੪੩. ਸਕਿਂਸਮ੍ਮਜ੍ਜਕਵਗ੍ਗੋ

੧. ਸਕਿਂਸਮ੍ਮਜ੍ਜਕਤ੍ਥੇਰਅਪਦਾਨਂ

੧. ‘‘ਵਿਪਸ੍ਸਿਨੋ ਭਗਵਤੋ, ਪਾਟਲਿਂ ਬੋਧਿਮੁਤ੍ਤਮਂ;

ਦਿਸ੍ਵਾਵ ਤਂ ਪਾਦਪਗ੍ਗਂ, ਤਤ੍ਥ ਚਿਤ੍ਤਂ ਪਸਾਦਯਿਂ.

੨. ‘‘ਸਮ੍ਮਜ੍ਜਨਿਂ ਗਹੇਤ੍ਵਾਨ, ਬੋਧਿਂ ਸਮ੍ਮਜ੍ਜਿ ਤਾਵਦੇ;

ਸਮ੍ਮਜ੍ਜਿਤ੍ਵਾਨ ਤਂ ਬੋਧਿਂ, ਅਵਨ੍ਦਿਂ ਪਾਟਲਿਂ ਅਹਂ.

੩. ‘‘ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਸਿਰੇ ਕਤ੍ਵਾਨ ਅਞ੍ਜਲਿਂ;

ਨਮਸ੍ਸਮਾਨੋ ਤਂ ਬੋਧਿਂ, ਗਞ੍ਛਿਂ ਪਟਿਕੁਟਿਂ ਅਹਂ.

੪. ‘‘ਤਾਦਿਮਗ੍ਗੇਨ ਗਚ੍ਛਾਮਿ, ਸਰਨ੍ਤੋ ਬੋਧਿਮੁਤ੍ਤਮਂ;

ਅਜਗਰੋ ਮਂ ਪੀਲ਼ੇਸਿ, ਘੋਰਰੂਪੋ ਮਹਬ੍ਬਲੋ.

੫. ‘‘ਆਸਨ੍ਨੇ ਮੇ ਕਤਂ ਕਮ੍ਮਂ, ਫਲੇਨ ਤੋਸਯੀ ਮਮਂ;

ਕਲ਼ੇਵਰਂ ਮੇ ਗਿਲਤਿ, ਦੇਵਲੋਕੇ ਰਮਾਮਹਂ.

੬. ‘‘ਅਨਾਵਿਲਂ ਮਮ ਚਿਤ੍ਤਂ, ਵਿਸੁਦ੍ਧਂ ਪਣ੍ਡਰਂ ਸਦਾ;

ਸੋਕਸਲ੍ਲਂ ਨ ਜਾਨਾਮਿ, ਚਿਤ੍ਤਸਨ੍ਤਾਪਨਂ ਮਮ.

੭. ‘‘ਕੁਟ੍ਠਂ ਗਣ੍ਡੋ ਕਿਲਾਸੋ ਚ, ਅਪਮਾਰੋ ਵਿਤਚ੍ਛਿਕਾ;

ਦਦ੍ਦੁ ਕਣ੍ਡੁ ਚ ਮੇ ਨਤ੍ਥਿ, ਫਲਂ ਸਮ੍ਮਜ੍ਜਨਾਯਿਦਂ [ਸਮ੍ਮਜ੍ਜਨੇ ਇਦਂ (ਸੀ.)].

੮. ‘‘ਸੋਕੋ ਚ ਪਰਿਦੇਵੋ ਚ, ਹਦਯੇ ਮੇ ਨ ਵਿਜ੍ਜਤਿ;

ਅਭਨ੍ਤਂ ਉਜੁਕਂ ਚਿਤ੍ਤਂ, ਫਲਂ ਸਮ੍ਮਜ੍ਜਨਾਯਿਦਂ.

੯. ‘‘ਸਮਾਧੀਸੁ ਨ ਮਜ੍ਜਾਮਿ [ਸਮਾਧੀਸੁ ਨ ਸਜ੍ਜਾਮਿ (ਸੀ.), ਸਮਾਧਿਂ ਪੁਨ ਪਜ੍ਜਾਮਿ (ਸ੍ਯਾ)], ਵਿਸਦਂ ਹੋਤਿ ਮਾਨਸਂ;

ਯਂ ਯਂ ਸਮਾਧਿਮਿਚ੍ਛਾਮਿ, ਸੋ ਸੋ ਸਮ੍ਪਜ੍ਜਤੇ ਮਮਂ.

੧੦. ‘‘ਰਜਨੀਯੇ ਨ ਰਜ੍ਜਾਮਿ, ਅਥੋ ਦੁਸ੍ਸਨਿਯੇਸੁ [ਦੋਸਨਿਯੇਸੁ (ਸੀ. ਸ੍ਯਾ. ਕ.)] ਚ;

ਮੋਹਨੀਯੇ ਨ ਮੁਯ੍ਹਾਮਿ, ਫਲਂ ਸਮ੍ਮਜ੍ਜਨਾਯਿਦਂ.

੧੧. ‘‘ਏਕਨਵੁਤਿਤੋ [ਏਕਨਵੁਤੇ ਇਤੋ (ਸੀ. ਸ੍ਯਾ.)] ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਂ ਸਮ੍ਮਜ੍ਜਨਾਯਿਦਂ.

੧੨. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੧੩. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੧੪. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਕਿਂਸਮ੍ਮਜ੍ਜਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਸਕਿਂਸਮ੍ਮਜ੍ਜਕਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਏਕਦੁਸ੍ਸਦਾਯਕਤ੍ਥੇਰਅਪਦਾਨਂ

੧੫. ‘‘ਨਗਰੇ ਹਂਸਵਤਿਯਾ, ਅਹੋਸਿਂ ਤਿਣਹਾਰਕੋ;

ਤਿਣਹਾਰੇਨ ਜੀਵਾਮਿ, ਤੇਨ ਪੋਸੇਮਿ ਦਾਰਕੇ.

੧੬. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਤਮਨ੍ਧਕਾਰਂ ਨਾਸੇਤ੍ਵਾ, ਉਪ੍ਪਜ੍ਜਿ ਲੋਕਨਾਯਕੋ.

੧੭. ‘‘ਸਕੇ ਘਰੇ ਨਿਸੀਦਿਤ੍ਵਾ, ਏਵਂ ਚਿਨ੍ਤੇਸਿ ਤਾਵਦੇ;

‘ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਦੇਯ੍ਯਧਮ੍ਮੋ ਨ ਵਿਜ੍ਜਤਿ.

੧੮. ‘‘‘ਇਦਂ ਮੇ ਸਾਟਕਂ ਏਕਂ, ਨਤ੍ਥਿ ਮੇ ਕੋਚਿ ਦਾਯਕੋ;

ਦੁਕ੍ਖੋ ਨਿਰਯਸਮ੍ਫਸ੍ਸੋ, ਰੋਪਯਿਸ੍ਸਾਮਿ ਦਕ੍ਖਿਣਂ’.

੧੯. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਸਕਂ ਚਿਤ੍ਤਂ ਪਸਾਦਯਿਂ;

ਏਕਂ ਦੁਸ੍ਸਂ ਗਹੇਤ੍ਵਾਨ, ਬੁਦ੍ਧਸੇਟ੍ਠਸ੍ਸਦਾਸਹਂ.

੨੦. ‘‘ਏਕਂ ਦੁਸ੍ਸਂ ਦਦਿਤ੍ਵਾਨ, ਉਕ੍ਕੁਟ੍ਠਿਂ ਸਮ੍ਪਵਤ੍ਤਯਿਂ;

‘ਯਦਿ ਬੁਦ੍ਧੋ ਤੁਵਂ ਵੀਰ, ਤਾਰੇਹਿ ਮਂ ਮਹਾਮੁਨਿ’.

੨੧. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਮਮ ਦਾਨਂ ਪਕਿਤ੍ਤੇਨ੍ਤੋ, ਅਕਾ ਮੇ ਅਨੁਮੋਦਨਂ.

੨੨. ‘‘‘ਇਮਿਨਾ ਏਕਦੁਸ੍ਸੇਨ, ਚੇਤਨਾਪਣਿਧੀਹਿ ਚ;

ਕਪ੍ਪਸਤਸਹਸ੍ਸਾਨਿ, ਵਿਨਿਪਾਤਂ ਨ ਗਚ੍ਛਸਿ.

੨੩. ‘‘‘ਛਤ੍ਤਿਂਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਸਿ;

ਤੇਤ੍ਤਿਂਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ [ਚਕ੍ਕਵਤ੍ਤਿ (ਸ੍ਯਾ.)] ਭਵਿਸ੍ਸਸਿ.

੨੪. ‘‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ [ਅਸਙ੍ਕਯਂ (ਸ੍ਯਾ. ਕ.) ਏਵਮੁਪਰਿਪਿ];

ਦੇਵਲੋਕੇ ਮਨੁਸ੍ਸੇ ਵਾ, ਸਂਸਰਨ੍ਤੋ ਤੁਵਂ ਭਵੇ.

੨੫. ‘‘‘ਰੂਪਵਾ ਗੁਣਸਮ੍ਪਨ੍ਨੋ, ਅਨਵਕ੍ਕਨ੍ਤਦੇਹਵਾ [ਅਨੁਵਤ੍ਤਨ੍ਤ… (ਸ੍ਯਾ)];

ਅਕ੍ਖੋਭਂ ਅਮਿਤਂ ਦੁਸ੍ਸਂ, ਲਭਿਸ੍ਸਸਿ ਯਦਿਚ੍ਛਕਂ’.

੨੬. ‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਜਲਜੁਤ੍ਤਮਨਾਮਕੋ;

ਨਭਂ ਅਬ੍ਭੁਗ੍ਗਮੀ ਵੀਰੋ [ਧੀਰੋ (ਸੀ. ਸ੍ਯਾ.)], ਹਂਸਰਾਜਾਵ ਅਮ੍ਬਰੇ.

੨੭. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਭੋਗੇ ਮੇ ਊਨਤਾ ਨਤ੍ਥਿ, ਏਕਦੁਸ੍ਸਸ੍ਸਿਦਂ ਫਲਂ.

੨੮. ‘‘ਪਦੁਦ੍ਧਾਰੇ ਪਦੁਦ੍ਧਾਰੇ, ਦੁਸ੍ਸਂ ਨਿਬ੍ਬਤ੍ਤਤੇ ਮਮਂ;

ਹੇਟ੍ਠਾ ਦੁਸ੍ਸਮ੍ਹਿ ਤਿਟ੍ਠਾਮਿ, ਉਪਰਿਚ੍ਛਦਨਂ ਮਮ.

੨੯. ‘‘ਚਕ੍ਕਵਾਲ਼ਂ ਉਪਾਦਾਯ, ਸਕਾਨਨਂ ਸਪਬ੍ਬਤਂ;

ਇਚ੍ਛਮਾਨੋ ਚਹਂ ਅਜ੍ਜ, ਦੁਸ੍ਸੇਹਚ੍ਛਾਦਯੇਯ੍ਯ ਤਂ.

੩੦. ‘‘ਤੇਨੇਵ ਏਕਦੁਸ੍ਸੇਨ, ਸਂਸਰਨ੍ਤੋ ਭਵਾਭਵੇ;

ਸੁਵਣ੍ਣਵਣ੍ਣੋ ਹੁਤ੍ਵਾਨ, ਸਂਸਰਾਮਿ ਭਵਾਭਵੇ.

੩੧. ‘‘ਵਿਪਾਕਂ ਵਿਏਕਦੁਸ੍ਸਸ੍ਸ, ਨਾਜ੍ਝਗਂ ਕਤ੍ਥਚਿਕ੍ਖਯਂ;

ਅਯਂ ਮੇ ਅਨ੍ਤਿਮਾ ਜਾਤਿ, ਵਿਪਚ੍ਚਤਿ ਇਧਾਪਿ ਮੇ.

੩੨. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਦੁਸ੍ਸਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਏਕਦੁਸ੍ਸਸ੍ਸਿਦਂ ਫਲਂ.

੩੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੩੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਦੁਸ੍ਸਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;

ਏਕਦੁਸ੍ਸਦਾਯਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਏਕਾਸਨਦਾਯਕਤ੍ਥੇਰਅਪਦਾਨਂ

੩੬. ‘‘ਹਿਮਵਨ੍ਤਸ੍ਸਾਵਿਦੂਰੇ, ਗੋਸਿਤੋ ਨਾਮ ਪਬ੍ਬਤੋ;

ਅਸ੍ਸਮੋ ਸੁਕਤੋ ਮਯ੍ਹਂ, ਪਣ੍ਣਸਾਲਾ ਸੁਮਾਪਿਤਾ.

੩੭. ‘‘ਨਾਰਦੋ ਨਾਮ ਨਾਮੇਨ, ਕਸ੍ਸਪੋ ਇਤਿ ਮਂ ਵਿਦੂ;

ਸੁਦ੍ਧਿਮਗ੍ਗਂ ਗਵੇਸਨ੍ਤੋ, ਵਸਾਮਿ ਗੋਸਿਤੇ ਤਦਾ.

੩੮. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਵਿਵੇਕਕਾਮੋ ਸਮ੍ਬੁਦ੍ਧੋ, ਅਗਞ੍ਛਿ ਅਨਿਲਞ੍ਜਸਾ.

੩੯. ‘‘ਵਨਗ੍ਗੇ ਗਚ੍ਛਮਾਨਸ੍ਸ, ਦਿਸ੍ਵਾ ਰਂਸਿਂ ਮਹੇਸਿਨੋ;

ਕਟ੍ਠਮਞ੍ਚਂ ਪਞ੍ਞਾਪੇਤ੍ਵਾ, ਅਜਿਨਞ੍ਚ ਅਪਤ੍ਥਰਿਂ.

੪੦. ‘‘ਆਸਨਂ ਪਞ੍ਞਾਪੇਤ੍ਵਾਨ, ਸਿਰੇ ਕਤ੍ਵਾਨ ਅਞ੍ਜਲਿਂ;

ਸੋਮਨਸ੍ਸਂ ਪਵੇਦਿਤ੍ਵਾ, ਇਦਂ ਵਚਨਮਬ੍ਰਵਿਂ.

੪੧. ‘‘‘ਸਲ੍ਲਕਤ੍ਤੋ ਮਹਾਵੀਰ, ਆਤੁਰਾਨਂ ਤਿਕਿਚ੍ਛਕੋ;

ਮਮਂ ਰੋਗਪਰੇਤਸ੍ਸ [ਰਾਗ… (ਸ੍ਯਾ.)], ਤਿਕਿਚ੍ਛਂ ਦੇਹਿ ਨਾਯਕ.

੪੨. ‘‘‘ਕਲ੍ਲਤ੍ਥਿਕਾ ਯੇ ਪਸ੍ਸਨ੍ਤਿ, ਬੁਦ੍ਧਸੇਟ੍ਠ ਤੁਵਂ ਮੁਨੇ;

ਧੁਵਤ੍ਥਸਿਦ੍ਧਿਂ ਪਪ੍ਪੋਨ੍ਤਿ, ਏਤੇਸਂ ਅਜਰੋ [ਜਜ੍ਜਰੋ (ਸੀ. ਪੀ. ਕ.)] ਭਵੇ.

੪੩. ‘‘‘ਨ ਮੇ ਦੇਯ੍ਯਧਮ੍ਮੋ ਅਤ੍ਥਿ, ਪਵਤ੍ਤਫਲਭੋਜਿਹਂ;

ਇਦਂ ਮੇ ਆਸਨਂ ਅਤ੍ਥਿ [ਨ ਮੇ ਦੇਯ੍ਯਂ ਤਵ ਅਤ੍ਥਿ (ਸੀ. ਸ੍ਯਾ.)], ਨਿਸੀਦ ਕਟ੍ਠਮਞ੍ਚਕੇ’.

੪੪. ‘‘ਨਿਸੀਦਿ ਤਤ੍ਥ ਭਗਵਾ, ਅਸਮ੍ਭੀਤੋਵ [ਅਚ੍ਛਮ੍ਭਿਤੋਵ (ਸ੍ਯਾ. ਕ.)] ਕੇਸਰੀ;

ਮੁਹੁਤ੍ਤਂ ਵੀਤਿਨਾਮੇਤ੍ਵਾ, ਇਦਂ ਵਚਨਮਬ੍ਰਵਿ.

੪੫. ‘‘‘ਵਿਸਟ੍ਠੋ [ਵਿਸ੍ਸਤ੍ਥੋ (ਸੀ. ਪੀ), ਵਿਸ੍ਸਟ੍ਠੋ (ਸ੍ਯਾ. ਕ.)] ਹੋਹਿ ਮਾ ਭਾਯਿ, ਲਦ੍ਧੋ ਜੋਤਿਰਸੋ ਤਯਾ;

ਯਂ ਤੁਯ੍ਹਂ ਪਤ੍ਥਿਤਂ ਸਬ੍ਬਂ, ਪਰਿਪੂਰਿਸ੍ਸਤਿਨਾਗਤੇ [ਪਰਿਪੂਰਿਸ੍ਸਤਾਸਨਂ (ਸ੍ਯਾ. ਕ.)].

੪੬. ‘‘‘ਨ ਮੋਘਂ ਤਂ ਕਤਂ ਤੁਯ੍ਹਂ, ਪੁਞ੍ਞਕ੍ਖੇਤ੍ਤੇ ਅਨੁਤ੍ਤਰੇ;

ਸਕ੍ਕਾ ਉਦ੍ਧਰਿਤੁਂ ਅਤ੍ਤਾ, ਯਸ੍ਸ ਚਿਤ੍ਤਂ ਪਣੀਹਿਤਂ [ਸੁਨੀਹਿਤਂ (ਸ੍ਯਾ.)].

੪੭. ‘‘‘ਇਮਿਨਾਸਨਦਾਨੇਨ, ਚੇਤਨਾਪਣਿਧੀਹਿ ਚ;

ਕਪ੍ਪਸਤਸਹਸ੍ਸਾਨਿ, ਵਿਨਿਪਾਤਂ ਨ ਗਚ੍ਛਸਿ.

੪੮. ‘‘‘ਪਞ੍ਞਾਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਸਿ;

ਅਸੀਤਿਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਭਵਿਸ੍ਸਸਿ.

੪੯. ‘‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਸਬ੍ਬਤ੍ਥ ਸੁਖਿਤੋ ਹੁਤ੍ਵਾ, ਸਂਸਾਰੇ ਸਂਸਰਿਸ੍ਸਸਿ’.

੫੦. ‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਜਲਜੁਤ੍ਤਮਨਾਮਕੋ;

ਨਭਂ ਅਬ੍ਭੁਗ੍ਗਮੀ ਵੀਰੋ, ਹਂਸਰਾਜਾਵ ਅਮ੍ਬਰੇ.

੫੧. ‘‘ਹਤ੍ਥਿਯਾਨਂ ਅਸ੍ਸਯਾਨਂ, ਸਰਥਂ ਸਨ੍ਦਮਾਨਿਕਂ;

ਲਭਾਮਿ ਸਬ੍ਬਮੇਵੇਤਂ, ਏਕਾਸਨਸ੍ਸਿਦਂ ਫਲਂ.

੫੨. ‘‘ਕਾਨਨਂ ਪਵਿਸਿਤ੍ਵਾਪਿ, ਯਦਾ ਇਚ੍ਛਾਮਿ ਆਸਨਂ;

ਮਮ ਸਙ੍ਕਪ੍ਪਮਞ੍ਞਾਯ, ਪਲ੍ਲਙ੍ਕੋ ਉਪਤਿਟ੍ਠਤਿ.

੫੩. ‘‘ਵਾਰਿਮਜ੍ਝਗਤੋ ਸਨ੍ਤੋ, ਯਦਾ ਇਚ੍ਛਾਮਿ ਆਸਨਂ;

ਮਮ ਸਙ੍ਕਪ੍ਪਮਞ੍ਞਾਯ, ਪਲ੍ਲਙ੍ਕੋ ਉਪਤਿਟ੍ਠਤਿ.

੫੪. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਪਲ੍ਲਙ੍ਕਸਤਸਹਸ੍ਸਾਨਿ, ਪਰਿਵਾਰੇਨ੍ਤਿ ਮਂ ਸਦਾ.

੫੫. ‘‘ਦੁਵੇ ਭਵੇ ਸਂਸਰਾਮਿ, ਦੇਵਤ੍ਤੇ ਅਥ ਮਾਨੁਸੇ;

ਦੁਵੇ ਕੁਲੇ ਪਜਾਯਾਮਿ, ਖਤ੍ਤਿਯੇ ਅਥ ਬ੍ਰਾਹ੍ਮਣੇ.

੫੬. ‘‘ਏਕਾਸਨਂ ਦਦਿਤ੍ਵਾਨ, ਪੁਞ੍ਞਕ੍ਖੇਤ੍ਤੇ ਅਨੁਤ੍ਤਰੇ;

ਧਮ੍ਮਪਲ੍ਲਙ੍ਕਮਾਦਾਯ [ਧਮ੍ਮਪਲ੍ਲਙ੍ਕਮਞ੍ਞਾਯ (ਸ੍ਯਾ. ਕ.)], ਵਿਹਰਾਮਿ ਅਨਾਸਵੋ.

੫੭. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਏਕਾਸਨਸ੍ਸਿਦਂ ਫਲਂ.

੫੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੫੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੬੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਾਸਨਦਾਯਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਏਕਾਸਨਦਾਯਕਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਸਤ੍ਤਕਦਮ੍ਬਪੁਪ੍ਫਿਯਤ੍ਥੇਰਅਪਦਾਨਂ

੬੧. ‘‘ਹਿਮਵਨ੍ਤਸ੍ਸਾਵਿਦੂਰੇ, ਕੁਕ੍ਕੁਟੋ [ਕਦਮ੍ਬੋ (ਸੀ. ਸ੍ਯਾ. ਪੀ.)] ਨਾਮ ਪਬ੍ਬਤੋ;

ਤਮ੍ਹਿ ਪਬ੍ਬਤਪਾਦਮ੍ਹਿ, ਸਤ੍ਤ ਬੁਦ੍ਧਾ ਵਸਿਂਸੁ ਤੇ.

੬੨. ‘‘ਕਦਮ੍ਬਂ ਪੁਪ੍ਫਿਤਂ ਦਿਸ੍ਵਾ, ਪਗ੍ਗਹੇਤ੍ਵਾਨ ਅਞ੍ਜਲਿਂ;

ਸਤ੍ਤ ਮਾਲਾ ਗਹੇਤ੍ਵਾਨ, ਪੁਞ੍ਞਚਿਤ੍ਤੇਨ [ਪੁਣ੍ਣਚਿਤ੍ਤੇਨ (ਕ.)] ਓਕਿਰਿਂ.

੬੩. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੬੪. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੬੫. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੬੬. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੬੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਤ੍ਤਕਦਮ੍ਬਪੁਪ੍ਫਿਯੋ ਥੇਰੋ ਇਮਾ

ਗਾਥਾਯੋ ਅਭਾਸਿਤ੍ਥਾਤਿ.

ਸਤ੍ਤਕਦਮ੍ਬਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਕੋਰਣ੍ਡਪੁਪ੍ਫਿਯਤ੍ਥੇਰਅਪਦਾਨਂ

੬੮. ‘‘ਵਨਕਮ੍ਮਿਕੋ ਪੁਰੇ ਆਸਿਂ, ਪਿਤੁਮਾਤੁਮਤੇਨਹਂ [ਪਿਤੁਪਿਤਾਮਹੇਨਹਂ (ਸੀ. ਸ੍ਯਾ. ਪੀ.)];

ਪਸੁਮਾਰੇਨ ਜੀਵਾਮਿ, ਕੁਸਲਂ ਮੇ ਨ ਵਿਜ੍ਜਤਿ.

੬੯. ‘‘ਮਮ ਆਸਯਸਾਮਨ੍ਤਾ, ਤਿਸ੍ਸੋ ਲੋਕਗ੍ਗਨਾਯਕੋ;

ਪਦਾਨਿ ਤੀਣਿ ਦਸ੍ਸੇਸਿ, ਅਨੁਕਮ੍ਪਾਯ ਚਕ੍ਖੁਮਾ.

੭੦. ‘‘ਅਕ੍ਕਨ੍ਤੇ ਚ ਪਦੇ ਦਿਸ੍ਵਾ, ਤਿਸ੍ਸਨਾਮਸ੍ਸ ਸਤ੍ਥੁਨੋ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਪਦੇ ਚਿਤ੍ਤਂ ਪਸਾਦਯਿਂ.

੭੧. ‘‘ਕੋਰਣ੍ਡਂ ਪੁਪ੍ਫਿਤਂ ਦਿਸ੍ਵਾ, ਪਾਦਪਂ ਧਰਣੀਰੁਹਂ;

ਸਕੋਸਕਂ ਗਹੇਤ੍ਵਾਨ, ਪਦਸੇਟ੍ਠਮਪੂਜਯਿਂ.