੧੦. ਚੁਨ੍ਦਤ੍ਥੇਰਅਪਦਾਨਂ

੧੨੫. ‘‘ਸਿਦ੍ਧਤ੍ਥਸ੍ਸ ਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;

ਅਗ੍ਘਿਯਂ ਕਾਰਯਿਤ੍ਵਾਨ, ਜਾਤਿਪੁਪ੍ਫੇਹਿ ਛਾਦਯਿਂ.

੧੨੬. ‘‘ਨਿਟ੍ਠਾਪੇਤ੍ਵਾਨ ਤਂ ਪੁਪ੍ਫਂ, ਬੁਦ੍ਧਸ੍ਸ ਉਪਨਾਮਯਿਂ;

ਪੁਪ੍ਫਾਵਸੇਸਂ ਪਗ੍ਗਯ੍ਹ, ਬੁਦ੍ਧਸ੍ਸ ਅਭਿਰੋਪਯਿਂ.

੧੨੭. ‘‘ਕਞ੍ਚਨਗ੍ਘਿਯਸਙ੍ਕਾਸਂ, ਬੁਦ੍ਧਂ ਲੋਕਗ੍ਗਨਾਯਕਂ;

ਪਸਨ੍ਨਚਿਤ੍ਤੋ ਸੁਮਨੋ, ਪੁਪ੍ਫਗ੍ਘਿਯਮੁਪਾਨਯਿਂ.

੧੨੮. ‘‘ਵਿਤਿਣ੍ਣਕਙ੍ਖੋ ਸਮ੍ਬੁਦ੍ਧੋ, ਤਿਣ੍ਣੋਘੇਹਿ ਪੁਰਕ੍ਖਤੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੧੨੯. ‘‘‘ਦਿਬ੍ਬਗਨ੍ਧਂ ਪਵਾਯਨ੍ਤਂ, ਯੋ ਮੇ ਪੁਪ੍ਫਗ੍ਘਿਯਂ ਅਦਾ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੧੩੦. ‘‘‘ਇਤੋ ਚੁਤੋ ਅਯਂ ਪੋਸੋ, ਦੇਵਸਙ੍ਘਪੁਰਕ੍ਖਤੋ;

ਜਾਤਿਪੁਪ੍ਫੇਹਿ ਪਰਿਕਿਣ੍ਣੋ, ਦੇਵਲੋਕਂ ਗਮਿਸ੍ਸਤਿ.

੧੩੧. ‘‘‘ਉਬ੍ਬਿਦ੍ਧਂ ਭਵਨਂ ਤਸ੍ਸ, ਸੋਵਣ੍ਣਞ੍ਚ ਮਣੀਮਯਂ;

ਬ੍ਯਮ੍ਹਂ ਪਾਤੁਭਵਿਸ੍ਸਤਿ, ਪੁਞ੍ਞਕਮ੍ਮਪ੍ਪਭਾਵਿਤਂ.

੧੩੨. ‘‘‘ਚਤੁਸਤ੍ਤਤਿਕ੍ਖਤ੍ਤੁਂ ਸੋ, ਦੇਵਰਜ੍ਜਂ ਕਰਿਸ੍ਸਤਿ;

ਅਨੁਭੋਸ੍ਸਤਿ ਸਮ੍ਪਤ੍ਤਿਂ, ਅਚ੍ਛਰਾਹਿ ਪੁਰਕ੍ਖਤੋ.

੧੩੩. ‘‘‘ਪਥਬ੍ਯਾ ਰਜ੍ਜਂ ਤਿਸਤਂ, ਵਸੁਧਂ ਆਵਸਿਸ੍ਸਤਿ;

ਪਞ੍ਚਸਤ੍ਤਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ.

੧੩੪. ‘‘‘ਦੁਜ੍ਜਯੋ ਨਾਮ ਨਾਮੇਨ, ਹੇਸ੍ਸਤਿ ਮਨੁਜਾਧਿਪੋ;

ਅਨੁਭੋਤ੍ਵਾਨ ਤਂ ਪੁਞ੍ਞਂ, ਸਕਕਮ੍ਮਂ ਅਪਸ੍ਸਿਤੋ [ਸਕਕਮ੍ਮੂਪਸਂਹਿਤੋ (ਸ੍ਯਾ.)].

੧੩੫. ‘‘‘ਵਿਨਿਪਾਤਂ ਅਗਨ੍ਤ੍ਵਾਨ, ਮਨੁਸ੍ਸਤ੍ਤਂ ਗਮਿਸ੍ਸਤਿ;

ਹਿਰਞ੍ਞਂ ਤਸ੍ਸ [ਹਿਰਞ੍ਞਸ੍ਸ ਚ (ਸੀ. ਕ.)] ਨਿਚਿਤਂ, ਕੋਟਿਸਤਮਨਪ੍ਪਕਂ.

੧੩੬. ‘‘‘ਨਿਬ੍ਬਤ੍ਤਿਸ੍ਸਤਿ ਯੋਨਿਮ੍ਹਿ, ਬ੍ਰਾਹ੍ਮਣੇ ਸੋ ਭਵਿਸ੍ਸਤਿ;

ਵਙ੍ਗਨ੍ਤਸ੍ਸ ਸੁਤੋ ਧੀਮਾ, ਸਾਰਿਯਾ ਓਰਸੋ ਪਿਯੋ.

੧੩੭. ‘‘‘ਸੋ ਚ ਪਚ੍ਛਾ ਪਬ੍ਬਜਿਤ੍ਵਾ, ਅਙ੍ਗੀਰਸਸ੍ਸ ਸਾਸਨੇ;

ਚੂਲ਼ਚੁਨ੍ਦੋਤਿ [ਚੂਲਚੁਨ੍ਦੋਤਿ (ਸੀ.)] ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ.

੧੩੮. ‘‘‘ਸਾਮਣੇਰੋਵ ਸੋ ਸਨ੍ਤੋ, ਖੀਣਾਸਵੋ ਭਵਿਸ੍ਸਤਿ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ’.

੧੩੯. ‘‘ਉਪਟ੍ਠਹਿਂ ਮਹਾਵੀਰਂ, ਅਞ੍ਞੇ ਚ ਪੇਸਲੇ ਬਹੂ;

ਭਾਤਰਂ ਮੇ ਚੁਪਟ੍ਠਾਸਿਂ, ਉਤ੍ਤਮਤ੍ਥਸ੍ਸ ਪਤ੍ਤਿਯਾ.

੧੪੦. ‘‘ਭਾਤਰਂ ਮੇ ਉਪਟ੍ਠਿਤ੍ਵਾ, ਧਾਤੁਂ ਪਤ੍ਤਮ੍ਹਿ ਓਹਿਯ [ਓਪਿਯ (ਸੀ.), ਓਚਿਯ (ਸ੍ਯਾ.)];

ਸਮ੍ਬੁਦ੍ਧਂ ਉਪਨਾਮੇਸਿਂ, ਲੋਕਜੇਟ੍ਠਂ ਨਰਾਸਭਂ.

੧੪੧. ‘‘ਉਭੋ ਹਤ੍ਥੇਹਿ ਪਗ੍ਗਯ੍ਹ, ਬੁਦ੍ਧੋ ਲੋਕੇ ਸਦੇਵਕੇ;

ਸਨ੍ਦਸ੍ਸਯਨ੍ਤੋ ਤਂ ਧਾਤੁਂ, ਕਿਤ੍ਤਯਿ ਅਗ੍ਗਸਾਵਕਂ.

੧੪੨. ‘‘ਚਿਤ੍ਤਞ੍ਚ ਸੁਵਿਮੁਤ੍ਤਂ ਮੇ, ਸਦ੍ਧਾ ਮਯ੍ਹਂ ਪਤਿਟ੍ਠਿਤਾ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੧੪੩. ‘‘ਪਟਿਸਮ੍ਭਿਦਾਨੁਪ੍ਪਤ੍ਤਾ, ਵਿਮੋਕ੍ਖਾਪਿ ਚ ਫਸ੍ਸਿਤਾ [ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ (ਸ੍ਯਾ.)];

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਚੁਨ੍ਦੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਚੁਨ੍ਦਤ੍ਥੇਰਸ੍ਸਾਪਦਾਨਂ ਦਸਮਂ.

ਉਪਾਲਿਵਗ੍ਗੋ ਪਞ੍ਚਮੋ.