੪੪. ਏਕਵਿਹਾਰਿਵਗ੍ਗੋ

੧. ਏਕਵਿਹਾਰਿਕਤ੍ਥੇਰਅਪਦਾਨਂ

੧. ‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

੨. ‘‘ਨਿਪ੍ਪਪਞ੍ਚੋ ਨਿਰਾਲਮ੍ਬੋ, ਆਕਾਸਸਮਮਾਨਸੋ;

ਸੁਞ੍ਞਤਾਬਹੁਲੋ ਤਾਦੀ, ਅਨਿਮਿਤ੍ਤਰਤੋ ਵਸੀ.

੩. ‘‘ਅਸਙ੍ਗਚਿਤ੍ਤੋ ਨਿਕ੍ਲੇਸੋ [ਨਿਲ੍ਲੇਪੋ (ਸ੍ਯਾ. ਕ.)], ਅਸਂਸਟ੍ਠੋ ਕੁਲੇ ਗਣੇ;

ਮਹਾਕਾਰੁਣਿਕੋ ਵੀਰੋ, ਵਿਨਯੋਪਾਯਕੋਵਿਦੋ.

੪. ‘‘ਉਯ੍ਯੁਤ੍ਤੋ ਪਰਕਿਚ੍ਚੇਸੁ, ਵਿਨਯਨ੍ਤੋ ਸਦੇਵਕੇ;

ਨਿਬ੍ਬਾਨਗਮਨਂ ਮਗ੍ਗਂ, ਗਤਿਂ ਪਙ੍ਕਵਿਸੋਸਨਂ.

੫. ‘‘ਅਮਤਂ ਪਰਮਸ੍ਸਾਦਂ, ਜਰਾਮਚ੍ਚੁਨਿਵਾਰਣਂ;

ਮਹਾਪਰਿਸਮਜ੍ਝੇ ਸੋ, ਨਿਸਿਨ੍ਨੋ ਲੋਕਤਾਰਕੋ.

੬. ‘‘ਕਰਵੀਕਰੁਤੋ [ਕਰਵੀਕਰੁਦੋ (ਸ੍ਯਾ. ਪੀ. ਕ.)] ਨਾਥੋ, ਬ੍ਰਹ੍ਮਘੋਸੋ ਤਥਾਗਤੋ;

ਉਦ੍ਧਰਨ੍ਤੋ ਮਹਾਦੁਗ੍ਗਾ, ਵਿਪ੍ਪਨਟ੍ਠੇ ਅਨਾਯਕੇ.

੭. ‘‘ਦੇਸੇਨ੍ਤੋ ਵਿਰਜਂ ਧਮ੍ਮਂ, ਦਿਟ੍ਠੋ ਮੇ ਲੋਕਨਾਯਕੋ;

ਤਸ੍ਸ ਧਮ੍ਮਂ ਸੁਣਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ.

੮. ‘‘ਪਬ੍ਬਜਿਤ੍ਵਾ ਤਦਾਪਾਹਂ, ਚਿਨ੍ਤੇਨ੍ਤੋ ਜਿਨਸਾਸਨਂ;

ਏਕਕੋਵ ਵਨੇ ਰਮ੍ਮੇ, ਵਸਿਂ ਸਂਸਗ੍ਗਪੀਲ਼ਿਤੋ.

੯. ‘‘ਸਕ੍ਕਾਯਵੂਪਕਾਸੋ ਮੇ, ਹੇਤੁਭੂਤੋ ਮਮਾਭਵੀ [ਮਮਾਗਮੀ (ਸ੍ਯਾ. ਪੀ.)];

ਮਨਸੋ ਵੂਪਕਾਸਸ੍ਸ, ਸਂਸਗ੍ਗਭਯਦਸ੍ਸਿਨੋ.

੧੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੧੧. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੧੨. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਵਿਹਾਰਿਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਏਕਵਿਹਾਰਿਕਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਏਕਸਙ੍ਖਿਯਤ੍ਥੇਰਅਪਦਾਨਂ

੧੩. ‘‘ਵਿਪਸ੍ਸਿਨੋ ਭਗਵਤੋ, ਮਹਾਬੋਧਿਮਹੋ ਅਹੁ;

ਮਹਾਜਨਾ ਸਮਾਗਮ੍ਮ, ਪੂਜੇਨ੍ਤਿ ਬੋਧਿਮੁਤ੍ਤਮਂ.

੧੪. ‘‘ਨ ਹਿ ਤਂ ਓਰਕਂ ਮਞ੍ਞੇ, ਬੁਦ੍ਧਸੇਟ੍ਠੋ ਭਵਿਸ੍ਸਤਿ;

ਯਸ੍ਸਾਯਂ ਈਦਿਸਾ ਬੋਧਿ, ਪੂਜਨੀਯਾ [ਈਦਿਸੋ ਬੋਧਿ, ਪੂਜਨੀਯੋ (ਸ੍ਯਾ.)] ਚ ਸਤ੍ਥੁਨੋ.

੧੫. ‘‘ਤਤੋ ਸਙ੍ਖਂ ਗਹੇਤ੍ਵਾਨ, ਬੋਧਿਰੁਕ੍ਖਮੁਪਟ੍ਠਹਿਂ;

ਧਮਨ੍ਤੋ ਸਬ੍ਬਦਿਵਸਂ, ਅਵਨ੍ਦਿਂ ਬੋਧਿਮੁਤ੍ਤਮਂ.

੧੬. ‘‘ਆਸਨ੍ਨਕੇ ਕਤਂ ਕਮ੍ਮਂ, ਦੇਵਲੋਕਂ ਅਪਾਪਯੀ;

ਕਲ਼ੇਵਰਂ ਮੇ ਪਤਿਤਂ, ਦੇਵਲੋਕੇ ਰਮਾਮਹਂ.

੧੭. ‘‘ਸਟ੍ਠਿਤੁਰਿਯਸਹਸ੍ਸਾਨਿ, ਤੁਟ੍ਠਹਟ੍ਠਾ ਪਮੋਦਿਤਾ;

ਸਦਾ ਮਯ੍ਹਂ ਉਪਟ੍ਠਨ੍ਤਿ, ਬੁਦ੍ਧਪੂਜਾਯਿਦਂ ਫਲਂ.

੧੮. ‘‘ਏਕਸਤ੍ਤਤਿਮੇ ਕਪ੍ਪੇ, ਰਾਜਾ ਆਸਿਂ ਸੁਦਸ੍ਸਨੋ;

ਚਾਤੁਰਨ੍ਤੋ ਵਿਜਿਤਾਵੀ, ਜਮ੍ਬੁਮਣ੍ਡਸ੍ਸ ਇਸ੍ਸਰੋ.

੧੯. ‘‘ਤਤੋ ਅਙ੍ਗਸਤਾ ਤੁਰਿਯਾ [ਤੂਰਾ (ਸੀ. ਕ.)], ਪਰਿਵਾਰੇਨ੍ਤਿ ਮਂ ਸਦਾ;

ਅਨੁਭੋਮਿ ਸਕਂ ਕਮ੍ਮਂ, ਉਪਟ੍ਠਾਨਸ੍ਸਿਦਂ ਫਲਂ.

੨੦. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਮਾਤੁਕੁਚ੍ਛਿਗਤਸ੍ਸਾਪਿ, ਵਜ੍ਜਰੇ ਭੇਰਿਯੋ ਸਦਾ.

੨੧. ‘‘ਉਪਟ੍ਠਿਤ੍ਵਾਨ ਸਮ੍ਬੁਦ੍ਧਂ, ਅਨੁਭੁਤ੍ਵਾਨ ਸਮ੍ਪਦਾ;

ਸਿਵਂ ਸੁਖੇਮਂ ਅਮਤਂ, ਪਤ੍ਤੋਮ੍ਹਿ ਅਚਲਂ ਪਦਂ.

੨੨. ‘‘ਏਕਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਸਙ੍ਖਿਯੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਏਕਸਙ੍ਖਿਯਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਪਾਟਿਹੀਰਸਞ੍ਞਕਤ੍ਥੇਰਅਪਦਾਨਂ

੨੬. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਆਹੁਤੀਨਂ ਪਟਿਗ੍ਗਹੋ;

ਵਸੀਸਤਸਹਸ੍ਸੇਹਿ, ਨਗਰਂ ਪਾਵਿਸੀ ਤਦਾ.

੨੭. ‘‘ਨਗਰਂ ਪਵਿਸਨ੍ਤਸ੍ਸ, ਉਪਸਨ੍ਤਸ੍ਸ ਤਾਦਿਨੋ;

ਰਤਨਾਨਿ ਪਜ੍ਜੋਤਿਂਸੁ [ਪਨਾਦਿਂਸੁ (ਪੀ.)], ਨਿਗ੍ਘੋਸੋ ਆਸਿ ਤਾਵਦੇ.

੨੮. ‘‘ਬੁਦ੍ਧਸ੍ਸ ਆਨੁਭਾਵੇਨ, ਭੇਰੀ ਵਜ੍ਜੁਮਘਟ੍ਟਿਤਾ;

ਸਯਂ ਵੀਣਾ ਪਵਜ੍ਜਨ੍ਤਿ, ਬੁਦ੍ਧਸ੍ਸ ਪਵਿਸਤੋ ਪੁਰਂ.

੨੯. ‘‘ਬੁਦ੍ਧਸੇਟ੍ਠਂ ਨਮਸ੍ਸਾਮਿ [ਨ ਪਸ੍ਸਾਮਿ (ਸੀ.)], ਪਦੁਮੁਤ੍ਤਰਮਹਾਮੁਨਿਂ;

ਪਾਟਿਹੀਰਞ੍ਚ ਪਸ੍ਸਿਤ੍ਵਾ, ਤਤ੍ਥ ਚਿਤ੍ਤਂ ਪਸਾਦਯਿਂ.

੩੦. ‘‘ਅਹੋ ਬੁਦ੍ਧੋ ਅਹੋ ਧਮ੍ਮੋ, ਅਹੋ ਨੋ ਸਤ੍ਥੁਸਮ੍ਪਦਾ;

ਅਚੇਤਨਾਪਿ ਤੁਰਿਯਾ, ਸਯਮੇਵ ਪਵਜ੍ਜਰੇ.

੩੧. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਸਞ੍ਞਾਯਿਦਂ ਫਲਂ.

੩੨. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੩੩. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਾਟਿਹੀਰਸਞ੍ਞਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਪਾਟਿਹੀਰਸਞ੍ਞਕਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਞਾਣਤ੍ਥਵਿਕਤ੍ਥੇਰਅਪਦਾਨਂ

੩੫. ‘‘ਕਣਿਕਾਰਂਵ ਜਲਿਤਂ, ਦੀਪਰੁਕ੍ਖਂਵ ਜੋਤਿਤਂ;

ਕਞ੍ਚਨਂਵ ਵਿਰੋਚਨ੍ਤਂ, ਅਦ੍ਦਸਂ ਦ੍ਵਿਪਦੁਤ੍ਤਮਂ.

੩੬. ‘‘ਕਮਣ੍ਡਲੁਂ ਠਪੇਤ੍ਵਾਨ, ਵਾਕਚੀਰਞ੍ਚ ਕੁਣ੍ਡਿਕਂ;

ਏਕਂਸਂ ਅਜਿਨਂ ਕਤ੍ਵਾ, ਬੁਦ੍ਧਸੇਟ੍ਠਂ ਥਵਿਂ ਅਹਂ.

੩੭. ‘‘‘ਤਮਨ੍ਧਕਾਰਂ ਵਿਧਮਂ, ਮੋਹਜਾਲਸਮਾਕੁਲਂ;

ਞਾਣਾਲੋਕਂ ਦਸ੍ਸੇਤ੍ਵਾਨ, ਨਿਤ੍ਤਿਣ੍ਣੋਸਿ ਮਹਾਮੁਨਿ.

੩੮. ‘‘‘ਸਮੁਦ੍ਧਰਸਿਮਂ ਲੋਕਂ, ਸਬ੍ਬਾਵਨ੍ਤਮਨੁਤ੍ਤਰਂ;

ਞਾਣੇ ਤੇ ਉਪਮਾ ਨਤ੍ਥਿ, ਯਾਵਤਾਜਗਤੋਗਤਿ [ਯਾਵਤਾ ਚ ਗਤੋਗਤਿ (ਪੀ. ਕ.)].

੩੯. ‘‘‘ਤੇਨ ਞਾਣੇਨ ਸਬ੍ਬਞ੍ਞੂ, ਇਤਿ ਬੁਦ੍ਧੋ ਪਵੁਚ੍ਚਤਿ;

ਵਨ੍ਦਾਮਿ ਤਂ ਮਹਾਵੀਰਂ, ਸਬ੍ਬਞ੍ਞੁਤਮਨਾਵਰਂ’.

੪੦. ‘‘ਸਤਸਹਸ੍ਸਿਤੋ ਕਪ੍ਪੇ, ਬੁਦ੍ਧਸੇਟ੍ਠਂ ਥਵਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਞਾਣਤ੍ਥਵਾਯਿਦਂ ਫਲਂ;

੪੧. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ;

੪੨. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਞਾਣਤ੍ਥਵਿਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਞਾਣਤ੍ਥਵਿਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਉਚ੍ਛੁਖਣ੍ਡਿਕਤ੍ਥੇਰਅਪਦਾਨਂ

੪੪. ‘‘ਨਗਰੇ ਬਨ੍ਧੁਮਤਿਯਾ, ਦ੍ਵਾਰਪਾਲੋ ਅਹੋਸਹਂ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਸਬ੍ਬਧਮ੍ਮਾਨ ਪਾਰਗੁਂ.

੪੫. ‘‘ਉਚ੍ਛੁਖਣ੍ਡਿਕਮਾਦਾਯ, ਬੁਦ੍ਧਸੇਟ੍ਠਸ੍ਸਦਾਸਹਂ;

ਪਸਨ੍ਨਚਿਤ੍ਤੋ ਸੁਮਨੋ, ਵਿਪਸ੍ਸਿਸ੍ਸ ਮਹੇਸਿਨੋ.

੪੬. ‘‘ਏਕਨਵੁਤਿਤੋ ਕਪ੍ਪੇ, ਯਂ ਉਚ੍ਛੁਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਉਚ੍ਛੁਖਣ੍ਡਸ੍ਸਿਦਂ ਫਲਂ.

੪੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੪੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਚ੍ਛੁਖਣ੍ਡਿਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਉਚ੍ਛੁਖਣ੍ਡਿਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਕਲ਼ਮ੍ਬਦਾਯਕਤ੍ਥੇਰਅਪਦਾਨਂ

੫੦. ‘‘ਰੋਮਸੋ ਨਾਮ ਸਮ੍ਬੁਦ੍ਧੋ, ਵਸਤੇ ਪਬ੍ਬਤਨ੍ਤਰੇ;

ਕਲ਼ਮ੍ਬਂ ਤਸ੍ਸ ਪਾਦਾਸਿਂ, ਪਸਨ੍ਨੋ ਸੇਹਿ ਪਾਣਿਭਿ.

੫੧. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਕਲ਼ਮ੍ਬਸ੍ਸ ਇਦਂ ਫਲਂ.

੫੨. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੫੩. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੫੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕਲ਼ਮ੍ਬਦਾਯਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਕਲ਼ਮ੍ਬਦਾਯਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਅਮ੍ਬਾਟਕਦਾਯਕਤ੍ਥੇਰਅਪਦਾਨਂ

੫੫. ‘‘ਵਿਪਿਨੇ ਬੁਦ੍ਧਂ ਦਿਸ੍ਵਾਨ, ਸਯਮ੍ਭੁਂ ਅਪਰਾਜਿਤਂ;

ਅਮ੍ਬਾਟਕਂ ਗਹੇਤ੍ਵਾਨ, ਸਯਮ੍ਭੁਸ੍ਸ ਅਦਾਸਹਂ.

੫੬. ‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਫਲਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੫੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੫੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੫੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਮ੍ਬਾਟਕਦਾਯਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਅਮ੍ਬਾਟਕਦਾਯਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਹਰੀਤਕਦਾਯਕਤ੍ਥੇਰਅਪਦਾਨਂ

੬੦. ‘‘ਹਰੀਤਕਂ ਆਮਲਕਂ, ਅਮ੍ਬਜਮ੍ਬੁਵਿਭੀਤਕਂ;

ਕੋਲਂ ਭਲ੍ਲਾਤਕਂ ਬਿਲ੍ਲਂ, ਸਯਮੇਵ ਹਰਾਮਹਂ.

੬੧. ‘‘ਦਿਸ੍ਵਾਨ ਪਬ੍ਭਾਰਗਤਂ, ਝਾਯਿਂ ਝਾਨਰਤਂ ਮੁਨਿਂ;

ਆਬਾਧੇਨ ਆਪੀਲ਼ੇਨ੍ਤਂ, ਅਦੁਤੀਯਂ ਮਹਾਮੁਨਿਂ.

੬੨. ‘‘ਹਰੀਤਕਂ ਗਹੇਤ੍ਵਾਨ, ਸਯਮ੍ਭੁਸ੍ਸ ਅਦਾਸਹਂ;

ਖਾਦਮਤ੍ਤਮ੍ਹਿ ਭੇਸਜ੍ਜੇ, ਬ੍ਯਾਧਿ ਪਸ੍ਸਮ੍ਭਿ [ਪਸ੍ਸਦ੍ਧਿ (ਕ.)] ਤਾਵਦੇ.

੬੩. ‘‘ਪਹੀਨਦਰਥੋ ਬੁਦ੍ਧੋ, ਅਨੁਮੋਦਮਕਾਸਿ ਮੇ;

‘ਭੇਸਜ੍ਜਦਾਨੇਨਿਮਿਨਾ, ਬ੍ਯਾਧਿਵੂਪਸਮੇਨ ਚ.

੬੪. ‘‘‘ਦੇਵਭੂਤੋ ਮਨੁਸ੍ਸੋ ਵਾ, ਜਾਤੋ ਵਾ ਅਞ੍ਞਜਾਤਿਯਾ;

ਸਬ੍ਬਤ੍ਥ ਸੁਖਿਤੋ ਹੋਤੁ, ਮਾ ਚ ਤੇ ਬ੍ਯਾਧਿਮਾਗਮਾ’.

੬੫. ‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਸਯਮ੍ਭੂ ਅਪਰਾਜਿਤੋ;

ਨਭਂ ਅਬ੍ਭੁਗ੍ਗਮੀ ਧੀਰੋ, ਹਂਸਰਾਜਾਵ ਅਮ੍ਬਰੇ.

੬੬. ‘‘ਯਤੋ ਹਰੀਤਕਂ ਦਿਨ੍ਨਂ, ਸਯਮ੍ਭੁਸ੍ਸ ਮਹੇਸਿਨੋ;

ਇਮਂ ਜਾਤਿਂ ਉਪਾਦਾਯ, ਬ੍ਯਾਧਿ ਮੇ ਨੁਪਪਜ੍ਜਥ.

੬੭. ‘‘ਅਯਂ ਪਚ੍ਛਿਮਕੋ ਮਯ੍ਹਂ, ਚਰਿਮੋ ਵਤ੍ਤਤੇ ਭਵੋ;

ਤਿਸ੍ਸੋ ਵਿਜ੍ਜਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੬੮. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਭੇਸਜ੍ਜਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਭੇਸਜ੍ਜਸ੍ਸ ਇਦਂ ਫਲਂ.

੬੯. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੭੦. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.