੯. ਸੁਭਦ੍ਦਤ੍ਥੇਰਅਪਦਾਨਂ

੧੦੧. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਜਨਤਂ ਉਦ੍ਧਰਿਤ੍ਵਾਨ, ਨਿਬ੍ਬਾਯਤਿ ਮਹਾਯਸੋ.

੧੦੨. ‘‘ਨਿਬ੍ਬਾਯਨ੍ਤੇ ਚ ਸਮ੍ਬੁਦ੍ਧੇ, ਦਸਸਹਸ੍ਸਿ ਕਮ੍ਪਥ;

ਜਨਕਾਯੋ ਮਹਾ ਆਸਿ, ਦੇਵਾ ਸਨ੍ਨਿਪਤੁਂ ਤਦਾ.

੧੦੩. ‘‘ਚਨ੍ਦਨਂ ਪੂਰਯਿਤ੍ਵਾਨ, ਤਗਰਾਮਲ੍ਲਿਕਾਹਿ ਚ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਆਰੋਪਯਿਂ [ਆਲੇਪੇਸਿਂ (ਸੀ.), ਆਰੋਪੇਸਿਂ (ਸ੍ਯਾ.)] ਨਰੁਤ੍ਤਮਂ.

੧੦੪. ‘‘ਮਮ ਸਙ੍ਕਪ੍ਪਮਞ੍ਞਾਯ, ਸਤ੍ਥਾ ਲੋਕੇ ਅਨੁਤ੍ਤਰੋ;

ਨਿਪਨ੍ਨਕੋਵ ਸਮ੍ਬੁਦ੍ਧੋ, ਇਮਾ ਗਾਥਾ ਅਭਾਸਥ.

੧੦੫. ‘‘‘ਯੋ ਮੇ ਪਚ੍ਛਿਮਕੇ ਕਾਲੇ, ਗਨ੍ਧਮਾਲੇਨ [ਗਨ੍ਧਮਲ੍ਲੇਨ (ਸ੍ਯਾ. ਕ.) ਨਪੁਂਸਕੇਕਤ੍ਤਂ ਮਨਸਿਕਾਤਬ੍ਬਂ] ਛਾਦਯਿ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੧੦੬. ‘‘‘ਇਤੋ ਚੁਤੋ ਅਯਂ ਪੋਸੋ, ਤੁਸਿਤਕਾਯਂ ਗਮਿਸ੍ਸਤਿ;

ਤਤ੍ਥ ਰਜ੍ਜਂ ਕਰਿਤ੍ਵਾਨ, ਨਿਮ੍ਮਾਨਂ ਸੋ ਗਮਿਸ੍ਸਤਿ.

੧੦੭. ‘‘‘ਏਤੇਨੇਵ ਉਪਾਯੇਨ, ਦਤ੍ਵਾ ਮਾਲਂ [ਮਲ੍ਯਂ (ਸੀ.), ਮਲ੍ਲਂ (ਸ੍ਯਾ. ਕ.)] ਵਰੁਤ੍ਤਮਂ;

ਸਕਕਮ੍ਮਾਭਿਰਦ੍ਧੋ ਸੋ, ਸਮ੍ਪਤ੍ਤਿਂ ਅਨੁਭੋਸ੍ਸਤਿ.

੧੦੮. ‘‘‘ਪੁਨਾਪਿ ਤੁਸਿਤੇ ਕਾਯੇ, ਨਿਬ੍ਬਤ੍ਤਿਸ੍ਸਤਿਯਂ ਨਰੋ;

ਤਮ੍ਹਾ ਕਾਯਾ ਚਵਿਤ੍ਵਾਨ, ਮਨੁਸ੍ਸਤ੍ਤਂ ਗਮਿਸ੍ਸਤਿ.

੧੦੯. ‘‘‘ਸਕ੍ਯਪੁਤ੍ਤੋ ਮਹਾਨਾਗੋ, ਅਗ੍ਗੋ ਲੋਕੇ ਸਦੇਵਕੇ;

ਬੋਧਯਿਤ੍ਵਾ ਬਹੂ ਸਤ੍ਤੇ, ਨਿਬ੍ਬਾਯਿਸ੍ਸਤਿ ਚਕ੍ਖੁਮਾ.

੧੧੦. ‘‘‘ਤਦਾ ਸੋਪਗਤੋ ਸਨ੍ਤੋ, ਸੁਕ੍ਕਮੂਲੇਨ ਚੋਦਿਤੋ;

ਉਪਸਙ੍ਕਮ੍ਮ ਸਮ੍ਬੁਦ੍ਧਂ, ਪਞ੍ਹਂ ਪੁਚ੍ਛਿਸ੍ਸਤਿ ਤਦਾ.

੧੧੧. ‘‘‘ਹਾਸਯਿਤ੍ਵਾਨ ਸਮ੍ਬੁਦ੍ਧੋ, ਸਬ੍ਬਞ੍ਞੂ ਲੋਕਨਾਯਕੋ;

ਪੁਞ੍ਞਕਮ੍ਮਂ ਪਰਿਞ੍ਞਾਯ, ਸਚ੍ਚਾਨਿ ਵਿਵਰਿਸ੍ਸਤਿ.

੧੧੨. ‘‘‘ਆਰਦ੍ਧੋ ਚ ਅਯਂ ਪਞ੍ਹੋ, ਤੁਟ੍ਠੋ ਏਕਗ੍ਗਮਾਨਸੋ;

ਸਤ੍ਥਾਰਂ ਅਭਿਵਾਦੇਤ੍ਵਾ, ਪਬ੍ਬਜ੍ਜਂ ਯਾਚਯਿਸ੍ਸਤਿ.

੧੧੩. ‘‘‘ਪਸਨ੍ਨਮਾਨਸਂ ਦਿਸ੍ਵਾ, ਸਕਕਮ੍ਮੇਨ ਤੋਸਿਤਂ;

ਪਬ੍ਬਾਜੇਸ੍ਸਤਿ ਸੋ ਬੁਦ੍ਧੋ, ਅਗ੍ਗਮਗ੍ਗਸ੍ਸ ਕੋਵਿਦੋ.

੧੧੪. ‘‘‘ਵਾਯਮਿਤ੍ਵਾਨਯਂ ਪੋਸੋ, ਸਮ੍ਮਾਸਮ੍ਬੁਦ੍ਧਸਾਸਨੇ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ’.

ਪਞ੍ਚਮਭਾਣਵਾਰਂ.

੧੧੫. ‘‘ਪੁਬ੍ਬਕਮ੍ਮੇਨ ਸਂਯੁਤ੍ਤੋ, ਏਕਗ੍ਗੋ ਸੁਸਮਾਹਿਤੋ;

ਬੁਦ੍ਧਸ੍ਸ ਓਰਸੋ ਪੁਤ੍ਤੋ, ਧਮ੍ਮਜੋਮ੍ਹਿ ਸੁਨਿਮ੍ਮਿਤੋ.

੧੧੬. ‘‘ਧਮ੍ਮਰਾਜਂ ਉਪਗਮ੍ਮ, ਅਪੁਚ੍ਛਿਂ ਪਞ੍ਹਮੁਤ੍ਤਮਂ;

ਕਥਯਨ੍ਤੋ ਚ ਮੇ ਪਞ੍ਹਂ, ਧਮ੍ਮਸੋਤਂ ਉਪਾਨਯਿ.

੧੧੭. ‘‘ਤਸ੍ਸਾਹਂ ਧਮ੍ਮਮਞ੍ਞਾਯ, ਵਿਹਾਸਿਂ ਸਾਸਨੇ ਰਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੧੧੮. ‘‘ਸਤਸਹਸ੍ਸਿਤੋ ਕਪ੍ਪੇ, ਜਲਜੁਤ੍ਤਮਨਾਯਕੋ;

ਨਿਬ੍ਬਾਯਿ ਅਨੁਪਾਦਾਨੋ, ਦੀਪੋਵ ਤੇਲਸਙ੍ਖਯਾ.

੧੧੯. ‘‘ਸਤ੍ਤਯੋਜਨਿਕਂ ਆਸਿ, ਥੂਪਞ੍ਚ ਰਤਨਾਮਯਂ;

ਧਜਂ ਤਤ੍ਥ ਅਪੂਜੇਸਿਂ, ਸਬ੍ਬਭਦ੍ਦਂ ਮਨੋਰਮਂ.

੧੨੦. ‘‘ਕਸ੍ਸਪਸ੍ਸ ਚ ਬੁਦ੍ਧਸ੍ਸ, ਤਿਸ੍ਸੋ ਨਾਮਗ੍ਗਸਾਵਕੋ;

ਪੁਤ੍ਤੋ ਮੇ ਓਰਸੋ ਆਸਿ, ਦਾਯਾਦੋ ਜਿਨਸਾਸਨੇ.

੧੨੧. ‘‘ਤਸ੍ਸ ਹੀਨੇਨ ਮਨਸਾ, ਵਾਚਂ ਭਾਸਿਂ ਅਭਦ੍ਦਕਂ;

ਤੇਨ ਕਮ੍ਮਵਿਪਾਕੇਨ, ਪਚ੍ਛਾ ਮੇ ਆਸਿ ਭਦ੍ਦਕਂ [ਪਚ੍ਛਿਮੇ ਅਦ੍ਦਸਂ ਜਿਨਂ (ਸੀ.)].

੧੨੨. ‘‘ਉਪਵਤ੍ਤਨੇ ਸਾਲਵਨੇ, ਪਚ੍ਛਿਮੇ ਸਯਨੇ ਮੁਨਿ;

ਪਬ੍ਬਾਜੇਸਿ ਮਹਾਵੀਰੋ, ਹਿਤੋ ਕਾਰੁਣਿਕੋ ਜਿਨੋ.

੧੨੩. ‘‘ਅਜ੍ਜੇਵ ਦਾਨਿ ਪਬ੍ਬਜ੍ਜਾ, ਅਜ੍ਜੇਵ ਉਪਸਮ੍ਪਦਾ;

ਅਜ੍ਜੇਵ ਪਰਿਨਿਬ੍ਬਾਨਂ, ਸਮ੍ਮੁਖਾ ਦ੍ਵਿਪਦੁਤ੍ਤਮੇ.

੧੨੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਭਦ੍ਦੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਭਦ੍ਦਤ੍ਥੇਰਸ੍ਸਾਪਦਾਨਂ ਨਵਮਂ.