੪. ਧੋਤਕਤ੍ਥੇਰਅਪਦਾਨਂ

੭੨. ‘‘ਗਙ੍ਗਾ ਭਾਗੀਰਥੀ ਨਾਮ, ਹਿਮਵਨ੍ਤਾ ਪਭਾਵਿਤਾ [ਹਿਮਵਨ੍ਤਪ੍ਪਭਾਵਿਤਾ (ਸੀ.)];

ਹਂਸਵਤਿਯਾ ਦ੍ਵਾਰੇਨ, ਅਨੁਸਨ੍ਦਤਿ ਤਾਵਦੇ.

੭੩. ‘‘ਸੋਭਿਤੋ ਨਾਮ ਆਰਾਮੋ, ਗਙ੍ਗਾਕੂਲੇ ਸੁਮਾਪਿਤੋ;

ਤਤ੍ਥ ਪਦੁਮੁਤ੍ਤਰੋ ਬੁਦ੍ਧੋ, ਵਸਤੇ ਲੋਕਨਾਯਕੋ.

੭੪. ‘‘ਤਿਦਸੇਹਿ ਯਥਾ ਇਨ੍ਦੋ, ਮਨੁਜੇਹਿ ਪੁਰਕ੍ਖਤੋ;

ਨਿਸੀਦਿ ਤਤ੍ਥ ਭਗਵਾ, ਅਸਮ੍ਭੀਤੋਵ ਕੇਸਰੀ.

੭੫. ‘‘ਨਗਰੇ ਹਂਸਵਤਿਯਾ, ਵਸਾਮਿ [ਅਹੋਸਿਂ (ਸ੍ਯਾ.)] ਬ੍ਰਾਹ੍ਮਣੋ ਅਹਂ;

ਛਲ਼ਙ੍ਗੋ ਨਾਮ ਨਾਮੇਨ, ਏਵਂਨਾਮੋ ਮਹਾਮੁਨਿ.

੭੬. ‘‘ਅਟ੍ਠਾਰਸ ਸਿਸ੍ਸਸਤਾ, ਪਰਿਵਾਰੇਨ੍ਤਿ ਮਂ ਤਦਾ;

ਤੇਹਿ ਸਿਸ੍ਸੇਹਿ ਸਮਿਤੋ, ਗਙ੍ਗਾਤੀਰਂ ਉਪਾਗਮਿਂ.

੭੭. ‘‘ਤਤ੍ਥਦ੍ਦਸਾਸਿਂ ਸਮਣੇ, ਨਿਕ੍ਕੁਹੇ ਧੋਤਪਾਪਕੇ;

ਭਾਗੀਰਥਿਂ ਤਰਨ੍ਤੇਹਂ [ਤਰਨ੍ਤੋਹਂ (ਸ੍ਯਾ. ਪੀ.)], ਏਵਂ ਚਿਨ੍ਤੇਸਿ ਤਾਵਦੇ.

੭੮. ‘‘ਸਾਯਂ ਪਾਤਂ [ਸਾਯਪਾਤਂ (ਪੀ.)] ਤਰਨ੍ਤਾਮੇ, ਬੁਦ੍ਧਪੁਤ੍ਤਾ ਮਹਾਯਸਾ;

ਵਿਹੇਸਯਨ੍ਤਿ ਅਤ੍ਤਾਨਂ, ਤੇਸਂ ਅਤ੍ਤਾ ਵਿਹਞ੍ਞਤਿ.

੭੯. ‘‘ਸਦੇਵਕਸ੍ਸ ਲੋਕਸ੍ਸ, ਬੁਦ੍ਧੋ ਅਗ੍ਗੋ ਪਵੁਚ੍ਚਤਿ;

ਨਤ੍ਥਿ ਮੇ ਦਕ੍ਖਿਣੇ ਕਾਰਂ, ਗਤਿਮਗ੍ਗਵਿਸੋਧਨਂ.

੮੦. ‘‘ਯਂਨੂਨ ਬੁਦ੍ਧਸੇਟ੍ਠਸ੍ਸ, ਸੇਤੁਂ ਗਙ੍ਗਾਯ ਕਾਰਯੇ;

ਕਾਰਾਪੇਤ੍ਵਾ ਇਮਂ ਕਮ੍ਮਂ [ਸੇਤੁਂ (ਸ੍ਯਾ.)], ਸਨ੍ਤਰਾਮਿ ਇਮਂ ਭਵਂ.

੮੧. ‘‘ਸਤਸਹਸ੍ਸਂ ਦਤ੍ਵਾਨ, ਸੇਤੁਂ ਕਾਰਾਪਯਿਂ ਅਹਂ;

ਸਦ੍ਦਹਨ੍ਤੋ ਕਤਂ ਕਾਰਂ, ਵਿਪੁਲਂ ਮੇ ਭਵਿਸ੍ਸਤਿ.

੮੨. ‘‘ਕਾਰਾਪੇਤ੍ਵਾਨ ਤਂ ਸੇਤੁਂ, ਉਪੇਸਿਂ ਲੋਕਨਾਯਕਂ;

ਸਿਰਸਿ ਅਞ੍ਜਲਿਂ ਕਤ੍ਵਾ, ਇਮਂ ਵਚਨਮਬ੍ਰਵਿਂ.

੮੩. ‘‘‘ਸਤਸਹਸ੍ਸਸ੍ਸ ਵਯਂ [ਵਯਂ ਸਤਸਹਸ੍ਸਂਵ (ਕ.)], ਦਤ੍ਵਾ [ਕਤ੍ਵਾ (ਸੀ. ਪੀ.)] ਕਾਰਾਪਿਤੋ ਮਯਾ;

ਤਵਤ੍ਥਾਯ ਮਹਾਸੇਤੁ, ਪਟਿਗ੍ਗਣ੍ਹ ਮਹਾਮੁਨੇ.

੮੪. ‘‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੮੫. ‘‘‘ਯੋ ਮੇ ਸੇਤੁਂ ਅਕਾਰੇਸਿ, ਪਸਨ੍ਨੋ ਸੇਹਿ ਪਾਣਿਭਿ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

(ਸੇਤੁਦਾਨਆਨਿਸਂਸੋ)

੮੬. ‘‘‘ਦਰਿਤੋ ਪਬ੍ਬਤਤੋ ਵਾ, ਰੁਕ੍ਖਤੋ ਪਤਿਤੋਪਿਯਂ;

ਚੁਤੋਪਿ ਲਚ੍ਛਤੀ ਠਾਨਂ, ਸੇਤੁਦਾਨਸ੍ਸਿਦਂ ਫਲਂ.

੮੭. ‘‘‘ਵਿਰੂਲ਼੍ਹਮੂਲਸਨ੍ਤਾਨਂ, ਨਿਗ੍ਰੋਧਮਿਵ ਮਾਲੁਤੋ;

ਅਮਿਤ੍ਤਾ ਨਪ੍ਪਸਹਨ੍ਤਿ, ਸੇਤੁਦਾਨਸ੍ਸਿਦਂ ਫਲਂ.

੮੮. ‘‘‘ਨਾਸ੍ਸ ਚੋਰਾ ਪਸਹਨ੍ਤਿ, ਨਾਤਿਮਞ੍ਞਨ੍ਤਿ ਖਤ੍ਤਿਯਾ;

ਸਬ੍ਬੇ ਤਰਿਸ੍ਸਤਾਮਿਤ੍ਤੇ, ਸੇਤੁਦਾਨਸ੍ਸਿਦਂ ਫਲਂ.

੮੯. ‘‘‘ਅਬ੍ਭੋਕਾਸਗਤਂ ਸਨ੍ਤਂ, ਕਠਿਨਾਤਪਤਾਪਿਤਂ;

ਪੁਞ੍ਞਕਮ੍ਮੇਨ ਸਂਯੁਤ੍ਤਂ, ਨ ਭਵਿਸ੍ਸਤਿ ਵੇਦਨਾ [ਤਾਵਦੇ (ਕ.)].

੯੦. ‘‘‘ਦੇਵਲੋਕੇ ਮਨੁਸ੍ਸੇ ਵਾ, ਹਤ੍ਥਿਯਾਨਂ ਸੁਨਿਮ੍ਮਿਤਂ;

ਤਸ੍ਸ ਸਙ੍ਕਪ੍ਪਮਞ੍ਞਾਯ, ਨਿਬ੍ਬਤ੍ਤਿਸ੍ਸਤਿ ਤਾਵਦੇ.

੯੧. ‘‘‘ਸਹਸ੍ਸਸ੍ਸਾ ਵਾਤਜਵਾ, ਸਿਨ੍ਧਵਾ ਸੀਘਵਾਹਨਾ;

ਸਾਯਂ ਪਾਤਂ ਉਪੇਸ੍ਸਨ੍ਤਿ, ਸੇਤੁਦਾਨਸ੍ਸਿਦਂ ਫਲਂ.

੯੨. ‘‘‘ਆਗਨ੍ਤ੍ਵਾਨ ਮਨੁਸ੍ਸਤ੍ਤਂ, ਸੁਖਿਤੋਯਂ ਭਵਿਸ੍ਸਤਿ;

ਵੇਹਾਸਂ [ਇਹਾਪਿ (ਸੀ. ਸ੍ਯਾ. ਪੀ.)] ਮਨੁਜਸ੍ਸੇਵ, ਹਤ੍ਥਿਯਾਨਂ ਭਵਿਸ੍ਸਤਿ.

੯੩. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੯੪. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ’.

੯੫. ‘‘ਅਹੋ ਮੇ ਸੁਕਤਂ ਕਮ੍ਮਂ, ਜਲਜੁਤ੍ਤਮਨਾਮਕੇ;

ਤਤ੍ਥ ਕਾਰਂ ਕਰਿਤ੍ਵਾਨ, ਪਤ੍ਤੋਹਂ ਆਸਵਕ੍ਖਯਂ.

੯੬. ‘‘ਪਧਾਨਂ ਪਹਿਤਤ੍ਤੋਮ੍ਹਿ, ਉਪਸਨ੍ਤੋ ਨਿਰੂਪਧਿ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੯੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੯੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੯੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਧੋਤਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਧੋਤਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.