੬. ਨਨ੍ਦਕਤ੍ਥੇਰਅਪਦਾਨਂ

੧੬੧. ‘‘ਮਿਗਲੁਦ੍ਦੋ ਪੁਰੇ ਆਸਿਂ, ਅਰਞ੍ਞੇ ਕਾਨਨੇ ਅਹਂ;

ਪਸਦਂ ਮਿਗਮੇਸਨ੍ਤੋ, ਸਯਮ੍ਭੁਂ ਅਦ੍ਦਸਂ ਅਹਂ [ਜਿਨਂ (ਸੀ.)].

੧੬੨. ‘‘ਅਨੁਰੁਦ੍ਧੋ ਨਾਮ ਸਮ੍ਬੁਦ੍ਧੋ, ਸਯਮ੍ਭੂ ਅਪਰਾਜਿਤੋ;

ਵਿਵੇਕਕਾਮੋ ਸੋ ਧੀਰੋ, ਵਨਮਜ੍ਝੋਗਹੀ ਤਦਾ.

੧੬੩. ‘‘ਚਤੁਦਣ੍ਡੇ ਗਹੇਤ੍ਵਾਨ, ਚਤੁਟ੍ਠਾਨੇ ਠਪੇਸਹਂ;

ਮਣ੍ਡਪਂ ਸੁਕਤਂ ਕਤ੍ਵਾ, ਪਦ੍ਮਪੁਪ੍ਫੇਹਿ ਛਾਦਯਿਂ.

੧੬੪. ‘‘ਮਣ੍ਡਪਂ ਛਾਦਯਿਤ੍ਵਾਨ, ਸਯਮ੍ਭੁਂ ਅਭਿਵਾਦਯਿਂ;

ਧਨੁਂ ਤਤ੍ਥੇਵ ਨਿਕ੍ਖਿਪ੍ਪ, ਪਬ੍ਬਜਿਂ ਅਨਗਾਰਿਯਂ.

੧੬੫. ‘‘ਨਚਿਰਂ ਪਬ੍ਬਜਿਤਸ੍ਸ [ਪਬ੍ਬਜਿਤਸ੍ਸ ਅਚਿਰਂ (ਸੀ.)], ਬ੍ਯਾਧਿ ਮੇ ਉਦਪਜ੍ਜਥ;

ਪੁਬ੍ਬਕਮ੍ਮਂ ਸਰਿਤ੍ਵਾਨ, ਤਤ੍ਥ ਕਾਲਙ੍ਕਤੋ ਅਹਂ.

੧੬੬. ‘‘ਪੁਬ੍ਬਕਮ੍ਮੇਨ ਸਂਯੁਤ੍ਤੋ, ਤੁਸਿਤਂ ਅਗਮਾਸਹਂ;

ਤਤ੍ਥ ਸੋਣ੍ਣਮਯਂ ਬ੍ਯਮ੍ਹਂ, ਨਿਬ੍ਬਤ੍ਤਤਿ ਯਦਿਚ੍ਛਕਂ.

੧੬੭. ‘‘ਸਹਸ੍ਸਯੁਤ੍ਤਂ ਹਯਵਾਹਿਂ, ਦਿਬ੍ਬਯਾਨਮਧਿਟ੍ਠਿਤੋ;

ਆਰੁਹਿਤ੍ਵਾਨ ਤਂ ਯਾਨਂ, ਗਚ੍ਛਾਮਹਂ ਯਦਿਚ੍ਛਕਂ.

੧੬੮. ‘‘ਤਤੋ ਮੇ ਨਿਯ੍ਯਮਾਨਸ੍ਸ, ਦੇਵਭੂਤਸ੍ਸ ਮੇ ਸਤੋ;

ਸਮਨ੍ਤਾ ਯੋਜਨਸਤਂ, ਮਣ੍ਡਪੋ ਮੇ ਧਰੀਯਤਿ.

੧੬੯. ‘‘ਸਯਨੇਹਂ ਤੁਵਟ੍ਟਾਮਿ, ਅਚ੍ਛਨ੍ਨੇ [ਅਚ੍ਚਨ੍ਤਂ (ਸੀ.), ਅਚ੍ਚਨ੍ਤ (ਪੀ.)] ਪੁਪ੍ਫਸਨ੍ਥਤੇ;

ਅਨ੍ਤਲਿਕ੍ਖਾ ਚ ਪਦੁਮਾ, ਵਸ੍ਸਨ੍ਤੇ ਨਿਚ੍ਚਕਾਲਿਕਂ.

੧੭੦. ‘‘ਮਰੀਚਿਕੇ ਫਨ੍ਦਮਾਨੇ, ਤਪ੍ਪਮਾਨੇ ਚ ਆਤਪੇ;

ਨ ਮਂ ਤਾਪੇਤਿ ਆਤਾਪੋ, ਮਣ੍ਡਪਸ੍ਸ ਇਦਂ ਫਲਂ.

੧੭੧. ‘‘ਦੁਗ੍ਗਤਿਂ ਸਮਤਿਕ੍ਕਨ੍ਤੋ, ਅਪਾਯਾ ਪਿਹਿਤਾ ਮਮ;

ਮਣ੍ਡਪੇ ਰੁਕ੍ਖਮੂਲੇ ਵਾ, ਸਨ੍ਤਾਪੋ ਮੇ ਨ ਵਿਜ੍ਜਤਿ.

੧੭੨. ‘‘ਮਹੀਸਞ੍ਞਂ ਅਧਿਟ੍ਠਾਯ, ਲੋਣਤੋਯਂ ਤਰਾਮਹਂ;

ਤਸ੍ਸ ਮੇ ਸੁਕਤਂ ਕਮ੍ਮਂ, ਬੁਦ੍ਧਪੂਜਾਯਿਦਂ ਫਲਂ.

੧੭੩. ‘‘ਅਪਥਮ੍ਪਿ [ਅਬ੍ਭਮ੍ਹਿ (ਸ੍ਯਾ. ਕ.)] ਪਥਂ ਕਤ੍ਵਾ, ਗਚ੍ਛਾਮਿ ਅਨਿਲਞ੍ਜਸੇ;

ਅਹੋ ਮੇ ਸੁਕਤਂ ਕਮ੍ਮਂ, ਬੁਦ੍ਧਪੂਜਾਯਿਦਂ ਫਲਂ.

੧੭੪. ‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਆਸਵਾ ਮੇ ਪਰਿਕ੍ਖੀਣਾ, ਬੁਦ੍ਧਪੂਜਾਯਿਦਂ ਫਲਂ.

੧੭੫. ‘‘ਜਹਿਤਾ ਪੁਰਿਮਾ ਜਾਤਿ, ਬੁਦ੍ਧਸ੍ਸ ਓਰਸੋ ਅਹਂ;

ਦਾਯਾਦੋਮ੍ਹਿ ਚ ਸਦ੍ਧਮ੍ਮੇ, ਬੁਦ੍ਧਪੂਜਾਯਿਦਂ ਫਲਂ.

੧੭੬. ‘‘ਆਰਾਧਿਤੋਮ੍ਹਿ ਸੁਗਤਂ, ਗੋਤਮਂ ਸਕ੍ਯਪੁਙ੍ਗਵਂ;

ਧਮ੍ਮਧਜੋ ਧਮ੍ਮਦਾਯਾਦੋ [ਧਮ੍ਮਾਦਾਸੋ (ਕ.)], ਬੁਦ੍ਧਪੂਜਾਯਿਦਂ ਫਲਂ.

੧੭੭. ‘‘ਉਪਟ੍ਠਿਤ੍ਵਾਨ ਸਮ੍ਬੁਦ੍ਧਂ, ਗੋਤਮਂ ਸਕ੍ਯਪੁਙ੍ਗਵਂ;

ਪਾਰਙ੍ਗਮਨਿਯਂ ਮਗ੍ਗਂ, ਅਪੁਚ੍ਛਿਂ ਲੋਕਨਾਯਕਂ.

੧੭੮. ‘‘ਅਜ੍ਝਿਟ੍ਠੋ ਕਥਯੀ ਬੁਦ੍ਧੋ, ਗਮ੍ਭੀਰਂ ਨਿਪੁਣਂ ਪਦਂ;

ਤਸ੍ਸਾਹਂ ਧਮ੍ਮਂ ਸੁਤ੍ਵਾਨ, ਪਤ੍ਤੋਮ੍ਹਿ ਆਸਵਕ੍ਖਯਂ.

੧੭੯. ‘‘ਅਹੋ ਮੇ ਸੁਕਤਂ ਕਮ੍ਮਂ, ਪਰਿਮੁਤ੍ਤੋਮ੍ਹਿ ਜਾਤਿਯਾ;

ਸਬ੍ਬਾਸਵਪਰਿਕ੍ਖੀਣੋ, ਨਤ੍ਥਿ ਦਾਨਿ ਪੁਨਬ੍ਭਵੋ.

੧੮੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੮੧. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੮੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਨਨ੍ਦਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਨਨ੍ਦਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.