੫. ਉਪਸੀਵਤ੍ਥੇਰਅਪਦਾਨਂ

੧੦੦. ‘‘ਹਿਮਵਨ੍ਤਸ੍ਸਾਵਿਦੂਰੇ, ਅਨੋਮੋ ਨਾਮ ਪਬ੍ਬਤੋ;

ਅਸ੍ਸਮੋ ਸੁਕਤੋ ਮਯ੍ਹਂ, ਪਣ੍ਣਸਾਲਾ ਸੁਮਾਪਿਤਾ.

੧੦੧. ‘‘ਨਦੀ ਚ ਸਨ੍ਦਤੀ ਤਤ੍ਥ, ਸੁਪਤਿਤ੍ਥਾ ਮਨੋਰਮਾ;

ਅਨੂਪਤਿਤ੍ਥੇ ਜਾਯਨ੍ਤਿ, ਪਦੁਮੁਪ੍ਪਲਕਾ ਬਹੂ.

੧੦੨. ‘‘ਪਾਠੀਨਾ ਪਾਵੁਸਾ ਮਚ੍ਛਾ, ਬਲਜਾ ਮੁਞ੍ਜਰੋਹਿਤਾ;

ਮਚ੍ਛਕਚ੍ਛਪਸਞ੍ਛਨ੍ਨਾ [ਮਚ੍ਛਕਚ੍ਛਪਸਮ੍ਪਨ੍ਨਾ (?)], ਨਦਿਕਾ ਸਨ੍ਦਤੇ ਤਦਾ.

੧੦੩. ‘‘ਤਿਮਿਰਾ ਪੁਪ੍ਫਿਤਾ ਤਤ੍ਥ, ਅਸੋਕਾ ਖੁਦ੍ਦਮਾਲਕਾ;

ਪੁਨ੍ਨਾਗਾ ਗਿਰਿਪੁਨ੍ਨਾਗਾ, ਸਮ੍ਪਵਨ੍ਤਿ ਮਮਸ੍ਸਮਂ.

੧੦੪. ‘‘ਕੁਟਜਾ ਪੁਪ੍ਫਿਤਾ ਤਤ੍ਥ, ਤਿਣਸੂਲਵਨਾਨਿ ਚ;

ਸਾਲਾ ਚ ਸਲ਼ਲਾ ਤਤ੍ਥ, ਚਮ੍ਪਕਾ ਪੁਪ੍ਫਿਤਾ ਬਹੂ.

੧੦੫. ‘‘ਅਜ੍ਜੁਨਾ ਅਤਿਮੁਤ੍ਤਾ ਚ, ਮਹਾਨਾਮਾ ਚ ਪੁਪ੍ਫਿਤਾ;

ਅਸਨਾ ਮਧੁਗਨ੍ਧੀ ਚ, ਪੁਪ੍ਫਿਤਾ ਤੇ ਮਮਸ੍ਸਮੇ.

੧੦੬. ‘‘ਉਦ੍ਦਾਲਕਾ ਪਾਟਲਿਕਾ, ਯੂਥਿਕਾ ਚ ਪਿਯਙ੍ਗੁਕਾ;

ਬਿਮ੍ਬਿਜਾਲਕਸਞ੍ਛਨ੍ਨਾ, ਸਮਨ੍ਤਾ ਅਡ੍ਢਯੋਜਨਂ.

੧੦੭. ‘‘ਮਾਤਗ੍ਗਾਰਾ [ਮਾਤਙ੍ਗਵਾ (ਸੀ.), ਮਾਤਕਰਾ (ਸ੍ਯਾ.), ਮਾਤਙ੍ਗਾ ਵਾ (ਪੀ.)] ਸਤ੍ਤਲਿਯੋ, ਪਾਟਲੀ ਸਿਨ੍ਦੁਵਾਰਕਾ;

ਅਙ੍ਕੋਲਕਾ ਬਹੂ ਤਤ੍ਥ, ਤਾਲਕੁਟ੍ਠਿ [ਤਾਲਕੂਟਾ (ਸੀ. ਸ੍ਯਾ.), ਤਾਲਕੁਟ੍ਠਾ (ਪੀ.)] ਚ ਪੁਪ੍ਫਿਤਾ;

ਸੇਲੇਯ੍ਯਕਾ ਬਹੂ ਤਤ੍ਥ, ਪੁਪ੍ਫਿਤਾ ਮਮ ਅਸ੍ਸਮੇ.

੧੦੮. ‘‘ਏਤੇਸੁ ਪੁਪ੍ਫਜਾਤੇਸੁ [ਪੁਪ੍ਫਮਾਨੇਸੁ (ਸੀ. ਪੀ.)], ਸੋਭਨ੍ਤਿ ਪਾਦਪਾ ਬਹੂ;

ਸਮਨ੍ਤਾ ਤੇਨ ਗਨ੍ਧੇਨ, ਵਾਯਤੇ ਮਮ ਅਸ੍ਸਮੋ.

੧੦੯. ‘‘ਹਰੀਤਕਾ ਆਮਲਕਾ, ਅਮ੍ਬਜਮ੍ਬੁਵਿਭੀਤਕਾ [ਵਿਭਿਟਕਾ (ਸੀ.)];

ਕੋਲਾ ਭਲ੍ਲਾਤਕਾ ਬਿਲ੍ਲਾ, ਫਾਰੁਸਕਫਲਾਨਿ ਚ.

੧੧੦. ‘‘ਤਿਨ੍ਦੁਕਾ ਚ ਪਿਯਾਲਾ ਚ, ਮਧੁਕਾ ਕਾਸੁਮਾਰਯੋ;

ਲਬੁਜਾ ਪਨਸਾ ਤਤ੍ਥ, ਕਦਲੀ ਬਦਰੀਫਲਾ [ਮਨ੍ਦਰਿਫਲਾ (ਕ.), ਚਨ੍ਦਰੀਫਲਾ (ਸ੍ਯਾ. ਪੀ.)].

੧੧੧. ‘‘ਅਮ੍ਬਾਟਕਾ ਬਹੂ ਤਤ੍ਥ, ਵਲ੍ਲਿਕਾਰਫਲਾਨਿ ਚ;

ਬੀਜਪੂਰਸਪਾਰਿਯੋ [ਚਿਰਸਂਰਸਪਾਕਾ ਚ (ਸ੍ਯਾ.), ਵਿਟਪਾ ਚ ਸਪਾਕਾ ਚ (ਪੀ), ਵਿਦਪਰਪਦਾਦਯੋ (ਕ.)], ਫਲਿਤਾ ਮਮ ਅਸ੍ਸਮੇ.

੧੧੨. ‘‘ਆਲ਼ਕਾ ਇਸਿਮੁਗ੍ਗਾ ਚ, ਤਤੋ ਮੋਦਫਲਾ ਬਹੂ;

ਅਵਟਾ ਪਕ੍ਕਭਰਿਤਾ [ਸਕ੍ਕਰਾਰਿਤਾ (ਕ.)], ਪਿਲਕ੍ਖੁਦੁਮ੍ਬਰਾਨਿ ਚ.

੧੧੩. ‘‘ਪਿਪ੍ਫਿਲੀ ਮਰੀਚਾ ਤਤ੍ਥ, ਨਿਗ੍ਰੋਧਾ ਚ ਕਪਿਤ੍ਥਨਾ;

ਉਦੁਮ੍ਬਰਕਾ ਬਹਵੋ, ਕਣ੍ਡੁਪਣ੍ਣਾ ਚ ਹਰਿਯੋ [ਕਣ੍ਡਪਕ੍ਕਾ ਚ ਪਾਰਿਯੋ (ਸੀ. ਸ੍ਯਾ. ਪੀ.)].

੧੧੪. ‘‘ਏਤੇ ਚਞ੍ਞੇ ਚ ਬਹਵੋ, ਫਲਿਤਾ ਅਸ੍ਸਮੇ ਮਮ;

ਪੁਪ੍ਫਰੁਕ੍ਖਾਪਿ ਬਹਵੋ, ਪੁਪ੍ਫਿਤਾ ਮਮ ਅਸ੍ਸਮੇ.

੧੧੫. ‘‘ਆਲੁਵਾ ਚ ਕਲ਼ਮ੍ਬਾ ਚ, ਬਿਲ਼ਾਲੀ ਤਕ੍ਕਲਾਨਿ ਚ;

ਆਲਕਾ ਤਾਲਕਾ ਚੇਵ, ਵਿਜ੍ਜਨ੍ਤਿ ਅਸ੍ਸਮੇ ਮਮ.

੧੧੬. ‘‘ਅਸ੍ਸਮਸ੍ਸਾਵਿਦੂਰੇ ਮੇ, ਮਹਾਜਾਤਸ੍ਸਰੋ ਅਹੁ;

ਅਚ੍ਛੋਦਕੋ ਸੀਤਜਲੋ, ਸੁਪਤਿਤ੍ਥੋ ਮਨੋਰਮੋ.

੧੧੭. ‘‘ਪਦੁਮੁਪ੍ਪਲਾ ਬਹੂ ਤਤ੍ਥ, ਪੁਣ੍ਡਰੀਕਸਮਾਯੁਤਾ;

ਮਨ੍ਦਾਲਕੇਹਿ ਸਞ੍ਛਨ੍ਨਾ, ਨਾਨਾਗਨ੍ਧਸਮੇਰਿਤਾ.

੧੧੮. ‘‘ਗਬ੍ਭਂ ਗਣ੍ਹਨ੍ਤਿ ਪਦੁਮਾ, ਅਞ੍ਞੇ ਪੁਪ੍ਫਨ੍ਤਿ ਕੇਸਰੀ;

ਓਪੁਪ੍ਫਪਤ੍ਤਾ ਤਿਟ੍ਠਨ੍ਤਿ, ਪਦੁਮਾਕਣ੍ਣਿਕਾ ਬਹੂ.

੧੧੯. ‘‘ਮਧੁ ਭਿਸਮ੍ਹਾ ਸਵਤਿ, ਖੀਰਂ ਸਪ੍ਪਿ ਮੁਲਾਲ਼ਿਭਿ;

ਸਮਨ੍ਤਾ ਤੇਨ ਗਨ੍ਧੇਨ, ਨਾਨਾਗਨ੍ਧਸਮੇਰਿਤਾ.

੧੨੦. ‘‘ਕੁਮੁਦਾ ਅਮ੍ਬਗਨ੍ਧਿ ਚ, ਨਯਿਤਾ ਦਿਸ੍ਸਰੇ ਬਹੂ;

ਜਾਤਸ੍ਸਰਸ੍ਸਾਨੁਕੂਲਂ, ਕੇਤਕਾ ਪੁਪ੍ਫਿਤਾ ਬਹੂ.

੧੨੧. ‘‘ਸੁਫੁਲ੍ਲਾ ਬਨ੍ਧੁਜੀਵਾ ਚ, ਸੇਤਵਾਰੀ ਸੁਗਨ੍ਧਿਕਾ;

ਕੁਮ੍ਭਿਲਾ ਸੁਸੁਮਾਰਾ ਚ, ਗਹਕਾ ਤਤ੍ਥ ਜਾਯਰੇ.

੧੨੨. ‘‘ਉਗ੍ਗਾਹਕਾ ਅਜਗਰਾ, ਤਤ੍ਥ ਜਾਤਸ੍ਸਰੇ ਬਹੂ;

ਪਾਠੀਨਾ ਪਾਵੁਸਾ ਮਚ੍ਛਾ, ਬਲਜਾ ਮੁਞ੍ਜਰੋਹਿਤਾ.

੧੨੩. ‘‘ਮਚ੍ਛਕਚ੍ਛਪਸਞ੍ਛਨ੍ਨਾ, ਅਥੋ ਪਪਟਕਾਹਿ [ਪਮ੍ਪਟਕੇਹਿ (ਸੀ.), ਸਪਟਕੇਹਿ (ਸ੍ਯਾ.), ਪਪ੍ਪਟਕੇਹਿ (ਪੀ)] ਚ;

ਪਾਰੇਵਤਾ ਰਵਿਹਂਸਾ, ਕੁਕੁਤ੍ਥਾ [ਕੁਕ੍ਕੁਤ੍ਥਾ (ਸ੍ਯਾ. ਕ.), ਕੁਤ੍ਥਕਾ (ਪੀ.)] ਚ ਨਦੀਚਰਾ.

੧੨੪. ‘‘ਦਿਨ੍ਦਿਭਾ [ਟਿਟ੍ਟਿਭਾ (ਪੀ.)] ਚਕ੍ਕਵਾਕਾ ਚ, ਪਮ੍ਪਕਾ ਜੀਵਜੀਵਕਾ;

ਕਲਨ੍ਦਕਾ ਉਕ੍ਕੁਸਾ ਚ, ਸੇਨਕਾ ਉਦ੍ਧਰਾ ਬਹੂ.

੧੨੫. ‘‘ਕੋਟ੍ਠਕਾ ਸੁਕਪੋਤਾ ਚ, ਤੁਲਿਯਾ ਚਮਰਾ ਬਹੂ;

ਕਾਰੇਨਿਯੋ [ਕਾਸੇਨਿਯਾ (ਸ੍ਯਾ.)] ਚ ਤਿਲਕਾ [ਕਿਲਕਾ (ਕ.)], ਉਪਜੀਵਨ੍ਤਿ ਤਂ ਸਰਂ.

੧੨੬. ‘‘ਸੀਹਾ ਬ੍ਯਗ੍ਘਾ ਚ ਦੀਪੀ ਚ, ਅਚ੍ਛਕੋਕਤਰਚ੍ਛਕਾ;

ਵਾਨਰਾ ਕਿਨ੍ਨਰਾ ਚੇਵ, ਦਿਸ੍ਸਨ੍ਤਿ ਮਮ ਅਸ੍ਸਮੇ.

੧੨੭. ‘‘ਤਾਨਿ ਗਨ੍ਧਾਨਿ ਘਾਯਨ੍ਤੋ, ਭਕ੍ਖਯਨ੍ਤੋ ਫਲਾਨਹਂ;

ਗਨ੍ਧੋਦਕਂ ਪਿਵਨ੍ਤੋ ਚ, ਵਸਾਮਿ ਮਮ ਅਸ੍ਸਮੇ.

੧੨੮. ‘‘ਏਣੀਮਿਗਾ ਵਰਾਹਾ ਚ, ਪਸਦਾ ਖੁਦ੍ਦਰੂਪਕਾ;

ਅਗ੍ਗਿਕਾ ਜੋਤਿਕਾ ਚੇਵ, ਵਸਨ੍ਤਿ ਮਮ ਅਸ੍ਸਮੇ.

੧੨੯. ‘‘ਹਂਸਾ ਕੋਞ੍ਚਾ ਮਯੂਰਾ ਚ, ਸਾਲਿਕਾਪਿ ਚ ਕੋਕਿਲਾ;

ਮਜ੍ਜਾਰਿਕਾ [ਮਞ੍ਜਰਿਕਾ (ਸੀ. ਸ੍ਯਾ. ਪੀ.)] ਬਹੂ ਤਤ੍ਥ, ਕੋਸਿਕਾ ਪੋਟ੍ਠਸੀਸਕਾ.

੧੩੦. ‘‘ਪਿਸਾਚਾ ਦਾਨਵਾ ਚੇਵ, ਕੁਮ੍ਭਣ੍ਡਾ ਰਕ੍ਖਸਾ ਬਹੂ;

ਗਰੁਲ਼ਾ ਪਨ੍ਨਗਾ ਚੇਵ, ਵਸਨ੍ਤਿ ਮਮ ਅਸ੍ਸਮੇ.

੧੩੧. ‘‘ਮਹਾਨੁਭਾਵਾ ਇਸਯੋ, ਸਨ੍ਤਚਿਤ੍ਤਾ ਸਮਾਹਿਤਾ;

ਕਮਣ੍ਡਲੁਧਰਾ ਸਬ੍ਬੇ, ਅਜਿਨੁਤ੍ਤਰਵਾਸਨਾ;

ਜਟਾਭਾਰਭਰਿਤਾਵ [ਤੇ ਜਟਾਭਾਰਭਰਿਤਾ (ਸੀ. ਪੀ.), ਜਟਾਭਾਰਭਰਿਤਾ ਚ (ਸ੍ਯਾ.)], ਵਸਨ੍ਤਿ ਮਮ ਅਸ੍ਸਮੇ.

੧੩੨. ‘‘ਯੁਗਮਤ੍ਤਞ੍ਚ ਪੇਕ੍ਖਨ੍ਤਾ, ਨਿਪਕਾ ਸਨ੍ਤਵੁਤ੍ਤਿਨੋ;

ਲਾਭਾਲਾਭੇਨ ਸਨ੍ਤੁਟ੍ਠਾ, ਵਸਨ੍ਤਿ ਮਮ ਅਸ੍ਸਮੇ.

੧੩੩. ‘‘ਵਾਕਚੀਰਂ ਧੁਨਨ੍ਤਾ ਤੇ, ਫੋਟੇਨ੍ਤਾਜਿਨਚਮ੍ਮਕਂ;

ਸਬਲੇਹਿ ਉਪਤ੍ਥਦ੍ਧਾ, ਗਚ੍ਛਨ੍ਤਿ ਅਮ੍ਬਰੇ ਤਦਾ.

੧੩੪. ‘‘ਨ ਤੇ ਦਕਂ ਆਹਰਨ੍ਤਿ, ਕਟ੍ਠਂ ਵਾ ਅਗ੍ਗਿਦਾਰੁਕਂ;

ਸਯਞ੍ਚ ਉਪਸਮ੍ਪਨ੍ਨਾ, ਪਾਟਿਹੀਰਸ੍ਸਿਦਂ ਫਲਂ.

੧੩੫. ‘‘ਲੋਹਦੋਣਿਂ ਗਹੇਤ੍ਵਾਨ, ਵਨਮਜ੍ਝੇ ਵਸਨ੍ਤਿ ਤੇ;

ਕੁਞ੍ਜਰਾਵ ਮਹਾਨਾਗਾ, ਅਸਮ੍ਭੀਤਾਵ ਕੇਸਰੀ.

੧੩੬. ‘‘ਅਞ੍ਞੇ ਗਚ੍ਛਨ੍ਤਿ ਗੋਯਾਨਂ, ਅਞ੍ਞੇ ਪੁਬ੍ਬਵਿਦੇਹਕਂ [ਪੁਬ੍ਬਵਿਦੇਹਨਂ (ਸ੍ਯਾ. ਪੀ. ਕ.)];

ਅਞ੍ਞੇ ਚ ਉਤ੍ਤਰਕੁਰੁਂ, ਸਕਂ ਬਲਮਵਸ੍ਸਿਤਾ [ਬਲਮਪਸ੍ਸਿਤਾ (ਸ੍ਯਾ. ਪੀ. ਕ.)].

੧੩੭. ‘‘ਤਤੋ ਪਿਣ੍ਡਂ ਆਹਰਿਤ੍ਵਾ, ਪਰਿਭੁਞ੍ਜਨ੍ਤਿ ਏਕਤੋ;

ਸਬ੍ਬੇਸਂ ਪਕ੍ਕਮਨ੍ਤਾਨਂ, ਉਗ੍ਗਤੇਜਾਨ ਤਾਦਿਨਂ.

੧੩੮. ‘‘ਅਜਿਨਚਮ੍ਮਸਦ੍ਦੇਨ, ਵਨਂ ਸਦ੍ਦਾਯਤੇ ਤਦਾ;

ਏਦਿਸਾ ਤੇ ਮਹਾਵੀਰ, ਸਿਸ੍ਸਾ ਉਗ੍ਗਤਪਾ ਮਮ.

੧੩੯. ‘‘ਪਰਿਵੁਤੋ ਅਹਂ ਤੇਹਿ, ਵਸਾਮਿ ਮਮ ਅਸ੍ਸਮੇ;

ਤੋਸਿਤਾ ਸਕਕਮ੍ਮੇਨ, ਵਿਨੀਤਾਪਿ ਸਮਾਗਤਾ.

੧੪੦. ‘‘ਆਰਾਧਯਿਂਸੁ ਮਂ ਏਤੇ, ਸਕਕਮ੍ਮਾਭਿਲਾਸਿਨੋ;

ਸੀਲਵਨ੍ਤੋ ਚ ਨਿਪਕਾ, ਅਪ੍ਪਮਞ੍ਞਾਸੁ ਕੋਵਿਦਾ.

੧੪੧. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਸਮਯਂ ਸਂਵਿਦਿਤ੍ਵਾਨ, ਉਪਗਚ੍ਛਿ ਵਿਨਾਯਕੋ.

੧੪੨. ‘‘ਉਪਗਨ੍ਤ੍ਵਾਨ ਸਮ੍ਬੁਦ੍ਧੋ, ਆਤਾਪੀ ਨਿਪਕੋ ਮੁਨਿ;

ਪਤ੍ਤਂ ਪਗ੍ਗਯ੍ਹ ਸਮ੍ਬੁਦ੍ਧੋ, ਭਿਕ੍ਖਾਯ ਮਮੁਪਾਗਮਿ.

੧੪੩. ‘‘ਉਪਾਗਤਂ ਮਹਾਵੀਰਂ, ਜਲਜੁਤ੍ਤਮਨਾਯਕਂ;

ਤਿਣਸਨ੍ਥਰਂ [ਤਿਣਤ੍ਥਰਂ (ਸ੍ਯਾ.), ਤਿਣਤ੍ਥਤਂ (ਕ.)] ਪਞ੍ਞਾਪੇਤ੍ਵਾ, ਸਾਲਪੁਪ੍ਫੇਹਿ ਓਕਿਰਿਂ.

੧੪੪. ‘‘ਨਿਸਾਦੇਤ੍ਵਾਨ [ਨਿਸੀਦੇਤ੍ਵਾਨ (ਸੀ.), ਨਿਸੀਦਿਤ੍ਵਾਨ (ਸ੍ਯਾ. ਪੀ.)] ਸਮ੍ਬੁਦ੍ਧਂ, ਹਟ੍ਠੋ ਸਂਵਿਗ੍ਗਮਾਨਸੋ;

ਖਿਪ੍ਪਂ ਪਬ੍ਬਤਮਾਰੁਯ੍ਹ, ਅਗਲ਼ੁਂ [ਅਗਰੁਂ (ਸੀ.)] ਅਗ੍ਗਹਿਂ ਅਹਂ.

੧੪੫. ‘‘ਕੁਮ੍ਭਮਤ੍ਤਂ ਗਹੇਤ੍ਵਾਨ, ਪਨਸਂ ਦੇਵਗਨ੍ਧਿਕਂ;

ਖਨ੍ਧੇ ਆਰੋਪਯਿਤ੍ਵਾਨ, ਉਪਗਚ੍ਛਿਂ ਵਿਨਾਯਕਂ.

੧੪੬. ‘‘ਫਲਂ ਬੁਦ੍ਧਸ੍ਸ ਦਤ੍ਵਾਨ, ਅਗਲ਼ੁਂ ਅਨੁਲਿਮ੍ਪਹਂ;

ਪਸਨ੍ਨਚਿਤ੍ਤੋ ਸੁਮਨੋ, ਬੁਦ੍ਧਸੇਟ੍ਠਂ ਅਵਨ੍ਦਿਹਂ.

੧੪੭. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਇਸਿਮਜ੍ਝੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੧੪੮. ‘‘‘ਯੋ ਮੇ ਫਲਞ੍ਚ ਅਗਲ਼ੁਂ, ਆਸਨਞ੍ਚ ਅਦਾਸਿ ਮੇ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੧੪੯. ‘‘‘ਗਾਮੇ ਵਾ ਯਦਿ ਵਾਰਞ੍ਞੇ, ਪਬ੍ਭਾਰੇਸੁ ਗੁਹਾਸੁ ਵਾ;

ਇਮਸ੍ਸ ਚਿਤ੍ਤਮਞ੍ਞਾਯ, ਨਿਬ੍ਬਤ੍ਤਿਸ੍ਸਤਿ ਭੋਜਨਂ.

੧੫੦. ‘‘‘ਦੇਵਲੋਕੇ ਮਨੁਸ੍ਸੇ ਵਾ, ਉਪਪਨ੍ਨੋ ਅਯਂ ਨਰੋ;

ਭੋਜਨੇਹਿ ਚ ਵਤ੍ਥੇਹਿ, ਪਰਿਸਂ ਤਪ੍ਪਯਿਸ੍ਸਤਿ.

੧੫੧. ‘‘‘ਉਪਪਜ੍ਜਤਿ ਯਂ ਯੋਨਿਂ, ਦੇਵਤ੍ਤਂ ਅਥ ਮਾਨੁਸਂ;

ਅਕ੍ਖੋਭਭੋਗੋ ਹੁਤ੍ਵਾਨ, ਸਂਸਰਿਸ੍ਸਤਿਯਂ ਨਰੋ.

੧੫੨. ‘‘‘ਤਿਂਸਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਤਿ;

ਸਹਸ੍ਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਭਵਿਸ੍ਸਤਿ.

੧੫੩. ‘‘‘ਏਕਸਤ੍ਤਤਿਕ੍ਖਤ੍ਤੁਞ੍ਚ, ਦੇਵਰਜ੍ਜਂ ਕਰਿਸ੍ਸਤਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੧੫੪. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੧੫੫. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ [(ਉਪਸੀਵੋ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ) (ਸ੍ਯਾ.)];

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਿਸ੍ਸਤਿਨਾਸਵੋ’.

੧੫੬. ‘‘ਸੁਲਦ੍ਧਲਾਭੋ ਲਦ੍ਧੋ ਮੇ, ਯੋਹਂ ਅਦ੍ਦਕ੍ਖਿਂ ਨਾਯਕਂ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੧੫੭. ‘‘ਗਾਮੇ ਵਾ ਯਦਿ ਵਾਰਞ੍ਞੇ, ਪਬ੍ਭਾਰੇਸੁ ਗੁਹਾਸੁ ਵਾ;

ਮਮ ਸਙ੍ਕਪ੍ਪਮਞ੍ਞਾਯ, ਭੋਜਨਂ ਹੋਤਿ ਮੇ ਸਦਾ.

੧੫੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੫੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੬੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਪਸੀਵੋ [ਉਪਸਿਵੋ (ਕ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਉਪਸੀਵਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.