੪੧. ਮੇਤ੍ਤੇਯ੍ਯਵਗ੍ਗੋ

੧. ਤਿਸ੍ਸਮੇਤ੍ਤੇਯ੍ਯਤ੍ਥੇਰਅਪਦਾਨਂ

੧. ‘‘ਪਬ੍ਭਾਰਕੂਟਂ ਨਿਸ੍ਸਾਯ, ਸੋਭਿਤੋ ਨਾਮ ਤਾਪਸੋ;

ਪਵਤ੍ਤਫਲਂ ਭੁਞ੍ਜਿਤ੍ਵਾ, ਵਸਤਿ ਪਬ੍ਬਤਨ੍ਤਰੇ.

੨. ‘‘ਅਗ੍ਗਿਂ ਦਾਰੁਂ ਆਹਰਿਤ੍ਵਾ, ਉਜ੍ਜਾਲੇਸਿਂ ਅਹਂ ਤਦਾ;

ਉਤ੍ਤਮਤ੍ਥਂ ਗਵੇਸਨ੍ਤੋ, ਬ੍ਰਹ੍ਮਲੋਕੂਪਪਤ੍ਤਿਯਾ.

੩. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਮਮੁਦ੍ਧਰਿਤੁਕਾਮੋ ਸੋ, ਆਗਚ੍ਛਿ ਮਮ ਸਨ੍ਤਿਕੇ.

੪. ‘‘ਕਿਂ ਕਰੋਸਿ ਮਹਾਪੁਞ੍ਞ, ਦੇਹਿ ਮੇ ਅਗ੍ਗਿਦਾਰੁਕਂ;

ਅਹਮਗ੍ਗਿਂ ਪਰਿਚਰੇ, ਤਤੋ ਮੇ ਸੁਦ੍ਧਿ ਹੋਹਿਤਿ [ਹੇਹਿਤਿ (ਸੀ.)].

੫. ‘‘ਸੁਭਦ੍ਦਕੋ ਤ੍ਵਂ ਮਨੁਜੇ, ਦੇਵਤੇ ਤ੍ਵਂ ਪਜਾਨਸਿ;

ਤੁਵਂ ਅਗ੍ਗਿਂ ਪਰਿਚਰ, ਹਨ੍ਦ ਤੇ ਅਗ੍ਗਿਦਾਰੁਕਂ.

੬. ‘‘ਤਤੋ ਕਟ੍ਠਂ ਗਹੇਤ੍ਵਾਨ, ਅਗ੍ਗਿਂ ਉਜ੍ਜਾਲਯੀ ਜਿਨੋ;

ਨ ਤਤ੍ਥ ਕਟ੍ਠਂ ਪਜ੍ਝਾਯਿ, ਪਾਟਿਹੇਰਂ ਮਹੇਸਿਨੋ.

੭. ‘‘ਨ ਤੇ ਅਗ੍ਗਿ ਪਜ੍ਜਲਤਿ, ਆਹੁਤੀ ਤੇ ਨ ਵਿਜ੍ਜਤਿ;

ਨਿਰਤ੍ਥਕਂ ਵਤਂ ਤੁਯ੍ਹਂ, ਅਗ੍ਗਿਂ ਪਰਿਚਰਸ੍ਸੁ ਮੇ.

੮. ‘‘ਕੀਦਿਸੋ ਸੋ [ਤੇ (ਸ੍ਯਾ. ਕ.)] ਮਹਾਵੀਰ, ਅਗ੍ਗਿ ਤਵ ਪਵੁਚ੍ਚਤਿ;

ਮਯ੍ਹਮ੍ਪਿ ਕਥਯਸ੍ਸੇਤਂ, ਉਭੋ ਪਰਿਚਰਾਮਸੇ.

੯. ‘‘ਹੇਤੁਧਮ੍ਮਨਿਰੋਧਾਯ, ਕਿਲੇਸਸਮਣਾਯ ਚ;

ਇਸ੍ਸਾਮਚ੍ਛਰਿਯਂ ਹਿਤ੍ਵਾ, ਤਯੋ ਏਤੇ ਮਮਾਹੁਤੀ.

੧੦. ‘‘ਕੀਦਿਸੋ ਤ੍ਵਂ ਮਹਾਵੀਰ, ਕਥਂ ਗੋਤ੍ਤੋਸਿ ਮਾਰਿਸ;

ਆਚਾਰਪਟਿਪਤ੍ਤਿ ਤੇ, ਬਾਲ਼੍ਹਂ ਖੋ ਮਮ ਰੁਚ੍ਚਤਿ.

੧੧. ‘‘ਖਤ੍ਤਿਯਮ੍ਹਿ ਕੁਲੇ ਜਾਤੋ, ਅਭਿਞ੍ਞਾਪਾਰਮਿਂ ਗਤੋ;

ਸਬ੍ਬਾਸਵਪਰਿਕ੍ਖੀਣੋ, ਨਤ੍ਥਿ ਦਾਨਿ ਪੁਨਬ੍ਭਵੋ.

੧੨. ‘‘ਯਦਿ ਬੁਦ੍ਧੋਸਿ ਸਬ੍ਬਞ੍ਞੂ, ਪਭਙ੍ਕਰ ਤਮੋਨੁਦ;

ਨਮਸ੍ਸਿਸ੍ਸਾਮਿ ਤਂ ਦੇਵ, ਦੁਕ੍ਖਸ੍ਸਨ੍ਤਕਰੋ ਤੁਵਂ.

੧੩. ‘‘ਪਤ੍ਥਰਿਤ੍ਵਾਜਿਨਚਮ੍ਮਂ, ਨਿਸੀਦਨਮਦਾਸਹਂ;

ਨਿਸੀਦ ਨਾਥ ਸਬ੍ਬਞ੍ਞੁ, ਉਪਟ੍ਠਿਸ੍ਸਾਮਹਂ ਤੁਵਂ.

੧੪. ‘‘ਨਿਸੀਦਿ ਭਗਵਾ ਤਤ੍ਥ, ਅਜਿਨਮ੍ਹਿ ਸੁਵਿਤ੍ਥਤੇ;

ਨਿਮਨ੍ਤਯਿਤ੍ਵਾ ਸਮ੍ਬੁਦ੍ਧਂ, ਪਬ੍ਬਤਂ ਅਗਮਾਸਹਂ.

੧੫. ‘‘ਖਾਰਿਭਾਰਞ੍ਚ ਪੂਰੇਤ੍ਵਾ, ਤਿਨ੍ਦੁਕਫਲਮਾਹਰਿਂ;

ਮਧੁਨਾ ਯੋਜਯਿਤ੍ਵਾਨ, ਫਲਂ ਬੁਦ੍ਧਸ੍ਸਦਾਸਹਂ.

੧੬. ‘‘ਮਮ ਨਿਜ੍ਝਾਯਮਾਨਸ੍ਸ, ਪਰਿਭੁਞ੍ਜਿ ਤਦਾ ਜਿਨੋ;

ਤਤ੍ਥ ਚਿਤ੍ਤਂ ਪਸਾਦੇਸਿਂ, ਪੇਕ੍ਖਨ੍ਤੋ ਲੋਕਨਾਯਕਂ.

੧੭. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਮਮਸ੍ਸਮੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੧੮. ‘‘‘ਯੋ ਮਂ ਫਲੇਨ ਤਪ੍ਪੇਸਿ, ਪਸਨ੍ਨੋ ਸੇਹਿ ਪਾਣਿਭਿ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੧੯. ‘‘‘ਪਞ੍ਚਵੀਸਤਿਕ੍ਖਤ੍ਤੁਂ ਸੋ, ਦੇਵਰਜ੍ਜਂ ਕਰਿਸ੍ਸਤਿ;

ਸਹਸ੍ਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਭਵਿਸ੍ਸਤਿ.

੨੦. ‘‘‘ਤਸ੍ਸ ਸਙ੍ਕਪ੍ਪਮਞ੍ਞਾਯ, ਪੁਬ੍ਬਕਮ੍ਮਸਮਙ੍ਗਿਨੋ;

ਅਨ੍ਨਂ ਪਾਨਞ੍ਚ ਵਤ੍ਥਞ੍ਚ, ਸਯਨਞ੍ਚ ਮਹਾਰਹਂ.

੨੧. ‘‘‘ਪੁਞ੍ਞਕਮ੍ਮੇਨ ਸਂਯੁਤ੍ਤਾ, ਨਿਬ੍ਬਤ੍ਤਿਸ੍ਸਨ੍ਤਿ ਤਾਵਦੇ;

ਸਦਾ ਪਮੁਦਿਤੋ ਚਾਯਂ, ਭਵਿਸ੍ਸਤਿ ਅਨਾਮਯੋ.

੨੨. ‘‘‘ਉਪਪਜ੍ਜਤਿ ਯਂ ਯੋਨਿਂ, ਦੇਵਤ੍ਤਂ ਅਥ ਮਾਨੁਸਂ;

ਸਬ੍ਬਤ੍ਥ ਸੁਖਿਤੋ ਹੁਤ੍ਵਾ, ਮਨੁਸ੍ਸਤ੍ਤਂ ਗਮਿਸ੍ਸਤਿ.

੨੩. ‘‘‘ਅਜ੍ਝਾਯਕੋ ਮਨ੍ਤਧਰੋ, ਤਿਣ੍ਣਂ ਵੇਦਾਨ ਪਾਰਗੂ;

ਸਮ੍ਬੁਦ੍ਧਂ ਉਪਗਨ੍ਤ੍ਵਾਨ, ਅਰਹਾ ਸੋ ਭਵਿਸ੍ਸਤਿ’.

੨੪. ‘‘ਯਤੋ ਸਰਾਮਿ ਅਤ੍ਤਾਨਂ, ਯਤੋ ਪਤ੍ਤੋਸ੍ਮਿ ਵਿਞ੍ਞੁਤਂ;

ਭੋਗੇ ਮੇ ਊਨਤਾ ਨਤ੍ਥਿ, ਫਲਦਾਨਸ੍ਸਿਦਂ ਫਲਂ.

੨੫. ‘‘ਵਰਧਮ੍ਮਮਨੁਪ੍ਪਤ੍ਤੋ, ਰਾਗਦੋਸੇ ਸਮੂਹਨਿਂ;

ਸਬ੍ਬਾਸਵਪਰਿਕ੍ਖੀਣੋ, ਨਤ੍ਥਿ ਦਾਨਿ ਪੁਨਬ੍ਭਵੋ.

੨੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੨੭. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੨੮. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਿਸ੍ਸਮੇਤ੍ਤੇਯ੍ਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਿਸ੍ਸਮੇਤ੍ਤੇਯ੍ਯਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਪੁਣ੍ਣਕਤ੍ਥੇਰਅਪਦਾਨਂ

੨੯. ‘‘ਪਬ੍ਭਾਰਕੂਟਂ ਨਿਸ੍ਸਾਯ, ਸਯਮ੍ਭੂ ਅਪਰਾਜਿਤੋ;

ਆਬਾਧਿਕੋ ਚ ਸੋ [ਆਬਾਧਿਕੋ ਗਰੁ (ਸੀ.)] ਬੁਦ੍ਧੋ, ਵਸਤਿ ਪਬ੍ਬਤਨ੍ਤਰੇ.

੩੦. ‘‘ਮਮ ਅਸ੍ਸਮਸਾਮਨ੍ਤਾ, ਪਨਾਦੋ ਆਸਿ ਤਾਵਦੇ;

ਬੁਦ੍ਧੇ ਨਿਬ੍ਬਾਯਮਾਨਮ੍ਹਿ, ਆਲੋਕੋ ਉਦਪਜ੍ਜਥ [ਆਸਿ ਤਾਵਦੇ (ਸ੍ਯਾ. ਕ.)].

੩੧. ‘‘ਯਾਵਤਾ ਵਨਸਣ੍ਡਸ੍ਮਿਂ, ਅਚ੍ਛਕੋਕਤਰਚ੍ਛਕਾ;

ਵਾਲ਼ਾ ਚ [ਬ੍ਯਗ੍ਘਾ (ਸੀ.)] ਕੇਸਰੀ ਸਬ੍ਬੇ, ਅਭਿਗਜ੍ਜਿਂਸੁ ਤਾਵਦੇ.

੩੨. ‘‘ਉਪ੍ਪਾਤਂ ਤਮਹਂ ਦਿਸ੍ਵਾ, ਪਬ੍ਭਾਰਂ ਅਗਮਾਸਹਂ;

ਤਤ੍ਥਦ੍ਦਸ੍ਸਾਸਿਂ ਸਮ੍ਬੁਦ੍ਧਂ, ਨਿਬ੍ਬੁਤਂ ਅਪਰਾਜਿਤਂ.

੩੩. ‘‘ਸੁਫੁਲ੍ਲਂ ਸਾਲਰਾਜਂਵ, ਸਤਰਂਸਿਂਵ ਉਗ੍ਗਤਂ;

ਵੀਤਚ੍ਚਿਕਂਵ ਅਙ੍ਗਾਰਂ, ਨਿਬ੍ਬੁਤਂ ਅਪਰਾਜਿਤਂ.

੩੪. ‘‘ਤਿਣਂ ਕਟ੍ਠਞ੍ਚ ਪੂਰੇਤ੍ਵਾ, ਚਿਤਕਂ ਤਤ੍ਥਕਾਸਹਂ;

ਚਿਤਕਂ ਸੁਕਤਂ ਕਤ੍ਵਾ, ਸਰੀਰਂ ਝਾਪਯਿਂ ਅਹਂ.

੩੫. ‘‘ਸਰੀਰਂ ਝਾਪਯਿਤ੍ਵਾਨ, ਗਨ੍ਧਤੋਯਂ ਸਮੋਕਿਰਿਂ;

ਅਨ੍ਤਲਿਕ੍ਖੇ ਠਿਤੋ ਯਕ੍ਖੋ, ਨਾਮਮਗ੍ਗਹਿ ਤਾਵਦੇ.

੩੬. ‘‘ਯਂ ਪੂਰਿਤਂ [ਤਂ ਪੂਰਿਤਂ (ਸ੍ਯਾ.), ਸਪ੍ਪੁਰਿਸ (ਕ.)] ਤਯਾ ਕਿਚ੍ਚਂ, ਸਯਮ੍ਭੁਸ੍ਸ ਮਹੇਸਿਨੋ;

ਪੁਣ੍ਣਕੋ ਨਾਮ ਨਾਮੇਨ, ਸਦਾ ਹੋਹਿ ਤੁਵਂ [ਯਦਾ ਹੋਸਿ ਤੁਵਂ (ਸ੍ਯਾ.), ਸਦਾ ਹੋਹਿਤਿ ਤ੍ਵਂ (ਕ.)] ਮੁਨੇ.

੩੭. ‘‘ਤਮ੍ਹਾ ਕਾਯਾ ਚਵਿਤ੍ਵਾਨ, ਦੇਵਲੋਕਂ ਅਗਚ੍ਛਹਂ;

ਤਤ੍ਥ ਦਿਬ੍ਬਮਯੋ ਗਨ੍ਧੋ, ਅਨ੍ਤਲਿਕ੍ਖਾ ਪਵਸ੍ਸਤਿ [ਅਨ੍ਤਲਿਕ੍ਖੇ ਪਵਾਯਤਿ (ਸੀ.)].

੩੮. ‘‘ਤਤ੍ਰਾਪਿ ਨਾਮਧੇਯ੍ਯਂ ਮੇ, ਪੁਣ੍ਣਕੋਤਿ ਅਹੂ ਤਦਾ;

ਦੇਵਭੂਤੋ ਮਨੁਸ੍ਸੋ ਵਾ, ਸਙ੍ਕਪ੍ਪਂ ਪੂਰਯਾਮਹਂ.

੩੯. ‘‘ਇਦਂ ਪਚ੍ਛਿਮਕਂ ਮਯ੍ਹਂ, ਚਰਿਮੋ ਵਤ੍ਤਤੇ ਭਵੋ;

ਇਧਾਪਿ ਪੁਣ੍ਣਕੋ ਨਾਮ, ਨਾਮਧੇਯ੍ਯਂ ਪਕਾਸਤਿ.

੪੦. ‘‘ਤੋਸਯਿਤ੍ਵਾਨ ਸਮ੍ਬੁਦ੍ਧਂ, ਗੋਤਮਂ ਸਕ੍ਯਪੁਙ੍ਗਵਂ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੪੧. ‘‘ਏਕਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਤਨੁਕਿਚ੍ਚਸ੍ਸਿਦਂ ਫਲਂ.

੪੨. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੪੩. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪੁਣ੍ਣਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪੁਣ੍ਣਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਮੇਤ੍ਤਗੁਤ੍ਥੇਰਅਪਦਾਨਂ

੪੫. ‘‘ਹਿਮਵਨ੍ਤਸ੍ਸਾਵਿਦੂਰੇ, ਅਸੋਕੋ ਨਾਮ ਪਬ੍ਬਤੋ;

ਤਤ੍ਥਾਸਿ ਅਸ੍ਸਮੋ ਮਯ੍ਹਂ, ਵਿਸ੍ਸਕਮ੍ਮੇਨ [ਵਿਸੁਕਮ੍ਮੇਨ (ਸੀ. ਸ੍ਯਾ. ਕ.)] ਮਾਪਿਤੋ.

੪੬. ‘‘ਸੁਮੇਧੋ ਨਾਮ ਸਮ੍ਬੁਦ੍ਧੋ, ਅਗ੍ਗੋ ਕਾਰੁਣਿਕੋ ਮੁਨਿ;

ਨਿਵਾਸਯਿਤ੍ਵਾ ਪੁਬ੍ਬਣ੍ਹੇ, ਪਿਣ੍ਡਾਯ ਮੇ [ਮਂ (ਸੀ.)] ਉਪਾਗਮਿ.

੪੭. ‘‘ਉਪਾਗਤਂ ਮਹਾਵੀਰਂ, ਸੁਮੇਧਂ ਲੋਕਨਾਯਕਂ;

ਪਗ੍ਗਯ੍ਹ ਸੁਗਤਪਤ੍ਤਂ [ਸੁਗਤਂ ਪਤ੍ਤਂ (ਸੀ.), ਸੁਭਕਂ ਪਤ੍ਤਂ (ਪੀ.)], ਸਪ੍ਪਿਤੇਲਂ ਅਪੂਰਯਿਂ [ਸਪ੍ਪਿਤੇਲੇਨ ਪੂਰਯਿਂ (ਸੀ.), ਸਪ੍ਪਿਤੇਲਸ੍ਸ’ਪੂਰਯਿਂ (?)].

੪੮. ‘‘ਦਤ੍ਵਾਨਹਂ ਬੁਦ੍ਧਸੇਟ੍ਠੇ, ਸੁਮੇਧੇ ਲੋਕਨਾਯਕੇ;

ਅਞ੍ਜਲਿਂ ਪਗ੍ਗਹੇਤ੍ਵਾਨ, ਭਿਯ੍ਯੋ [ਭੀਯੋ (ਸੀ.), ਭੀਯ੍ਯੋ (ਪੀ.)] ਹਾਸਂ ਜਨੇਸਹਂ.

੪੯. ‘‘ਇਮਿਨਾ ਸਪ੍ਪਿਦਾਨੇਨ, ਚੇਤਨਾਪਣਿਧੀਹਿ ਚ;

ਦੇਵਭੂਤੋ ਮਨੁਸ੍ਸੋ ਵਾ, ਲਭਾਮਿ ਵਿਪੁਲਂ ਸੁਖਂ.

੫੦. ‘‘ਵਿਨਿਪਾਤਂ ਵਿਵਜ੍ਜੇਤ੍ਵਾ, ਸਂਸਰਾਮਿ ਭਵਾਭਵੇ;

ਤਤ੍ਥ ਚਿਤ੍ਤਂ ਪਣਿਧਿਤ੍ਵਾ, ਲਭਾਮਿ ਅਚਲਂ ਪਦਂ.

੫੧. ‘‘ਲਾਭਾ ਤੁਯ੍ਹਂ ਸੁਲਦ੍ਧਂ ਤੇ, ਯਂ ਮਂ ਅਦ੍ਦਕ੍ਖਿ ਬ੍ਰਾਹ੍ਮਣ;

ਮਮ ਦਸ੍ਸਨਮਾਗਮ੍ਮ, ਅਰਹਤ੍ਤਂ ਭਵਿਸ੍ਸਤਿ [ਅਰਹਾ ਤ੍ਵਂ ਭਵਿਸ੍ਸਸਿ (ਸੀ. ਪੀ.), ਅਰਹਤ੍ਤਂ ਗਮਿਸ੍ਸਸਿ (ਸ੍ਯਾ.)].

੫੨. ‘‘ਵਿਸ੍ਸਤ੍ਥੋ [ਵਿਸ੍ਸਟ੍ਠੋ (ਸ੍ਯਾ. ਪੀ.), ਵਿਸਟ੍ਠੋ (ਕ.)] ਹੋਹਿ ਮਾ ਭਾਯਿ, ਅਧਿਗਨ੍ਤ੍ਵਾ ਮਹਾਯਸਂ;

ਮਮਞ੍ਹਿ ਸਪ੍ਪਿਂ ਦਤ੍ਵਾਨ, ਪਰਿਮੋਕ੍ਖਸਿ ਜਾਤਿਯਾ.

੫੩. ‘‘ਇਮਿਨਾ ਸਪ੍ਪਿਦਾਨੇਨ, ਚੇਤਨਾਪਣਿਧੀਹਿ ਚ;

ਦੇਵਭੂਤੋ ਮਨੁਸ੍ਸੋ ਵਾ, ਲਭਸੇ ਵਿਪੁਲਂ ਸੁਖਂ.

੫੪. ‘‘ਇਮਿਨਾ ਸਪ੍ਪਿਦਾਨੇਨ, ਮੇਤ੍ਤਚਿਤ੍ਤਵਤਾਯ ਚ;

ਅਟ੍ਠਾਰਸੇ ਕਪ੍ਪਸਤੇ, ਦੇਵਲੋਕੇ ਰਮਿਸ੍ਸਸਿ.

੫੫. ‘‘ਅਟ੍ਠਤਿਂਸਤਿਕ੍ਖਤ੍ਤੁਞ੍ਚ, ਦੇਵਰਾਜਾ ਭਵਿਸ੍ਸਸਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੫੬. ‘‘ਏਕਪਞ੍ਞਾਸਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਸਿ;

ਚਾਤੁਰਨ੍ਤੋ ਵਿਜਿਤਾਵੀ, ਜਮ੍ਬੁਮਣ੍ਡਸ੍ਸ [ਜਮ੍ਬੁਸਣ੍ਡਸ੍ਸ (ਸੀ. ਪੀ.)] ਇਸ੍ਸਰੋ.

੫੭. ‘‘ਮਹਾਸਮੁਦ੍ਦੋਵਕ੍ਖੋਭੋ, ਦੁਦ੍ਧਰੋ ਪਥਵੀ ਯਥਾ;

ਏਵਮੇਵ ਚ ਤੇ ਭੋਗਾ, ਅਪ੍ਪਮੇਯ੍ਯਾ ਭਵਿਸ੍ਸਰੇ.

੫੮. ‘‘ਸਟ੍ਠਿਕੋਟੀ ਹਿਰਞ੍ਞਸ੍ਸ, ਚਜਿਤ੍ਵਾ [ਚਤ੍ਵਾਨ (ਸੀ. ਕ.), ਦਤ੍ਵਾਨ (ਸ੍ਯਾ. ਪੀ.)] ਪਬ੍ਬਜਿਂ ਅਹਂ;

ਕਿਂ ਕੁਸਲਂ ਗਵੇਸਨ੍ਤੋ, ਬਾਵਰਿਂ ਉਪਸਙ੍ਕਮਿਂ.

੫੯. ‘‘ਤਤ੍ਥ ਮਨ੍ਤੇ ਅਧੀਯਾਮਿ, ਛਲ਼ਙ੍ਗਂ ਨਾਮ ਲਕ੍ਖਣਂ;

ਤਮਨ੍ਧਕਾਰਂ ਵਿਧਮਂ, ਉਪ੍ਪਜ੍ਜਿ ਤ੍ਵਂ ਮਹਾਮੁਨਿ.

੬੦. ‘‘ਤਵ ਦਸ੍ਸਨਕਾਮੋਹਂ, ਆਗਤੋਮ੍ਹਿ ਮਹਾਮੁਨਿ;

ਤਵ ਧਮ੍ਮਂ ਸੁਣਿਤ੍ਵਾਨ, ਪਤ੍ਤੋਮ੍ਹਿ ਅਚਲਂ ਪਦਂ.

੬੧. ‘‘ਤਿਂਸਕਪ੍ਪਸਹਸ੍ਸਮ੍ਹਿ, ਸਪ੍ਪਿਂ ਬੁਦ੍ਧਸ੍ਸਦਾਸਹਂ;

ਏਤ੍ਥਨ੍ਤਰੇ ਨਾਭਿਜਾਨੇ, ਸਪ੍ਪਿਂ ਵਿਞ੍ਞਾਪਿਤਂ [ਵਿਞ੍ਞਾਪਿਤਾ (?)] ਮਯਾ.

੬੨. ‘‘ਮਮ ਸਙ੍ਕਪ੍ਪਮਞ੍ਞਾਯ, ਉਪ੍ਪਜ੍ਜਤਿ ਯਦਿਚ੍ਛਕਂ;

ਚਿਤ੍ਤਮਞ੍ਞਾਯ ਨਿਬ੍ਬਤ੍ਤਂ, ਸਬ੍ਬੇ ਸਨ੍ਤਪ੍ਪਯਾਮਹਂ.

੬੩. ‘‘ਅਹੋ ਬੁਦ੍ਧਾ ਅਹੋ ਧਮ੍ਮਾ [ਅਹੋ ਬੁਦ੍ਧੋ ਅਹੋ ਧਮ੍ਮੋ (ਸੀ.) ਥੇਰਗਾ. ੨੦੧ ਥੇਰਗਾਥਾਯ ਤਦਟ੍ਠਕਥਾਯ ਚ ਸਂਸਨ੍ਦੇਤਬ੍ਬਂ], ਅਹੋ ਨੋ ਸਤ੍ਥੁ ਸਮ੍ਪਦਾ;

ਥੋਕਞ੍ਹਿ ਸਪ੍ਪਿਂ ਦਤ੍ਵਾਨ, ਅਪ੍ਪਮੇਯ੍ਯਂ ਲਭਾਮਹਂ.

੬੪. ‘‘ਮਹਾਸਮੁਦ੍ਦੇ ਉਦਕਂ, ਯਾਵਤਾ ਨੇਰੁਪਸ੍ਸਤੋ;

ਮਮ ਸਪ੍ਪਿਂ ਉਪਾਦਾਯ, ਕਲਭਾਗਂ ਨ ਹੇਸ੍ਸਤਿ [ਹਿਸ੍ਸਤਿ (ਸ੍ਯਾ. ਕ.), ਏਸ੍ਸਤਿ (ਸੀ.)].

੬੫. ‘‘ਯਾਵਤਾ ਚਕ੍ਕਵਾਲ਼ਸ੍ਸ, ਕਰਿਯਨ੍ਤਸ੍ਸ [ਕਾਰਯਨ੍ਤਸ੍ਸ (ਸ੍ਯਾ.), ਕਯਿਰਨ੍ਤਸ੍ਸ (ਪੀ.), ਆਹਰਨ੍ਤਸ੍ਸ (ਕ.)] ਰਾਸਿਤੋ;

ਮਮ ਨਿਬ੍ਬਤ੍ਤਵਤ੍ਥਾਨਂ [ਮਯਾ ਨਿਵਤ੍ਥਵਤ੍ਥਾਨਂ (ਪੀ.)], ਓਕਾਸੋ ਸੋ ਨ ਸਮ੍ਮਤਿ.

੬੬. ‘‘ਪਬ੍ਬਤਰਾਜਾ ਹਿਮਵਾ, ਪਵਰੋਪਿ ਸਿਲੁਚ੍ਚਯੋ;

ਮਮਾਨੁਲਿਤ੍ਤਗਨ੍ਧਸ੍ਸ, ਉਪਨਿਧਿਂ [ਉਪਨਿਧਂ (ਸੀ. ਸ੍ਯਾ. ਕ.), ਉਪਨੀਯਂ (ਪੀ.)] ਨ ਹੇਸ੍ਸਤਿ.

੬੭. ‘‘ਵਤ੍ਥਂ ਗਨ੍ਧਞ੍ਚ ਸਪ੍ਪਿਞ੍ਚ, ਅਞ੍ਞਞ੍ਚ ਦਿਟ੍ਠਧਮ੍ਮਿਕਂ;

ਅਸਙ੍ਖਤਞ੍ਚ ਨਿਬ੍ਬਾਨਂ, ਸਪ੍ਪਿਦਾਨਸ੍ਸਿਦਂ ਫਲਂ.

੬੮. ‘‘ਸਤਿਪਟ੍ਠਾਨਸਯਨੋ, ਸਮਾਧਿਝਾਨਗੋਚਰੋ;

ਬੋਜ੍ਝਙ੍ਗਭੋਜਨੋ [… ਜਨਨੋ (ਸ੍ਯਾ. ਕ.)] ਅਜ੍ਜ, ਸਪ੍ਪਿਦਾਨਸ੍ਸਿਦਂ ਫਲਂ.

੬੯. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੭੦. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੭੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮੇਤ੍ਤਗੂ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਮੇਤ੍ਤਗੁਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਧੋਤਕਤ੍ਥੇਰਅਪਦਾਨਂ

੭੨. ‘‘ਗਙ੍ਗਾ ਭਾਗੀਰਥੀ ਨਾਮ, ਹਿਮਵਨ੍ਤਾ ਪਭਾਵਿਤਾ [ਹਿਮਵਨ੍ਤਪ੍ਪਭਾਵਿਤਾ (ਸੀ.)];

ਹਂਸਵਤਿਯਾ ਦ੍ਵਾਰੇਨ, ਅਨੁਸਨ੍ਦਤਿ ਤਾਵਦੇ.