੮. ਸੁਚਿਨ੍ਤਿਤਤ੍ਥੇਰਅਪਦਾਨਂ

੧੦੭. ‘‘ਨਗਰੇ ਹਂਸਵਤਿਯਾ, ਅਹੋਸਿਂ ਕਸ੍ਸਕੋ ਤਦਾ;

ਕਸਿਕਮ੍ਮੇਨ ਜੀਵਾਮਿ, ਤੇਨ ਪੋਸੇਮਿ ਦਾਰਕੇ.

੧੦੮. ‘‘ਸੁਸਮ੍ਪਨ੍ਨਂ ਤਦਾ ਖੇਤ੍ਤਂ, ਧਞ੍ਞਂ ਮੇ ਫਲਿਨਂ [ਫਲਿਤਂ (ਸੀ. ਪੀ.)] ਅਹੁ;

ਪਾਕਕਾਲੇ ਚ ਸਮ੍ਪਤ੍ਤੇ, ਏਵਂ ਚਿਨ੍ਤੇਸਹਂ ਤਦਾ.

੧੦੯. ‘‘ਨਚ੍ਛਨ੍ਨਂ ਨਪ੍ਪਤਿਰੂਪਂ, ਜਾਨਨ੍ਤਸ੍ਸ ਗੁਣਾਗੁਣਂ;

ਯੋਹਂ ਸਙ੍ਘੇ ਅਦਤ੍ਵਾਨ, ਅਗ੍ਗਂ ਭੁਞ੍ਜੇਯ੍ਯ ਚੇ ਤਦਾ [ਮਤ੍ਤਨਾ (ਸ੍ਯਾ.)].

੧੧੦. ‘‘ਅਯਂ ਬੁਦ੍ਧੋ ਅਸਮਸਮੋ, ਦ੍ਵਤ੍ਤਿਂਸਵਰਲਕ੍ਖਣੋ;

ਤਤੋ ਪਭਾਵਿਤੋ ਸਙ੍ਘੋ, ਪੁਞ੍ਞਕ੍ਖੇਤ੍ਤੋ ਅਨੁਤ੍ਤਰੋ.

੧੧੧. ‘‘ਤਤ੍ਥ ਦਸ੍ਸਾਮਹਂ ਦਾਨਂ, ਨਵਸਸ੍ਸਂ ਪੁਰੇ ਪੁਰੇ;

ਏਵਾਹਂ ਚਿਨ੍ਤਯਿਤ੍ਵਾਨ, ਹਟ੍ਠੋ ਪੀਣਿਤਮਾਨਸੋ [ਪੀਤਿਕ… (ਸ੍ਯਾ.)].

੧੧੨. ‘‘ਖੇਤ੍ਤਤੋ ਧਞ੍ਞਮਾਹਤ੍ਵਾ, ਸਮ੍ਬੁਦ੍ਧਂ ਉਪਸਙ੍ਕਮਿਂ;

ਉਪਸਙ੍ਕਮ੍ਮ ਸਮ੍ਬੁਦ੍ਧਂ, ਲੋਕਜੇਟ੍ਠਂ ਨਰਾਸਭਂ;

ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਇਦਂ ਵਚਨਮਬ੍ਰਵਿਂ.

੧੧੩. ‘‘‘ਨਵਸਸ੍ਸਞ੍ਚ ਸਮ੍ਪਨ੍ਨਂ, ਆਯਾਗੋਸਿ [ਇਧ ਹੋਸਿ (ਸ੍ਯਾ.)] ਚ ਤ੍ਵਂ ਮੁਨੇ;

ਅਨੁਕਮ੍ਪਮੁਪਾਦਾਯ, ਅਧਿਵਾਸੇਹਿ ਚਕ੍ਖੁਮ’.

੧੧੪. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਮਮ ਸਙ੍ਕਪ੍ਪਮਞ੍ਞਾਯ, ਇਦਂ ਵਚਨਮਬ੍ਰਵਿ.

੧੧੫. ‘‘‘ਚਤ੍ਤਾਰੋ ਚ ਪਟਿਪਨ੍ਨਾ, ਚਤ੍ਤਾਰੋ ਚ ਫਲੇ ਠਿਤਾ;

ਏਸ ਸਙ੍ਘੋ ਉਜੁਭੂਤੋ, ਪਞ੍ਞਾਸੀਲਸਮਾਹਿਤੋ;

ਯਜਨ੍ਤਾਨਂ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ.

੧੧੬. ‘‘‘ਕਰੋਤੋਪਧਿਕਂ ਪੁਞ੍ਞਂ, ਸਙ੍ਘੇ ਦਿਨ੍ਨਂ ਮਹਪ੍ਫਲਂ;

ਤਸ੍ਮਿਂ ਸਙ੍ਘੇਵ [ਸਂਘੇ ਚ (ਸ੍ਯਾ. ਪੀ.)] ਦਾਤਬ੍ਬਂ, ਤਵ ਸਸ੍ਸਂ ਤਥੇਤਰਂ.

੧੧੭. ‘‘‘ਸਙ੍ਘਤੋ ਉਦ੍ਦਿਸਿਤ੍ਵਾਨ, ਭਿਕ੍ਖੂ ਨੇਤ੍ਵਾਨ ਸਂਘਰਂ;

ਪਟਿਯਤ੍ਤਂ ਘਰੇ ਸਨ੍ਤਂ, ਭਿਕ੍ਖੁਸਙ੍ਘਸ੍ਸ ਦੇਹਿ ਤ੍ਵਂ’.

੧੧੮. ‘‘ਸਙ੍ਘਤੋ ਉਦ੍ਦਿਸਿਤ੍ਵਾਨ, ਭਿਕ੍ਖੂ ਨੇਤ੍ਵਾਨ ਸਂਘਰਂ;

ਯਂ ਘਰੇ ਪਟਿਯਤ੍ਤਂ ਮੇ, ਭਿਕ੍ਖੁਸਙ੍ਘਸ੍ਸਦਾਸਹਂ.

੧੧੯. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੧੨੦. ‘‘ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਸੋਵਣ੍ਣਂ ਸਪ੍ਪਭਸ੍ਸਰਂ;

ਸਟ੍ਠਿਯੋਜਨਮੁਬ੍ਬੇਧਂ, ਤਿਂਸਯੋਜਨਵਿਤ੍ਥਤਂ.

ਏਕੂਨਵੀਸਤਿਮਂ ਭਾਣਵਾਰਂ.

੧੨੧. ‘‘ਆਕਿਣ੍ਣਂ ਭਵਨਂ ਮਯ੍ਹਂ, ਨਾਰੀਗਣਸਮਾਕੁਲਂ;

ਤਤ੍ਥ ਭੁਤ੍ਵਾ ਪਿਵਿਤ੍ਵਾ ਚ, ਵਸਾਮਿ ਤਿਦਸੇ ਅਹਂ.

੧੨੨. ‘‘ਸਤਾਨਂ ਤੀਣਿਕ੍ਖਤ੍ਤੁਞ੍ਚ, ਦੇਵਰਜ੍ਜਮਕਾਰਯਿਂ;

ਸਤਾਨਂ ਪਞ੍ਚਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੧੨੩. ‘‘ਭਵਾਭਵੇ ਸਂਸਰਨ੍ਤੋ, ਲਭਾਮਿ ਅਮਿਤਂ ਧਨਂ;

ਭੋਗੇ ਮੇ ਊਨਤਾ ਨਤ੍ਥਿ, ਨਵਸਸ੍ਸਸ੍ਸਿਦਂ ਫਲਂ.

੧੨੪. ‘‘ਹਤ੍ਥਿਯਾਨਂ ਅਸ੍ਸਯਾਨਂ, ਸਿਵਿਕਂ ਸਨ੍ਦਮਾਨਿਕਂ;

ਲਭਾਮਿ ਸਬ੍ਬਮੇਵੇਤਂ [ਸਬ੍ਬਮੇਤਮ੍ਪਿ (ਕ.)], ਨਵਸਸ੍ਸਸ੍ਸਿਦਂ ਫਲਂ.

੧੨੫. ‘‘ਨਵਵਤ੍ਥਂ ਨਵਫਲਂ, ਨਵਗ੍ਗਰਸਭੋਜਨਂ;

ਲਭਾਮਿ ਸਬ੍ਬਮੇਵੇਤਂ, ਨਵਸਸ੍ਸਸ੍ਸਿਦਂ ਫਲਂ.

੧੨੬. ‘‘ਕੋਸੇਯ੍ਯਕਮ੍ਬਲਿਯਾਨਿ, ਖੋਮਕਪ੍ਪਾਸਿਕਾਨਿ ਚ;

ਲਭਾਮਿ ਸਬ੍ਬਮੇਵੇਤਂ, ਨਵਸਸ੍ਸਸ੍ਸਿਦਂ ਫਲਂ.

੧੨੭. ‘‘ਦਾਸੀਗਣਂ ਦਾਸਗਣਂ, ਨਾਰਿਯੋ ਚ ਅਲਙ੍ਕਤਾ;

ਲਭਾਮਿ ਸਬ੍ਬਮੇਵੇਤਂ, ਨਵਸਸ੍ਸਸ੍ਸਿਦਂ ਫਲਂ.

੧੨੮. ‘‘ਨ ਮਂ ਸੀਤਂ ਵਾ ਉਣ੍ਹਂ ਵਾ, ਪਰਿਲ਼ਾਹੋ ਨ ਵਿਜ੍ਜਤਿ;

ਅਥੋ ਚੇਤਸਿਕਂ ਦੁਕ੍ਖਂ, ਹਦਯੇ ਮੇ ਨ ਵਿਜ੍ਜਤਿ.

੧੨੯. ‘‘ਇਦਂ ਖਾਦ ਇਦਂ ਭੁਞ੍ਜ, ਇਮਮ੍ਹਿ ਸਯਨੇ ਸਯ;

ਲਭਾਮਿ ਸਬ੍ਬਮੇਵੇਤਂ, ਨਵਸਸ੍ਸਸ੍ਸਿਦਂ ਫਲਂ.

੧੩੦. ‘‘ਅਯਂ ਪਚ੍ਛਿਮਕੋ ਦਾਨਿ, ਚਰਿਮੋ ਵਤ੍ਤਤੇ ਭਵੋ;

ਅਜ੍ਜਾਪਿ ਦੇਯ੍ਯਧਮ੍ਮੋ ਮੇ, ਫਲਂ ਤੋਸੇਸਿ ਸਬ੍ਬਦਾ.

੧੩੧. ‘‘ਨਵਸਸ੍ਸਂ ਦਦਿਤ੍ਵਾਨ, ਸਙ੍ਘੇ ਗਣਵਰੁਤ੍ਤਮੇ;

ਅਟ੍ਠਾਨਿਸਂਸੇ ਅਨੁਭੋਮਿ, ਕਮ੍ਮਾਨੁਚ੍ਛਵਿਕੇ ਮਮ.

੧੩੨. ‘‘ਵਣ੍ਣਵਾ ਯਸਵਾ ਹੋਮਿ, ਮਹਾਭੋਗੋ ਅਨੀਤਿਕੋ;

ਮਹਾਪਕ੍ਖੋ [ਮਹਾਭਕ੍ਖੋ (ਸ੍ਯਾ. ਕ.)] ਸਦਾ ਹੋਮਿ, ਅਭੇਜ੍ਜਪਰਿਸੋ ਸਦਾ.

੧੩੩. ‘‘ਸਬ੍ਬੇ ਮਂ ਅਪਚਾਯਨ੍ਤਿ, ਯੇ ਕੇਚਿ ਪਥਵਿਸ੍ਸਿਤਾ;

ਦੇਯ੍ਯਧਮ੍ਮਾ ਚ ਯੇ ਕੇਚਿ, ਪੁਰੇ ਪੁਰੇ ਲਭਾਮਹਂ.

੧੩੪. ‘‘ਭਿਕ੍ਖੁਸਙ੍ਘਸ੍ਸ ਵਾ ਮਜ੍ਝੇ, ਬੁਦ੍ਧਸੇਟ੍ਠਸ੍ਸ ਸਮ੍ਮੁਖਾ;

ਸਬ੍ਬੇਪਿ ਸਮਤਿਕ੍ਕਮ੍ਮ, ਦੇਨ੍ਤਿ ਮਮੇਵ ਦਾਯਕਾ.

੧੩੫. ‘‘ਪਠਮਂ ਨਵਸਸ੍ਸਞ੍ਹਿ, ਦਤ੍ਵਾ ਸਙ੍ਘੇ ਗਣੁਤ੍ਤਮੇ;

ਇਮਾਨਿਸਂਸੇ ਅਨੁਭੋਮਿ, ਨਵਸਸ੍ਸਸ੍ਸਿਦਂ ਫਲਂ.

੧੩੬. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਨਵਸਸ੍ਸਸ੍ਸਿਦਂ ਫਲਂ.

੧੩੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ;

੧੩੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੩੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਚਿਨ੍ਤਿਤੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਸੁਚਿਨ੍ਤਿਤਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.