਕਿਣ੍ਣੋ ਦੇਵਕਞ੍ਞਾਹਿ, ਆਮੋਦਿਂ ਕਾਮਕਾਮਿਹਂ.
੮. ‘‘ਦੇਵਲੋਕਾ ਚਵਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;
ਆਗਨ੍ਤ੍ਵਾਨ ਮਨੁਸ੍ਸਤ੍ਤਂ, ਪਤ੍ਤੋਮ੍ਹਿ ਆਸਵਕ੍ਖਯਂ.
੯. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਨਿਸੀਦਨਮਦਾਸਹਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਤਿਣਮੁਟ੍ਠੇ ਇਦਂ ਫਲਂ.
੧੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;
ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.
੧੧. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;
ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.
੧੨. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਤਿਣਮੁਟ੍ਠਿਦਾਯਕੋ ਥੇਰੋ ਇਮਾ ਗਾਥਾਯੋ
ਅਭਾਸਿਤ੍ਥਾਤਿ.
ਤਿਣਮੁਟ੍ਠਿਦਾਯਕਤ੍ਥੇਰਸ੍ਸਾਪਦਾਨਂ ਪਠਮਂ.
੨. ਮਞ੍ਚਦਾਯਕਤ੍ਥੇਰਅਪਦਾਨਂ
੧੩. ‘‘ਵਿਪਸ੍ਸਿਨੋ ਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;
ਏਕਮਞ੍ਚਂ [ਏਕਂ ਵੇਚ੍ਚਂ (ਸ੍ਯਾ.), ਏਕਪਚ੍ਛਂ (ਪੀ.)] ਮਯਾ ਦਿਨ੍ਨਂ, ਪਸਨ੍ਨੇਨ ਸਪਾਣਿਨਾ.
੧੪. ‘‘ਹਤ੍ਥਿਯਾਨਂ ਅਸ੍ਸਯਾਨਂ, ਦਿਬ੍ਬਯਾਨਂ ਸਮਜ੍ਝਗਂ;
ਤੇਨ ਮਞ੍ਚਕਦਾਨੇਨ, ਪਤ੍ਤੋਮ੍ਹਿ ਆਸਵਕ੍ਖਯਂ.
੧੫. ‘‘ਏਕਨਵੁਤਿਤੋ ਕਪ੍ਪੇ, ਯਂ ਮਞ੍ਚਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਮਞ੍ਚਦਾਨਸ੍ਸਿਦਂ ਫਲਂ.
੧੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.
੧੭. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.
੧੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਮਞ੍ਚਦਾਯਕੋ [ਵੇਚ੍ਚਕਦਾਯਕੋ (ਸ੍ਯਾ.), ਸਦ੍ਦਸਞ੍ਞਿਕਵਗ੍ਗੇਪਿ ਇਦਂ§ਅਪਦਾਨਂ ਦਿਸ੍ਸਤਿ] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਮਞ੍ਚਦਾਯਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.
੩. ਸਰਣਗਮਨਿਯਤ੍ਥੇਰਅਪਦਾਨਂ
੧੯. ‘‘ਆਰੁਹਿਮ੍ਹ ਤਦਾ ਨਾਵਂ, ਭਿਕ੍ਖੁ ਚਾਜੀਵਿਕੋ ਚਹਂ;
ਨਾਵਾਯ ਭਿਜ੍ਜਮਾਨਾਯ, ਭਿਕ੍ਖੁ ਮੇ ਸਰਣਂ ਅਦਾ.
੨੦. ‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਸੋ ਮੇ ਸਰਣਂ ਅਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਸਰਣਗਮਨੇ ਫਲਂ.
੨੧. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.
੨੨. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.
੨੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸਰਣਗਮਨਿਯੋ ਥੇਰੋ ਇਮਾ ਗਾਥਾਯੋ
ਅਭਾਸਿਤ੍ਥਾਤਿ.
ਸਰਣਗਮਨਿਯਤ੍ਥੇਰਸ੍ਸਾਪਦਾਨਂ ਤਤਿਯਂ.
੪. ਅਬ੍ਭਞ੍ਜਨਦਾਯਕਤ੍ਥੇਰਅਪਦਾਨਂ
੨੪. ‘‘ਨਗਰੇ ਬਨ੍ਧੁਮਤਿਯਾ, ਰਾਜੁਯ੍ਯਾਨੇ ਵਸਾਮਹਂ;
ਚਮ੍ਮਵਾਸੀ ਤਦਾ ਆਸਿਂ, ਕਮਣ੍ਡਲੁਧਰੋ ਅਹਂ.
੨੫. ‘‘ਅਦ੍ਦਸਂ ਵਿਮਲਂ ਬੁਦ੍ਧਂ, ਸਯਮ੍ਭੁਂ ਅਪਰਾਜਿਤਂ;
ਪਧਾਨਂ ਪਹਿਤਤ੍ਤਂ ਤਂ, ਝਾਯਿਂ ਝਾਨਰਤਂ ਵਸਿਂ [ਇਸਿਂ (ਸ੍ਯਾ.)].
੨੬. ‘‘ਸਬ੍ਬਕਾਮਸਮਿਦ੍ਧਿਞ੍ਚ, ਓਘਤਿਣ੍ਣਮਨਾਸਵਂ;
ਦਿਸ੍ਵਾ ਪਸਨ੍ਨੋ ਸੁਮਨੋ, ਅਬ੍ਭਞ੍ਜਨਮਦਾਸਹਂ.
੨੭. ‘‘ਏਕਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਅਬ੍ਭਞ੍ਜਨਸ੍ਸਿਦਂ ਫਲਂ.
੨੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.
੨੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.
੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਅਬ੍ਭਞ੍ਜਨਦਾਯਕੋ ਥੇਰੋ ਇਮਾ ਗਾਥਾਯੋ
ਅਭਾਸਿਤ੍ਥਾਤਿ.
ਅਬ੍ਭਞ੍ਜਨਦਾਯਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.
੫. ਸੁਪਟਦਾਯਕਤ੍ਥੇਰਅਪਦਾਨਂ
੩੧. ‘‘ਦਿਵਾਵਿਹਾਰਾ ਨਿਕ੍ਖਨ੍ਤੋ, ਵਿਪਸ੍ਸੀ ਲੋਕਨਾਯਕੋ;
ਲਹੁਂ ਸੁਪਟਕਂ [ਸੁਪਟਿਕਂ (ਸ੍ਯਾ.), ਪੂਪਪਵਂ (ਪੀ.)] ਦਤ੍ਵਾ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ.
੩੨. ‘‘ਏਕਨਵੁਤਿਤੋ ਕਪ੍ਪੇ, ਸੁਪਟਕਮਦਾਸਹਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਸੁਪਟਸ੍ਸ ਇਦਂ ਫਲਂ.
੩੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.
੩੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.
੩੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸੁਪਟਦਾਯਕੋ ਥੇਰੋ ਇਮਾ ਗਾਥਾਯੋ
ਅਭਾਸਿਤ੍ਥਾਤਿ.
ਸੁਪਟਦਾਯਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.
੬. ਦਣ੍ਡਦਾਯਕਤ੍ਥੇਰਅਪਦਾਨਂ
੩੬. ‘‘ਕਾਨਨਂ ਵਨਮੋਗਯ੍ਹ, ਵੇਲ਼ੁਂ ਛੇਤ੍ਵਾਨਹਂ ਤਦਾ;
ਆਲਮ੍ਬਣਂ ਕਰਿਤ੍ਵਾਨ, ਸਙ੍ਘਸ੍ਸ ਅਦਦਿਂ ਬਹੁਂ [ਅਹਂ (ਸੀ. ਸ੍ਯਾ. ਪੀ.)].
੩੭. ‘‘ਤੇਨ ਚਿਤ੍ਤਪ੍ਪਸਾਦੇਨ, ਸੁਬ੍ਬਤੇ ਅਭਿਵਾਦਿਯ;
ਆਲਮ੍ਬਦਣ੍ਡਂ ਦਤ੍ਵਾਨ, ਪਕ੍ਕਾਮਿਂ ਉਤ੍ਤਰਾਮੁਖੋ.
੩੮. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਦਣ੍ਡਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਦਣ੍ਡਦਾਨਸ੍ਸਿਦਂ ਫਲਂ.
੩੯. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.
੪੦. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.
੪੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਦਣ੍ਡਦਾਯਕੋ ਥੇਰੋ ਇਮਾ ਗਾਥਾਯੋ
ਅਭਾਸਿਤ੍ਥਾਤਿ.
ਦਣ੍ਡਦਾਯਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.
ਤੇਵੀਸਤਿਮਂ ਭਾਣਵਾਰਂ.
੭. ਗਿਰਿਨੇਲਪੂਜਕਤ੍ਥੇਰਅਪਦਾਨਂ
੪੨. ‘‘ਮਿਗਲੁਦ੍ਦੋ ਪੁਰੇ ਆਸਿਂ, ਵਿਪਿਨੇ ਵਿਚਰਂ ਅਹਂ;
ਅਦ੍ਦਸਂ ਵਿਰਜਂ ਬੁਦ੍ਧਂ, ਸਬ੍ਬਧਮ੍ਮਾਨ ਪਾਰਗੁਂ.
੪੩. ‘‘ਤਸ੍ਮਿਂ ਮਹਾਕਾਰੁਣਿਕੇ, ਸਬ੍ਬਸਤ੍ਤਹਿਤੇ ਰਤੇ;
ਪਸਨ੍ਨਚਿਤ੍ਤੋ ਸੁਮਨੋ, ਨੇਲਪੁਪ੍ਫਮਪੂਜਯਿਂ.
੪੪. ‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੪੫. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.
੪੬. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.
੪੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਗਿਰਿਨੇਲਪੂਜਕੋ ਥੇਰੋ ਇਮਾ ਗਾਥਾਯੋ
ਅਭਾਸਿਤ੍ਥਾਤਿ.
ਗਿਰਿਨੇਲਪੂਜਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.
੮. ਬੋਧਿਸਮ੍ਮਜ੍ਜਕਤ੍ਥੇਰਅਪਦਾਨਂ
੪੮. ‘‘ਅਹਂ ਪੁਰੇ ਬੋਧਿਪਤ੍ਤਂ, ਉਜ੍ਝਿਤਂ ਚੇਤਿਯਙ੍ਗਣੇ;
ਤਂ ਗਹੇਤ੍ਵਾਨ ਛਡ੍ਡੇਸਿਂ, ਅਲਭਿਂ ਵੀਸਤੀਗੁਣੇ.
੪੯. ‘‘ਤਸ੍ਸ ਕਮ੍ਮਸ੍ਸ ਤੇਜੇਨ, ਸਂਸਰਨ੍ਤੋ ਭਵਾਭਵੇ;
ਦੁਵੇ ਭਵੇ ਸਂਸਰਾਮਿ, ਦੇਵਤ੍ਤੇ ਚਾਪਿ ਮਾਨੁਸੇ.
੫੦. ‘‘ਦੇਵਲੋਕਾ ਚਵਿਤ੍ਵਾਨ, ਆਗਨ੍ਤ੍ਵਾ ਮਾਨੁਸਂ ਭਵਂ;
ਦੁਵੇ ਕੁਲੇ ਪਜਾਯਾਮਿ, ਖਤ੍ਤਿਯੇ ਚਾਪਿ ਬ੍ਰਾਹ੍ਮਣੇ.
੫੧. ‘‘ਅਙ੍ਗਪਚ੍ਚਙ੍ਗਸਮ੍ਪਨ੍ਨੋ, ਆਰੋਹਪਰਿਣਾਹਵਾ;
ਅਭਿਰੂਪੋ ਸੁਚਿ ਹੋਮਿ, ਸਮ੍ਪੁਣ੍ਣਙ੍ਗੋ ਅਨੂਨਕੋ.
੫੨. ‘‘ਦੇਵਲੋਕੇ ਮਨੁਸ੍ਸੇ ਵਾ, ਜਾਤੋ ਵਾ ਯਤ੍ਥ ਕਤ੍ਥਚਿ;
ਭਵੇ ਸੁਵਣ੍ਣਵਣ੍ਣੋ ਚ, ਉਤ੍ਤਤ੍ਤਕਨਕੂਪਮੋ.
੫੩. ‘‘ਮੁਦੁਕਾ ਮਦ੍ਦਵਾ ਸ੍ਨਿਦ੍ਧਾ [ਮੁਦੁ ਮਦ੍ਦਵਾ ਸਿਨਿਦ੍ਧਾ (ਸ੍ਯਾ.)], ਸੁਖੁਮਾ ਸੁਕੁਮਾਰਿਕਾ;
ਛਵਿ ਮੇ ਸਬ੍ਬਦਾ ਹੋਤਿ, ਬੋਧਿਪਤ੍ਤੇ ਸੁਛਡ੍ਡਿਤੇ [ਸੁਛਡ੍ਡਿਨੇ (ਸੀ.)].
੫੪. ‘‘ਯਤੋ ਕੁਤੋਚਿ ਗਤੀਸੁ, ਸਰੀਰੇ ਸਮੁਦਾਗਤੇ;
ਨ ਲਿਮ੍ਪਤਿ ਰਜੋਜਲ੍ਲਂ, ਵਿਪਾਕੋ ਪਤ੍ਤਛਡ੍ਡਿਤੇ.
੫੫. ‘‘ਉਣ੍ਹੇ ਵਾਤਾਤਪੇ ਤਸ੍ਸ, ਅਗ੍ਗਿਤਾਪੇਨ ਵਾ ਪਨ;
ਗਤ੍ਤੇ ਸੇਦਾ ਨ ਮੁਚ੍ਚਨ੍ਤਿ, ਵਿਪਾਕੋ ਪਤ੍ਤਛਡ੍ਡਿਤੇ.
੫੬. ‘‘ਕੁਟ੍ਠਂ ਗਣ੍ਡੋ ਕਿਲਾਸੋ ਚ, ਤਿਲਕਾ ਪਿਲ਼ਕਾ ਤਥਾ;
ਨ ਹੋਨ੍ਤਿ ਕਾਯੇ ਦਦ੍ਦੁ ਚ, ਵਿਪਾਕੋ ਪਤ੍ਤਛਡ੍ਡਿਤੇ.
੫੭. ‘‘ਅਪਰਮ੍ਪਿ ਗੁਣਂ ਤਸ੍ਸ, ਨਿਬ੍ਬਤ੍ਤਤਿ ਭਵਾਭਵੇ;
ਰੋਗਾ ਨ ਹੋਨ੍ਤਿ ਕਾਯਸ੍ਮਿਂ, ਵਿਪਾਕੋ ਪਤ੍ਤਛਡ੍ਡਿਤੇ.
੫੮. ‘‘ਅਪਰਮ੍ਪਿ ਗੁਣਂ ਤਸ੍ਸ, ਨਿਬ੍ਬਤ੍ਤਤਿ ਭਵਾਭਵੇ;
ਨ ਹੋਤਿ ਚਿਤ੍ਤਜਾ ਪੀਲ਼ਾ, ਵਿਪਾਕੋ ਪਤ੍ਤਛਡ੍ਡਿਤੇ.
੫੯. ‘‘ਅਪਰਮ੍ਪਿ ਗੁਣਂ ਤਸ੍ਸ, ਨਿਬ੍ਬਤ੍ਤਤਿ ਭਵਾਭਵੇ;
ਅਮਿਤ੍ਤਾ ਨ ਭਵਨ੍ਤਸ੍ਸ, ਵਿਪਾਕੋ ਪਤ੍ਤਛਡ੍ਡਿਤੇ.
੬੦. ‘‘ਅਪਰਮ੍ਪਿ ਗੁਣਂ ਤਸ੍ਸ, ਨਿਬ੍ਬਤ੍ਤਤਿ ਭਵਾਭਵੇ;
ਅਨੂਨਭੋਗੋ ਭਵਤਿ, ਵਿਪਾਕੋ ਪਤ੍ਤਛਡ੍ਡਿਤੇ.
੬੧. ‘‘ਅਪਰਮ੍ਪਿ ਗੁਣਂ ਤਸ੍ਸ, ਨਿਬ੍ਬਤ੍ਤਤਿ ਭਵਾਭਵੇ;
ਅਗ੍ਗਿਰਾਜੂਹਿ ਚੋਰੇਹਿ, ਨ ਹੋਤਿ ਉਦਕੇ ਭਯਂ.
੬੨. ‘‘ਅਪਰਮ੍ਪਿ ਗੁਣਂ ਤਸ੍ਸ, ਨਿਬ੍ਬਤ੍ਤਤਿ ਭਵਾਭਵੇ;
ਦਾਸਿਦਾਸਾ ਅਨੁਚਰਾ, ਹੋਨ੍ਤਿ ਚਿਤ੍ਤਾਨੁਵਤ੍ਤਕਾ.
੬੩. ‘‘ਯਮ੍ਹਿ ਆਯੁਪ੍ਪਮਾਣਮ੍ਹਿ, ਜਾਯਤੇ ਮਾਨੁਸੇ ਭਵੇ;
ਤਤੋ ਨ ਹਾਯਤੇ ਆਯੁ, ਤਿਟ੍ਠਤੇ ਯਾਵਤਾਯੁਕਂ.
੬੪. ‘‘ਅਬ੍ਭਨ੍ਤਰਾ ਚ ਬਾਹਿਰਾ [ਬਹਿਚਰਾ (ਸੀ. ਪੀ. ਕ.)], ਨੇਗਮਾ ਚ ਸਰਟ੍ਠਕਾ;
ਨੁਯੁਤ੍ਤਾ ਹੋਨ੍ਤਿ ਸਬ੍ਬੇਪਿ, ਵੁਦ੍ਧਿਕਾਮਾ ਸੁਖਿਚ੍ਛਕਾ.
੬੫. ‘‘ਭੋਗਵਾ ਯਸਵਾ ਹੋਮਿ, ਸਿਰਿਮਾ ਞਾਤਿਪਕ੍ਖਵਾ;
ਅਪੇਤਭਯਸਨ੍ਤਾਸੋ, ਭਵੇਹਂ ਸਬ੍ਬਤੋ ਭਵੇ.
੬੬. ‘‘ਦੇਵਾ ਮਨੁਸ੍ਸਾ ਅਸੁਰਾ, ਗਨ੍ਧਬ੍ਬਾ ਯਕ੍ਖਰਕ੍ਖਸਾ;
ਸਬ੍ਬੇ ਤੇ ਪਰਿਰਕ੍ਖਨ੍ਤਿ, ਭਵੇ ਸਂਸਰਤੋ ਸਦਾ.
੬੭. ‘‘ਦੇਵਲੋਕੇ ਮਨੁਸ੍ਸੇ ਚ, ਅਨੁਭੋਤ੍ਵਾ ਉਭੋ ਯਸੇ;
ਅਵਸਾਨੇ ਚ ਨਿਬ੍ਬਾਨਂ, ਸਿਵਂ ਪਤ੍ਤੋ ਅਨੁਤ੍ਤਰਂ.
੬੮. ‘‘ਸਮ੍ਬੁਦ੍ਧਮੁਦ੍ਦਿਸਿਤ੍ਵਾਨ, ਬੋਧਿਂ ਵਾ ਤਸ੍ਸ ਸਤ੍ਥੁਨੋ;
ਯੋ ਪੁਞ੍ਞਂ ਪਸਵੇ ਪੋਸੋ, ਤਸ੍ਸ ਕਿਂ ਨਾਮ ਦੁਲ੍ਲਭਂ.
੬੯. ‘‘ਮਗ੍ਗੇ ਫਲੇ ਆਗਮੇ ਚ, ਝਾਨਾਭਿਞ੍ਞਾਗੁਣੇਸੁ ਚ;
ਅਞ੍ਞੇਸਂ ਅਧਿਕੋ ਹੁਤ੍ਵਾ, ਨਿਬ੍ਬਾਯਾਮਿ ਅਨਾਸਵੋ.