੧੦. ਪੁਲਿਨਚਙ੍ਕਮਿਯਤ੍ਥੇਰਅਪਦਾਨਂ

੯੦. ‘‘ਮਿਗਲੁਦ੍ਦੋ ਪੁਰੇ ਆਸਿਂ, ਅਰਞ੍ਞੇ ਕਾਨਨੇ ਅਹਂ;

ਵਾਤਮਿਗਂ ਗਵੇਸਨ੍ਤੋ, ਚਙ੍ਕਮਂ ਅਦ੍ਦਸਂ ਅਹਂ.

੯੧. ‘‘ਉਚ੍ਛਙ੍ਗੇਨ ਪੁਲਿਨਂ [ਪੁਲ਼ਿਨਂ (ਸੀ. ਸ੍ਯਾ. ਪੀ. ਕ.)] ਗਯ੍ਹ, ਚਙ੍ਕਮੇ ਓਕਿਰਿਂ ਅਹਂ;

ਪਸਨ੍ਨਚਿਤ੍ਤੋ ਸੁਮਨੋ, ਸੁਗਤਸ੍ਸ ਸਿਰੀਮਤੋ.

੯੨. ‘‘ਏਕਤਿਂਸੇ ਇਤੋ ਕਪ੍ਪੇ, ਪੁਲਿਨਂ ਓਕਿਰਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਪੁਲਿਨਸ੍ਸ ਇਦਂ ਫਲਂ.

੯੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੯੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੯੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪੁਲਿਨਚਙ੍ਕਮਿਯੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਪੁਲਿਨਚਙ੍ਕਮਿਯਤ੍ਥੇਰਸ੍ਸਾਪਦਾਨਂ ਦਸਮਂ.

ਨਲ਼ਮਾਲਿਵਗ੍ਗੋ ਅਟ੍ਠਚਤ੍ਤਾਲੀਸਮੋ.