੮. ਚਙ੍ਕਮਨਦਾਯਕਤ੍ਥੇਰਅਪਦਾਨਂ

੯੩. ‘‘ਅਤ੍ਥਦਸ੍ਸਿਸ੍ਸ ਮੁਨਿਨੋ, ਲੋਕਜੇਟ੍ਠਸ੍ਸ ਤਾਦਿਨੋ;

ਇਟ੍ਠਕਾਹਿ ਚਿਨਿਤ੍ਵਾਨ, ਚਙ੍ਕਮਂ ਕਾਰਯਿਂ ਅਹਂ.

੯੪. ‘‘ਉਚ੍ਚਤੋ ਪਞ੍ਚਰਤਨਂ, ਚਙ੍ਕਮਂ ਸਾਧੁਮਾਪਿਤਂ;

ਆਯਾਮਤੋ ਹਤ੍ਥਸਤਂ, ਭਾਵਨੀਯ੍ਯਂ ਮਨੋਰਮਂ.

੯੫. ‘‘ਪਟਿਗ੍ਗਹੇਸਿ ਭਗਵਾ, ਅਤ੍ਥਦਸ੍ਸੀ ਨਰੁਤ੍ਤਮੋ;

ਹਤ੍ਥੇਨ ਪੁਲਿਨਂ ਗਯ੍ਹ, ਇਮਾ ਗਾਥਾ ਅਭਾਸਥ.

੯੬. ‘‘‘ਇਮਿਨਾ ਪੁਲਿਨਦਾਨੇਨ, ਚਙ੍ਕਮਂ ਸੁਕਤੇਨ ਚ;

ਸਤ੍ਤਰਤਨਸਮ੍ਪਨ੍ਨਂ, ਪੁਲਿਨਂ ਅਨੁਭੋਸ੍ਸਤਿ.

੯੭. ‘‘‘ਤੀਣਿ ਕਪ੍ਪਾਨਿ ਦੇਵੇਸੁ, ਦੇਵਰਜ੍ਜਂ ਕਰਿਸ੍ਸਤਿ;

ਅਨੁਭੋਸ੍ਸਤਿ ਸਮ੍ਪਤ੍ਤਿਂ, ਅਚ੍ਛਰਾਹਿ ਪੁਰਕ੍ਖਤੋ.

੯੮. ‘‘‘ਮਨੁਸ੍ਸਲੋਕਮਾਗਨ੍ਤ੍ਵਾ, ਰਾਜਾ ਰਟ੍ਠੇ ਭਵਿਸ੍ਸਤਿ;

ਤਿਕ੍ਖਤ੍ਤੁਂ ਚਕ੍ਕਵਤ੍ਤੀ ਚ, ਮਹਿਯਾ ਸੋ ਭਵਿਸ੍ਸਤਿ’.

੯੯. ‘‘ਅਟ੍ਠਾਰਸੇ ਕਪ੍ਪਸਤੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਚਙ੍ਕਮਸ੍ਸ ਇਦਂ ਫਲਂ.

੧੦੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਚਙ੍ਕਮਨਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਚਙ੍ਕਮਨਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.