੪੫. ਵਿਭੀਤਕਵਗ੍ਗੋ

੧. ਵਿਭੀਤਕਮਿਞ੍ਜਿਯਤ੍ਥੇਰਅਪਦਾਨਂ

੧. ‘‘ਕਕੁਸਨ੍ਧੋ ਮਹਾਵੀਰੋ, ਸਬ੍ਬਧਮ੍ਮਾਨ ਪਾਰਗੂ;

ਗਣਮ੍ਹਾ ਵੂਪਕਟ੍ਠੋ ਸੋ, ਅਗਮਾਸਿ ਵਨਨ੍ਤਰਂ.

੨. ‘‘ਬੀਜਮਿਞ੍ਜਂ ਗਹੇਤ੍ਵਾਨ, ਲਤਾਯ ਆਵੁਣਿਂ ਅਹਂ;

ਭਗਵਾ ਤਮ੍ਹਿ ਸਮਯੇ, ਝਾਯਤੇ ਪਬ੍ਬਤਨ੍ਤਰੇ.

੩. ‘‘ਦਿਸ੍ਵਾਨਹਂ ਦੇਵਦੇਵਂ, ਵਿਪ੍ਪਸਨ੍ਨੇਨ ਚੇਤਸਾ;

ਦਕ੍ਖਿਣੇਯ੍ਯਸ੍ਸ ਵੀਰਸ੍ਸ, ਬੀਜਮਿਞ੍ਜਮਦਾਸਹਂ.

੪. ‘‘ਇਮਸ੍ਮਿਂਯੇਵ ਕਪ੍ਪਮ੍ਹਿ, ਯਂ ਮਿਞ੍ਜਮਦਦਿਂ [ਫਲਮਦਦਿਂ (ਸੀ. ਪੀ.), ਬੀਜਮਦਦਿਂ (ਸ੍ਯਾ.)] ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੀਜਮਿਞ੍ਜਸ੍ਸਿਦਂ ਫਲਂ.

੫. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੬. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੭. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਵਿਭੀਤਕਮਿਞ੍ਜਿਯੋ [ਵਿਭੇਦਕ… (ਸ੍ਯਾ. ਕ.)] ਥੇਰੋ ਇਮਾ

ਗਾਥਾਯੋ ਅਭਾਸਿਤ੍ਥਾਤਿ.

ਵਿਭੀਤਕਮਿਞ੍ਜਿਯਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਕੋਲਦਾਯਕਤ੍ਥੇਰਅਪਦਾਨਂ

੮. ‘‘ਅਜਿਨੇਨ ਨਿਵਤ੍ਥੋਹਂ, ਵਾਕਚੀਰਧਰੋ ਤਦਾ;

ਖਾਰਿਯਾ ਪੂਰਯਿਤ੍ਵਾਨ, ਕੋਲਂਹਾਸਿਂ ਮਮਸ੍ਸਮਂ [ਖਾਰਿਭਾਰਂ ਹਰਿਤ੍ਵਾਨ, ਕੋਲਮਾਹਰਿਮਸ੍ਸਮਂ (ਸੀ. ਪੀ.)].

੯. ‘‘ਤਮ੍ਹਿ ਕਾਲੇ ਸਿਖੀ ਬੁਦ੍ਧੋ, ਏਕੋ ਅਦੁਤਿਯੋ ਅਹੁ;

ਮਮਸ੍ਸਮਂ ਉਪਾਗਚ੍ਛਿ, ਜਾਨਨ੍ਤੋ ਸਬ੍ਬਕਾਲਿਕਂ.

੧੦. ‘‘ਸਕਂ ਚਿਤ੍ਤਂ ਪਸਾਦੇਤ੍ਵਾ, ਵਨ੍ਦਿਤ੍ਵਾਨ ਚ ਸੁਬ੍ਬਤਂ;

ਉਭੋ ਹਤ੍ਥੇਹਿ ਪਗ੍ਗਯ੍ਹ, ਕੋਲਂ ਬੁਦ੍ਧਸ੍ਸਦਾਸਹਂ.

੧੧. ‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਫਲਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਕੋਲਦਾਨਸ੍ਸਿਦਂ ਫਲਂ.

੧੨. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੩. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕੋਲਦਾਯਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਕੋਲਦਾਯਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਬਿਲ੍ਲਿਯਤ੍ਥੇਰਅਪਦਾਨਂ

੧੫. ‘‘ਚਨ੍ਦਭਾਗਾਨਦੀਤੀਰੇ, ਅਸ੍ਸਮੋ ਸੁਕਤੋ ਮਮ;

ਬਿਲ੍ਲਰੁਕ੍ਖੇਹਿ [ਬੇਲੁਵਰੁਕ੍ਖੇਹਿ (ਸ੍ਯਾ.)] ਆਕਿਣ੍ਣੋ, ਨਾਨਾਦੁਮਨਿਸੇਵਿਤੋ.

੧੬. ‘‘ਸੁਗਨ੍ਧਂ ਬੇਲੁਵਂ ਦਿਸ੍ਵਾ, ਬੁਦ੍ਧਸੇਟ੍ਠਮਨੁਸ੍ਸਰਿਂ;

ਖਾਰਿਭਾਰਂ ਪੂਰਯਿਤ੍ਵਾ, ਤੁਟ੍ਠੋ ਸਂਵਿਗ੍ਗਮਾਨਸੋ.

੧੭. ‘‘ਕਕੁਸਨ੍ਧਂ ਉਪਾਗਮ੍ਮ, ਬਿਲ੍ਲਪਕ੍ਕਮਦਾਸਹਂ;

ਪੁਞ੍ਞਕ੍ਖੇਤ੍ਤਸ੍ਸ ਵੀਰਸ੍ਸ, ਵਿਪ੍ਪਸਨ੍ਨੇਨ ਚੇਤਸਾ.

੧੮. ‘‘ਇਮਸ੍ਮਿਂਯੇਵ ਕਪ੍ਪਸ੍ਮਿਂ, ਯਂ ਫਲਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੧੯. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੦. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਬਿਲ੍ਲਿਯੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਬਿਲ੍ਲਿਯਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਭਲ੍ਲਾਤਦਾਯਕਤ੍ਥੇਰਅਪਦਾਨਂ

੨੨. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਦ੍ਵਤ੍ਤਿਂਸਵਰਲਕ੍ਖਣਂ;

ਵਿਪਿਨਗ੍ਗੇਨ [ਪਵਨਗ੍ਗੇਨ (ਸੀ. ਸ੍ਯਾ. ਪੀ.)] ਗਚ੍ਛਨ੍ਤਂ, ਸਾਲਰਾਜਂਵ ਫੁਲ੍ਲਿਤਂ.

੨੩. ‘‘ਤਿਣਤ੍ਥਰਂ ਪਞ੍ਞਾਪੇਤ੍ਵਾ, ਬੁਦ੍ਧਸੇਟ੍ਠਂ ਅਯਾਚਹਂ;

‘ਅਨੁਕਮ੍ਪਤੁ ਮਂ ਬੁਦ੍ਧੋ, ਭਿਕ੍ਖਂ ਇਚ੍ਛਾਮਿ ਦਾਤਵੇ’.

੨੪. ‘‘ਅਨੁਕਮ੍ਪਕੋ ਕਾਰੁਣਿਕੋ, ਅਤ੍ਥਦਸ੍ਸੀ ਮਹਾਯਸੋ;

ਮਮ ਸਙ੍ਕਪ੍ਪਮਞ੍ਞਾਯ, ਓਰੂਹਿ ਮਮ ਅਸ੍ਸਮੇ.

੨੫. ‘‘ਓਰੋਹਿਤ੍ਵਾਨ ਸਮ੍ਬੁਦ੍ਧੋ, ਨਿਸੀਦਿ ਪਣ੍ਣਸਨ੍ਥਰੇ;

ਭਲ੍ਲਾਤਕਂ ਗਹੇਤ੍ਵਾਨ, ਬੁਦ੍ਧਸੇਟ੍ਠਸ੍ਸਦਾਸਹਂ.

੨੬. ‘‘ਮਮ ਨਿਜ੍ਝਾਯਮਾਨਸ੍ਸ, ਪਰਿਭੁਞ੍ਜਿ ਤਦਾ ਜਿਨੋ;

ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਅਭਿਵਨ੍ਦਿਂ ਤਦਾ ਜਿਨਂ.

੨੭. ‘‘ਅਟ੍ਠਾਰਸੇ ਕਪ੍ਪਸਤੇ, ਯਂ ਫਲਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੨੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਭਲ੍ਲਾਤਦਾਯਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਭਲ੍ਲਾਤਦਾਯਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਉਤ੍ਤਲਿਪੁਪ੍ਫਿਯਤ੍ਥੇਰਅਪਦਾਨਂ

੩੧. ‘‘ਨਿਗ੍ਰੋਧੇ ਹਰਿਤੋਭਾਸੇ, ਸਂਵਿਰੁਲ਼੍ਹਮ੍ਹਿ ਪਾਦਪੇ;

ਉਤ੍ਤਲਿਮਾਲਂ [ਉਮ੍ਮਾ ਮਾਲਂ ਹਿ (ਸ੍ਯਾ.)] ਪਗ੍ਗਯ੍ਹ, ਬੋਧਿਯਾ ਅਭਿਰੋਪਯਿਂ.

੩੨. ‘‘ਇਮਸ੍ਮਿਂਯੇਵ ਕਪ੍ਪਮ੍ਹਿ, ਯਂ ਬੋਧਿਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੋਧਿਪੂਜਾਯਿਦਂ ਫਲਂ.

੩੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੩੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਤ੍ਤਲਿਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਉਤ੍ਤਲਿਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਅਮ੍ਬਾਟਕਿਯਤ੍ਥੇਰਅਪਦਾਨਂ

੩੬. ‘‘ਸੁਪੁਪ੍ਫਿਤਂ ਸਾਲਵਨਂ, ਓਗਯ੍ਹ ਵੇਸ੍ਸਭੂ ਮੁਨਿ;

ਨਿਸੀਦਿ ਗਿਰਿਦੁਗ੍ਗੇਸੁ, ਅਭਿਜਾਤੋਵ ਕੇਸਰੀ.

੩੭. ‘‘ਪਸਨ੍ਨਚਿਤ੍ਤੋ ਸੁਮਨੋ, ਅਮ੍ਬਾਟਕਮਪੂਜਯਿਂ;

ਪੁਞ੍ਞਕ੍ਖੇਤ੍ਤਂ ਅਨੁਤ੍ਤਰਂ [ਮਹਾਵੀਰਂ (ਸੀ. ਸ੍ਯਾ.)], ਪਸਨ੍ਨੋ ਸੇਹਿ ਪਾਣਿਭਿ.

੩੮. ‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੩੯. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੪੦. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਮ੍ਬਾਟਕਿਯੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਅਮ੍ਬਾਟਕਿਯਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਸੀਹਾਸਨਿਕਤ੍ਥੇਰਅਪਦਾਨਂ

੪੨. ‘‘ਪਦੁਮੁਤ੍ਤਰਸ੍ਸ ਭਗਵਤੋ, ਸਬ੍ਬਭੂਤਹਿਤੇਸਿਨੋ;

ਪਸਨ੍ਨਚਿਤ੍ਤੋ ਸੁਮਨੋ, ਸੀਹਾਸਨਮਦਾਸਹਂ.

੪੩. ‘‘ਦੇਵਲੋਕੇ ਮਨੁਸ੍ਸੇ ਵਾ, ਯਤ੍ਥ ਯਤ੍ਥ ਵਸਾਮਹਂ;

ਲਭਾਮਿ ਵਿਪੁਲਂ ਬ੍ਯਮ੍ਹਂ, ਸੀਹਾਸਨਸ੍ਸਿਦਂ ਫਲਂ.

੪੪. ‘‘ਸੋਣ੍ਣਮਯਾ ਰੂਪਿਮਯਾ, ਲੋਹਿਤਙ੍ਗਮਯਾ [ਲੋਹਿਤਙ੍ਕਮਯਾ (ਸੀ. ਸ੍ਯਾ. ਪੀ.)] ਬਹੂ;

ਮਣਿਮਯਾ ਚ ਪਲ੍ਲਙ੍ਕਾ, ਨਿਬ੍ਬਤ੍ਤਨ੍ਤਿ ਮਮਂ ਸਦਾ.

੪੫. ‘‘ਬੋਧਿਯਾ ਆਸਨਂ ਕਤ੍ਵਾ, ਜਲਜੁਤ੍ਤਮਨਾਮਿਨੋ;

ਉਚ੍ਚੇ ਕੁਲੇ ਪਜਾਯਾਮਿ, ਅਹੋ ਧਮ੍ਮਸੁਧਮ੍ਮਤਾ.

੪੬. ‘‘ਸਤਸਹਸ੍ਸਿਤੋ ਕਪ੍ਪੇ, ਸੀਹਾਸਨਮਕਾਸਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਸੀਹਾਸਨਸ੍ਸਿਦਂ ਫਲਂ.

੪੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੪੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੀਹਾਸਨਿਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਸੀਹਾਸਨਿਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਪਾਦਪੀਠਿਯਤ੍ਥੇਰਅਪਦਾਨਂ

੫੦. ‘‘ਸੁਮੇਧੋ ਨਾਮ ਸਮ੍ਬੁਦ੍ਧੋ, ਅਗ੍ਗੋ ਕਾਰੁਣਿਕੋ ਮੁਨਿ;

ਤਾਰਯਿਤ੍ਵਾ ਬਹੂ ਸਤ੍ਤੇ, ਨਿਬ੍ਬੁਤੋ ਸੋ ਮਹਾਯਸੋ.

੫੧. ‘‘ਸੀਹਾਸਨਸ੍ਸ ਸਾਮਨ੍ਤਾ, ਸੁਮੇਧਸ੍ਸ ਮਹੇਸਿਨੋ;

ਪਸਨ੍ਨਚਿਤ੍ਤੋ ਸੁਮਨੋ, ਪਾਦਪੀਠਮਕਾਰਯਿਂ.

੫੨. ‘‘ਕਤ੍ਵਾਨ ਕੁਸਲਂ ਕਮ੍ਮਂ, ਸੁਖਪਾਕਂ ਸੁਖੁਦ੍ਰਯਂ;

ਪੁਞ੍ਞਕਮ੍ਮੇਨ ਸਂਯੁਤ੍ਤੋ, ਤਾਵਤਿਂਸਮਗਚ੍ਛਹਂ.

੫੩. ‘‘ਤਤ੍ਥ ਮੇ ਵਸਮਾਨਸ੍ਸ, ਪੁਞ੍ਞਕਮ੍ਮਸਮਙ੍ਗਿਨੋ;

ਪਦਾਨਿ ਉਦ੍ਧਰਨ੍ਤਸ੍ਸ, ਸੋਣ੍ਣਪੀਠਾ ਭਵਨ੍ਤਿ ਮੇ.

੫੪. ‘‘ਲਾਭਾ ਤੇਸਂ ਸੁਲਦ੍ਧਂ ਵੋ, ਯੇ ਲਭਨ੍ਤਿ ਉਪਸ੍ਸੁਤਿਂ;

ਨਿਬ੍ਬੁਤੇ ਕਾਰਂ ਕਤ੍ਵਾਨ, ਲਭਨ੍ਤਿ ਵਿਪੁਲਂ ਸੁਖਂ.

੫੫. ‘‘ਮਯਾਪਿ ਸੁਕਤਂ ਕਮ੍ਮਂ, ਵਾਣਿਜ੍ਜਂ ਸੁਪ੍ਪਯੋਜਿਤਂ;

ਪਾਦਪੀਠਂ ਕਰਿਤ੍ਵਾਨ, ਸੋਣ੍ਣਪੀਠਂ ਲਭਾਮਹਂ.

੫੬. ‘‘ਯਂ ਯਂ ਦਿਸਂ ਪਕ੍ਕਮਾਮਿ, ਕੇਨਚਿ ਕਿਚ੍ਚਯੇਨਹਂ [ਪਚ੍ਚਯੇਨਹਂ (ਸੀ. ਪੀ.)];

ਸੋਣ੍ਣਪੀਠੇ ਅਕ੍ਕਮਾਮਿ [ਸੋਣ੍ਣਪੀਠੇਨ ਕਮਾਮਿ (ਕ.)], ਪੁਞ੍ਞਕਮ੍ਮਸ੍ਸਿਦਂ ਫਲਂ.

੫੭. ‘‘ਤਿਂਸਕਪ੍ਪਸਹਸ੍ਸਮ੍ਹਿ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਾਦਪੀਠਸ੍ਸਿਦਂ ਫਲਂ.

੫੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੫੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੬੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਾਦਪੀਠਿਯੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਪਾਦਪੀਠਿਯਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਵੇਦਿਕਾਰਕਤ੍ਥੇਰਅਪਦਾਨਂ

੬੧. ‘‘ਪਦੁਮੁਤ੍ਤਰਸ੍ਸ ਭਗਵਤੋ, ਬੋਧਿਯਾ ਪਾਦਪੁਤ੍ਤਮੇ;

ਵੇਦਿਕਂ ਸੁਕਤਂ ਕਤ੍ਵਾ, ਸਕਂ ਚਿਤ੍ਤਂ ਪਸਾਦਯਿਂ.

੬੨. ‘‘ਅਤੋਲ਼ਾਰਾਨਿ [ਅਥੋਲ਼ਾਰਾਨਿ (ਸੀ. ਪੀ.), ਅਗ੍ਗੋਲ਼ਾਰਾਨਿ (ਸ੍ਯਾ.)] ਭਣ੍ਡਾਨਿ, ਕਤਾਨਿ ਅਕਤਾਨਿ ਚ;

ਅਨ੍ਤਲਿਕ੍ਖਾ ਪਵਸ੍ਸਨ੍ਤਿ, ਵੇਦਿਕਾਯ ਇਦਂ ਫਲਂ.

੬੩. ‘‘ਉਭਤੋ ਬ੍ਯੂਲ਼੍ਹਸਙ੍ਗਾਮੇ, ਪਕ੍ਖਨ੍ਦਨ੍ਤੋ ਭਯਾਨਕੇ;

ਭਯਭੇਰਵਂ ਨ ਪਸ੍ਸਾਮਿ, ਵੇਦਿਕਾਯ ਇਦਂ ਫਲਂ.

੬੪. ‘‘ਮਮ ਸਙ੍ਕਪ੍ਪਮਞ੍ਞਾਯ, ਬ੍ਯਮ੍ਹਂ ਨਿਬ੍ਬਤ੍ਤਤੇ ਸੁਭਂ;

ਸਯਨਾਨਿ ਮਹਗ੍ਘਾਨਿ, ਵੇਦਿਕਾਯ ਇਦਂ ਫਲਂ.

੬੫. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਵੇਦਿਕਮਕਾਰਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਵੇਦਿਕਾਯ ਇਦਂ ਫਲਂ.

੬੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੬੭. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੬੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਵੇਦਿਕਾਰਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਵੇਦਿਕਾਰਕਤ੍ਥੇਰਸ੍ਸਾਪਦਾਨਂ ਨਵਮਂ.

੧੦. ਬੋਧਿਘਰਦਾਯਕਤ੍ਥੇਰਅਪਦਾਨਂ