੧੦. ਸੋਣ੍ਣਕੋਨ੍ਤਰਿਕਤ੍ਥੇਰਅਪਦਾਨਂ

੧੫੭. ‘‘ਮਨੋਭਾਵਨਿਯਂ ਬੁਦ੍ਧਂ, ਅਤ੍ਤਦਨ੍ਤਂ ਸਮਾਹਿਤਂ;

ਇਰਿਯਮਾਨਂ ਬ੍ਰਹ੍ਮਪਥੇ, ਚਿਤ੍ਤਵੂਪਸਮੇ ਰਤਂ.

੧੫੮. ‘‘ਨਿਤ੍ਤਿਣ੍ਣਓਘਂ ਸਮ੍ਬੁਦ੍ਧਂ, ਝਾਯਿਂ ਝਾਨਰਤਂ ਮੁਨਿਂ;

ਉਪਤਿਤ੍ਥਂ ਸਮਾਪਨ੍ਨਂ, ਇਨ੍ਦਿਵਰਦਲਪ੍ਪਭਂ.

੧੫੯. ‘‘ਅਲਾਬੁਨੋਦਕਂ ਗਯ੍ਹ, ਬੁਦ੍ਧਸੇਟ੍ਠਂ ਉਪਾਗਮਿਂ;

ਬੁਦ੍ਧਸ੍ਸ ਪਾਦੇ ਧੋਵਿਤ੍ਵਾ, ਅਲਾਬੁਕਮਦਾਸਹਂ.

੧੬੦. ‘‘ਆਣਾਪੇਸਿ ਚ ਸਮ੍ਬੁਦ੍ਧੋ, ਪਦੁਮੁਤ੍ਤਰਨਾਮਕੋ;

‘ਇਮਿਨਾ ਦਕਮਾਹਤ੍ਵਾ, ਪਾਦਮੂਲੇ ਠਪੇਹਿ ਮੇ’.

੧੬੧. ‘‘ਸਾਧੂਤਿਹਂ ਪਟਿਸ੍ਸੁਤ੍ਵਾ, ਸਤ੍ਥੁਗਾਰਵਤਾਯ ਚ;

ਦਕਂ ਅਲਾਬੁਨਾਹਤ੍ਵਾ, ਬੁਦ੍ਧਸੇਟ੍ਠਂ ਉਪਾਗਮਿਂ.

੧੬੨. ‘‘ਅਨੁਮੋਦਿ ਮਹਾਵੀਰੋ, ਚਿਤ੍ਤਂ ਨਿਬ੍ਬਾਪਯਂ ਮਮ;

‘ਇਮਿਨਾਲਾਬੁਦਾਨੇਨ, ਸਙ੍ਕਪ੍ਪੋ ਤੇ ਸਮਿਜ੍ਝਤੁ’.

੧੬੩. ‘‘ਪਨ੍ਨਰਸੇਸੁ ਕਪ੍ਪੇਸੁ, ਦੇਵਲੋਕੇ ਰਮਿਂ ਅਹਂ;

ਤਿਂਸਤਿਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਅਹੋਸਹਂ.

੧੬੪. ‘‘ਦਿਵਾ ਵਾ ਯਦਿ ਵਾ ਰਤ੍ਤਿਂ, ਚਙ੍ਕਮਨ੍ਤਸ੍ਸ ਤਿਟ੍ਠਤੋ;

ਸੋਵਣ੍ਣਂ ਕੋਨ੍ਤਰਂ ਗਯ੍ਹ, ਤਿਟ੍ਠਤੇ ਪੁਰਤੋ ਮਮ.

੧੬੫. ‘‘ਬੁਦ੍ਧਸ੍ਸ ਦਤ੍ਵਾਨਲਾਬੁਂ, ਲਭਾਮਿ ਸੋਣ੍ਣਕੋਨ੍ਤਰਂ;

ਅਪ੍ਪਕਮ੍ਪਿ ਕਤਂ ਕਾਰਂ, ਵਿਪੁਲਂ ਹੋਤਿ ਤਾਦਿਸੁ.

੧੬੬. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂਲਾਬੁਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਅਲਾਬੁਸ੍ਸ ਇਦਂ ਫਲਂ.

੧੬੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੬੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੬੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੋਣ੍ਣਕੋਨ੍ਤਰਿਕੋ ਥੇਰੋ ਇਮਾ

ਗਾਥਾਯੋ ਅਭਾਸਿਤ੍ਥਾਤਿ.

ਸੋਣ੍ਣਕੋਨ੍ਤਰਿਕਤ੍ਥੇਰਸ੍ਸਾਪਦਾਨਂ ਦਸਮਂ.

ਸਕਿਂਸਮ੍ਮਜ੍ਜਕਵਗ੍ਗੋ ਤੇਚਤ੍ਤਾਲੀਸਮੋ.