੭. ਏਕਧਮ੍ਮਸ੍ਸਵਨਿਯਤ੍ਥੇਰਅਪਦਾਨਂ

੮੮. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਚਤੁਸਚ੍ਚਂ ਪਕਾਸੇਨ੍ਤੋ, ਸਨ੍ਤਾਰੇਸਿ ਬਹੁਂ ਜਨਂ.

੮੯. ‘‘ਅਹਂ ਤੇਨ ਸਮਯੇਨ, ਜਟਿਲੋ ਉਗ੍ਗਤਾਪਨੋ;

ਧੁਨਨ੍ਤੋ ਵਾਕਚੀਰਾਨਿ, ਗਚ੍ਛਾਮਿ ਅਮ੍ਬਰੇ ਤਦਾ.

੯੦. ‘‘ਬੁਦ੍ਧਸੇਟ੍ਠਸ੍ਸ ਉਪਰਿ, ਗਨ੍ਤੁਂ ਨ ਵਿਸਹਾਮਹਂ;

ਪਕ੍ਖੀਵ ਸੇਲਮਾਸਜ੍ਜ, ਗਮਨਂ ਨ ਲਭਾਮਹਂ.

੯੧. ‘‘ਉਦਕੇ ਵੋਕ੍ਕਮਿਤ੍ਵਾਨ, ਏਵਂ ਗਚ੍ਛਾਮਿ ਅਮ੍ਬਰੇ;

ਨ ਮੇ ਇਦਂ ਭੂਤਪੁਬ੍ਬਂ, ਇਰਿਯਾਪਥਵਿਕੋਪਨਂ.

੯੨. ‘‘ਹਨ੍ਦ ਮੇਤਂ ਗਵੇਸਿਸ੍ਸਂ, ਅਪ੍ਪੇਵਤ੍ਥਂ ਲਭੇਯ੍ਯਹਂ;

ਓਰੋਹਨ੍ਤੋ ਅਨ੍ਤਲਿਕ੍ਖਾ, ਸਦ੍ਦਮਸ੍ਸੋਸਿ ਸਤ੍ਥੁਨੋ.

੯੩. ‘‘ਸਰੇਨ ਰਜਨੀਯੇਨ, ਸਵਨੀਯੇਨ ਵਗ੍ਗੁਨਾ;

ਅਨਿਚ੍ਚਤਂ ਕਥੇਨ੍ਤਸ੍ਸ, ਤਞ੍ਞੇਵ ਉਗ੍ਗਹਿਂ ਤਦਾ;

ਅਨਿਚ੍ਚਸਞ੍ਞਮੁਗ੍ਗਯ੍ਹ, ਅਗਮਾਸਿਂ ਮਮਸ੍ਸਮਂ.

੯੪. ‘‘ਯਾਵਤਾਯੁਂ ਵਸਿਤ੍ਵਾਨ, ਤਤ੍ਥ ਕਾਲਙ੍ਕਤੋ ਅਹਂ;

ਚਰਿਮੇ ਵਤ੍ਤਮਾਨਮ੍ਹਿ, ਸਦ੍ਧਮ੍ਮਸ੍ਸਵਨਂ ਸਰਿਂ.

੯੫. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੯੬. ‘‘ਤਿਂਸਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਂ ਅਹਂ;

ਏਕਪਞ੍ਞਾਸਕ੍ਖਤ੍ਤੁਞ੍ਚ, ਦੇਵਰਜ੍ਜਮਕਾਰਯਿਂ.

੯੭. ‘‘ਏਕਵੀਸਤਿਕ੍ਖਤ੍ਤੁਞ੍ਚ [ਏਕਤਿਂਸਤਿ… (ਸ੍ਯਾ.)], ਚਕ੍ਕਵਤ੍ਤੀ ਅਹੋਸਹਂ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੯੮. ‘‘ਅਨੁਭੋਮਿ ਸਕਂ ਪੁਞ੍ਞਂ, ਸੁਖਿਤੋਹਂ ਭਵਾਭਵੇ;

ਅਨੁਸ੍ਸਰਾਮਿ ਤਂ ਸਞ੍ਞਂ, ਸਂਸਰਨ੍ਤੋ ਭਵਾਭਵੇ;

ਨ ਕੋਟਿਂ ਪਟਿਵਿਜ੍ਝਾਮਿ, ਨਿਬ੍ਬਾਨਂ ਅਚ੍ਚੁਤਂ ਪਦਂ.

੯੯. ‘‘ਪਿਤੁਗੇਹੇ ਨਿਸੀਦਿਤ੍ਵਾ, ਸਮਣੋ ਭਾਵਿਤਿਨ੍ਦ੍ਰਿਯੋ;

ਕਥਂਸ [ਕਥਯਂ (ਸੀ. ਪੀ. ਕ.)] ਪਰਿਦੀਪੇਨ੍ਤੋ, ਅਨਿਚ੍ਚਤਮੁਦਾਹਰਿ.

੧੦੦. ‘‘‘ਅਨਿਚ੍ਚਾ ਵਤ ਸਙ੍ਖਾਰਾ, ਉਪ੍ਪਾਦਵਯਧਮ੍ਮਿਨੋ;

ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ, ਤੇਸਂ ਵੂਪਸਮੋ ਸੁਖੋ’.

੧੦੧. ‘‘ਸਹ ਗਾਥਂ ਸੁਣਿਤ੍ਵਾਨ, ਪੁਬ੍ਬਸਞ੍ਞਮਨੁਸ੍ਸਰਿਂ;

ਏਕਾਸਨੇ ਨਿਸੀਦਿਤ੍ਵਾ, ਅਰਹਤ੍ਤਮਪਾਪੁਣਿਂ.

੧੦੨. ‘‘ਜਾਤਿਯਾ ਸਤ੍ਤਵਸ੍ਸੇਨ, ਅਰਹਤ੍ਤਮਪਾਪੁਣਿਂ;

ਉਪਸਮ੍ਪਾਦਯੀ ਬੁਦ੍ਧੋ, ਧਮ੍ਮਸ੍ਸਵਨਸ੍ਸਿਦਂ ਫਲਂ.

੧੦੩. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਧਮ੍ਮਮਸੁਣਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਧਮ੍ਮਸ੍ਸਵਨਸ੍ਸਿਦਂ ਫਲਂ.

੧੦੪. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੦੫. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੦੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਧਮ੍ਮਸ੍ਸਵਨਿਯੋ ਥੇਰੋ ਇਮਾ

ਗਾਥਾਯੋ ਅਭਾਸਿਤ੍ਥਾਤਿ.

ਏਕਧਮ੍ਮਸ੍ਸਵਨਿਯਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.