੭. ਹੇਮਕਤ੍ਥੇਰਅਪਦਾਨਂ

੧੮੩. ‘‘ਪਬ੍ਭਾਰਕੂਟਂ ਨਿਸ੍ਸਾਯ, ਅਨੋਮੋ ਨਾਮ ਤਾਪਸੋ;

ਅਸ੍ਸਮਂ ਸੁਕਤਂ ਕਤ੍ਵਾ, ਪਣ੍ਣਸਾਲੇ ਵਸੀ ਤਦਾ.

੧੮੪. ‘‘ਸਿਦ੍ਧਂ ਤਸ੍ਸ ਤਪੋ ਕਮ੍ਮਂ, ਸਿਦ੍ਧਿਪਤ੍ਤੋ ਸਕੇ ਬਲੇ;

ਸਕਸਾਮਞ੍ਞਵਿਕ੍ਕਨ੍ਤੋ, ਆਤਾਪੀ ਨਿਪਕੋ ਮੁਨਿ.

੧੮੫. ‘‘ਵਿਸਾਰਦੋ ਸਸਮਯੇ, ਪਰਵਾਦੇ ਚ ਕੋਵਿਦੋ;

ਪਟ੍ਠੋ ਭੂਮਨ੍ਤਲਿਕ੍ਖਮ੍ਹਿ, ਉਪ੍ਪਾਤਮ੍ਹਿ ਚ ਕੋਵਿਦੋ.

੧੮੬. ‘‘ਵੀਤਸੋਕੋ ਨਿਰਾਰਮ੍ਭੋ, ਅਪ੍ਪਾਹਾਰੋ ਅਲੋਲੁਪੋ;

ਲਾਭਾਲਾਭੇਨ ਸਨ੍ਤੁਟ੍ਠੋ, ਝਾਯੀ ਝਾਨਰਤੋ ਮੁਨਿ.

੧੮੭. ‘‘ਪਿਯਦਸ੍ਸੀ ਨਾਮ ਸਮ੍ਬੁਦ੍ਧੋ, ਅਗ੍ਗੋ ਕਾਰੁਣਿਕੋ ਮੁਨਿ;

ਸਤ੍ਤੇ ਤਾਰੇਤੁਕਾਮੋ ਸੋ, ਕਰੁਣਾਯ ਫਰੀ ਤਦਾ.

੧੮੮. ‘‘ਬੋਧਨੇਯ੍ਯਂ ਜਨਂ ਦਿਸ੍ਵਾ, ਪਿਯਦਸ੍ਸੀ ਮਹਾਮੁਨਿ;

ਚਕ੍ਕਵਾਲ਼ਸਹਸ੍ਸਮ੍ਪਿ, ਗਨ੍ਤ੍ਵਾ ਓਵਦਤੇ ਮੁਨਿ.

੧੮੯. ‘‘ਮਮੁਦ੍ਧਰਿਤੁਕਾਮੋ ਸੋ, ਮਮਸ੍ਸਮਮੁਪਾਗਮਿ;

ਨ ਦਿਟ੍ਠੋ ਮੇ ਜਿਨੋ ਪੁਬ੍ਬੇ, ਨ ਸੁਤੋਪਿ ਚ ਕਸ੍ਸਚਿ.

੧੯੦. ‘‘ਉਪ੍ਪਾਤਾ ਸੁਪਿਨਾ ਮਯ੍ਹਂ, ਲਕ੍ਖਣਾ ਸੁਪ੍ਪਕਾਸਿਤਾ;

ਪਟ੍ਠੋ ਭੂਮਨ੍ਤਲਿਕ੍ਖਮ੍ਹਿ, ਨਕ੍ਖਤ੍ਤਪਦਕੋਵਿਦੋ.

੧੯੧. ‘‘ਸੋਹਂ ਬੁਦ੍ਧਸ੍ਸ ਸੁਤ੍ਵਾਨ, ਤਤ੍ਥ ਚਿਤ੍ਤਂ ਪਸਾਦਯਿਂ;

ਤਿਟ੍ਠਨ੍ਤੋ [ਭੁਞ੍ਜਨ੍ਤੋ (ਸੀ. ਪੀ. ਕ.)] ਵਾ ਨਿਸਿਨ੍ਨੋ ਵਾ, ਸਰਾਮਿ ਨਿਚ੍ਚਕਾਲਿਕਂ.

੧੯੨. ‘‘ਮਯਿ ਏਵਂ ਸਰਨ੍ਤਮ੍ਹਿ, ਭਗਵਾਪਿ ਅਨੁਸ੍ਸਰਿ;

ਬੁਦ੍ਧਂ ਅਨੁਸ੍ਸਰਨ੍ਤਸ੍ਸ, ਪੀਤਿ ਮੇ ਹੋਤਿ ਤਾਵਦੇ.

੧੯੩. ‘‘ਕਾਲਞ੍ਚ ਪੁਨਰਾਗਮ੍ਮ, ਉਪੇਸਿ ਮਂ ਮਹਾਮੁਨਿ;

ਸਮ੍ਪਤ੍ਤੇਪਿ ਨ ਜਾਨਾਮਿ, ਅਯਂ ਬੁਦ੍ਧੋ ਮਹਾਮੁਨਿ.

੧੯੪. ‘‘ਅਨੁਕਮ੍ਪਕੋ ਕਾਰੁਣਿਕੋ, ਪਿਯਦਸ੍ਸੀ ਮਹਾਮੁਨਿ;

ਸਞ੍ਜਾਨਾਪੇਸਿ ਅਤ੍ਤਾਨਂ, ‘ਅਹਂ ਬੁਦ੍ਧੋ ਸਦੇਵਕੇ’.

੧੯੫. ‘‘ਸਞ੍ਜਾਨਿਤ੍ਵਾਨ ਸਮ੍ਬੁਦ੍ਧਂ, ਪਿਯਦਸ੍ਸਿਂ ਮਹਾਮੁਨਿਂ;

ਸਕਂ ਚਿਤ੍ਤਂ ਪਸਾਦੇਤ੍ਵਾ, ਇਦਂ ਵਚਨਮਬ੍ਰਵਿਂ.

੧੯੬. ‘‘‘ਅਞ੍ਞੇ [ਸਬ੍ਬੇ (ਸ੍ਯਾ.)] ਪੀਠੇ ਚ ਪਲ੍ਲਙ੍ਕੇ, ਆਸਨ੍ਦੀਸੁ ਨਿਸੀਦਰੇ;

ਤੁਵਮ੍ਪਿ ਸਬ੍ਬਦਸ੍ਸਾਵੀ, ਨਿਸੀਦ ਰਤਨਾਸਨੇ’.

੧੯੭. ‘‘ਸਬ੍ਬਰਤਨਮਯਂ ਪੀਠਂ, ਨਿਮ੍ਮਿਨਿਤ੍ਵਾਨ ਤਾਵਦੇ;

ਪਿਯਦਸ੍ਸਿਸ੍ਸ ਮੁਨਿਨੋ, ਅਦਾਸਿਂ ਇਦ੍ਧਿਨਿਮ੍ਮਿਤਂ.

੧੯੮. ‘‘ਰਤਨੇ ਚ ਨਿਸਿਨ੍ਨਸ੍ਸ, ਪੀਠਕੇ ਇਦ੍ਧਿਨਿਮ੍ਮਿਤੇ;

ਕੁਮ੍ਭਮਤ੍ਤਂ ਜਮ੍ਬੁਫਲਂ, ਅਦਾਸਿਂ ਤਾਵਦੇ ਅਹਂ.

੧੯੯. ‘‘ਮਮ ਹਾਸਂ ਜਨੇਤ੍ਵਾਨ, ਪਰਿਭੁਞ੍ਜਿ ਮਹਾਮੁਨਿ;

ਤਦਾ ਚਿਤ੍ਤਂ ਪਸਾਦੇਤ੍ਵਾ, ਸਤ੍ਥਾਰਂ ਅਭਿਵਾਦਯਿਂ.

੨੦੦. ‘‘ਪਿਯਦਸ੍ਸੀ ਤੁ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਰਤਨਾਸਨਮਾਸੀਨੋ, ਇਮਾ ਗਾਥਾ ਅਭਾਸਥ.

੨੦੧. ‘‘‘ਯੋ ਮੇ ਰਤਨਮਯਂ ਪੀਠਂ, ਅਮਤਞ੍ਚ ਫਲਂ ਅਦਾ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੨੦੨. ‘‘‘ਸਤ੍ਤਸਤ੍ਤਤਿ ਕਪ੍ਪਾਨਿ, ਦੇਵਲੋਕੇ ਰਮਿਸ੍ਸਤਿ;

ਪਞ੍ਚਸਤ੍ਤਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ.

੨੦੩. ‘‘‘ਦ੍ਵਤ੍ਤਿਂਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੨੦੪. ‘‘‘ਸੋਣ੍ਣਮਯਂ ਰੂਪਿਮਯਂ, ਪਲ੍ਲਙ੍ਕਂ ਸੁਕਤਂ ਬਹੁਂ;

ਲੋਹਿਤਙ੍ਗਮਯਞ੍ਚੇਵ, ਲਚ੍ਛਤਿ ਰਤਨਾਮਯਂ.

੨੦੫. ‘‘‘ਚਙ੍ਕਮਨ੍ਤਮ੍ਪਿ ਮਨੁਜਂ, ਪੁਞ੍ਞਕਮ੍ਮਸਮਙ੍ਗਿਨਂ;

ਪਲ੍ਲਙ੍ਕਾਨਿ ਅਨੇਕਾਨਿ, ਪਰਿਵਾਰੇਸ੍ਸਰੇ ਤਦਾ.

੨੦੬. ‘‘‘ਕੂਟਾਗਾਰਾ ਚ ਪਾਸਾਦਾ, ਸਯਨਞ੍ਚ ਮਹਾਰਹਂ;

ਇਮਸ੍ਸ ਚਿਤ੍ਤਮਞ੍ਞਾਯ, ਨਿਬ੍ਬਤ੍ਤਿਸ੍ਸਨ੍ਤਿ ਤਾਵਦੇ.

੨੦੭. ‘‘‘ਸਟ੍ਠਿ ਨਾਗਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤਾ;

ਸੁਵਣ੍ਣਕਚ੍ਛਾ ਮਾਤਙ੍ਗਾ, ਹੇਮਕਪ੍ਪਨਵਾਸਸਾ [ਹੇਮਕਪ੍ਪਨਿਵਾਸਨਾ (ਸੀ. ਸ੍ਯਾ.), ਹੇਮਕਪ੍ਪਨਿਵਾਸਸਾ (ਕ.)].

੨੦੮. ‘‘‘ਆਰੂਲ਼੍ਹਾ ਗਾਮਣੀਯੇਹਿ, ਤੋਮਰਙ੍ਕੁਸਪਾਣਿਭਿ;

ਇਮਂ ਪਰਿਚਰਿਸ੍ਸਨ੍ਤਿ, ਰਤ੍ਨਪੀਠਸ੍ਸਿਦਂ ਫਲਂ.

੨੦੯. ‘‘‘ਸਟ੍ਠਿ ਅਸ੍ਸਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤਾ;

ਆਜਾਨੀਯਾਵ ਜਾਤਿਯਾ, ਸਿਨ੍ਧਵਾ ਸੀਘਵਾਹਿਨੋ.

੨੧੦. ‘‘‘ਆਰੂਲ਼੍ਹਾ ਗਾਮਣੀਯੇਹਿ, ਇਲ੍ਲਿਯਾਚਾਪਧਾਰਿਭਿ;

ਤੇਪਿਮਂ ਪਰਿਚਰਿਸ੍ਸਨ੍ਤਿ, ਰਤ੍ਨਪੀਠਸ੍ਸਿਦਂ ਫਲਂ.

੨੧੧. ‘‘‘ਸਟ੍ਠਿ ਰਥਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤਾ;

ਦੀਪਾ ਅਥੋਪਿ ਵੇਯਗ੍ਘਾ, ਸਨ੍ਨਦ੍ਧਾ ਉਸ੍ਸਿਤਦ੍ਧਜਾ.

੨੧੨. ‘‘‘ਆਰੂਲ਼੍ਹਾ ਗਾਮਣੀਯੇਹਿ, ਚਾਪਹਤ੍ਥੇਹਿ ਵਮ੍ਮਿਭਿ;

ਪਰਿਵਾਰੇਸ੍ਸਨ੍ਤਿਮਂ ਨਿਚ੍ਚਂ, ਰਤ੍ਨਪੀਠਸ੍ਸਿਦਂ ਫਲਂ.

੨੧੩. ‘‘‘ਸਟ੍ਠਿ ਧੇਨੁਸਹਸ੍ਸਾਨਿ, ਦੋਹਞ੍ਞਾ ਪੁਙ੍ਗਵੂਸਭੇ;

ਵਚ੍ਛਕੇ ਜਨਯਿਸ੍ਸਨ੍ਤਿ, ਰਤ੍ਨਪੀਠਸ੍ਸਿਦਂ ਫਲਂ.

੨੧੪. ‘‘‘ਸੋਲ਼ਸਿਤ੍ਥਿਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤਾ;

ਵਿਚਿਤ੍ਤਵਤ੍ਥਾਭਰਣਾ, ਆਮੁਕ੍ਕਮਣਿਕੁਣ੍ਡਲਾ.

੨੧੫. ‘‘‘ਅਲ਼ਾਰਪਮ੍ਹਾ ਹਸੁਲਾ, ਸੁਸਞ੍ਞਾ ਤਨੁਮਜ੍ਝਿਮਾ;

ਪਰਿਵਾਰੇਸ੍ਸਨ੍ਤਿਮਂ ਨਿਚ੍ਚਂ, ਰਤ੍ਨਪੀਠਸ੍ਸਿਦਂ ਫਲਂ.

੨੧੬. ‘‘‘ਅਟ੍ਠਾਰਸੇ ਕਪ੍ਪਸਤੇ, ਗੋਤਮੋ ਨਾਮ ਚਕ੍ਖੁਮਾ;

ਤਮਨ੍ਧਕਾਰਂ ਵਿਧਮਿਤ੍ਵਾ, ਬੁਦ੍ਧੋ ਲੋਕੇ ਭਵਿਸ੍ਸਤਿ.

੨੧੭. ‘‘‘ਤਸ੍ਸ ਦਸ੍ਸਨਮਾਗਮ੍ਮ, ਪਬ੍ਬਜਿਸ੍ਸਤਿਕਿਞ੍ਚਨੋ;

ਤੋਸਯਿਤ੍ਵਾਨ ਸਤ੍ਥਾਰਂ, ਸਾਸਨੇਭਿਰਮਿਸ੍ਸਤਿ.

੨੧੮. ‘‘‘ਤਸ੍ਸ ਧਮ੍ਮਂ ਸੁਣਿਤ੍ਵਾਨ, ਕਿਲੇਸੇ ਘਾਤਯਿਸ੍ਸਤਿ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ’.

੨੧੯. ‘‘ਵੀਰਿਯਂ ਮੇ ਧੁਰਧੋਰਯ੍ਹਂ, ਯੋਗਕ੍ਖੇਮਾਧਿਵਾਹਨਂ;

ਉਤ੍ਤਮਤ੍ਥਂ ਪਤ੍ਥਯਨ੍ਤੋ, ਸਾਸਨੇ ਵਿਹਰਾਮਹਂ.

੨੨੦. ‘‘ਇਦਂ ਪਚ੍ਛਿਮਕਂ ਮਯ੍ਹਂ, ਚਰਿਮੋ ਵਤ੍ਤਤੇ ਭਵੋ;

ਸਬ੍ਬਾਸਵਾ ਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੨੨੧. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੨੨. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੨੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਹੇਮਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;

ਹੇਮਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

ਸਤ੍ਤਰਸਮਂ ਭਾਣਵਾਰਂ.