੮. ਤੋਦੇਯ੍ਯਤ੍ਥੇਰਅਪਦਾਨਂ

੨੨੪. ‘‘ਰਾਜਾ ਅਜਿਤਞ੍ਜਯੋ [ਰਾਜਾਸਿ ਵਿਜਯੋ (ਸੀ. ਅਟ੍ਠ.), ਰਾਜਾ ਵਿਜਿਤਜਯੋ (ਸ੍ਯਾ.)] ਨਾਮ, ਕੇਤੁਮਤੀਪੁਰੁਤ੍ਤਮੇ;

ਸੂਰੋ ਵਿਕ੍ਕਮਸਮ੍ਪਨ੍ਨੋ, ਪੁਰਮਜ੍ਝਾਵਸੀ ਤਦਾ.

੨੨੫. ‘‘ਤਸ੍ਸ ਰਞ੍ਞੋ ਪਮਤ੍ਤਸ੍ਸ, ਅਟਵਿਯੋ ਸਮੁਟ੍ਠਹੁਂ;

ਓਤਾਰਾ [ਉਤ੍ਤਰਾ (ਸ੍ਯਾ.), ਓਚਰਾ (ਪੀ.)] ਤੁਣ੍ਡਿਕਾ ਚੇਵ, ਰਟ੍ਠਂ ਵਿਦ੍ਧਂਸਯੁਂ ਤਦਾ.

੨੨੬. ‘‘ਪਚ੍ਚਨ੍ਤੇ ਕੁਪਿਤੇ ਖਿਪ੍ਪਂ, ਸਨ੍ਨਿਪਾਤੇਸਿਰਿਨ੍ਦਮੋ;

ਭਟੇ ਚੇਵ ਬਲਤ੍ਥੇ ਚ, ਅਰਿਂ ਨਿਗ੍ਗਾਹਯਿ ਤਦਾ.

੨੨੭. ‘‘ਹਤ੍ਥਾਰੋਹਾ ਅਨੀਕਟ੍ਠਾ, ਸੂਰਾ ਚ ਚਮ੍ਮਯੋਧਿਨੋ;

ਧਨੁਗ੍ਗਹਾ ਚ ਉਗ੍ਗਾ ਚ, ਸਬ੍ਬੇ ਸਨ੍ਨਿਪਤੁਂ ਤਦਾ.

੨੨੮. ‘‘ਆਲ਼ਾਰਿਕਾ ਚ ਕਪ੍ਪਕਾ, ਨ੍ਹਾਪਕਾ ਮਾਲਕਾਰਕਾ;

ਸੂਰਾ ਵਿਜਿਤਸਙ੍ਗਾਮਾ, ਸਬ੍ਬੇ ਸਨ੍ਨਿਪਤੁਂ ਤਦਾ.

੨੨੯. ‘‘ਖਗ੍ਗਹਤ੍ਥਾ ਚ ਪੁਰਿਸਾ, ਚਾਪਹਤ੍ਥਾ ਚ ਵਮ੍ਮਿਨੋ;

ਲੁਦ੍ਦਾ ਵਿਜਿਤਸਙ੍ਗਾਮਾ, ਸਬ੍ਬੇ ਸਨ੍ਨਿਪਤੁਂ ਤਦਾ.

੨੩੦. ‘‘ਤਿਧਾਪਭਿਨ੍ਨਾ ਮਾਤਙ੍ਗਾ, ਕੁਞ੍ਜਰਾ ਸਟ੍ਠਿਹਾਯਨਾ;

ਸੁਵਣ੍ਣਕਚ੍ਛਾਲਙ੍ਕਾਰਾ, ਸਬ੍ਬੇ ਸਨ੍ਨਿਪਤੁਂ ਤਦਾ.

੨੩੧. ‘‘ਖਮਾ ਸੀਤਸ੍ਸ ਉਣ੍ਹਸ੍ਸ, ਉਕ੍ਕਾਰੁਹਰਣਸ੍ਸ ਚ;

ਯੋਧਾਜੀਵਾ ਕਤਕਮ੍ਮਾ, ਸਬ੍ਬੇ ਸਨ੍ਨਿਪਤੁਂ ਤਦਾ.

੨੩੨. ‘‘ਸਙ੍ਖਸਦ੍ਦਂ ਭੇਰਿਸਦ੍ਦਂ, ਅਥੋ ਉਤੁਜ [ਉਦ੍ਧਵ (ਸੀ.), ਉਦ੍ਦਟ (ਸ੍ਯਾ.)] ਸਦ੍ਦਕਂ;

ਏਤੇਹਿ ਤੇ ਹਾਸਯਨ੍ਤਾ, ਸਬ੍ਬੇ ਸਨ੍ਨਿਪਤੁਂ ਤਦਾ.

੨੩੩. ‘‘ਤਿਸੂਲਕੋਨ੍ਤਿਮਨ੍ਤੇਹਿ [ਤਿਸੂਲਕੋਨ੍ਤਮਨ੍ਤੇਹਿ (ਸੀ.), ਕਵਚੇਹਿ ਤੋਮਰੇਹਿ (ਸੀ.), ਧਨੂਹਿ ਤੋਮਰੇਹਿ (ਸ੍ਯਾ.)] ਚ;

ਕੋਟ੍ਟੇਨ੍ਤਾਨਂ ਨਿਪਾਤੇਨ੍ਤਾ [ਕੋਟ੍ਟਯਨ੍ਤਾ ਨਿਵਤ੍ਤੇਨ੍ਤਾ (ਸ੍ਯਾ.)], ਸਬ੍ਬੇ ਸਨ੍ਨਿਪਤੁਂ ਤਦਾ.

੨੩੪. ‘‘ਕਿਮੇਵਾਤਿਨਿਸਾਮੇਤ੍ਵਾ [ਕਵਚਾਨਿਵਾਸੇਤ੍ਵਾ (ਸ੍ਯਾ.)], ਸਰਾਜਾ ਅਜਿਤਞ੍ਜਯੋ [ਅਜਿਨਂ ਜਿਨੋ (ਸੀ.), ਅਜਿਤਞ੍ਜਿਨੋ (ਸ੍ਯਾ.)];

ਸਟ੍ਠਿ ਪਾਣਸਹਸ੍ਸਾਨਿ, ਸੂਲੇ ਉਤ੍ਤਾਸਯਿਂ ਤਦਾ.

੨੩੫. ‘‘ਸਦ੍ਦਂ ਮਾਨੁਸਕਾਕਂਸੁ, ਅਹੋ ਰਾਜਾ ਅਧਮ੍ਮਿਕੋ;

ਨਿਰਯੇ ਪਚ੍ਚਮਾਨਸ੍ਸ, ਕਦਾ ਅਨ੍ਤੋ ਭਵਿਸ੍ਸਤਿ.

੨੩੬. ‘‘ਸਯਨੇਹਂ ਤੁਵਟ੍ਟੇਨ੍ਤੋ, ਪਸ੍ਸਾਮਿ ਨਿਰਯੇ ਤਦਾ;

ਨ ਸੁਪਾਮਿ ਦਿਵਾਰਤ੍ਤਿਂ, ਸੂਲੇਨ ਤਜ੍ਜਯਨ੍ਤਿ ਮਂ.

੨੩੭. ‘‘ਕਿਂ ਪਮਾਦੇਨ ਰਜ੍ਜੇਨ, ਵਾਹਨੇਨ ਬਲੇਨ ਚ;

ਨ ਤੇ ਪਹੋਨ੍ਤਿ ਧਾਰੇਤੁਂ, ਤਾਪਯਨ੍ਤਿ [ਤਾਸਯਨ੍ਤਿ (ਸੀ. ਸ੍ਯਾ.)] ਮਮਂ ਸਦਾ.

੨੩੮. ‘‘ਕਿਂ ਮੇ ਪੁਤ੍ਤੇਹਿ ਦਾਰੇਹਿ, ਰਜ੍ਜੇਨ ਸਕਲੇਨ ਚ;

ਯਂਨੂਨ ਪਬ੍ਬਜੇਯ੍ਯਾਹਂ, ਗਤਿਮਗ੍ਗਂ ਵਿਸੋਧਯੇ.

੨੩੯. ‘‘ਸਟ੍ਠਿ ਨਾਗਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤੇ;

ਸੁਵਣ੍ਣਕਚ੍ਛੇ ਮਾਤਙ੍ਗੇ, ਹੇਮਕਪ੍ਪਨਵਾਸਸੇ.

੨੪੦. ‘‘ਆਰੂਲ਼੍ਹੇ ਗਾਮਣੀਯੇਹਿ, ਤੋਮਰਙ੍ਕੁਸਪਾਣਿਭਿ;

ਸਙ੍ਗਾਮਾਵਚਰੇ ਠਾਨੇ, ਅਨਪੇਕ੍ਖੋ ਵਿਹਾਯਹਂ;

ਸਕਕਮ੍ਮੇਨ ਸਨ੍ਤਤ੍ਤੋ, ਨਿਕ੍ਖਮਿਂ ਅਨਗਾਰਿਯਂ.

੨੪੧. ‘‘ਸਟ੍ਠਿ ਅਸ੍ਸਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤੇ;

ਆਜਾਨੀਯੇਵ ਜਾਤਿਯਾ, ਸਿਨ੍ਧਵੇ ਸੀਘਵਾਹਨੇ.

੨੪੨. ‘‘ਆਰੂਲ਼੍ਹੇ ਗਾਮਣੀਯੇਹਿ, ਚਾਪਹਤ੍ਥੇਹਿ ਵਮ੍ਮਿਭਿ;

ਪਹਾਰੇਤ੍ਵਾਨ [ਪਹਾਯਿਤ੍ਵਾਨ (ਸੀ. ਪੀ.), ਛਡ੍ਡਯਿਤ੍ਵਾਨ (ਸ੍ਯਾ.)] ਤੇ ਸਬ੍ਬੇ, ਨਿਕ੍ਖਮਿਂ ਅਨਗਾਰਿਯਂ.

੨੪੩. ‘‘ਸਟ੍ਠਿ ਰਥਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤੇ;

ਦੀਪੇ ਅਥੋਪਿ ਵੇਯਗ੍ਘੇ, ਸਨ੍ਨਦ੍ਧੇ ਉਸ੍ਸਿਤਦ੍ਧਜੇ;

ਤੇ ਸਬ੍ਬੇ ਪਰਿਹਾਰੇਤ੍ਵਾ [ਪਰਿਵਜ੍ਜੇਤ੍ਵਾ (ਸ੍ਯਾ.), ਪਰਿਹਾਯਿਤ੍ਵਾ (ਪੀ.)], ਪਬ੍ਬਜਿਂ ਅਨਗਾਰਿਯਂ.

੨੪੪. ‘‘ਸਟ੍ਠਿ ਧੇਨੁਸਹਸ੍ਸਾਨਿ, ਸਬ੍ਬਾ ਕਂਸੂਪਧਾਰਣਾ;

ਤਾਯੋਪਿ [ਗਾਵਿਯੋ (ਸ੍ਯਾ.), ਧੇਨੁਯੋ (ਕ.)] ਛਡ੍ਡਯਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ.

੨੪੫. ‘‘ਸਟ੍ਠਿ ਇਤ੍ਥਿਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤਾ;

ਵਿਚਿਤ੍ਤਵਤ੍ਥਾਭਰਣਾ, ਆਮੁਕ੍ਕਮਣਿਕੁਣ੍ਡਲਾ.

੨੪੬. ‘‘ਅਲ਼ਾਰਪਮ੍ਹਾ ਹਸੁਲਾ, ਸੁਸਞ੍ਞਾ ਤਨੁਮਜ੍ਝਿਮਾ;

ਤਾ ਹਿਤ੍ਵਾ ਕਨ੍ਦਮਾਨਾਯੋ, ਪਬ੍ਬਜਿਂ ਅਨਗਾਰਿਯਂ.

੨੪੭. ‘‘ਸਟ੍ਠਿ ਗਾਮਸਹਸ੍ਸਾਨਿ, ਪਰਿਪੁਣ੍ਣਾਨਿ ਸਬ੍ਬਸੋ;

ਛਡ੍ਡਯਿਤ੍ਵਾਨ ਤਂ ਰਜ੍ਜਂ, ਪਬ੍ਬਜਿਂ ਅਨਗਾਰਿਯਂ.

੨੪੮. ‘‘ਨਗਰਾ ਨਿਕ੍ਖਮਿਤ੍ਵਾਨ, ਹਿਮਵਨ੍ਤਮੁਪਾਗਮਿਂ;

ਭਾਗੀਰਥੀਨਦੀਤੀਰੇ, ਅਸ੍ਸਮਂ ਮਾਪਯਿਂ ਅਹਂ.

੨੪੯. ‘‘ਪਣ੍ਣਸਾਲਂ ਕਰਿਤ੍ਵਾਨ, ਅਗ੍ਯਾਗਾਰਂ ਅਕਾਸਹਂ;

ਆਰਦ੍ਧਵੀਰਿਯੋ ਪਹਿਤਤ੍ਤੋ, ਵਸਾਮਿ ਅਸ੍ਸਮੇ ਅਹਂ.

੨੫੦. ‘‘ਮਣ੍ਡਪੇ ਰੁਕ੍ਖਮੂਲੇ ਵਾ, ਸੁਞ੍ਞਾਗਾਰੇ ਚ ਝਾਯਤੋ;

ਨ ਤੁ ਵਿਜ੍ਜਤਿ ਤਾਸੋ ਮੇ, ਨ ਪਸ੍ਸੇ ਭਯਭੇਰਵਂ.

੨੫੧. ‘‘ਸੁਮੇਧੋ ਨਾਮ ਸਮ੍ਬੁਦ੍ਧੋ, ਅਗ੍ਗੋ ਕਾਰੁਣਿਕੋ ਮੁਨਿ;

ਞਾਣਾਲੋਕੇਨ ਜੋਤਨ੍ਤੋ, ਲੋਕੇ ਉਪ੍ਪਜ੍ਜਿ ਤਾਵਦੇ.

੨੫੨. ‘‘ਮਮ ਅਸ੍ਸਮਸਾਮਨ੍ਤਾ, ਯਕ੍ਖੋ ਆਸਿ ਮਹਿਦ੍ਧਿਕੋ;

ਬੁਦ੍ਧਸੇਟ੍ਠਮ੍ਹਿ ਉਪ੍ਪਨ੍ਨੇ, ਆਰੋਚੇਸਿ ਮਮਂ ਤਦਾ.

੨੫੩. ‘‘ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਸੁਮੇਧੋ ਨਾਮ ਚਕ੍ਖੁਮਾ;

ਤਾਰੇਤਿ ਜਨਤਂ ਸਬ੍ਬਂ, ਤਮ੍ਪਿ ਸੋ ਤਾਰਯਿਸ੍ਸਤਿ.

੨੫੪. ‘‘ਯਕ੍ਖਸ੍ਸ ਵਚਨਂ ਸੁਤ੍ਵਾ, ਸਂਵਿਗ੍ਗੋ ਆਸਿ ਤਾਵਦੇ;

ਬੁਦ੍ਧੋ ਬੁਦ੍ਧੋਤਿ ਚਿਨ੍ਤੇਨ੍ਤੋ, ਅਸ੍ਸਮਂ ਪਟਿਸਾਮਯਿਂ.

੨੫੫. ‘‘ਅਗ੍ਗਿਦਾਰੁਞ੍ਚ ਛਡ੍ਡੇਤ੍ਵਾ, ਸਂਸਾਮੇਤ੍ਵਾਨ ਸਨ੍ਥਤਂ;

ਅਸ੍ਸਮਂ ਅਭਿਵਨ੍ਦਿਤ੍ਵਾ, ਨਿਕ੍ਖਮਿਂ ਵਿਪਿਨਾ ਅਹਂ.

੨੫੬. ‘‘ਤਤੋ ਚਨ੍ਦਨਮਾਦਾਯ, ਗਾਮਾ ਗਾਮਂ ਪੁਰਾ ਪੁਰਂ;

ਦੇਵਦੇਵਂ ਗਵੇਸਨ੍ਤੋ, ਉਪਗਚ੍ਛਿਂ ਵਿਨਾਯਕਂ.

੨੫੭. ‘‘ਭਗਵਾ ਤਮ੍ਹਿ ਸਮਯੇ, ਸੁਮੇਧੋ ਲੋਕਨਾਯਕੋ;

ਚਤੁਸਚ੍ਚਂ ਪਕਾਸੇਨ੍ਤੋ, ਬੋਧੇਤਿ ਜਨਤਂ ਬਹੁਂ.

੨੫੮. ‘‘ਅਞ੍ਜਲਿਂ ਪਗ੍ਗਹੇਤ੍ਵਾਨ, ਸੀਸੇ ਕਤ੍ਵਾਨ ਚਨ੍ਦਨਂ;

ਸਮ੍ਬੁਦ੍ਧਂ ਅਭਿਵਾਦੇਤ੍ਵਾ, ਇਮਾ ਗਾਥਾ ਅਭਾਸਹਂ.

੨੫੯. ‘‘‘ਵਸ੍ਸਿਕੇ ਪੁਪ੍ਫਮਾਨਮ੍ਹਿ, ਸਨ੍ਤਿਕੇ ਉਪਵਾਯਤਿ;

ਤ੍ਵਂ ਵੀਰ ਗੁਣਗਨ੍ਧੇਨ, ਦਿਸਾ ਸਬ੍ਬਾ ਪਵਾਯਸਿ.

੨੬੦. ‘‘‘ਚਮ੍ਪਕੇ ਨਾਗਵਨਿਕੇ, ਅਤਿਮੁਤ੍ਤਕਕੇਤਕੇ;

ਸਾਲੇਸੁ ਪੁਪ੍ਫਮਾਨੇਸੁ, ਅਨੁਵਾਤਂ ਪਵਾਯਤਿ.

੨੬੧. ‘‘‘ਤਵ ਗਨ੍ਧਂ ਸੁਣਿਤ੍ਵਾਨ, ਹਿਮਵਨ੍ਤਾ ਇਧਾਗਮਿਂ;

ਪੂਜੇਮਿ ਤਂ ਮਹਾਵੀਰ, ਲੋਕਜੇਟ੍ਠ ਮਹਾਯਸ’.

੨੬੨. ‘‘ਵਰਚਨ੍ਦਨੇਨਾਨੁਲਿਮ੍ਪਿਂ, ਸੁਮੇਧਂ ਲੋਕਨਾਯਕਂ;

ਸਕਂ ਚਿਤ੍ਤਂ ਪਸਾਦੇਤ੍ਵਾ, ਤੁਣ੍ਹੀ ਅਟ੍ਠਾਸਿ ਤਾਵਦੇ.

੨੬੩. ‘‘ਸੁਮੇਧੋ ਨਾਮ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੨੬੪. ‘‘‘ਯੋ ਮੇ ਗੁਣੇ ਪਕਿਤ੍ਤੇਸਿ, ਚਨ੍ਦਨਞ੍ਚ ਅਪੂਜਯਿ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੨੬੫. ‘‘‘ਆਦੇਯ੍ਯਵਾਕ੍ਯਵਚਨੋ, ਬ੍ਰਹ੍ਮਾ ਉਜੁ ਪਤਾਪਵਾ;

ਪਞ੍ਚਵੀਸਤਿਕਪ੍ਪਾਨਿ, ਸਪ੍ਪਭਾਸੋ ਭਵਿਸ੍ਸਤਿ.

੨੬੬. ‘‘‘ਛਬ੍ਬੀਸਤਿਕਪ੍ਪਸਤੇ, ਦੇਵਲੋਕੇ ਰਮਿਸ੍ਸਤਿ;

ਸਹਸ੍ਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਭਵਿਸ੍ਸਤਿ.

੨੬੭. ‘‘‘ਤੇਤ੍ਤਿਂਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੨੬੮. ‘‘‘ਤਤੋ ਚੁਤੋਯਂ ਮਨੁਜੋ, ਮਨੁਸ੍ਸਤ੍ਤਂ ਗਮਿਸ੍ਸਤਿ;

ਪੁਞ੍ਞਕਮ੍ਮੇਨ ਸਂਯੁਤ੍ਤੋ, ਬ੍ਰਹ੍ਮਬਨ੍ਧੁ ਭਵਿਸ੍ਸਤਿ.

੨੬੯. ‘‘‘ਅਜ੍ਝਾਯਕੋ ਮਨ੍ਤਧਰੋ, ਤਿਣ੍ਣਂ ਵੇਦਾਨ ਪਾਰਗੂ;

ਤਿਲਕ੍ਖਣੇਨ ਸਮ੍ਪਨ੍ਨੋ, ਬਾਵਰੀ ਨਾਮ ਬ੍ਰਾਹ੍ਮਣੋ.

੨੭੦. ‘‘‘ਤਸ੍ਸ ਸਿਸ੍ਸੋ ਭਵਿਤ੍ਵਾਨ, ਹੇਸ੍ਸਤਿ ਮਨ੍ਤਪਾਰਗੂ;

ਉਪਗਨ੍ਤ੍ਵਾਨ ਸਮ੍ਬੁਦ੍ਧਂ, ਗੋਤਮਂ ਸਕ੍ਯਪੁਙ੍ਗਵਂ.

੨੭੧. ‘‘‘ਪੁਚ੍ਛਿਤ੍ਵਾ ਨਿਪੁਣੇ ਪਞ੍ਹੇ, ਭਾਵਯਿਤ੍ਵਾਨ ਅਞ੍ਜਸਂ [ਹਾਸਯਿਤ੍ਵਾਨ ਮਾਨਸਂ (ਸ੍ਯਾ.), ਭਾਵਯਿਤ੍ਵਾਨ ਸਞ੍ਚਯਂ (ਕ.)];

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਿਸ੍ਸਤਿਨਾਸਵੋ’.

੨੭੨. ‘‘ਤਿਵਿਧਗ੍ਗਿ ਨਿਬ੍ਬੁਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੨੭੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੭੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੭੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤੋਦੇਯ੍ਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤੋਦੇਯ੍ਯਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.