੯. ਸੋਵਣ੍ਣਕਿਙ੍ਕਣਿਯਤ੍ਥੇਰਅਪਦਾਨਂ

੧੪੦. ‘‘ਸਦ੍ਧਾਯ ਅਭਿਨਿਕ੍ਖਮ੍ਮ, ਪਬ੍ਬਜਿਂ ਅਨਗਾਰਿਯਂ;

ਵਾਕਚੀਰਧਰੋ ਆਸਿਂ, ਤਪੋਕਮ੍ਮਮਪਸ੍ਸਿਤੋ.

੧੪੧. ‘‘ਅਤ੍ਥਦਸ੍ਸੀ ਤੁ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਉਪ੍ਪਜ੍ਜਿ ਤਮ੍ਹਿ ਸਮਯੇ, ਤਾਰਯਨ੍ਤੋ ਮਹਾਜਨਂ.

੧੪੨. ‘‘ਬਲਞ੍ਚ ਵਤ ਮੇ ਖੀਣਂ, ਬ੍ਯਾਧਿਨਾ ਪਰਮੇਨ ਤਂ;

ਬੁਦ੍ਧਸੇਟ੍ਠਂ ਸਰਿਤ੍ਵਾਨ, ਪੁਲਿਨੇ ਥੂਪਮੁਤ੍ਤਮਂ.

੧੪੩. ‘‘ਕਰਿਤ੍ਵਾ ਹਟ੍ਠਚਿਤ੍ਤੋਹਂ, ਸਹਤ੍ਥੇਨ [ਪਸਾਦੇਨ (ਕ.)] ਸਮੋਕਿਰਿਂ;

ਸੋਣ੍ਣਕਿਙ੍ਕਣਿਪੁਪ੍ਫਾਨਿ, ਉਦਗ੍ਗਮਨਸੋ ਅਹਂ.

੧੪੪. ‘‘ਸਮ੍ਮੁਖਾ ਵਿਯ ਸਮ੍ਬੁਦ੍ਧਂ, ਥੂਪਂ ਪਰਿਚਰਿਂ ਅਹਂ;

ਤੇਨ ਚੇਤੋਪਸਾਦੇਨ, ਅਤ੍ਥਦਸ੍ਸਿਸ੍ਸ ਤਾਦਿਨੋ.

੧੪੫. ‘‘ਦੇਵਲੋਕਂ ਗਤੋ ਸਨ੍ਤੋ, ਲਭਾਮਿ ਵਿਪੁਲਂ ਸੁਖਂ;

ਸੁਵਣ੍ਣਵਣ੍ਣੋ ਤਤ੍ਥਾਸਿਂ, ਬੁਦ੍ਧਪੂਜਾਯਿਦਂ ਫਲਂ.

੧੪੬. ‘‘ਅਸੀਤਿਕੋਟਿਯੋ ਮਯ੍ਹਂ, ਨਾਰਿਯੋ ਸਮਲਙ੍ਕਤਾ;

ਸਦਾ ਮਯ੍ਹਂ ਉਪਟ੍ਠਨ੍ਤਿ, ਬੁਦ੍ਧਪੂਜਾਯਿਦਂ ਫਲਂ.

੧੪੭. ‘‘ਸਟ੍ਠਿਤੁਰਿਯਸਹਸ੍ਸਾਨਿ [ਸਟ੍ਠਿਤੂਰਿਯ… (ਕ.)], ਭੇਰਿਯੋ ਪਣਵਾਨਿ ਚ;

ਸਙ੍ਖਾ ਚ ਡਿਣ੍ਡਿਮਾ ਤਤ੍ਥ, ਵਗ੍ਗੂ ਵਜ੍ਜਨ੍ਤਿ [ਨਦਨ੍ਤਿ (ਸੀ.), ਵਦਨ੍ਤਿ (ਪੀ.)] ਦੁਨ੍ਦੁਭੀ.

੧੪੮. ‘‘ਚੁਲ੍ਲਾਸੀਤਿਸਹਸ੍ਸਾਨਿ, ਹਤ੍ਥਿਨੋ ਸਮਲਙ੍ਕਤਾ;

ਤਿਧਾਪਭਿਨ੍ਨਮਾਤਙ੍ਗਾ, ਕੁਞ੍ਜਰਾ ਸਟ੍ਠਿਹਾਯਨਾ.

੧੪੯. ‘‘ਹੇਮਜਾਲਾਭਿਸਞ੍ਛਨ੍ਨਾ, ਉਪਟ੍ਠਾਨਂ ਕਰੋਨ੍ਤਿ ਮੇ;

ਬਲਕਾਯੇ ਗਜੇ ਚੇਵ, ਊਨਤਾ ਮੇ ਨ ਵਿਜ੍ਜਤਿ.

੧੫੦. ‘‘ਸੋਣ੍ਣਕਿਙ੍ਕਣਿਪੁਪ੍ਫਾਨਂ, ਵਿਪਾਕਂ ਅਨੁਭੋਮਹਂ;

ਅਟ੍ਠਪਞ੍ਞਾਸਕ੍ਖਤ੍ਤੁਞ੍ਚ, ਦੇਵਰਜ੍ਜਮਕਾਰਯਿਂ.

੧੫੧. ‘‘ਏਕਸਤ੍ਤਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ;

ਪਥਬ੍ਯਾ ਰਜ੍ਜਂ ਏਕਸਤਂ, ਮਹਿਯਾ ਕਾਰਯਿਂ ਅਹਂ.

੧੫੨. ‘‘ਸੋ ਦਾਨਿ ਅਮਤਂ ਪਤ੍ਤੋ, ਅਸਙ੍ਖਤਂ ਸੁਦੁਦ੍ਦਸਂ [ਗਮ੍ਭੀਰਂ ਦੁਦ੍ਦਸਂ ਪਦਂ (ਸ੍ਯਾ.)];

ਸਂਯੋਜਨਪਰਿਕ੍ਖੀਣੋ, ਨਤ੍ਥਿ ਦਾਨਿ ਪੁਨਬ੍ਭਵੋ.

੧੫੩. ‘‘ਅਟ੍ਠਾਰਸੇ ਕਪ੍ਪਸਤੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੫੪. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੫੫. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੫੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੋਵਣ੍ਣਕਿਙ੍ਕਣਿਯੋ ਥੇਰੋ ਇਮਾ

ਗਾਥਾਯੋ ਅਭਾਸਿਤ੍ਥਾਤਿ.

ਸੋਵਣ੍ਣਕਿਙ੍ਕਣਿਯਤ੍ਥੇਰਸ੍ਸਾਪਦਾਨਂ ਨਵਮਂ.