੯. ਜਤੁਕਣ੍ਣਿਤ੍ਥੇਰਅਪਦਾਨਂ

੨੭੬. ‘‘ਨਗਰੇ ਹਂਸਵਤਿਯਾ, ਸੇਟ੍ਠਿਪੁਤ੍ਤੋ ਅਹੋਸਹਂ;

ਸਮਪ੍ਪਿਤੋ ਕਾਮਗੁਣੇ, ਪਰਿਚਾਰੇਮਹਂ ਤਦਾ.

੨੭੭. ‘‘ਤਤੋ [ਤਯੋ (ਸੀ.)] ਪਾਸਾਦਮਾਰੁਯ੍ਹ, ਮਹਾਭੋਗੇ ਵਲਞ੍ਜਕੋ [ਉਬ੍ਬਿਦ੍ਧਾ ਗੇਹਲੁਞ੍ਜਕਾ (ਕ.), ਉਬ੍ਬਿਦ੍ਧਾਗੇਹਲਞ੍ਛਕਾ (ਸੀ.)];

ਤਤ੍ਥ ਨਚ੍ਚੇਹਿ ਗੀਤੇਹਿ, ਪਰਿਚਾਰੇਮਹਂ ਤਦਾ.

੨੭੮. ‘‘ਤੂਰਿਯਾ ਆਹਤਾ ਮਯ੍ਹਂ, ਸਮ੍ਮਤਾਲ਼ਸਮਾਹਿਤਾ;

ਨਚ੍ਚਨ੍ਤਾ [ਰਞ੍ਜਨ੍ਤੀ (ਸ੍ਯਾ.), ਰਜ੍ਜਨ੍ਤਾ (ਕ.)] ਇਤ੍ਥਿਯੋ ਸਬ੍ਬਾ, ਹਰਨ੍ਤਿਯੇਵ ਮੇ ਮਨੋ.

੨੭੯. ‘‘ਚੇਲਾਪਿਕਾ [ਚੇਲਾਵਕਾ (ਸ੍ਯਾ.), ਵੇਲਾਮਿਕਾ (ਪੀ.)] ਲਾਮਣਿਕਾ [ਵਾਮਨਿਕਾ (ਸ੍ਯਾ. ਪੀ.)], ਕੁਞ੍ਜਵਾਸੀ ਤਿਮਜ੍ਝਿਕਾ [ਕੁਞ੍ਜਵਾ ਸੀਹਿਮਜ੍ਝਿਤਾ (ਸ੍ਯਾ.), ਕੁਜ੍ਜਾ ਵਾ ਸੀਹਿਮਜ੍ਝਿਕਾ (ਪੀ.)];

ਲਙ੍ਘਿਕਾ ਸੋਕਜ੍ਝਾਯੀ ਚ, ਪਰਿਵਾਰੇਨ੍ਤਿ ਮਂ ਸਦਾ.

੨੮੦. ‘‘ਵੇਤਾਲ਼ਿਨੋ ਕੁਮ੍ਭਥੂਨੀ, ਨਟਾ ਚ ਨਚ੍ਚਕਾ ਬਹੂ;

ਨਟਕਾ ਨਾਟਕਾ ਚੇਵ, ਪਰਿਵਾਰੇਨ੍ਤਿ ਮਂ ਸਦਾ.

੨੮੧. ‘‘ਕਪ੍ਪਕਾ ਨ੍ਹਾਪਕਾ ਸੂਦਾ, ਮਾਲਾਕਾਰਾ ਸੁਪਾਸਕਾ [ਸੁਮਾਪਕਾ (ਸੀ. ਸ੍ਯਾ.)];

ਜਲ੍ਲਾ ਮਲ੍ਲਾ ਚ ਤੇ ਸਬ੍ਬੇ, ਪਰਿਵਾਰੇਨ੍ਤਿ ਮਂ ਸਦਾ.

੨੮੨. ‘‘ਏਤੇਸੁ ਕੀਲ਼ਮਾਨੇਸੁ, ਸਿਕ੍ਖਿਤੇ ਕਤੁਪਾਸਨੇ;

ਰਤ੍ਤਿਨ੍ਦਿਵਂ ਨ ਜਾਨਾਮਿ, ਇਨ੍ਦੋਵ ਤਿਦਸਙ੍ਗਣੇ.

੨੮੩. ‘‘ਅਦ੍ਧਿਕਾ ਪਥਿਕਾ ਸਬ੍ਬੇ, ਯਾਚਕਾ ਵਰਕਾ ਬਹੂ;

ਉਪਗਚ੍ਛਨ੍ਤਿ ਤੇ ਨਿਚ੍ਚਂ, ਭਿਕ੍ਖਯਨ੍ਤਾ ਮਮਂ ਘਰਂ.

੨੮੪. ‘‘ਸਮਣਾ ਬ੍ਰਾਹ੍ਮਣਾ ਚੇਵ, ਪੁਞ੍ਞਕ੍ਖੇਤ੍ਤਾ ਅਨੁਤ੍ਤਰਾ;

ਵਡ੍ਢਯਨ੍ਤਾ ਮਮਂ ਪੁਞ੍ਞਂ, ਆਗਚ੍ਛਨ੍ਤਿ ਮਮਂ ਘਰਂ.

੨੮੫. ‘‘ਪਟਗਾ [ਪਟਕਾ (ਸੀ. ਸ੍ਯਾ.), ਪਦਕਾ (ਪੀ.)] ਲਟੁਕਾ [ਲਟਕਾ (ਸੀ.)] ਸਬ੍ਬੇ, ਨਿਗਣ੍ਠਾ ਪੁਪ੍ਫਸਾਟਕਾ;

ਤੇਦਣ੍ਡਿਕਾ ਏਕਸਿਖਾ, ਆਗਚ੍ਛਨ੍ਤਿ ਮਮਂ ਘਰਂ.

੨੮੬. ‘‘ਆਜੀਵਕਾ ਵਿਲੁਤ੍ਤਾਵੀ, ਗੋਧਮ੍ਮਾ ਦੇਵਧਮ੍ਮਿਕਾ;

ਰਜੋਜਲ੍ਲਧਰਾ ਏਤੇ, ਆਗਚ੍ਛਨ੍ਤਿ ਮਮਂ ਘਰਂ.

੨੮੭. ‘‘ਪਰਿਤ੍ਤਕਾ ਸਨ੍ਤਿਪਤ੍ਤਾ [ਪਰਿਵਤ੍ਤਕਾ ਸਿਦ੍ਧਿਪਤ੍ਤਾ (ਸੀ. ਸ੍ਯਾ. ਪੀ.)], ਕੋਧਪੁਗ੍ਗਨਿਕਾ [ਕੋਣ੍ਡਪੁਗ੍ਗਣਿਕਾ (ਸੀ.), ਕੋਣ੍ਡਪੁਗ੍ਗਲਿਕਾ (ਪੀ.)] ਬਹੂ;

ਤਪਸ੍ਸੀ ਵਨਚਾਰੀ ਚ, ਆਗਚ੍ਛਨ੍ਤਿ ਮਮਂ ਘਰਂ.

੨੮੮. ‘‘ਓਡ੍ਡਕਾ ਦਮਿਲ਼ਾ ਚੇਵ, ਸਾਕੁਲ਼ਾ ਮਲਵਾਲ਼ਕਾ [ਮਲਯਾਲਕਾ (ਸੀ. ਸ੍ਯਾ. ਪੀ.)];

ਸਵਰਾ ਯੋਨਕਾ ਚੇਵ, ਆਗਚ੍ਛਨ੍ਤਿ ਮਮਂ ਘਰਂ.

੨੮੯. ‘‘ਅਨ੍ਧਕਾ ਮੁਣ੍ਡਕਾ ਸਬ੍ਬੇ, ਕੋਟਲਾ ਹਨੁਵਿਨ੍ਦਕਾ [ਕੋਲਕਾ ਸਾਨੁਵਿਨ੍ਦਕਾ (ਸੀ. ਪੀ.)];

ਆਰਾਵਚੀਨਰਟ੍ਠਾ ਚ, ਆਗਚ੍ਛਨ੍ਤਿ ਮਮਂ ਘਰਂ.

੨੯੦. ‘‘ਅਲਸਨ੍ਦਕਾ [ਅਲਸਨ੍ਤਾ (ਕ.)] ਪਲ੍ਲਵਕਾ, ਧਮ੍ਮਰਾ ਨਿਗ੍ਗਮਾਨੁਸਾ [ਬਬ੍ਬਰਾ ਭਗ੍ਗਕਾਰੁਸਾ (ਸੀ.)];

ਗੇਹਿਕਾ [ਰੋਹਿਤਾ (ਸੀ.), ਬਾਹਿਕਾ (ਪੀ.)] ਚੇਤਪੁਤ੍ਤਾ ਚ, ਆਗਚ੍ਛਨ੍ਤਿ ਮਮਂ ਘਰਂ.

੨੯੧. ‘‘ਮਾਧੁਰਕਾ ਕੋਸਲਕਾ, ਕਲਿਙ੍ਗਾ [ਕਾਸਿਕਾ (ਸੀ.)] ਹਤ੍ਥਿਪੋਰਿਕਾ;

ਇਸਿਣ੍ਡਾ ਮਕ੍ਕਲਾ ਚੇਵ, ਆਗਚ੍ਛਨ੍ਤਿ ਮਮਂ ਘਰਂ.

੨੯੨. ‘‘ਚੇਲਾਵਕਾ ਆਰਬ੍ਭਾ [ਅਰਮ੍ਮਾ (ਸੀ. ਪੀ.)] ਚ, ਓਘੁਲ਼੍ਹਾ [ਓਕ੍ਕਲਾ (ਸੀ.)] ਮੇਘਲਾ ਬਹੂ;

ਖੁਦ੍ਦਕਾ ਸੁਦ੍ਦਕਾ ਚੇਵ, ਆਗਚ੍ਛਨ੍ਤਿ ਮਮਂ ਘਰਂ.

੨੯੩. ‘‘ਰੋਹਣਾ ਸਿਨ੍ਧਵਾ ਚੇਵ, ਚਿਤਕਾ ਏਕਕਣ੍ਣਿਕਾ;

ਸੁਰਟ੍ਠਾ ਅਪਰਨ੍ਤਾ ਚ, ਆਗਚ੍ਛਨ੍ਤਿ ਮਮਂ ਘਰਂ.

੨੯੪. ‘‘ਸੁਪ੍ਪਾਰਕਾ ਕੁਮਾਰਾ [ਕਿਕੁਮਾਰਾ (ਸੀ. ਪੀ.)] ਚ, ਮਲ੍ਲਸੋਵਣ੍ਣਭੂਮਿਕਾ [ਮਲਯਾ ਸੋਣ੍ਣਭੂਮਿਕਾ (ਸੀ. ਸ੍ਯਾ. ਪੀ.)];

ਵਜ੍ਜੀਤਙ੍ਗਾ [ਵਜ੍ਜੀ ਤਾਰਾ (ਸੀ.), ਵਜ੍ਜੀਹਾਰਾ (ਸ੍ਯਾ. ਪੀ.)] ਚ ਤੇ ਸਬ੍ਬੇ, ਆਗਚ੍ਛਨ੍ਤਿ ਮਮਂ ਘਰਂ.

੨੯੫. ‘‘ਨਲ਼ਕਾਰਾ ਪੇਸਕਾਰਾ, ਚਮ੍ਮਕਾਰਾ ਚ ਤਚ੍ਛਕਾ;

ਕਮ੍ਮਾਰਾ ਕੁਮ੍ਭਕਾਰਾ ਚ, ਆਗਚ੍ਛਨ੍ਤਿ ਮਮਂ ਘਰਂ.

੨੯੬. ‘‘ਮਣਿਕਾਰਾ ਲੋਹਕਾਰਾ, ਸੋਣ੍ਣਕਾਰਾ ਚ ਦੁਸ੍ਸਿਕਾ;

ਤਿਪੁਕਾਰਾ ਚ ਤੇ ਸਬ੍ਬੇ, ਆਗਚ੍ਛਨ੍ਤਿ ਮਮਂ ਘਰਂ.

੨੯੭. ‘‘ਉਸੁਕਾਰਾ ਭਮਕਾਰਾ, ਪੇਸਕਾਰਾ ਚ ਗਨ੍ਧਿਕਾ;

ਰਜਕਾ ਤੁਨ੍ਨਵਾਯਾ ਚ, ਆਗਚ੍ਛਨ੍ਤਿ ਮਮਂ ਘਰਂ.

੨੯੮. ‘‘ਤੇਲਿਕਾ ਕਟ੍ਠਹਾਰਾ ਚ, ਉਦਹਾਰਾ ਚ ਪੇਸ੍ਸਿਕਾ;

ਸੂਪਿਕਾ ਸੂਪਰਕ੍ਖਾ ਚ, ਆਗਚ੍ਛਨ੍ਤਿ ਮਮਂ ਘਰਂ.

੨੯੯. ‘‘ਦੋਵਾਰਿਕਾ ਅਨੀਕਟ੍ਠਾ, ਬਨ੍ਧਿਕਾ [ਵਨ੍ਦਿਕਾ (ਸੀ.), ਗਨ੍ਥਿਕਾ (ਸ੍ਯਾ.), ਸਨ੍ਦਿਕਾ (ਪੀ.)] ਪੁਪ੍ਫਛਡ੍ਡਕਾ;

ਹਤ੍ਥਾਰੁਹਾ ਹਤ੍ਥਿਪਾਲਾ, ਆਗਚ੍ਛਨ੍ਤਿ ਮਮਂ ਘਰਂ.

੩੦੦. ‘‘ਆਨਨ੍ਦਸ੍ਸ ਮਹਾਰਞ੍ਞੋ [ਆਨਨ੍ਦਸ੍ਸ ਨਾਮ ਰਞ੍ਞੋ (ਸ੍ਯਾ.), ਅਰਿਨ੍ਦਮਨਾਮ ਰਞ੍ਞੋ (ਪੀ.)], ਮਮਤ੍ਥਸ੍ਸ [ਪਮਤ੍ਤਸ੍ਸ (ਸੀ. ਪੀ.), ਸਮਗ੍ਗਸ੍ਸ (ਸ੍ਯਾ.)] ਅਦਾਸਹਂ;

ਸਤ੍ਤਵਣ੍ਣੇਨ ਰਤਨੇਨ, ਊਨਤ੍ਥਂ [ਊਨਤ੍ਤਂ (ਸੀ. ਸ੍ਯਾ. ਪੀ.)] ਪੂਰਯਾਮਹਂ.

੩੦੧. ‘‘ਯੇ ਮਯਾ ਕਿਤ੍ਤਿਤਾ ਸਬ੍ਬੇ, ਨਾਨਾਵਣ੍ਣਾ ਬਹੂ ਜਨਾ;

ਤੇਸਾਹਂ ਚਿਤ੍ਤਮਞ੍ਞਾਯ, ਤਪ੍ਪਯਿਂ ਰਤਨੇਨਹਂ.

੩੦੨. ‘‘ਵਗ੍ਗੂਸੁ ਭਾਸਮਾਨਾਸੁ, ਵਜ੍ਜਮਾਨਾਸੁ ਭੇਰਿਸੁ;

ਸਙ੍ਖੇਸੁ ਧਮਯਨ੍ਤੇਸੁ, ਸਕਗੇਹੇ ਰਮਾਮਹਂ.

੩੦੩. ‘‘ਭਗਵਾ ਤਮ੍ਹਿ ਸਮਯੇ, ਪਦੁਮੁਤ੍ਤਰਨਾਯਕੋ;

ਵਸੀਸਤਸਹਸ੍ਸੇਹਿ, ਪਰਿਕ੍ਖੀਣਾਸਵੇਹਿ ਸੋ.

੩੦੪. ‘‘ਭਿਕ੍ਖੂਹਿ ਸਹਿਤੋ ਵੀਥਿਂ, ਪਟਿਪਜ੍ਜਿਤ੍ਥ ਚਕ੍ਖੁਮਾ;

ਓਭਾਸੇਨ੍ਤੋ ਦਿਸਾ ਸਬ੍ਬਾ, ਦੀਪਰੁਕ੍ਖੋਵ ਜੋਤਤਿ.

੩੦੫. ‘‘ਵਜ੍ਜਨ੍ਤਿ ਭੇਰਿਯੋ ਸਬ੍ਬਾ, ਗਚ੍ਛਨ੍ਤੇ ਲੋਕਨਾਯਕੇ;

ਪਭਾ ਨਿਦ੍ਧਾਵਤੇ ਤਸ੍ਸ, ਸਤਰਂਸੀਵ ਉਗ੍ਗਤੋ.

੩੦੬. ‘‘ਕਵਾਟਨ੍ਤਰਿਕਾਯਾਪਿ, ਪਵਿਟ੍ਠੇਨ ਚ ਰਸ੍ਮਿਨਾ;

ਅਨ੍ਤੋਘਰੇਸੁ ਵਿਪੁਲੋ, ਆਲੋਕੋ ਆਸਿ ਤਾਵਦੇ.

੩੦੭. ‘‘ਪਭਂ ਦਿਸ੍ਵਾਨ ਬੁਦ੍ਧਸ੍ਸ, ਪਾਰਿਸਜ੍ਜੇ ਅਵੋਚਹਂ;

ਨਿਸ੍ਸਂਸਯਂ ਬੁਦ੍ਧਸੇਟ੍ਠੋ, ਇਮਂ ਵੀਥਿਮੁਪਾਗਤੋ.

੩੦੮. ‘‘ਖਿਪ੍ਪਂ ਓਰੁਯ੍ਹ ਪਾਸਾਦਾ, ਅਗਮਿਂ ਅਨ੍ਤਰਾਪਣਂ;

ਸਮ੍ਬੁਦ੍ਧਂ ਅਭਿਵਾਦੇਤ੍ਵਾ, ਇਦਂ ਵਚਨਮਬ੍ਰਵਿਂ.

੩੦੯. ‘‘‘ਅਨੁਕਮ੍ਪਤੁ ਮੇ ਬੁਦ੍ਧੋ, ਜਲਜੁਤ੍ਤਮਨਾਯਕੋ;

ਵਸੀਸਤਸਹਸ੍ਸੇਹਿ, ਅਧਿਵਾਸੇਸਿ ਸੋ ਮੁਨਿ’.

੩੧੦. ‘‘ਨਿਮਨ੍ਤੇਤ੍ਵਾਨ ਸਮ੍ਬੁਦ੍ਧਂ, ਅਭਿਨੇਸਿਂ ਸਕਂ ਘਰਂ;

ਤਤ੍ਥ ਅਨ੍ਨੇਨ ਪਾਨੇਨ, ਸਨ੍ਤਪ੍ਪੇਸਿਂ ਮਹਾਮੁਨਿਂ.

੩੧੧. ‘‘ਭੁਤ੍ਤਾਵਿਂ ਕਾਲਮਞ੍ਞਾਯ, ਬੁਦ੍ਧਸੇਟ੍ਠਸ੍ਸ ਤਾਦਿਨੋ;

ਸਤਙ੍ਗਿਕੇਨ ਤੂਰਿਯੇਨ, ਬੁਦ੍ਧਸੇਟ੍ਠਂ ਉਪਟ੍ਠਹਿਂ.

੩੧੨. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਅਨ੍ਤੋਘਰੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੩੧੩. ‘‘‘ਯੋ ਮਂ ਤੂਰਿਯੇਹੁਪਟ੍ਠਾਸਿ, ਅਨ੍ਨਪਾਨਞ੍ਚਦਾਸਿ ਮੇ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੩੧੪. ‘‘‘ਪਹੂਤਭਕ੍ਖੋ ਹੁਤ੍ਵਾਨ, ਸਹਿਰਞ੍ਞੋ ਸਭੋਜਨੋ;

ਚਤੁਦੀਪੇ ਏਕਰਜ੍ਜਂ, ਕਾਰਯਿਸ੍ਸਤਿਯਂ ਨਰੋ.

੩੧੫. ‘‘‘ਪਞ੍ਚਸੀਲੇ ਸਮਾਦਾਯ, ਦਸਕਮ੍ਮਪਥੇ ਤਤੋ;

ਸਮਾਦਾਯ ਪਵਤ੍ਤੇਨ੍ਤੋ, ਪਰਿਸਂ ਸਿਕ੍ਖਾਪਯਿਸ੍ਸਤਿ.

੩੧੬. ‘‘‘ਤੂਰਿਯਸਤਸਹਸ੍ਸਾਨਿ, ਭੇਰਿਯੋ ਸਮਲਙ੍ਕਤਾ;

ਵਜ੍ਜਯਿਸ੍ਸਨ੍ਤਿਮਂ ਨਿਚ੍ਚਂ, ਉਪਟ੍ਠਾਨਸ੍ਸਿਦਂ ਫਲਂ.

੩੧੭. ‘‘‘ਤਿਂਸਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਤਿ;

ਚਤੁਸਟ੍ਠਿਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ.

੩੧੮. ‘‘‘ਚਤੁਸਟ੍ਠਿਕ੍ਖਤ੍ਤੁਂ ਰਾਜਾ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੩੧੯. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੩੨੦. ‘‘‘ਉਪਪਜ੍ਜਤਿ ਯਂ ਯੋਨਿਂ, ਦੇਵਤ੍ਤਂ ਅਥ ਮਾਨੁਸਂ;

ਅਨੂਨਭੋਗੋ ਹੁਤ੍ਵਾਨ, ਮਨੁਸ੍ਸਤ੍ਤਂ ਗਮਿਸ੍ਸਤਿ.

੩੨੧. ‘‘‘ਅਜ੍ਝਾਯਕੋ ਭਵਿਤ੍ਵਾਨ, ਤਿਣ੍ਣਂ ਵੇਦਾਨ ਪਾਰਗੂ;

ਉਤ੍ਤਮਤ੍ਥਂ ਗਵੇਸਨ੍ਤੋ, ਚਰਿਸ੍ਸਤਿ ਮਹਿਂ ਇਮਂ.

੩੨੨. ‘‘‘ਸੋ ਪਚ੍ਛਾ ਪਬ੍ਬਜਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਗੋਤਮਸ੍ਸ ਭਗਵਤੋ, ਸਾਸਨੇਭਿਰਮਿਸ੍ਸਤਿ.

੩੨੩. ‘‘‘ਆਰਾਧਯਿਤ੍ਵਾਨ ਸਮ੍ਬੁਦ੍ਧਂ, ਗੋਤਮਂ ਸਕ੍ਯਪੁਙ੍ਗਵਂ;

ਕਿਲੇਸੇ ਝਾਪਯਿਤ੍ਵਾਨ, ਅਰਹਾਯਂ ਭਵਿਸ੍ਸਤਿ’.

੩੨੪. ‘‘ਵਿਪਿਨੇ ਬ੍ਯਗ੍ਘਰਾਜਾਵ, ਮਿਗਰਾਜਾਵ ਕੇਸਰੀ;

ਅਭੀਤੋ ਵਿਹਰਾਮਜ੍ਜ, ਸਕ੍ਯਪੁਤ੍ਤਸ੍ਸ ਸਾਸਨੇ.

੩੨੫. ‘‘ਦੇਵਲੋਕੇ ਮਨੁਸ੍ਸੇ ਵਾ, ਦਲਿਦ੍ਦੇ ਦੁਗ੍ਗਤਿਮ੍ਹਿ ਵਾ;

ਨਿਬ੍ਬਤ੍ਤਿਂ ਮੇ ਨ ਪਸ੍ਸਾਮਿ, ਉਪਟ੍ਠਾਨਸ੍ਸਿਦਂ ਫਲਂ.

੩੨੬. ‘‘ਵਿਵੇਕਮਨੁਯੁਤ੍ਤੋਮ੍ਹਿ, ਉਪਸਨ੍ਤੋ ਨਿਰੂਪਧਿ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੩੨੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੩੨੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੨੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਜਤੁਕਣ੍ਣਿਤ੍ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਜਤੁਕਣ੍ਣਿਤ੍ਥੇਰਸ੍ਸਾਪਦਾਨਂ ਨਵਮਂ.