੨. ਮਣਿਪੂਜਕਤ੍ਥੇਰਅਪਦਾਨਂ

੮. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਵਿਵੇਕਕਾਮੋ ਸਮ੍ਬੁਦ੍ਧੋ, ਗਚ੍ਛਤੇ ਅਨਿਲਞ੍ਜਸੇ.

੯. ‘‘ਅਵਿਦੂਰੇ ਹਿਮਵਨ੍ਤਸ੍ਸ, ਮਹਾਜਾਤਸ੍ਸਰੋ ਅਹੁ;

ਤਤ੍ਥ ਮੇ ਭਵਨਂ ਆਸਿ, ਪੁਞ੍ਞਕਮ੍ਮੇਨ ਸਂਯੁਤਂ.

੧੦. ‘‘ਭਵਨਾ ਅਭਿਨਿਕ੍ਖਮ੍ਮ, ਅਦ੍ਦਸਂ ਲੋਕਨਾਯਕਂ;

ਇਨ੍ਦੀਵਰਂਵ ਜਲਿਤਂ, ਆਦਿਤ੍ਤਂਵ ਹੁਤਾਸਨਂ.

੧੧. ‘‘ਵਿਚਿਨਂ ਨਦ੍ਦਸਂ ਪੁਪ੍ਫਂ, ਪੂਜਯਿਸ੍ਸਨ੍ਤਿ ਨਾਯਕਂ;

ਸਕਂ ਚਿਤ੍ਤਂ ਪਸਾਦੇਤ੍ਵਾ, ਅਵਨ੍ਦਿਂ ਸਤ੍ਥੁਨੋ ਅਹਂ.

੧੨. ‘‘ਮਮ ਸੀਸੇ ਮਣਿਂ ਗਯ੍ਹ, ਪੂਜਯਿਂ ਲੋਕਨਾਯਕਂ;

ਇਮਾਯ ਮਣਿਪੂਜਾਯ, ਵਿਪਾਕੋ ਹੋਤੁ ਭਦ੍ਦਕੋ.

੧੩. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਅਨ੍ਤਲਿਕ੍ਖੇ ਠਿਤੋ ਸਤ੍ਥਾ, ਇਮਂ ਗਾਥਂ ਅਭਾਸਥ.

੧੪. ‘ਸੋ ਤੇ ਇਜ੍ਝਤੁ ਸਙ੍ਕਪ੍ਪੋ, ਲਭਸ੍ਸੁ ਵਿਪੁਲਂ ਸੁਖਂ;

ਇਮਾਯ ਮਣਿਪੂਜਾਯ, ਅਨੁਭੋਹਿ ਮਹਾਯਸਂ’.

੧੫. ‘‘ਇਦਂ ਵਤ੍ਵਾਨ ਭਗਵਾ, ਜਲਜੁਤ੍ਤਮਨਾਮਕੋ;

ਅਗਮਾਸਿ ਬੁਦ੍ਧਸੇਟ੍ਠੋ, ਯਤ੍ਥ ਚਿਤ੍ਤਂ ਪਣੀਹਿਤਂ.

੧੬. ‘‘ਸਟ੍ਠਿਕਪ੍ਪਾਨਿ ਦੇਵਿਨ੍ਦੋ, ਦੇਵਰਜ੍ਜਮਕਾਰਯਿਂ;

ਅਨੇਕਸਤਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ.

੧੭. ‘‘ਪੁਬ੍ਬਕਮ੍ਮਂ ਸਰਨ੍ਤਸ੍ਸ, ਦੇਵਭੂਤਸ੍ਸ ਮੇ ਸਤੋ;

ਮਣਿ ਨਿਬ੍ਬਤ੍ਤਤੇ ਮਯ੍ਹਂ, ਆਲੋਕਕਰਣੋ ਮਮਂ.

੧੮. ‘‘ਛਲ਼ਸੀਤਿਸਹਸ੍ਸਾਨਿ, ਨਾਰਿਯੋ ਮੇ ਪਰਿਗ੍ਗਹਾ;

ਵਿਚਿਤ੍ਤਵਤ੍ਥਾਭਰਣਾ, ਆਮੁਕ੍ਕਮਣਿਕੁਣ੍ਡਲਾ [ਆਮੁਤ੍ਤਮਣਿਕੁਣ੍ਡਲਾ (ਸੀ. ਸ੍ਯਾ. ਪੀ.)].

੧੯. ‘‘ਅਲ਼ਾਰਪਮ੍ਹਾ ਹਸੁਲਾ, ਸੁਸਞ੍ਞਾ ਤਨੁਮਜ੍ਝਿਮਾ;

ਪਰਿਵਾਰੇਨ੍ਤਿ ਮਂ ਨਿਚ੍ਚਂ, ਮਣਿਪੂਜਾਯਿਦਂ ਫਲਂ.

੨੦. ‘‘ਸੋਣ੍ਣਮਯਾ ਮਣਿਮਯਾ, ਲੋਹਿਤਙ੍ਗਮਯਾ ਤਥਾ;

ਭਣ੍ਡਾ ਮੇ ਸੁਕਤਾ ਹੋਨ੍ਤਿ, ਯਦਿਚ੍ਛਸਿ [ਯਦਿਚ੍ਛਾਯ (ਸੀ. ਪੀ.)] ਪਿਲ਼ਨ੍ਧਨਾ.

੨੧. ‘‘ਕੂਟਾਗਾਰਾ ਗਹਾਰਮ੍ਮਾ, ਸਯਨਞ੍ਚ ਮਹਾਰਹਂ;

ਮਮ ਸਙ੍ਕਪ੍ਪਮਞ੍ਞਾਯ, ਨਿਬ੍ਬਤ੍ਤਨ੍ਤਿ ਯਦਿਚ੍ਛਕਂ.

੨੨. ‘‘ਲਾਭਾ ਤੇਸਂ ਸੁਲਦ੍ਧਞ੍ਚ, ਯੇ ਲਭਨ੍ਤਿ ਉਪਸ੍ਸੁਤਿਂ;

ਪੁਞ੍ਞਕ੍ਖੇਤ੍ਤਂ ਮਨੁਸ੍ਸਾਨਂ, ਓਸਧਂ ਸਬ੍ਬਪਾਣਿਨਂ.

੨੩. ‘‘ਮਯ੍ਹਮ੍ਪਿ ਸੁਕਤਂ ਕਮ੍ਮਂ, ਯੋਹਂ ਅਦਕ੍ਖਿ ਨਾਯਕਂ;

ਵਿਨਿਪਾਤਾ ਪਮੁਤ੍ਤੋਮ੍ਹਿ, ਪਤ੍ਤੋਮ੍ਹਿ ਅਚਲਂ ਪਦਂ.

੨੪. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਦਿਵਸਞ੍ਚੇਵ ਰਤ੍ਤਿਞ੍ਚ [ਸਮਨ੍ਤਾ ਸਤ੍ਤਰਤਨਾ (ਸੀ. ਪੀ. ਕ.)], ਆਲੋਕੋ ਹੋਤਿ ਮੇ ਸਦਾ.

੨੫. ‘‘ਤਾਯੇਵ ਮਣਿਪੂਜਾਯ, ਅਨੁਭੋਤ੍ਵਾਨ ਸਮ੍ਪਦਾ;

ਞਾਣਾਲੋਕੋ ਮਯਾ ਦਿਟ੍ਠੋ, ਪਤ੍ਤੋਮ੍ਹਿ ਅਚਲਂ ਪਦਂ.

੨੬. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਮਣਿਂ ਅਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਮਣਿਪੂਜਾਯਿਦਂ ਫਲਂ.

੨੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮਣਿਪੂਜਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਮਣਿਪੂਜਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.