੧੦. ਉਦੇਨਤ੍ਥੇਰਅਪਦਾਨਂ

੩੩੦. ‘‘ਹਿਮਵਨ੍ਤਸ੍ਸਾਵਿਦੂਰੇ, ਪਦੁਮੋ ਨਾਮ ਪਬ੍ਬਤੋ;

ਅਸ੍ਸਮੋ ਸੁਕਤੋ ਮਯ੍ਹਂ, ਪਣ੍ਣਸਾਲਾ ਸੁਮਾਪਿਤਾ.

੩੩੧. ‘‘ਨਦਿਯੋ ਸਨ੍ਦਰੇ ਤਤ੍ਥ, ਸੁਪਤਿਤ੍ਥਾ ਮਨੋਰਮਾ;

ਅਚ੍ਛੋਦਕਾ ਸੀਤਜਲਾ, ਸਨ੍ਦਰੇ ਨਦਿਯੋ ਸਦਾ.

੩੩੨. ‘‘ਪਾਠੀਨਾ ਪਾਵੁਸਾ ਮਚ੍ਛਾ, ਬਲਜਾ ਮੁਞ੍ਜਰੋਹਿਤਾ;

ਸੋਭੇਨ੍ਤਾ ਨਦਿਯੋ ਏਤੇ, ਵਸਨ੍ਤਿ ਨਦਿਯਾ ਸਦਾ.

੩੩੩. ‘‘ਅਮ੍ਬਜਮ੍ਬੂਹਿ ਸਞ੍ਛਨ੍ਨਾ, ਕਰੇਰਿਤਿਲਕਾ ਤਥਾ;

ਉਦ੍ਦਾਲਕਾ ਪਾਟਲਿਯੋ, ਸੋਭੇਨ੍ਤਿ ਮਮ ਅਸ੍ਸਮਂ.

੩੩੪. ‘‘ਅਙ੍ਕੋਲਕਾ ਬਿਮ੍ਬਿਜਾਲਾ, ਮਾਯਾਕਾਰੀ ਚ ਪੁਪ੍ਫਿਤਾ;

ਗਨ੍ਧੇਨ ਉਪਵਾਯਨ੍ਤਾ, ਸੋਭੇਨ੍ਤਿ ਮਮ ਅਸ੍ਸਮਂ.

੩੩੫. ‘‘ਅਤਿਮੁਤ੍ਤਾ ਸਤ੍ਤਲਿਕਾ, ਨਾਗਾ ਸਾਲਾ ਚ ਪੁਪ੍ਫਿਤਾ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭੇਨ੍ਤਿ ਮਮ ਅਸ੍ਸਮਂ.

੩੩੬. ‘‘ਕੋਸਮ੍ਬਾ ਸਲ਼ਲਾ ਨੀਪਾ, ਅਟ੍ਠਙ੍ਗਾਪਿ ਚ ਪੁਪ੍ਫਿਤਾ [ਅਟ੍ਠਙ੍ਗਾ ਚ ਸੁਪੁਪ੍ਫਿਤਾ (ਸੀ.), ਕਟ੍ਠਙ੍ਗਾ ਚ ਸੁਪੁਪ੍ਫਿਤਾ (ਪੀ.)];

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭੇਨ੍ਤਿ ਮਮ ਅਸ੍ਸਮਂ.

੩੩੭. ‘‘ਹਰੀਤਕਾ ਆਮਲਕਾ, ਅਮ੍ਬਜਮ੍ਬੁਵਿਭੀਤਕਾ;

ਕੋਲਾ ਭਲ੍ਲਾਤਕਾ ਬਿਲ੍ਲਾ, ਫਲਾਨਿ ਬਹੁ ਅਸ੍ਸਮੇ.

੩੩੮. ‘‘ਕਲਮ੍ਬਾ ਕਨ੍ਦਲੀ ਤਤ੍ਥ, ਪੁਪ੍ਫਨ੍ਤਿ ਮਮ ਅਸ੍ਸਮੇ;

ਦਿਬ੍ਬਗਨ੍ਧਂ [ਦਿਬ੍ਬਗਨ੍ਧਾ (ਸੀ. ਸ੍ਯਾ. ਪੀ.) ਏਵਂ ਪਰਤ੍ਥਪਿ] ਸਮ੍ਪਵਨ੍ਤਾ, ਸੋਭੇਨ੍ਤਿ ਮਮ ਅਸ੍ਸਮਂ.

੩੩੯. ‘‘ਅਸੋਕਪਿਣ੍ਡਿਵਾਰੀ ਚ [ਅਸੋਕਪਿਣ੍ਡੀ ਚ ਵਰੀ (ਸੀ. ਸ੍ਯਾ.), ਅਸੋਕਪਿਣ੍ਡੀ ਚ ਵਾਰੀ (ਪੀ.)], ਨਿਮ੍ਬਰੁਕ੍ਖਾ ਚ ਪੁਪ੍ਫਿਤਾ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭੇਨ੍ਤਿ ਮਮ ਅਸ੍ਸਮਂ.

੩੪੦. ‘‘ਪੁਨ੍ਨਾਗਾ ਗਿਰਿਪੁਨ੍ਨਾਗਾ, ਤਿਮਿਰਾ ਤਤ੍ਥ ਪੁਪ੍ਫਿਤਾ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭੇਨ੍ਤਿ ਮਮ ਅਸ੍ਸਮਂ.

੩੪੧. ‘‘ਨਿਗ੍ਗੁਣ੍ਡੀ ਸਿਰਿਨਿਗ੍ਗੁਣ੍ਡੀ, ਚਮ੍ਪਰੁਕ੍ਖੇਤ੍ਥ ਪੁਪ੍ਫਿਤਾ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭੇਨ੍ਤਿ ਮਮ ਅਸ੍ਸਮਂ.

੩੪੨. ‘‘ਅਵਿਦੂਰੇ ਪੋਕ੍ਖਰਣੀ, ਚਕ੍ਕਵਾਕੂਪਕੂਜਿਤਾ;

ਮਨ੍ਦਾਲਕੇਹਿ ਸਞ੍ਛਨ੍ਨਾ, ਪਦੁਮੁਪ੍ਪਲਕੇਹਿ ਚ.

੩੪੩. ‘‘ਅਚ੍ਛੋਦਕਾ ਸੀਤਜਲਾ, ਸੁਪਤਿਤ੍ਥਾ ਮਨੋਰਮਾ;

ਅਚ੍ਛਾ ਫਲਿਕਸਮਾਨਾ, ਸੋਭੇਨ੍ਤਿ ਮਮ ਅਸ੍ਸਮਂ.

੩੪੪. ‘‘ਪਦੁਮਾ ਪੁਪ੍ਫਰੇ ਤਤ੍ਥ, ਪੁਣ੍ਡਰੀਕਾ ਚ ਉਪ੍ਪਲਾ;

ਮਨ੍ਦਾਲਕੇਹਿ ਸਞ੍ਛਨ੍ਨਾ, ਸੋਭੇਨ੍ਤਿ ਮਮ ਅਸ੍ਸਮਂ.

੩੪੫. ‘‘ਪਾਠੀਨਾ ਪਾਵੁਸਾ ਮਚ੍ਛਾ, ਬਲਜਾ ਮੁਞ੍ਜਰੋਹਿਤਾ;

ਵਿਚਰਨ੍ਤਾਵ ਤੇ ਤਤ੍ਥ, ਸੋਭੇਨ੍ਤਿ ਮਮ ਅਸ੍ਸਮਂ.

੩੪੬. ‘‘ਕੁਮ੍ਭੀਲਾ ਸੁਸੁਮਾਰਾ ਚ, ਕਚ੍ਛਪਾ ਚ ਗਹਾ ਬਹੂ;

ਓਗਹਾ ਅਜਗਰਾ ਚ, ਸੋਭੇਨ੍ਤਿ ਮਮ ਅਸ੍ਸਮਂ.

੩੪੭. ‘‘ਪਾਰੇਵਤਾ ਰਵਿਹਂਸਾ, ਚਕ੍ਕਵਾਕਾ ਨਦੀਚਰਾ;

ਦਿਨ੍ਦਿਭਾ ਸਾਲ਼ਿਕਾ ਚੇਤ੍ਥ, ਸੋਭੇਨ੍ਤਿ ਮਮ ਅਸ੍ਸਮਂ.

੩੪੮. ‘‘ਨਯਿਤਾ ਅਮ੍ਬਗਨ੍ਧੀ ਚ, ਕੇਤਕਾ ਤਤ੍ਥ ਪੁਪ੍ਫਿਤਾ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭੇਨ੍ਤਿ ਮਮ ਅਸ੍ਸਮਂ.

੩੪੯. ‘‘ਸੀਹਾ ਬ੍ਯਗ੍ਘਾ ਚ ਦੀਪੀ ਚ, ਅਚ੍ਛਕੋਕਤਰਚ੍ਛਕਾ;

ਅਨੁਸਞ੍ਚਰਨ੍ਤਾ ਪਵਨੇ, ਸੋਭੇਨ੍ਤਿ ਮਮ ਅਸ੍ਸਮਂ.

੩੫੦. ‘‘ਜਟਾਭਾਰੇਨ ਭਰਿਤਾ, ਅਜਿਨੁਤ੍ਤਰਵਾਸਨਾ;

ਅਨੁਸਞ੍ਚਰਨ੍ਤਾ ਪਵਨੇ, ਸੋਭੇਨ੍ਤਿ ਮਮ ਅਸ੍ਸਮਂ.

੩੫੧. ‘‘ਅਜਿਨਾਨਿਧਰਾ ਏਤੇ, ਨਿਪਕਾ ਸਨ੍ਤਵੁਤ੍ਤਿਨੋ;

ਅਪ੍ਪਾਹਾਰਾਵ ਤੇ ਸਬ੍ਬੇ, ਸੋਭੇਨ੍ਤਿ ਮਮ ਅਸ੍ਸਮਂ.

੩੫੨. ‘‘ਖਾਰਿਭਾਰਂ ਗਹੇਤ੍ਵਾਨ, ਅਜ੍ਝੋਗਯ੍ਹ ਵਨਂ ਤਦਾ;

ਮੂਲਫਲਾਨਿ ਭੁਞ੍ਜਨ੍ਤਾ, ਵਸਨ੍ਤਿ ਅਸ੍ਸਮੇ ਤਦਾ.

੩੫੩. ‘‘ਨ ਤੇ ਦਾਰੁਂ ਆਹਰਨ੍ਤਿ, ਉਦਕਂ ਪਾਦਧੋਵਨਂ;

ਸਬ੍ਬੇਸਂ ਆਨੁਭਾਵੇਨ, ਸਯਮੇਵਾਹਰੀਯਤਿ.

੩੫੪. ‘‘ਚੁਲ੍ਲਾਸੀਤਿਸਹਸ੍ਸਾਨਿ, ਇਸਯੇਤ੍ਥ ਸਮਾਗਤਾ;

ਸਬ੍ਬੇਵ ਝਾਯਿਨੋ ਏਤੇ, ਉਤ੍ਤਮਤ੍ਥਗਵੇਸਕਾ.

੩੫੫. ‘‘ਤਪਸ੍ਸਿਨੋ ਬ੍ਰਹ੍ਮਚਾਰੀ, ਚੋਦੇਨ੍ਤਾ ਅਪ੍ਪਨਾਵ ਤੇ;

ਅਮ੍ਬਰਾਵਚਰਾ ਸਬ੍ਬੇ, ਵਸਨ੍ਤਿ ਅਸ੍ਸਮੇ ਤਦਾ.

੩੫੬. ‘‘ਪਞ੍ਚਾਹਂ ਸਨ੍ਨਿਪਤਨ੍ਤਿ, ਏਕਗ੍ਗਾ ਸਨ੍ਤਵੁਤ੍ਤਿਨੋ;

ਅਞ੍ਞੋਞ੍ਞਂ ਅਭਿਵਾਦੇਤ੍ਵਾ, ਪਕ੍ਕਮਨ੍ਤਿ ਦਿਸਾਮੁਖਾ.

੩੫੭. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਤਮਨ੍ਧਕਾਰਂ ਵਿਧਮਂ, ਉਪ੍ਪਜ੍ਜਿ ਤਾਵਦੇ ਜਿਨੋ.

੩੫੮. ‘‘ਮਮ ਅਸ੍ਸਮਸਾਮਨ੍ਤਾ, ਯਕ੍ਖੋ ਆਸਿ ਮਹਿਦ੍ਧਿਕੋ;

ਸੋ ਮੇ ਸਂਸਿਤ੍ਥ ਸਮ੍ਬੁਦ੍ਧਂ, ਜਲਜੁਤ੍ਤਮਨਾਯਕਂ.

੩੫੯. ‘‘ਏਸ ਬੁਦ੍ਧੋ ਸਮੁਪ੍ਪਨ੍ਨੋ, ਪਦੁਮੁਤ੍ਤਰੋ ਮਹਾਮੁਨਿ;

ਖਿਪ੍ਪਂ ਗਨ੍ਤ੍ਵਾਨ ਸਮ੍ਬੁਦ੍ਧਂ, ਪਯਿਰੂਪਾਸ ਮਾਰਿਸ.

੩੬੦. ‘‘ਯਕ੍ਖਸ੍ਸ ਵਚਨਂ ਸੁਤ੍ਵਾ, ਵਿਪ੍ਪਸਨ੍ਨੇਨ ਚੇਤਸਾ;

ਅਸ੍ਸਮਂ ਸਂਸਾਮੇਤ੍ਵਾਨ, ਨਿਕ੍ਖਮਿਂ ਵਿਪਿਨਾ ਤਦਾ.

੩੬੧. ‘‘ਚੇਲ਼ੇਵ ਡਯ੍ਹਮਾਨਮ੍ਹਿ, ਨਿਕ੍ਖਮਿਤ੍ਵਾਨ ਅਸ੍ਸਮਾ;

ਏਕਰਤ੍ਤਿਂ ਨਿਵਾਸੇਤ੍ਵਾ [ਨਿਵਸਿਤ੍ਵਾ (ਸੀ.), ਨਿਵਾਸੇਨ (?)], ਉਪਗਚ੍ਛਿਂ ਵਿਨਾਯਕਂ.

੩੬੨. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਚਤੁਸਚ੍ਚਂ ਪਕਾਸੇਨ੍ਤੋ, ਦੇਸੇਸਿ ਅਮਤਂ ਪਦਂ.

੩੬੩. ‘‘ਸੁਫੁਲ੍ਲਂ ਪਦੁਮਂ ਗਯ੍ਹ, ਉਪਗਨ੍ਤ੍ਵਾ ਮਹੇਸਿਨੋ;

ਪਸਨ੍ਨਚਿਤ੍ਤੋ ਸੁਮਨੋ, ਬੁਦ੍ਧਸ੍ਸ ਅਭਿਰੋਪਯਿਂ.

੩੬੪. ‘‘ਪੂਜਯਿਤ੍ਵਾਨ ਸਮ੍ਬੁਦ੍ਧਂ, ਜਲਜੁਤ੍ਤਮਨਾਯਕਂ;

ਏਕਂਸਂ ਅਜਿਨਂ ਕਤ੍ਵਾ, ਸਨ੍ਥਵਿਂ ਲੋਕਨਾਯਕਂ.

੩੬੫. ‘‘ਯੇਨ ਞਾਣੇਨ ਸਮ੍ਬੁਦ੍ਧੋ, ਵਸਤੀਹ ਅਨਾਸਵੋ;

ਤਂ ਞਾਣਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੩੬੬. ‘‘‘ਸਂਸਾਰਸੋਤਂ ਛਿਨ੍ਦਿਤ੍ਵਾ, ਤਾਰੇਸਿ ਸਬ੍ਬਪਾਣਿਨਂ;

ਤਵ ਧਮ੍ਮਂ ਸੁਣਿਤ੍ਵਾਨ, ਤਣ੍ਹਾਸੋਤਂ ਤਰਨ੍ਤਿ ਤੇ.

੩੬੭. ‘‘‘ਤੁਵਂ ਸਤ੍ਥਾ ਚ ਕੇਤੁ ਚ, ਧਜੋ ਯੂਪੋ ਚ ਪਾਣਿਨਂ;

ਪਰਾਯਣੋ ਪਤਿਟ੍ਠਾ ਚ, ਦੀਪੋ ਚ ਦ੍ਵਿਪਦੁਤ੍ਤਮ [ਦਿਪਦੁਤ੍ਤਮ (ਸੀ. ਸ੍ਯਾ. ਪੀ.)].

੩੬੮. ‘‘‘ਯਾਵਤਾ ਗਣਿਨੋ ਲੋਕੇ, ਸਤ੍ਥਵਾਹਾ ਪਵੁਚ੍ਚਰੇ;

ਤੁਵਂ ਅਗ੍ਗੋਸਿ ਸਬ੍ਬਞ੍ਞੁ, ਤਵ ਅਨ੍ਤੋਗਧਾਵ ਤੇ.

੩੬੯. ‘‘‘ਤਵ ਞਾਣੇਨ ਸਬ੍ਬਞ੍ਞੁ, ਤਾਰੇਸਿ ਜਨਤਂ ਬਹੁਂ;

ਤਵ ਦਸ੍ਸਨਮਾਗਮ੍ਮ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਰੇ.

੩੭੦. ‘‘‘ਯੇ ਕੇਚਿਮੇ ਗਨ੍ਧਜਾਤਾ, ਲੋਕੇ ਵਾਯਨ੍ਤਿ ਚਕ੍ਖੁਮ;

ਤਵ ਗਨ੍ਧਸਮੋ ਨਤ੍ਥਿ, ਪੁਞ੍ਞਕ੍ਖੇਤ੍ਤੇ ਮਹਾਮੁਨੇ’.

੩੭੧. ‘‘‘ਤਿਰਚ੍ਛਾਨਯੋਨਿਂ ਨਿਰਯਂ, ਪਰਿਮੋਚੇਸਿ [ਪਰਿਮੋਚੇਹਿ (ਸ੍ਯਾ. ਕ.)] ਚਕ੍ਖੁਮ;

ਅਸਙ੍ਖਤਂ ਪਦਂ ਸਨ੍ਤਂ, ਦੇਸੇਸਿ [ਦੇਸੇਹਿ (ਸ੍ਯਾ. ਕ.)] ਤ੍ਵਂ ਮਹਾਮੁਨੇ’.

੩੭੨. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੩੭੩. ‘‘‘ਯੋ ਮੇ ਞਾਣਂ ਅਪੂਜੇਸਿ, ਪਸਨ੍ਨੋ ਸੇਹਿ ਪਾਣਿਭਿ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੩੭੪. ‘‘‘ਤਿਂਸਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਤਿ;

ਸਹਸ੍ਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਭਵਿਸ੍ਸਤਿ’.

੩੭੫. ‘‘ਸੁਲਦ੍ਧਲਾਭਂ ਲਦ੍ਧੋਮ੍ਹਿ, ਤੋਸਯਿਤ੍ਵਾਨ ਸੁਬ੍ਬਤਂ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੩੭੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੩੭੭. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੭੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਦੇਨੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਉਦੇਨਤ੍ਥੇਰਸ੍ਸਾਪਦਾਨਂ ਦਸਮਂ.

ਮੇਤ੍ਤੇਯ੍ਯਵਗ੍ਗੋ ਏਕਚਤ੍ਤਾਲੀਸਮੋ.