੫. ਉਪਾਲਿਵਗ੍ਗੋ

੧. ਭਾਗਿਨੇਯ੍ਯੁਪਾਲਿਤ੍ਥੇਰਅਪਦਾਨਂ

੧. ‘‘ਖੀਣਾਸਵਸਹਸ੍ਸੇਹਿ, ਪਰਿਵੁਤੋ [ਪਰੇਤੋ (ਕ. ਅਟ੍ਠ)] ਲੋਕਨਾਯਕੋ;

ਵਿਵੇਕਮਨੁਯੁਤ੍ਤੋ ਸੋ, ਗਚ੍ਛਤੇ ਪਟਿਸਲ੍ਲਿਤੁਂ.

੨. ‘‘ਅਜਿਨੇਨ ਨਿਵਤ੍ਥੋਹਂ, ਤਿਦਣ੍ਡਪਰਿਧਾਰਕੋ;

ਭਿਕ੍ਖੁਸਙ੍ਘਪਰਿਬ੍ਯੂਲ਼੍ਹਂ, ਅਦ੍ਦਸਂ ਲੋਕਨਾਯਕਂ.

੩. ‘‘ਏਕਂਸਂ ਅਜਿਨਂ ਕਤ੍ਵਾ, ਸਿਰੇ ਕਤ੍ਵਾਨ ਅਞ੍ਜਲਿਂ;

ਸਮ੍ਬੁਦ੍ਧਂ ਅਭਿਵਾਦੇਤ੍ਵਾ, ਸਨ੍ਥਵਿਂ ਲੋਕਨਾਯਕਂ.

੪. ‘‘ਯਥਾਣ੍ਡਜਾ ਚ ਸਂਸੇਦਾ, ਓਪਪਾਤੀ ਜਲਾਬੁਜਾ;

ਕਾਕਾਦਿਪਕ੍ਖਿਨੋ ਸਬ੍ਬੇ, ਅਨ੍ਤਲਿਕ੍ਖਚਰਾ ਸਦਾ.

੫. ‘‘ਯੇ ਕੇਚਿ ਪਾਣਭੂਤਤ੍ਥਿ, ਸਞ੍ਞਿਨੋ ਵਾ ਅਸਞ੍ਞਿਨੋ;

ਸਬ੍ਬੇ ਤੇ ਤਵ ਞਾਣਮ੍ਹਿ, ਅਨ੍ਤੋ ਹੋਨ੍ਤਿ ਸਮੋਗਧਾ.

੬. ‘‘ਗਨ੍ਧਾ ਚ ਪਬ੍ਬਤੇਯ੍ਯਾ ਯੇ, ਹਿਮਵਨ੍ਤਨਗੁਤ੍ਤਮੇ;

ਸਬ੍ਬੇ ਤੇ ਤਵ ਸੀਲਮ੍ਹਿ, ਕਲਾਯਪਿ ਨ ਯੁਜ੍ਜਰੇ.

੭. ‘‘ਮੋਹਨ੍ਧਕਾਰਪਕ੍ਖਨ੍ਦੋ, ਅਯਂ ਲੋਕੋ ਸਦੇਵਕੋ;

ਤਵ ਞਾਣਮ੍ਹਿ ਜੋਤਨ੍ਤੇ, ਅਨ੍ਧਕਾਰਾ ਵਿਧਂਸਿਤਾ.

੮. ‘‘ਯਥਾ ਅਤ੍ਥਙ੍ਗਤੇ ਸੂਰਿਯੇ, ਹੋਨ੍ਤਿ ਸਤ੍ਤਾ ਤਮੋਗਤਾ;

ਏਵਂ ਬੁਦ੍ਧੇ ਅਨੁਪ੍ਪਨ੍ਨੇ, ਹੋਤਿ ਲੋਕੋ ਤਮੋਗਤੋ.

੯. ‘‘ਯਥੋਦਯਨ੍ਤੋ ਆਦਿਚ੍ਚੋ, ਵਿਨੋਦੇਤਿ ਤਮਂ ਸਦਾ;

ਤਥੇਵ ਤ੍ਵਂ ਬੁਦ੍ਧਸੇਟ੍ਠ, ਵਿਦ੍ਧਂਸੇਸਿ ਤਮਂ ਸਦਾ.

੧੦. ‘‘ਪਧਾਨਪਹਿਤਤ੍ਤੋਸਿ, ਬੁਦ੍ਧੋ ਲੋਕੇ ਸਦੇਵਕੇ;

ਤਵ ਕਮ੍ਮਾਭਿਰਦ੍ਧੇਨ, ਤੋਸੇਸਿ ਜਨਤਂ ਬਹੁਂ.

੧੧. ‘‘ਤਂ ਸਬ੍ਬਂ ਅਨੁਮੋਦਿਤ੍ਵਾ, ਪਦੁਮੁਤ੍ਤਰੋ ਮਹਾਮੁਨਿ;

ਨਭਂ ਅਬ੍ਭੁਗ੍ਗਮੀ ਧੀਰੋ, ਹਂਸਰਾਜਾਵ ਅਮ੍ਬਰੇ.

੧੨. ‘‘ਅਬ੍ਭੁਗ੍ਗਨ੍ਤ੍ਵਾਨ ਸਮ੍ਬੁਦ੍ਧੋ, ਮਹੇਸਿ ਪਦੁਮੁਤ੍ਤਰੋ;

ਅਨ੍ਤਲਿਕ੍ਖੇ ਠਿਤੋ ਸਤ੍ਥਾ, ਇਮਾ ਗਾਥਾ ਅਭਾਸਥ.

੧੩. ‘‘ਯੇਨਿਦਂ ਥਵਿਤਂ ਞਾਣਂ, ਓਪਮ੍ਮੇਹਿ ਸਮਾਯੁਤਂ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੧੪. ‘‘‘ਅਟ੍ਠਾਰਸਞ੍ਚ ਖਤ੍ਤੁਂ ਸੋ, ਦੇਵਰਾਜਾ ਭਵਿਸ੍ਸਤਿ;

ਪਥਬ੍ਯਾ ਰਜ੍ਜਂ ਤਿਸਤਂ, ਵਸੁਧਂ ਆਵਸਿਸ੍ਸਤਿ.

੧੫. ‘‘‘ਪਞ੍ਚਵੀਸਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੧੬. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੧੭. ‘‘‘ਤੁਸਿਤਾ ਹਿ ਚਵਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਹੀਨੋਵ ਜਾਤਿਯਾ ਸਨ੍ਤੋ, ਉਪਾਲਿ ਨਾਮ ਹੇਸ੍ਸਤਿ.

੧੮. ‘‘‘ਸੋ ਪਚ੍ਛਾ ਪਬ੍ਬਜਿਤ੍ਵਾਨ, ਵਿਰਾਜੇਤ੍ਵਾਨ ਪਾਪਕਂ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ.

੧੯. ‘‘‘ਤੁਟ੍ਠੋ ਚ ਗੋਤਮੋ ਬੁਦ੍ਧੋ, ਸਕ੍ਯਪੁਤ੍ਤੋ ਮਹਾਯਸੋ;

ਵਿਨਯਾਧਿਗਤਂ ਤਸ੍ਸ, ਏਤਦਗ੍ਗੇ ਠਪੇਸ੍ਸਤਿ’.

੨੦. ‘‘ਸਦ੍ਧਾਯਾਹਂ ਪਬ੍ਬਜਿਤੋ, ਕਤਕਿਚ੍ਚੋ ਅਨਾਸਵੋ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੨੧. ‘‘ਭਗਵਾ ਚਾਨੁਕਮ੍ਪੀ ਮਂ, ਵਿਨਯੇਹਂ ਵਿਸਾਰਦੋ;

ਸਕਕਮ੍ਮਾਭਿਰਦ੍ਧੋ ਚ, ਵਿਹਰਾਮਿ ਅਨਾਸਵੋ.

੨੨. ‘‘ਸਂਵੁਤੋ ਪਾਤਿਮੋਕ੍ਖਮ੍ਹਿ, ਇਨ੍ਦ੍ਰਿਯੇਸੁ ਚ ਪਞ੍ਚਸੁ;

ਧਾਰੇਮਿ ਵਿਨਯਂ ਸਬ੍ਬਂ, ਕੇਵਲਂ ਰਤਨਾਕਰਂ [ਰਤਨਗ੍ਘਰਂ (ਕ.)].

੨੩. ‘‘ਮਮਞ੍ਚ ਗੁਣਮਞ੍ਞਾਯ, ਸਤ੍ਥਾ ਲੋਕੇ ਅਨੁਤ੍ਤਰੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਏਤਦਗ੍ਗੇ ਠਪੇਸਿ ਮਂ.

੨੪. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਪਾਲਿਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਭਾਗਿਨੇਯ੍ਯੁਪਾਲਿਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਸੋਣਕੋਲ਼ਿਵਿਸਤ੍ਥੇਰਅਪਦਾਨਂ

੨੫. ‘‘ਅਨੋਮਦਸ੍ਸਿਸ੍ਸ ਮੁਨਿਨੋ, ਲੋਕਜੇਟ੍ਠਸ੍ਸ ਤਾਦਿਨੋ;

ਸੁਧਾਯ ਲੇਪਨਂ ਕਤ੍ਵਾ, ਚਙ੍ਕਮਂ ਕਾਰਯਿਂ ਅਹਂ.

੨੬. ‘‘ਨਾਨਾਵਣੇਹਿ ਪੁਪ੍ਫੇਹਿ, ਚਙ੍ਕਮਂ ਸਨ੍ਥਰਿਂ ਅਹਂ;

ਆਕਾਸੇ ਵਿਤਾਨਂ ਕਤ੍ਵਾ, ਭੋਜਯਿਂ ਬੁਦ੍ਧਮੁਤ੍ਤਮਂ.

੨੭. ‘‘ਅਞ੍ਜਲਿਂ ਪਗ੍ਗਹੇਤ੍ਵਾਨ, ਅਭਿਵਾਦੇਤ੍ਵਾਨ ਸੁਬ੍ਬਤਂ [ਪੁਪ੍ਫਕਂ (ਕ.)];

ਦੀਘਸਾਲਂ ਭਗਵਤੋ, ਨਿਯ੍ਯਾਦੇਸਿਮਹਂ ਤਦਾ.

੨੮. ‘‘ਮਮ ਸਙ੍ਕਪ੍ਪਮਞ੍ਞਾਯ, ਸਤ੍ਥਾ ਲੋਕੇ ਅਨੁਤ੍ਤਰੋ;

ਪਟਿਗ੍ਗਹੇਸਿ ਭਗਵਾ, ਅਨੁਕਮ੍ਪਾਯ ਚਕ੍ਖੁਮਾ.

੨੯. ‘‘ਪਟਿਗ੍ਗਹੇਤ੍ਵਾਨ ਸਮ੍ਬੁਦ੍ਧੋ, ਦਕ੍ਖਿਣੇਯ੍ਯੋ ਸਦੇਵਕੇ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੩੦. ‘‘‘ਯੋ ਸੋ ਹਟ੍ਠੇਨ ਚਿਤ੍ਤੇਨ, ਦੀਘਸਾਲਂ ਅਦਾਸਿ [ਅਕਾਸਿ (ਸੀ.)] ਮੇ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੩੧. ‘‘‘ਇਮਸ੍ਸ ਮਚ੍ਚੁਕਾਲਮ੍ਹਿ, ਪੁਞ੍ਞਕਮ੍ਮਸਮਙ੍ਗਿਨੋ;

ਸਹਸ੍ਸਯੁਤ੍ਤਸ੍ਸਰਥੋ, ਉਪਟ੍ਠਿਸ੍ਸਤਿ ਤਾਵਦੇ.

੩੨. ‘‘‘ਤੇਨ ਯਾਨੇਨਯਂ ਪੋਸੋ, ਦੇਵਲੋਕਂ ਗਮਿਸ੍ਸਤਿ;

ਅਨੁਮੋਦਿਸ੍ਸਰੇ ਦੇਵਾ, ਸਮ੍ਪਤ੍ਤੇ ਕੁਸਲਬ੍ਭਵੇ [ਕੁਸਲੇ ਭਵੇ (ਸੀ. ਸ੍ਯਾ.)].

੩੩. ‘‘‘ਮਹਾਰਹਂ ਬ੍ਯਮ੍ਹਂ ਸੇਟ੍ਠਂ, ਰਤਨਮਤ੍ਤਿਕਲੇਪਨਂ;

ਕੂਟਾਗਾਰਵਰੂਪੇਤਂ, ਬ੍ਯਮ੍ਹਂ ਅਜ੍ਝਾਵਸਿਸ੍ਸਤਿ.

੩੪. ‘‘‘ਤਿਂਸਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਤਿ;

ਪਞ੍ਚਵੀਸਤਿ ਕਪ੍ਪਾਨਿ, ਦੇਵਰਾਜਾ ਭਵਿਸ੍ਸਤਿ.

੩੫. ‘‘‘ਸਤ੍ਤਸਤ੍ਤਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਯਸੋਧਰਸਨਾਮਾ [ਯਸੇਧਰਾ ਸਮਾਨਾ (ਸੀ.)] ਤੇ, ਸਬ੍ਬੇਪਿ ਏਕਨਾਮਕਾ.

੩੬. ‘‘‘ਦ੍ਵੇ ਸਮ੍ਪਤ੍ਤੀ ਅਨੁਭੋਤ੍ਵਾ, ਵਡ੍ਢੇਤ੍ਵਾ [ਚਿਨਿਤ੍ਵਾ (ਸ੍ਯਾ.)] ਪੁਞ੍ਞਸਞ੍ਚਯਂ;

ਅਟ੍ਠਵੀਸਤਿਕਪ੍ਪਮ੍ਹਿ, ਚਕ੍ਕਵਤ੍ਤੀ ਭਵਿਸ੍ਸਤਿ.

੩੭. ‘‘‘ਤਤ੍ਰਾਪਿ ਬ੍ਯਮ੍ਹਂ ਪਵਰਂ, ਵਿਸ੍ਸਕਮ੍ਮੇਨ ਮਾਪਿਤਂ;

ਦਸਸਦ੍ਦਾਵਿਵਿਤ੍ਤਂ ਤਂ, ਪੁਰਮਜ੍ਝਾਵਸਿਸ੍ਸਤਿ.

੩੮. ‘‘‘ਅਪਰਿਮੇਯ੍ਯੇ ਇਤੋ ਕਪ੍ਪੇ, ਭੂਮਿਪਾਲੋ ਮਹਿਦ੍ਧਿਕੋ;

ਓਕ੍ਕਾਕੋ ਨਾਮ ਨਾਮੇਨ, ਰਾਜਾ ਰਟ੍ਠੇ ਭਵਿਸ੍ਸਤਿ.

੩੯. ‘‘‘ਸੋਲ਼ਸਿਤ੍ਥਿਸਹਸ੍ਸਾਨਂ, ਸਬ੍ਬਾਸਂ ਪਵਰਾ ਚ ਸਾ [ਪਵਰਾਵ ਯਾ (ਸ੍ਯਾ.), ਪਵਰਾ ਪਿਯਾ (?)];

ਅਭਿਜਾਤਾ ਖਤ੍ਤਿਯਾਨੀ, ਨਵ ਪੁਤ੍ਤੇ ਜਨੇਸ੍ਸਤਿ.

੪੦. ‘‘‘ਨਵ ਪੁਤ੍ਤੇ ਜਨੇਤ੍ਵਾਨ, ਖਤ੍ਤਿਯਾਨੀ ਮਰਿਸ੍ਸਤਿ;

ਤਰੁਣੀ ਚ ਪਿਯਾ ਕਞ੍ਞਾ, ਮਹੇਸਿਤ੍ਤਂ ਕਰਿਸ੍ਸਤਿ.

੪੧. ‘‘‘ਓਕ੍ਕਾਕਂ ਤੋਸਯਿਤ੍ਵਾਨ, ਵਰਂ ਕਞ੍ਞਾ ਲਭਿਸ੍ਸਤਿ;

ਵਰਂ ਲਦ੍ਧਾਨ ਸਾ ਕਞ੍ਞਾ, ਪੁਤ੍ਤੇ ਪਬ੍ਬਾਜਯਿਸ੍ਸਤਿ.

੪੨. ‘‘‘ਪਬ੍ਬਾਜਿਤਾ ਚ ਤੇ ਸਬ੍ਬੇ, ਗਮਿਸ੍ਸਨ੍ਤਿ ਨਗੁਤ੍ਤਮਂ;

ਜਾਤਿਭੇਦਭਯਾ ਸਬ੍ਬੇ, ਭਗਿਨੀਹਿ ਵਸਿਸ੍ਸਰੇ [ਸਂਵਸਿਸ੍ਸਰੇ (ਸੀ.)].

੪੩. ‘‘‘ਏਕਾ ਚ ਕਞ੍ਞਾ ਬ੍ਯਾਧੀਹਿ, ਭਵਿਸ੍ਸਤਿ ਪਰਿਕ੍ਖਤਾ [ਪੁਰਕ੍ਖਤਾ (ਸ੍ਯਾ. ਕ.)];

ਮਾ ਨੋ ਜਾਤਿ ਪਭਿਜ੍ਜੀਤਿ, ਨਿਖਣਿਸ੍ਸਨ੍ਤਿ ਖਤ੍ਤਿਯਾ.

੪੪. ‘‘‘ਖਤ੍ਤਿਯੋ ਨੀਹਰਿਤ੍ਵਾਨ, ਤਾਯ ਸਦ੍ਧਿਂ ਵਸਿਸ੍ਸਤਿ;

ਭਵਿਸ੍ਸਤਿ ਤਦਾ ਭੇਦੋ, ਓਕ੍ਕਾਕਕੁਲਸਮ੍ਭਵੋ.

੪੫. ‘‘‘ਤੇਸਂ ਪਜਾ ਭਵਿਸ੍ਸਨ੍ਤਿ, ਕੋਲ਼ਿਯਾ ਨਾਮ ਜਾਤਿਯਾ;

ਤਤ੍ਥ ਮਾਨੁਸਕਂ ਭੋਗਂ, ਅਨੁਭੋਸ੍ਸਤਿਨਪ੍ਪਕਂ.

੪੬. ‘‘‘ਤਮ੍ਹਾ ਕਾਯਾ ਚਵਿਤ੍ਵਾਨ, ਦੇਵਲੋਕਂ ਗਮਿਸ੍ਸਤਿ;

ਤਤ੍ਰਾਪਿ ਪਵਰਂ ਬ੍ਯਮ੍ਹਂ, ਲਭਿਸ੍ਸਤਿ ਮਨੋਰਮਂ.

੪੭. ‘‘‘ਦੇਵਲੋਕਾ ਚਵਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਆਗਨ੍ਤ੍ਵਾਨ ਮਨੁਸ੍ਸਤ੍ਤਂ, ਸੋਣੋ ਨਾਮ ਭਵਿਸ੍ਸਤਿ.

੪੮. ‘‘‘ਆਰਦ੍ਧਵੀਰਿਯੋ ਪਹਿਤਤ੍ਤੋ, ਪਦਹਂ ਸਤ੍ਥੁ ਸਾਸਨੇ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ.

੪੯. ‘‘‘ਅਨਨ੍ਤਦਸ੍ਸੀ ਭਗਵਾ, ਗੋਤਮੋ ਸਕ੍ਯਪੁਙ੍ਗਵੋ;

ਵਿਸੇਸਞ੍ਞੂ ਮਹਾਵੀਰੋ, ਅਗ੍ਗਟ੍ਠਾਨੇ ਠਪੇਸ੍ਸਤਿ’.

੫੦. ‘‘ਵੁਟ੍ਠਮ੍ਹਿ ਦੇਵੇ ਚਤੁਰਙ੍ਗੁਲਮ੍ਹਿ, ਤਿਣੇ ਅਨਿਲੇਰਿਤਅਙ੍ਗਣਮ੍ਹਿ;

ਠਤ੍ਵਾਨ ਯੋਗਸ੍ਸ ਪਯੁਤ੍ਤਤਾਦਿਨੋ, ਤਤੋਤ੍ਤਰਿਂ ਪਾਰਮਤਾ ਨ ਵਿਜ੍ਜਤਿ.

੫੧. ‘‘ਉਤ੍ਤਮੇ ਦਮਥੇ ਦਨ੍ਤੋ, ਚਿਤ੍ਤਂ ਮੇ ਸੁਪਣੀਹਿਤਂ;

ਭਾਰੋ ਮੇ ਓਹਿਤੋ ਸਬ੍ਬੋ, ਨਿਬ੍ਬੁਤੋਮ੍ਹਿ ਅਨਾਸਵੋ.

੫੨. ‘‘ਅਙ੍ਗੀਰਸੋ ਮਹਾਨਾਗੋ, ਅਭਿਜਾਤੋਵ ਕੇਸਰੀ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਏਤਦਗ੍ਗੇ ਠਪੇਸਿ ਮਂ.

੫੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੋਣੋ ਕੋਲ਼ਿਵਿਸੋ [ਕੋਲ਼ਿਯਵੇਸ੍ਸੋ (ਸੀ. ਸ੍ਯਾ.), ਕੋਟਿਕਣ੍ਣੋ (ਕ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੋਣਕੋਲ਼ਿਵਿਸਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਕਾਲ਼ਿਗੋਧਾਪੁਤ੍ਤਭਦ੍ਦਿਯਤ੍ਥੇਰਅਪਦਾਨਂ

੫੪. ‘‘ਪਦੁਮੁਤ੍ਤਰਸਮ੍ਬੁਦ੍ਧਂ, ਮੇਤ੍ਤਚਿਤ੍ਤਂ ਮਹਾਮੁਨਿਂ;

ਉਪੇਤਿ ਜਨਤਾ ਸਬ੍ਬਾ, ਸਬ੍ਬਲੋਕਗ੍ਗਨਾਯਕਂ.

੫੫. ‘‘ਸਤ੍ਤੁਕਞ੍ਚ ਬਦ੍ਧਕਞ੍ਚ [ਵਤ੍ਥਂ ਸੇਨਾਸਨਞ੍ਚੇਵ (ਸੀ.), ਸਤ੍ਤੁਕਞ੍ਚ ਪਦਕਞ੍ਚ (ਸੀ. ਅਟ੍ਠ.), ਸਤ੍ਤੁਕਞ੍ਚ ਪਵਾਕਞ੍ਚ (ਸ੍ਯਾ.)], ਆਮਿਸਂ ਪਾਨਭੋਜਨਂ;

ਦਦਨ੍ਤਿ ਸਤ੍ਥੁਨੋ ਸਬ੍ਬੇ, ਪੁਞ੍ਞਕ੍ਖੇਤ੍ਤੇ ਅਨੁਤ੍ਤਰੇ.

੫੬. ‘‘ਅਹਮ੍ਪਿ ਦਾਨਂ ਦਸ੍ਸਾਮਿ, ਦੇਵਦੇਵਸ੍ਸ ਤਾਦਿਨੋ;

ਬੁਦ੍ਧਸੇਟ੍ਠਂ ਨਿਮਨ੍ਤੇਤ੍ਵਾ, ਸਙ੍ਘਮ੍ਪਿ ਚ ਅਨੁਤ੍ਤਰਂ.

੫੭. ‘‘ਉਯ੍ਯੋਜਿਤਾ ਮਯਾ ਚੇਤੇ, ਨਿਮਨ੍ਤੇਸੁਂ ਤਥਾਗਤਂ;

ਕੇਵਲਂ ਭਿਕ੍ਖੁਸਙ੍ਘਞ੍ਚ, ਪੁਞ੍ਞਕ੍ਖੇਤ੍ਤਂ ਅਨੁਤ੍ਤਰਂ.

੫੮. ‘‘ਸਤਸਹਸ੍ਸਪਲ੍ਲਙ੍ਕਂ, ਸੋਵਣ੍ਣਂ ਗੋਨਕਤ੍ਥਤਂ;

ਤੂਲਿਕਾਪਟਲਿਕਾਯ, ਖੋਮਕਪ੍ਪਾਸਿਕੇਹਿ ਚ;

ਮਹਾਰਹਂ ਪਞ੍ਞਾਪਯਿਂ, ਆਸਨਂ ਬੁਦ੍ਧਯੁਤ੍ਤਕਂ.

੫੯. ‘‘ਪਦੁਮੁਤ੍ਤਰੋ ਲੋਕਵਿਦੂ, ਦੇਵਦੇਵੋ ਨਰਾਸਭੋ;

ਭਿਕ੍ਖੁਸਙ੍ਘਪਰਿਬ੍ਯੂਲ਼੍ਹੋ, ਮਮ ਦ੍ਵਾਰਮੁਪਾਗਮਿ.

੬੦. ‘‘ਪਚ੍ਚੁਗ੍ਗਨ੍ਤ੍ਵਾਨ ਸਮ੍ਬੁਦ੍ਧਂ, ਲੋਕਨਾਥਂ ਯਸਸ੍ਸਿਨਂ;

ਪਸਨ੍ਨਚਿਤ੍ਤੋ ਸੁਮਨੋ, ਅਭਿਨਾਮਯਿਂ ਸਙ੍ਘਰਂ [ਸਕਂ ਘਰਂ (ਸੀ.)].

੬੧. ‘‘ਭਿਕ੍ਖੂਨਂ ਸਤਸਹਸ੍ਸਂ, ਬੁਦ੍ਧਞ੍ਚ ਲੋਕਨਾਯਕਂ;

ਪਸਨ੍ਨਚਿਤ੍ਤੋ ਸੁਮਨੋ, ਪਰਮਨ੍ਨੇਨ ਤਪ੍ਪਯਿਂ.

੬੨. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੬੩. ‘‘‘ਯੇਨਿਦਂ ਆਸਨਂ ਦਿਨ੍ਨਂ, ਸੋਵਣ੍ਣਂ ਗੋਨਕਤ੍ਥਤਂ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੬੪. ‘‘‘ਚਤੁਸਤ੍ਤਤਿਕ੍ਖਤ੍ਤੁਂ ਸੋ, ਦੇਵਰਜ੍ਜਂ ਕਰਿਸ੍ਸਤਿ;

ਅਨੁਭੋਸ੍ਸਤਿ ਸਮ੍ਪਤ੍ਤਿਂ, ਅਚ੍ਛਰਾਹਿ ਪੁਰਕ੍ਖਤੋ.

੬੫. ‘‘‘ਪਦੇਸਰਜ੍ਜਂ ਸਹਸ੍ਸਂ, ਵਸੁਧਂ ਆਵਸਿਸ੍ਸਤਿ;

ਏਕਪਞ੍ਞਾਸਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ.

੬੬. ‘‘‘ਸਬ੍ਬਾਸੁ ਭਵਯੋਨੀਸੁ, ਉਚ੍ਚਾਕੁਲੀ [ਉਚ੍ਚਾਕੁਲੇ (ਕ.)] ਭਵਿਸ੍ਸਤਿ;

ਸੋ ਚ ਪਚ੍ਛਾ ਪਬ੍ਬਜਿਤ੍ਵਾ, ਸੁਕ੍ਕਮੂਲੇਨ ਚੋਦਿਤੋ;

ਭਦ੍ਦਿਯੋ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ.

੬੭. ‘‘‘ਵਿਵੇਕਮਨੁਯੁਤ੍ਤੋਮ੍ਹਿ, ਪਨ੍ਤਸੇਨਨਿਵਾਸਹਂ;

ਫਲਞ੍ਚਾਧਿਗਤਂ ਸਬ੍ਬਂ, ਚਤ੍ਤਕ੍ਲੇਸੋਮ੍ਹਿ ਅਜ੍ਜਹਂ.

੬੮. ‘‘‘ਮਮ ਸਬ੍ਬਂ [ਕਮ੍ਮਂ (?)] ਅਭਿਞ੍ਞਾਯ, ਸਬ੍ਬਞ੍ਞੂ ਲੋਕਨਾਯਕੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਏਤਦਗ੍ਗੇ ਠਪੇਸਿ ਮਂ’.

੬੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਭਦ੍ਦਿਯੋ ਕਾਲ਼ਿਗੋਧਾਯ ਪੁਤ੍ਤੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਭਦ੍ਦਿਯਸ੍ਸ ਕਾਲ਼ਿਗੋਧਾਯ ਪੁਤ੍ਤਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਸਨ੍ਨਿਟ੍ਠਾਪਕਤ੍ਥੇਰਅਪਦਾਨਂ

੭੦. ‘‘ਅਰਞ੍ਞੇ ਕੁਟਿਕਂ ਕਤ੍ਵਾ, ਵਸਾਮਿ ਪਬ੍ਬਤਨ੍ਤਰੇ;