੪੯. ਪਂਸੁਕੂਲਵਗ੍ਗੋ

੧. ਪਂਸੁਕੂਲਸਞ੍ਞਕਤ੍ਥੇਰਅਪਦਾਨਂ

੧. ‘‘ਤਿਸ੍ਸੋ ਨਾਮਾਸਿ ਭਗਵਾ, ਸਯਮ੍ਭੂ ਅਗ੍ਗਪੁਗ੍ਗਲੋ;

ਪਂਸੁਕੂਲਂ ਠਪੇਤ੍ਵਾਨ, ਵਿਹਾਰਂ ਪਾਵਿਸੀ ਜਿਨੋ.

੨. ‘‘ਵਿਨਤਂ [ਸਜ੍ਜਿਤਂ (ਸ੍ਯਾ.), ਤਿਯਨ੍ਤਂ (ਪੀ.)] ਧਨੁਮਾਦਾਯ, ਭਕ੍ਖਤ੍ਥਾਯ ਚਰਿਂ ਅਹਂ;

ਮਣ੍ਡਲਗ੍ਗਂ ਗਹੇਤ੍ਵਾਨ, ਕਾਨਨਂ ਪਾਵਿਸਿਂ ਅਹਂ.

੩. ‘‘ਤਤ੍ਥਦ੍ਦਸਂ ਪਂਸੁਕੂਲਂ, ਦੁਮਗ੍ਗੇ ਲਗ੍ਗਿਤਂ ਤਦਾ;

ਚਾਪਂ ਤਤ੍ਥੇਵ ਨਿਕ੍ਖਿਪ੍ਪ, ਸਿਰੇ ਕਤ੍ਵਾਨ ਅਞ੍ਜਲਿਂ.

੪. ‘‘ਪਸਨ੍ਨਚਿਤ੍ਤੋ ਸੁਮਨੋ, ਵਿਪੁਲਾਯ ਚ ਪੀਤਿਯਾ;

ਬੁਦ੍ਧਸੇਟ੍ਠਂ ਸਰਿਤ੍ਵਾਨ, ਪਂਸੁਕੂਲਂ ਅਵਨ੍ਦਹਂ.

੫. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਪਂਸੁਕੂਲਮਵਨ੍ਦਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਵਨ੍ਦਨਾਯ ਇਦਂ ਫਲਂ.

੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੭. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੮. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਂਸੁਕੂਲਸਞ੍ਞਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਪਂਸੁਕੂਲਸਞ੍ਞਕਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਬੁਦ੍ਧਸਞ੍ਞਕਤ੍ਥੇਰਅਪਦਾਨਂ

੯. ‘‘ਅਜ੍ਝਾਯਕੋ ਮਨ੍ਤਧਰੋ, ਤਿਣ੍ਣਂ ਵੇਦਾਨ ਪਾਰਗੂ;

ਲਕ੍ਖਣੇ ਇਤਿਹਾਸੇ ਚ, ਸਨਿਘਣ੍ਡੁਸਕੇਟੁਭੇ.

੧੦. ‘‘ਨਦੀਸੋਤਪਟਿਭਾਗਾ, ਸਿਸ੍ਸਾ ਆਯਨ੍ਤਿ ਮੇ ਤਦਾ;

ਤੇਸਾਹਂ ਮਨ੍ਤੇ [ਮਨ੍ਤਂ (ਸ੍ਯਾ. ਕ.)] ਵਾਚੇਮਿ, ਰਤ੍ਤਿਨ੍ਦਿਵਮਤਨ੍ਦਿਤੋ.

੧੧. ‘‘ਸਿਦ੍ਧਤ੍ਥੋ ਨਾਮ ਸਮ੍ਬੁਦ੍ਧੋ, ਲੋਕੇ ਉਪ੍ਪਜ੍ਜਿ ਤਾਵਦੇ;

ਤਮਨ੍ਧਕਾਰਂ ਨਾਸੇਤ੍ਵਾ, ਞਾਣਾਲੋਕਂ ਪਵਤ੍ਤਯਿ.

੧੨. ‘‘ਮਮ ਅਞ੍ਞਤਰੋ ਸਿਸ੍ਸੋ, ਸਿਸ੍ਸਾਨਂ ਸੋ ਕਥੇਸਿ ਮੇ;

ਸੁਤ੍ਵਾਨ ਤੇ ਏਤਮਤ੍ਥਂ, ਆਰੋਚੇਸੁਂ ਮਮਂ ਤਦਾ.

੧੩. ‘‘ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਸਬ੍ਬਞ੍ਞੂ ਲੋਕਨਾਯਕੋ;

ਤਸ੍ਸਾਨੁਵਤ੍ਤਤਿ ਜਨੋ, ਲਾਭੋ ਅਮ੍ਹਂ ਨ ਵਿਜ੍ਜਤਿ [ਨ ਹੇਸ੍ਸਤਿ (ਸੀ. ਪੀ.)].

੧੪. ‘‘ਅਧਿਚ੍ਚੁਪ੍ਪਤ੍ਤਿਕਾ ਬੁਦ੍ਧਾ, ਚਕ੍ਖੁਮਨ੍ਤੋ ਮਹਾਯਸਾ;

ਯਂਨੂਨਾਹਂ ਬੁਦ੍ਧਸੇਟ੍ਠਂ, ਪਸ੍ਸੇਯ੍ਯਂ ਲੋਕਨਾਯਕਂ.

੧੫. ‘‘ਅਜਿਨਂ ਮੇ ਗਹੇਤ੍ਵਾਨ, ਵਾਕਚੀਰਂ ਕਮਣ੍ਡਲੁਂ;

ਅਸ੍ਸਮਾ ਅਭਿਨਿਕ੍ਖਮ੍ਮ, ਸਿਸ੍ਸੇ ਆਮਨ੍ਤਯਿਂ ਅਹਂ.

੧੬. ‘‘ਓਦੁਮ੍ਬਰਿਕਪੁਪ੍ਫਂਵ, ਚਨ੍ਦਮ੍ਹਿ ਸਸਕਂ ਯਥਾ;

ਵਾਯਸਾਨਂ ਯਥਾ ਖੀਰਂ, ਦੁਲ੍ਲਭੋ ਲੋਕਨਾਯਕੋ [ਦੁਲ੍ਲਭਾ ਲੋਕਨਾਯਕਾ (ਸੀ.), ਦੁਲ੍ਲਭਂ ਲੋਕਨਾਯਕਂ (ਸ੍ਯਾ. ਪੀ. ਕ.)].

੧੭. ‘‘ਬੁਦ੍ਧੋ ਲੋਕਮ੍ਹਿ ਉਪ੍ਪਨ੍ਨੋ, ਮਨੁਸ੍ਸਤ੍ਤਮ੍ਪਿ ਦੁਲ੍ਲਭਂ;

ਉਭੋਸੁ ਵਿਜ੍ਜਮਾਨੇਸੁ, ਸਵਨਞ੍ਚ ਸੁਦੁਲ੍ਲਭਂ.

੧੮. ‘‘ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਚਕ੍ਖੁਂ ਲਚ੍ਛਾਮ ਨੋ ਭਵਂ;

ਏਥ ਸਬ੍ਬੇ ਗਮਿਸ੍ਸਾਮ, ਸਮ੍ਮਾਸਮ੍ਬੁਦ੍ਧਸਨ੍ਤਿਕਂ.

੧੯. ‘‘ਕਮਣ੍ਡਲੁਧਰਾ ਸਬ੍ਬੇ, ਖਰਾਜਿਨਨਿਵਾਸਿਨੋ;

ਤੇ ਜਟਾ ਭਾਰਭਰਿਤਾ, ਨਿਕ੍ਖਮੁਂ ਵਿਪਿਨਾ ਤਦਾ.

੨੦. ‘‘ਯੁਗਮਤ੍ਤਂ ਪੇਕ੍ਖਮਾਨਾ, ਉਤ੍ਤਮਤ੍ਥਂ ਗਵੇਸਿਨੋ;

ਆਸਤ੍ਤਿਦੋਸਰਹਿਤਾ, ਅਸਮ੍ਭੀਤਾਵ ਕੇਸਰੀ.

੨੧. ‘‘ਅਪ੍ਪਕਿਚ੍ਚਾ ਅਲੋਲੁਪ੍ਪਾ, ਨਿਪਕਾ ਸਨ੍ਤਵੁਤ੍ਤਿਨੋ;

ਉਞ੍ਛਾਯ ਚਰਮਾਨਾ ਤੇ, ਬੁਦ੍ਧਸੇਟ੍ਠਮੁਪਾਗਮੁਂ.

੨੨. ‘‘ਦਿਯਡ੍ਢਯੋਜਨੇ ਸੇਸੇ, ਬ੍ਯਾਧਿ ਮੇ ਉਪਪਜ੍ਜਥ;

ਬੁਦ੍ਧਸੇਟ੍ਠਂ ਸਰਿਤ੍ਵਾਨ, ਤਤ੍ਥ ਕਾਲਙ੍ਕਤੋ ਅਹਂ.

੨੩. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਸਞ੍ਞਾਯਿਦਂ ਫਲਂ.

੨੪. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੫. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਬੁਦ੍ਧਸਞ੍ਞਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਬੁਦ੍ਧਸਞ੍ਞਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਭਿਸਦਾਯਕਤ੍ਥੇਰਅਪਦਾਨਂ

੨੭. ‘‘ਓਗਯ੍ਹ ਯਂ [ਓਗਯ੍ਹਾਹਂ (ਸੀ. ਸ੍ਯਾ. ਪੀ.)] ਪੋਕ੍ਖਰਣਿਂ, ਨਾਨਾਕੁਞ੍ਜਰਸੇਵਿਤਂ;

ਉਦ੍ਧਰਾਮਿ ਭਿਸਂ ਤਤ੍ਥ, ਘਾਸਹੇਤੁ [ਅਸਨਹੇਤੁ (ਸ੍ਯਾ.)] ਅਹਂ ਤਦਾ.

੨੮. ‘‘ਭਗਵਾ ਤਮ੍ਹਿ ਸਮਯੇ, ਪਦੁਮੁਤ੍ਤਰਸਵ੍ਹਯੋ;

ਰਤ੍ਤਮ੍ਬਰਧਰੋ [ਰਤ੍ਤਕਮ੍ਬਲਧਰੋ (ਸ੍ਯਾ.)] ਬੁਦ੍ਧੋ, ਗਚ੍ਛਤਿ ਅਨਿਲਞ੍ਜਸੇ.

੨੯. ‘‘ਧੁਨਨ੍ਤੋ ਪਂਸੁਕੂਲਾਨਿ, ਸਦ੍ਦਮਸ੍ਸੋਸਹਂ ਤਦਾ;

ਉਦ੍ਧਂ ਨਿਜ੍ਝਾਯਮਾਨੋਹਂ, ਅਦ੍ਦਸਂ ਲੋਕਨਾਯਕਂ.

੩੦. ‘‘ਤਤ੍ਥੇਵ ਠਿਤਕੋ ਸਨ੍ਤੋ, ਆਯਾਚਿਂ ਲੋਕਨਾਯਕਂ;

ਮਧੁਂ ਭਿਸੇਹਿ ਸਵਤਿ, ਖੀਰਂ ਸਪ੍ਪਿਂ ਮੁਲ਼ਾਲਿਭਿ.

੩੧. ‘‘ਪਟਿਗ੍ਗਣ੍ਹਾਤੁ ਮੇ ਬੁਦ੍ਧੋ, ਅਨੁਕਮ੍ਪਾਯ ਚਕ੍ਖੁਮਾ;

ਤਤੋ ਕਾਰੁਣਿਕੋ ਸਤ੍ਥਾ, ਓਰੁਹਿਤ੍ਵਾ ਮਹਾਯਸੋ.

੩੨. ‘‘ਪਟਿਗ੍ਗਣ੍ਹਿ ਮਮਂ ਭਿਕ੍ਖਂ, ਅਨੁਕਮ੍ਪਾਯ ਚਕ੍ਖੁਮਾ;

ਪਟਿਗ੍ਗਹੇਤ੍ਵਾ ਸਮ੍ਬੁਦ੍ਧੋ, ਅਕਾ ਮੇ ਅਨੁਮੋਦਨਂ.

੩੩. ‘‘‘ਸੁਖੀ ਹੋਤੁ [ਹੋਹਿ (ਸੀ. ਸ੍ਯਾ. ਪੀ. ਕ.)] ਮਹਾਪੁਞ੍ਞ, ਗਤਿ ਤੁਯ੍ਹਂ ਸਮਿਜ੍ਝਤੁ;

ਇਮਿਨਾ ਭਿਸਦਾਨੇਨ, ਲਭਸ੍ਸੁ ਵਿਪੁਲਂ ਸੁਖਂ’.

੩੪. ‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਜਲਜੁਤ੍ਤਮਨਾਮਕੋ;

ਭਿਕ੍ਖਮਾਦਾਯ ਸਮ੍ਬੁਦ੍ਧੋ, ਅਮ੍ਬਰੇਨਾਗਮਾ ਜਿਨੋ.

੩੫. ‘‘ਤਤੋ ਭਿਸਂ ਗਹੇਤ੍ਵਾਨ, ਆਗਚ੍ਛਿਂ ਮਮ ਅਸ੍ਸਮਂ;

ਭਿਸਂ ਰੁਕ੍ਖੇ ਲਗੇਤ੍ਵਾਨ [ਲਗ੍ਗਿਤ੍ਵਾਨ (ਸ੍ਯਾ. ਕ.)], ਮਮ ਦਾਨਮਨੁਸ੍ਸਰਿਂ.

੩੬. ‘‘ਮਹਾਵਾਤੋ ਵੁਟ੍ਠਹਿਤ੍ਵਾ, ਸਞ੍ਚਾਲੇਸਿ ਵਨਂ ਤਦਾ;

ਆਕਾਸੋ ਅਭਿਨਾਦਿਤ੍ਥ, ਅਸਨਿਯਾ ਫਲਨ੍ਤਿਯਾ.

੩੭. ‘‘ਤਤੋ ਮੇ ਅਸਨਿਪਾਤੋ, ਮਤ੍ਥਕੇ ਨਿਪਤੀ ਤਦਾ;

ਸੋਹਂ ਨਿਸਿਨ੍ਨਕੋ ਸਨ੍ਤੋ, ਤਤ੍ਥ ਕਾਲਙ੍ਕਤੋ ਅਹੁਂ.

੩੮. ‘‘ਪੁਞ੍ਞਕਮ੍ਮੇਨ ਸਂਯੁਤ੍ਤੋ, ਤੁਸਿਤਂ ਉਪਪਜ੍ਜਹਂ;

ਕਲ਼ੇਵਰਂ ਮੇ ਪਤਿਤਂ, ਦੇਵਲੋਕੇ ਰਮਿਂ ਅਹਂ.

੩੯. ‘‘ਛਲ਼ਸੀਤਿਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;

ਸਾਯਪਾਤਂ [ਸਾਯਂ ਪਾਤਂ (ਸ੍ਯਾ. ਕ.)] ਉਪਟ੍ਠਨ੍ਤਿ, ਭਿਸਦਾਨਸ੍ਸਿਦਂ ਫਲਂ.

੪੦. ‘‘ਮਨੁਸ੍ਸਯੋਨਿਮਾਗਨ੍ਤ੍ਵਾ, ਸੁਖਿਤੋ ਹੋਮਹਂ ਸਦਾ;

ਭੋਗੇ ਮੇ ਊਨਤਾ ਨਤ੍ਥਿ, ਭਿਸਦਾਨਸ੍ਸਿਦਂ ਫਲਂ.

੪੧. ‘‘ਅਨੁਕਮ੍ਪਿਤਕੋ ਤੇਨ, ਦੇਵਦੇਵੇਨ ਤਾਦਿਨਾ;

ਸਬ੍ਬਾਸਵਾ ਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੪੨. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਭਿਸਂ [ਭਿਕ੍ਖਂ (ਸਬ੍ਬਤ੍ਥ)] ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਭਿਸਦਾਨਸ੍ਸਿਦਂ ਫਲਂ.

੪੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੪੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਭਿਸਦਾਯਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਭਿਸਦਾਯਕਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਞਾਣਥਵਿਕਤ੍ਥੇਰਅਪਦਾਨਂ

੪੬. ‘‘ਦਕ੍ਖਿਣੇ ਹਿਮਵਨ੍ਤਸ੍ਸ, ਸੁਕਤੋ ਅਸ੍ਸਮੋ ਮਮ;

ਉਤ੍ਤਮਤ੍ਥਂ ਗਵੇਸਨ੍ਤੋ, ਵਸਾਮਿ ਵਿਪਿਨੇ ਤਦਾ.

੪੭. ‘‘ਲਾਭਾਲਾਭੇਨ ਸਨ੍ਤੁਟ੍ਠੋ, ਮੂਲੇਨ ਚ ਫਲੇਨ ਚ;

ਅਨ੍ਵੇਸਨ੍ਤੋ ਆਚਰਿਯਂ, ਵਸਾਮਿ ਏਕਕੋ ਅਹਂ.

੪੮. ‘‘ਸੁਮੇਧੋ ਨਾਮ ਸਮ੍ਬੁਦ੍ਧੋ, ਲੋਕੇ ਉਪ੍ਪਜ੍ਜਿ ਤਾਵਦੇ;

ਚਤੁਸਚ੍ਚਂ ਪਕਾਸੇਤਿ, ਉਦ੍ਧਰਨ੍ਤੋ ਮਹਾਜਨਂ.

੪੯. ‘‘ਨਾਹਂ ਸੁਣੋਮਿ ਸਮ੍ਬੁਦ੍ਧਂ, ਨਪਿ ਮੇ ਕੋਚਿ ਸਂਸਤਿ [ਭਾਸਤਿ (ਸੀ.), ਸਾਸਤਿ (ਸ੍ਯਾ. ਪੀ.)];

ਅਟ੍ਠਵਸ੍ਸੇ ਅਤਿਕ੍ਕਨ੍ਤੇ, ਅਸ੍ਸੋਸਿਂ ਲੋਕਨਾਯਕਂ.

੫੦. ‘‘ਅਗ੍ਗਿਦਾਰੁਂ ਨੀਹਰਿਤ੍ਵਾ, ਸਮ੍ਮਜ੍ਜਿਤ੍ਵਾਨ ਅਸ੍ਸਮਂ;

ਖਾਰਿਭਾਰਂ ਗਹੇਤ੍ਵਾਨ, ਨਿਕ੍ਖਮਿਂ ਵਿਪਿਨਾ ਅਹਂ.

੫੧. ‘‘ਏਕਰਤ੍ਤਿਂ ਵਸਨ੍ਤੋਹਂ, ਗਾਮੇਸੁ ਨਿਗਮੇਸੁ ਚ;

ਅਨੁਪੁਬ੍ਬੇਨ ਚਨ੍ਦਵਤਿਂ, ਤਦਾਹਂ ਉਪਸਙ੍ਕਮਿਂ.

੫੨. ‘‘ਭਗਵਾ ਤਮ੍ਹਿ ਸਮਯੇ, ਸੁਮੇਧੋ ਲੋਕਨਾਯਕੋ;

ਉਦ੍ਧਰਨ੍ਤੋ ਬਹੂ ਸਤ੍ਤੇ, ਦੇਸੇਤਿ ਅਮਤਂ ਪਦਂ.

੫੩. ‘‘ਜਨਕਾਯਮਤਿਕ੍ਕਮ੍ਮ, ਵਨ੍ਦਿਤ੍ਵਾ ਜਿਨਸਾਗਰਂ;

ਏਕਂਸਂ ਅਜਿਨਂ ਕਤ੍ਵਾ, ਸਨ੍ਥਵਿਂ ਲੋਕਨਾਯਕਂ.

੫੪. ‘‘‘ਤੁਵਂ ਸਤ੍ਥਾ ਚ ਕੇਤੁ ਚ, ਧਜੋ ਯੂਪੋ ਚ ਪਾਣਿਨਂ;

ਪਰਾਯਨੋ [ਪਰਾਯਣੋ (ਸੀ. ਪੀ.)] ਪਤਿਟ੍ਠਾ ਚ, ਦੀਪੋ ਚ ਦ੍ਵਿਪਦੁਤ੍ਤਮੋ.

ਏਕਵੀਸਤਿਮਂ ਭਾਣਵਾਰਂ.

੫੫. ‘‘‘ਨੇਪੁਞ੍ਞੋ ਦਸ੍ਸਨੇ ਵੀਰੋ, ਤਾਰੇਸਿ ਜਨਤਂ ਤੁਵਂ;

ਨਤ੍ਥਞ੍ਞੋ ਤਾਰਕੋ ਲੋਕੇ, ਤਵੁਤ੍ਤਰਿਤਰੋ ਮੁਨੇ.

੫੬. ‘‘‘ਸਕ੍ਕਾ ਥੇਵੇ [ਹਵੇ (ਸੀ. ਪੀ.) ਭਵੇ (ਸ੍ਯਾ. ਕ.)] ਕੁਸਗ੍ਗੇਨ, ਪਮੇਤੁਂ ਸਾਗਰੁਤ੍ਤਮੇ [ਸਾਗਰੁਤ੍ਤਮੋ (ਸੀ. ਸ੍ਯਾ. ਪੀ.)];

ਨਤ੍ਵੇਵ ਤਵ ਸਬ੍ਬਞ੍ਞੁ, ਞਾਣਂ ਸਕ੍ਕਾ ਪਮੇਤਵੇ.

੫੭. ‘‘‘ਤੁਲਦਣ੍ਡੇ [ਤੁਲਮਣ੍ਡਲੇ (ਸੀ. ਪੀ.)] ਠਪੇਤ੍ਵਾਨ, ਮਹਿਂ [ਮਹੀ (ਸ੍ਯਾ. ਪੀ.)] ਸਕ੍ਕਾ ਧਰੇਤਵੇ;

ਨਤ੍ਵੇਵ ਤਵ ਪਞ੍ਞਾਯ, ਪਮਾਣਮਤ੍ਥਿ ਚਕ੍ਖੁਮ.

੫੮. ‘‘‘ਆਕਾਸੋ ਮਿਨਿਤੁਂ ਸਕ੍ਕਾ, ਰਜ੍ਜੁਯਾ ਅਙ੍ਗੁਲੇਨ ਵਾ;

ਨਤ੍ਵੇਵ ਤਵ ਸਬ੍ਬਞ੍ਞੁ, ਸੀਲਂ ਸਕ੍ਕਾ ਪਮੇਤਵੇ.

੫੯. ‘‘‘ਮਹਾਸਮੁਦ੍ਦੇ ਉਦਕਂ, ਆਕਾਸੋ ਚ ਵਸੁਨ੍ਧਰਾ;

ਪਰਿਮੇਯ੍ਯਾਨਿ ਏਤਾਨਿ, ਅਪ੍ਪਮੇਯ੍ਯੋਸਿ ਚਕ੍ਖੁਮ’.

੬੦. ‘‘ਛਹਿ ਗਾਥਾਹਿ ਸਬ੍ਬਞ੍ਞੁਂ, ਕਿਤ੍ਤਯਿਤ੍ਵਾ ਮਹਾਯਸਂ;

ਅਞ੍ਜਲਿਂ ਪਗ੍ਗਹੇਤ੍ਵਾਨ, ਤੁਣ੍ਹੀ ਅਟ੍ਠਾਸਹਂ ਤਦਾ.

੬੧. ‘‘ਯਂ ਵਦਨ੍ਤਿ ਸੁਮੇਧੋਤਿ, ਭੂਰਿਪਞ੍ਞਂ ਸੁਮੇਧਸਂ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੬੨. ‘‘‘ਯੋ ਮੇ ਞਾਣਂ ਪਕਿਤ੍ਤੇਸਿ, ਵਿਪ੍ਪਸਨ੍ਨੇਨ ਚੇਤਸਾ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੬੩. ‘‘‘ਸਤ੍ਤਸਤ੍ਤਤਿ ਕਪ੍ਪਾਨਿ, ਦੇਵਲੋਕੇ ਰਮਿਸ੍ਸਤਿ;

ਸਹਸ੍ਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ.

੬੪. ‘‘‘ਅਨੇਕਸਤਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੬੫. ‘‘‘ਦੇਵਭੂਤੋ ਮਨੁਸ੍ਸੋ ਵਾ, ਪੁਞ੍ਞਕਮ੍ਮਸਮਾਹਿਤੋ;

ਅਨੂਨਮਨਸਙ੍ਕਪ੍ਪੋ, ਤਿਕ੍ਖਪਞ੍ਞੋ ਭਵਿਸ੍ਸਤਿ’.

੬੬. ‘‘ਤਿਂਸਕਪ੍ਪਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੬੭. ‘‘ਅਗਾਰਾ ਅਭਿਨਿਕ੍ਖਮ੍ਮ, ਪਬ੍ਬਜਿਸ੍ਸਤਿ ਕਿਞ੍ਚਨੋ;

ਜਾਤਿਯਾ ਸਤ੍ਤਵਸ੍ਸੇਨ, ਅਰਹਤ੍ਤਂ ਫੁਸਿਸ੍ਸਤਿ.

੬੮. ‘‘ਯਤੋ ਸਰਾਮਿ ਅਤ੍ਤਾਨਂ, ਯਤੋ ਪਤ੍ਤੋਸ੍ਮਿ ਸਾਸਨਂ;

ਏਤ੍ਥਨ੍ਤਰੇ ਨ ਜਾਨਾਮਿ, ਚੇਤਨਂ ਅਮਨੋਰਮਂ.

੬੯. ‘‘ਸਂਸਰਿਤ੍ਵਾ ਭਵੇ ਸਬ੍ਬੇ, ਸਮ੍ਪਤ੍ਤਾਨੁਭਵਿਂ ਅਹਂ;

ਭੋਗੇ ਮੇ ਊਨਤਾ ਨਤ੍ਥਿ, ਫਲਂ ਞਾਣਸ੍ਸ ਥੋਮਨੇ.

੭੦. ‘‘ਤਿਯਗ੍ਗੀ ਨਿਬ੍ਬੁਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਸਬ੍ਬਾਸਵਾ ਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੭੧. ‘‘ਤਿਂਸਕਪ੍ਪਸਹਸ੍ਸਮ੍ਹਿ, ਯਂ ਞਾਣਮਥਵਿਂ ਅਹਂ [ਮਭਿਥੋਮਯਿਂ (ਸੀ. ਪੀ.), ਮਭਿਥੋਮਹਂ (ਸ੍ਯਾ.)];