੫੦. ਕਿਙ੍ਕਣਿਪੁਪ੍ਫਵਗ੍ਗੋ
੧. ਤਿਕਿਙ੍ਕਣਿਪੁਪ੍ਫਿਯਤ੍ਥੇਰਅਪਦਾਨਂ
੧. ‘‘ਕਣਿਕਾਰਂਵ ਜੋਤਨ੍ਤਂ, ਨਿਸਿਨ੍ਨਂ ਪਬ੍ਬਤਨ੍ਤਰੇ;
ਅਦ੍ਦਸਂ ਵਿਰਜਂ ਬੁਦ੍ਧਂ, ਵਿਪਸ੍ਸਿਂ ਲੋਕਨਾਯਕਂ.
੨. ‘‘ਤੀਣਿ ਕਿਙ੍ਕਣਿਪੁਪ੍ਫਾਨਿ, ਪਗ੍ਗਯ੍ਹ ਅਭਿਰੋਪਯਿਂ;
ਸਮ੍ਬੁਦ੍ਧਮਭਿਪੂਜੇਤ੍ਵਾ, ਗਚ੍ਛਾਮਿ ਦਕ੍ਖਿਣਾਮੁਖੋ.
੩. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;
ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.
੪. ‘‘ਏਕਨਵੁਤਿਤੋ ਕਪ੍ਪੇ, ਯਂ ਬੁਦ੍ਧਮਭਿਪੂਜਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੫. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;
ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.
੬. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;
ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.
੭. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਤਿਕਿਙ੍ਕਣਿਪੁਪ੍ਫਿਯੋ ਥੇਰੋ ਇਮਾ
ਗਾਥਾਯੋ ਅਭਾਸਿਤ੍ਥਾਤਿ.
ਤਿਕਿਙ੍ਕਣਿਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਪਠਮਂ.
੨. ਪਂਸੁਕੂਲਪੂਜਕਤ੍ਥੇਰਅਪਦਾਨਂ
੮. ‘‘ਹਿਮਵਨ੍ਤਸ੍ਸਾਵਿਦੂਰੇ, ਉਦਙ੍ਗਣੋ ਨਾਮ ਪਬ੍ਬਤੋ;
ਤਤ੍ਥਦ੍ਦਸਂ ਪਂਸੁਕੂਲਂ, ਦੁਮਗ੍ਗਮ੍ਹਿ ਵਿਲਮ੍ਬਿਤਂ.
੯. ‘‘ਤੀਣਿ ਕਿਙ੍ਕਣਿਪੁਪ੍ਫਾਨਿ, ਓਚਿਨਿਤ੍ਵਾਨਹਂ ਤਦਾ;
ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਪਂਸੁਕੂਲਮਪੂਜਯਿਂ.
੧੦. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;
ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.
੧੧. ‘‘ਏਕਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪੂਜਿਤ੍ਵਾ ਅਰਹਦ੍ਧਜਂ.
੧੨. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.
੧੩. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.
੧੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਪਂਸੁਕੂਲਪੂਜਕੋ ਥੇਰੋ ਇਮਾ ਗਾਥਾਯੋ
ਅਭਾਸਿਤ੍ਥਾਤਿ.
ਪਂਸੁਕੂਲਪੂਜਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.
੩. ਕੋਰਣ੍ਡਪੁਪ੍ਫਿਯਤ੍ਥੇਰਅਪਦਾਨਂ
੧੫. ‘‘ਵਨਕਮ੍ਮਿਕੋ ਪੁਰੇ ਆਸਿਂ, ਪਿਤੁਮਾਤੁਮਤੇਨਹਂ [ਪਿਤੁਪੇਤਾਮਹੇਨਹਂ (ਸੀ. ਸ੍ਯਾ. ਪੀ.)];
ਪਸੁਮਾਰੇਨ ਜੀਵਾਮਿ, ਕੁਸਲਂ ਮੇ ਨ ਵਿਜ੍ਜਤਿ.
੧੬. ‘‘ਮਮ ਆਸਯਸਾਮਨ੍ਤਾ, ਤਿਸ੍ਸੋ ਲੋਕਗ੍ਗਨਾਯਕੋ;
ਪਦਾਨਿ ਤੀਣਿ ਦਸ੍ਸੇਸਿ, ਅਨੁਕਮ੍ਪਾਯ ਚਕ੍ਖੁਮਾ.
੧੭. ‘‘ਅਕ੍ਕਨ੍ਤੇ ਚ ਪਦੇ ਦਿਸ੍ਵਾ, ਤਿਸ੍ਸਨਾਮਸ੍ਸ ਸਤ੍ਥੁਨੋ;
ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਪਦੇ ਚਿਤ੍ਤਂ ਪਸਾਦਯਿਂ.
੧੮. ‘‘ਕੋਰਣ੍ਡਂ ਪੁਪ੍ਫਿਤਂ ਦਿਸ੍ਵਾ, ਪਾਦਪਂ ਧਰਣੀਰੁਹਂ;
ਸਕੋਸਕਂ ਗਹੇਤ੍ਵਾਨ, ਪਦਸੇਟ੍ਠਮਪੂਜਯਿਂ [ਪਦਸੇਟ੍ਠੇ ਅਪੂਜਯਿਂ (ਸੀ. ਪੀ.)].
੧੯. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;
ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.
੨੦. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;
ਕੋਰਣ੍ਡਕਛਵਿ ਹੋਮਿ, ਸੁਪ੍ਪਭਾਸੋ [ਸਪਭਾਸੋ (ਸੀ. ਸ੍ਯਾ. ਪੀ. ਕ.)] ਭਵਾਮਹਂ.
੨੧. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪਦਪੂਜਾਯਿਦਂ ਫਲਂ.
੨੨. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.
੨੩. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.
੨੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਕੋਰਣ੍ਡਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ
ਅਭਾਸਿਤ੍ਥਾਤਿ.
ਕੋਰਣ੍ਡਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਤਤਿਯਂ.
੪. ਕਿਂਸੁਕਪੁਪ੍ਫਿਯਤ੍ਥੇਰਅਪਦਾਨਂ
੨੫. ‘‘ਕਿਂਸੁਕਂ ਪੁਪ੍ਫਿਤਂ ਦਿਸ੍ਵਾ, ਪਗ੍ਗਹੇਤ੍ਵਾਨ ਅਞ੍ਜਲਿਂ;
ਬੁਦ੍ਧਸੇਟ੍ਠਂ ਸਰਿਤ੍ਵਾਨ, ਆਕਾਸੇ ਅਭਿਪੂਜਯਿਂ.
੨੬. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;
ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.
੨੭. ‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੨੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.
੨੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.
੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਕਿਂਸੁਕਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ
ਅਭਾਸਿਤ੍ਥਾਤਿ.
ਕਿਂਸੁਕਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.
੫. ਉਪਡ੍ਢਦੁਸ੍ਸਦਾਯਕਤ੍ਥੇਰਅਪਦਾਨਂ
੩੧. ‘‘ਪਦੁਮੁਤ੍ਤਰਭਗਵਤੋ, ਸੁਜਾਤੋ ਨਾਮ ਸਾਵਕੋ;
ਪਂਸੁਕੂਲਂ ਗਵੇਸਨ੍ਤੋ, ਸਙ੍ਕਾਰੇ ਚਰਤੇ [ਚਰਤੀ (ਸੀ. ਕ.)] ਤਦਾ.
੩੨. ‘‘ਨਗਰੇ ਹਂਸਵਤਿਯਾ, ਪਰੇਸਂ ਭਤਕੋ ਅਹਂ;
ਉਪਡ੍ਢਦੁਸ੍ਸਂ ਦਤ੍ਵਾਨ, ਸਿਰਸਾ ਅਭਿਵਾਦਯਿਂ.
੩੩. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;
ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.
੩੪. ‘‘ਤੇਤ੍ਤਿਂਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਮਕਾਰਯਿਂ;
ਸਤ੍ਤਸਤ੍ਤਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ.
੩੫. ‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;
ਉਪਡ੍ਢਦੁਸ੍ਸਦਾਨੇਨ, ਮੋਦਾਮਿ ਅਕੁਤੋਭਯੋ.
੩੬. ‘‘ਇਚ੍ਛਮਾਨੋ ਚਹਂ ਅਜ੍ਜ, ਸਕਾਨਨਂ ਸਪਬ੍ਬਤਂ;
ਖੋਮਦੁਸ੍ਸੇਹਿ ਛਾਦੇਯ੍ਯਂ, ਅਡ੍ਢਦੁਸ੍ਸਸ੍ਸਿਦਂ ਫਲਂ.
੩੭. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਅਡ੍ਢਦੁਸ੍ਸਸ੍ਸਿਦਂ ਫਲਂ.
੩੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.
੩੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.
੪੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਉਪਡ੍ਢਦੁਸ੍ਸਦਾਯਕੋ ਥੇਰੋ ਇਮਾ
ਗਾਥਾਯੋ ਅਭਾਸਿਤ੍ਥਾਤਿ.
ਉਪਡ੍ਢਦੁਸ੍ਸਦਾਯਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.
੬. ਘਤਮਣ੍ਡਦਾਯਕਤ੍ਥੇਰਅਪਦਾਨਂ
੪੧. ‘‘ਸੁਚਿਨ੍ਤਿਤਂ ਭਗਵਨ੍ਤਂ, ਲੋਕਜੇਟ੍ਠਂ ਨਰਾਸਭਂ;
ਉਪਵਿਟ੍ਠਂ ਮਹਾਰਞ੍ਞਂ, ਵਾਤਾਬਾਧੇਨ ਪੀਲ਼ਿਤਂ.
੪੨. ‘‘ਦਿਸ੍ਵਾ ਚਿਤ੍ਤਂ ਪਸਾਦੇਤ੍ਵਾ, ਘਤਮਣ੍ਡਮੁਪਾਨਯਿਂ;
ਕਤਤ੍ਤਾ ਆਚਿਤਤ੍ਤਾ [ਉਪਚਿਤਤ੍ਤਾ (ਸ੍ਯਾ. ਕ.)] ਚ, ਗਙ੍ਗਾ ਭਾਗੀਰਥੀ ਅਯਂ.
੪੩. ‘‘ਮਹਾਸਮੁਦ੍ਦਾ ਚਤ੍ਤਾਰੋ, ਘਤਂ ਸਮ੍ਪਜ੍ਜਰੇ ਮਮ;
ਅਯਞ੍ਚ ਪਥਵੀ ਘੋਰਾ, ਅਪ੍ਪਮਾਣਾ ਅਸਙ੍ਖਿਯਾ.
੪੪. ‘‘ਮਮ ਸਙ੍ਕਪ੍ਪਮਞ੍ਞਾਯ, ਭਵਤੇ ਮਧੁਸਕ੍ਕਰਾ [ਮਧੁਸਕ੍ਖਰਾ (ਸ੍ਯਾ. ਕ.)];
ਚਾਤੁਦ੍ਦੀਪਾ ਇਮੇ ਰੁਕ੍ਖਾ, ਪਾਦਪਾ ਧਰਣੀਰੁਹਾ.
੪੫. ‘‘ਮਮ ਸਙ੍ਕਪ੍ਪਮਞ੍ਞਾਯ, ਕਪ੍ਪਰੁਕ੍ਖਾ ਭਵਨ੍ਤਿ ਤੇ;
ਪਞ੍ਞਾਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਮਕਾਰਯਿਂ.
੪੬. ‘‘ਏਕਪਞ੍ਞਾਸਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ;
ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.
੪੭. ‘‘ਚਤੁਨ੍ਨਵੁਤਿਤੋ [ਛਨਵੁਤੇ ਇਤੋ (ਸੀ.)] ਕਪ੍ਪੇ, ਯਂ ਦਾਨਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਘਤਮਣ੍ਡਸ੍ਸਿਦਂ ਫਲਂ.
੪੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.
੪੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.
੫੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਘਤਮਣ੍ਡਦਾਯਕੋ ਥੇਰੋ ਇਮਾ ਗਾਥਾਯੋ
ਅਭਾਸਿਤ੍ਥਾਤਿ.
ਘਤਮਣ੍ਡਦਾਯਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.
੭. ਉਦਕਦਾਯਕਤ੍ਥੇਰਅਪਦਾਨਂ
੫੧. ‘‘ਪਦੁਮੁਤ੍ਤਰਬੁਦ੍ਧਸ੍ਸ, ਭਿਕ੍ਖੁਸਙ੍ਘੇ ਅਨੁਤ੍ਤਰੇ;
ਪਸਨ੍ਨਚਿਤ੍ਤੋ ਸੁਮਨੋ, ਪਾਨੀਘਟਮਪੂਰਯਿਂ.
੫੨. ‘‘ਪਬ੍ਬਤਗ੍ਗੇ ਦੁਮਗ੍ਗੇ ਵਾ, ਆਕਾਸੇ ਵਾਥ ਭੂਮਿਯਂ;
ਯਦਾ ਪਾਨੀਯਮਿਚ੍ਛਾਮਿ, ਖਿਪ੍ਪਂ ਨਿਬ੍ਬਤ੍ਤਤੇ ਮਮ.
੫੩. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਦਕਦਾਨਸ੍ਸਿਦਂ ਫਲਂ.
੫੪. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.
੫੫. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.
੫੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਉਦਕਦਾਯਕੋ ਥੇਰੋ ਇਮਾ ਗਾਥਾਯੋ
ਅਭਾਸਿਤ੍ਥਾਤਿ.
ਉਦਕਦਾਯਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.
੮. ਪੁਲਿਨਥੂਪਿਯਤ੍ਥੇਰਅਪਦਾਨਂ
੫੭. ‘‘ਹਿਮਵਨ੍ਤਸ੍ਸਾਵਿਦੂਰੇ, ਯਮਕੋ ਨਾਮ ਪਬ੍ਬਤੋ;
ਅਸ੍ਸਮੋ ਸੁਕਤੋ ਮਯ੍ਹਂ, ਪਣ੍ਣਸਾਲਾ ਸੁਮਾਪਿਤਾ.
੫੮. ‘‘ਨਾਰਦੋ ਨਾਮ ਨਾਮੇਨ, ਜਟਿਲੋ ਉਗ੍ਗਤਾਪਨੋ;
ਚਤੁਦ੍ਦਸਸਹਸ੍ਸਾਨਿ, ਸਿਸ੍ਸਾ ਪਰਿਚਰਨ੍ਤਿ ਮਂ.
੫੯. ‘‘ਪਟਿਸਲ੍ਲੀਨਕੋ ਸਨ੍ਤੋ, ਏਵਂ ਚਿਨ੍ਤੇਸਹਂ ਤਦਾ;
‘ਸਬ੍ਬੋ ਜਨੋ ਮਂ ਪੂਜੇਤਿ, ਨਾਹਂ ਪੂਜੇਮਿ ਕਿਞ੍ਚਨਂ.
੬੦. ‘‘‘ਨ ਮੇ ਓਵਾਦਕੋ ਅਤ੍ਥਿ, ਵਤ੍ਤਾ ਕੋਚਿ ਨ ਵਿਜ੍ਜਤਿ;
ਅਨਾਚਰਿਯੁਪਜ੍ਝਾਯੋ, ਵਨੇ ਵਾਸਂ ਉਪੇਮਹਂ.
੬੧. ‘‘‘ਉਪਾਸਮਾਨੋ ਯਮਹਂ, ਗਰੁਚਿਤ੍ਤਂ ਉਪਟ੍ਠਹੇ;
ਸੋ ਮੇ ਆਚਰਿਯੋ ਨਤ੍ਥਿ, ਵਨਵਾਸੋ ਨਿਰਤ੍ਥਕੋ.
੬੨. ‘‘‘ਆਯਾਗਂ ਮੇ ਗਵੇਸਿਸ੍ਸਂ, ਗਰੁਂ ਭਾਵਨਿਯਂ ਤਥਾ;
ਸਾਵਸ੍ਸਯੋ ਵਸਿਸ੍ਸਾਮਿ, ਨ ਕੋਚਿ ਗਰਹਿਸ੍ਸਤਿ’.
੬੩. ‘‘ਉਤ੍ਤਾਨਕੂਲਾ ਨਦਿਕਾ, ਸੁਪਤਿਤ੍ਥਾ ਮਨੋਰਮਾ;
ਸਂਸੁਦ੍ਧਪੁਲਿਨਾਕਿਣ੍ਣਾ, ਅਵਿਦੂਰੇ ਮਮਸ੍ਸਮਂ.
੬੪. ‘‘ਨਦਿਂ ਅਮਰਿਕਂ ਨਾਮ, ਉਪਗਨ੍ਤ੍ਵਾਨਹਂ ਤਦਾ;
ਸਂਵਡ੍ਢਯਿਤ੍ਵਾ ਪੁਲਿਨਂ, ਅਕਂ ਪੁਲਿਨਚੇਤਿਯਂ.
੬੫. ‘‘ਯੇ ਤੇ ਅਹੇਸੁਂ ਸਮ੍ਬੁਦ੍ਧਾ, ਭਵਨ੍ਤਕਰਣਾ ਮੁਨੀ;
ਤੇਸਂ ਏਤਾਦਿਸੋ ਥੂਪੋ, ਤਂ ਨਿਮਿਤ੍ਤਂ ਕਰੋਮਹਂ.
੬੬. ‘‘ਕਰਿਤ੍ਵਾ ਪੁਲਿਨਂ [ਪੁਲ਼ਿਨੇ (ਸੀ. ਸ੍ਯਾ. ਪੀ.)] ਥੂਪਂ, ਸੋਵਣ੍ਣਂ ਮਾਪਯਿਂ ਅਹਂ;
ਸੋਣ੍ਣਕਿਙ੍ਕਣਿਪੁਪ੍ਫਾਨਿ, ਸਹਸ੍ਸੇ ਤੀਣਿ ਪੂਜਯਿਂ.
੬੭. ‘‘ਸਾਯਪਾਤਂ ਨਮਸ੍ਸਾਮਿ, ਵੇਦਜਾਤੋ ਕਤਞ੍ਜਲੀ;
ਸਮ੍ਮੁਖਾ ਵਿਯ ਸਮ੍ਬੁਦ੍ਧਂ, ਵਨ੍ਦਿਂ ਪੁਲਿਨਚੇਤਿਯਂ.
੬੮. ‘‘ਯਦਾ ਕਿਲੇਸਾ ਜਾਯਨ੍ਤਿ, ਵਿਤਕ੍ਕਾ ਗੇਹਨਿਸ੍ਸਿਤਾ;
ਸਰਾਮਿ ਸੁਕਤਂ ਥੂਪਂ, ਪਚ੍ਚਵੇਕ੍ਖਾਮਿ ਤਾਵਦੇ.
੬੯. ‘‘ਉਪਨਿਸ੍ਸਾਯ ਵਿਹਰਂ, ਸਤ੍ਥਵਾਹਂ ਵਿਨਾਯਕਂ;
ਕਿਲੇਸੇ ਸਂਵਸੇਯ੍ਯਾਸਿ, ਨ ਯੁਤ੍ਤਂ ਤਵ ਮਾਰਿਸ.