੩. ਉਕ੍ਕਾਸਤਿਕਤ੍ਥੇਰਅਪਦਾਨਂ

੩੦. ‘‘ਕੋਸਿਕੋ ਨਾਮ ਭਗਵਾ, ਚਿਤ੍ਤਕੂਟੇ ਵਸੀ ਤਦਾ;

ਝਾਯੀ ਝਾਨਰਤੋ ਬੁਦ੍ਧੋ, ਵਿਵੇਕਾਭਿਰਤੋ ਮੁਨਿ.

੩੧. ‘‘ਅਜ੍ਝੋਗਾਹੇਤ੍ਵਾ [ਅਜ੍ਝੋਗਹੇਤ੍ਵਾ (ਸੀ. ਸ੍ਯਾ. ਪੀ.)] ਹਿਮਵਨ੍ਤਂ, ਨਾਰੀਗਣਪੁਰਕ੍ਖਤੋ;

ਅਦ੍ਦਸਂ ਕੋਸਿਕਂ ਬੁਦ੍ਧਂ, ਪੁਣ੍ਣਮਾਯੇਵ ਚਨ੍ਦਿਮਂ.

੩੨. ‘‘ਉਕ੍ਕਾਸਤੇ ਗਹੇਤ੍ਵਾਨ, ਪਰਿਵਾਰੇਸਹਂ ਤਦਾ;

ਸਤ੍ਤਰਤ੍ਤਿਨ੍ਦਿਵਂ ਠਤ੍ਵਾ [ਬੁਦ੍ਧੋ (ਸ੍ਯਾ. ਕ.)], ਅਟ੍ਠਮੇਨ ਅਗਚ੍ਛਹਂ.

੩੩. ‘‘ਵੁਟ੍ਠਿਤਂ ਕੋਸਿਕਂ ਬੁਦ੍ਧਂ, ਸਯਮ੍ਭੁਂ ਅਪਰਾਜਿਤਂ;

ਪਸਨ੍ਨਚਿਤ੍ਤੋ ਵਨ੍ਦਿਤ੍ਵਾ, ਏਕਂ ਭਿਕ੍ਖਂ ਅਦਾਸਹਂ.

੩੪. ‘‘ਤੇਨ ਕਮ੍ਮੇਨ ਦ੍ਵਿਪਦਿਨ੍ਦ, ਲੋਕਜੇਟ੍ਠ ਨਰਾਸਭ;

ਉਪ੍ਪਜ੍ਜਿਂ ਤੁਸਿਤੇ ਕਾਯੇ, ਏਕਭਿਕ੍ਖਾਯਿਦਂ ਫਲਂ.

੩੫. ‘‘ਦਿਵਸਞ੍ਚੇਵ ਰਤ੍ਤਿਞ੍ਚ, ਆਲੋਕੋ ਹੋਤਿ ਮੇ ਸਦਾ;

ਸਮਨ੍ਤਾ ਯੋਜਨਸਤਂ, ਓਭਾਸੇਨ ਫਰਾਮਹਂ.

੩੬. ‘‘ਪਞ੍ਚਪਞ੍ਞਾਸਕਪ੍ਪਮ੍ਹਿ, ਚਕ੍ਕਵਤ੍ਤੀ ਅਹੋਸਹਂ;

ਚਾਤੁਰਨ੍ਤੋ ਵਿਜਿਤਾਵੀ, ਜਮ੍ਬੁਮਣ੍ਡਸ੍ਸ [ਜਮ੍ਬੁਸਣ੍ਡਸ੍ਸ (ਪੀ.)] ਇਸ੍ਸਰੋ.

੩੭. ‘‘ਤਦਾ ਮੇ ਨਗਰਂ ਆਸਿ, ਇਦ੍ਧਂ ਫੀਤਂ ਸੁਨਿਮ੍ਮਿਤਂ;

ਤਿਂਸਯੋਜਨਮਾਯਾਮਂ, ਵਿਤ੍ਥਾਰੇਨ ਚ ਵੀਸਤਿ.

੩੮. ‘‘ਸੋਭਣਂ ਨਾਮ ਨਗਰਂ, ਵਿਸ੍ਸਕਮ੍ਮੇਨ ਮਾਪਿਤਂ;

ਦਸਸਦ੍ਦਾਵਿਵਿਤ੍ਤਂ ਤਂ, ਸਮ੍ਮਤਾਲ਼ਸਮਾਹਿਤਂ.

੩੯. ‘‘ਨ ਤਮ੍ਹਿ ਨਗਰੇ ਅਤ੍ਥਿ, ਵਲ੍ਲਿਕਟ੍ਠਞ੍ਚ ਮਤ੍ਤਿਕਾ;

ਸਬ੍ਬਸੋਣ੍ਣਮਯਂਯੇਵ, ਜੋਤਤੇ ਨਿਚ੍ਚਕਾਲਿਕਂ.

੪੦. ‘‘ਚਤੁਪਾਕਾਰਪਰਿਕ੍ਖਿਤ੍ਤਂ, ਤਯੋ ਆਸੁਂ ਮਣਿਮਯਾ;

ਵੇਮਜ੍ਝੇ ਤਾਲਪਨ੍ਤੀ ਚ, ਵਿਸ੍ਸਕਮ੍ਮੇਨ ਮਾਪਿਤਾ.

੪੧. ‘‘ਦਸਸਹਸ੍ਸਪੋਕ੍ਖਰਞ੍ਞੋ, ਪਦੁਮੁਪ੍ਪਲਛਾਦਿਤਾ;

ਪੁਣ੍ਡਰੀਕੇਹਿ [ਪੁਣ੍ਡਰੀਕਾਦਿ (ਸ੍ਯਾ.)] ਸਞ੍ਛਨ੍ਨਾ, ਨਾਨਾਗਨ੍ਧਸਮੀਰਿਤਾ.

੪੨. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਉਕ੍ਕਂ ਧਾਰਯਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਉਕ੍ਕਧਾਰਸ੍ਸਿਦਂ ਫਲਂ.

੪੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੪੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਕ੍ਕਾਸਤਿਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਉਕ੍ਕਾਸਤਿਕਤ੍ਥੇਰਸ੍ਸਾਪਦਾਨਂ ਤਤਿਯਂ.