੯. ਸੋਣਕੋਟਿਵੀਸਤ੍ਥੇਰਅਪਦਾਨਂ

੪੯. ‘‘ਵਿਪਸ੍ਸਿਨੋ ਪਾਵਚਨੇ, ਏਕਂ ਲੇਣਂ ਮਯਾ ਕਤਂ;

ਚਾਤੁਦ੍ਦਿਸਸ੍ਸ ਸਙ੍ਘਸ੍ਸ, ਬਨ੍ਧੁਮਾਰਾਜਧਾਨਿਯਾ.

੫੦. ‘‘ਦੁਸ੍ਸੇਹਿ ਭੂਮਿਂ ਲੇਣਸ੍ਸ, ਸਨ੍ਥਰਿਤ੍ਵਾ ਪਰਿਚ੍ਚਜਿਂ;

ਉਦਗ੍ਗਚਿਤ੍ਤੋ ਸੁਮਨੋ, ਅਕਾਸਿਂ ਪਣਿਧਿਂ ਤਦਾ.

੫੧. ‘‘ਆਰਾਧਯੇਯ੍ਯਂ ਸਮ੍ਬੁਦ੍ਧਂ, ਪਬ੍ਬਜ੍ਜਞ੍ਚ ਲਭੇਯ੍ਯਹਂ;

ਅਨੁਤ੍ਤਰਞ੍ਚ ਨਿਬ੍ਬਾਨਂ, ਫੁਸੇਯ੍ਯਂ ਸਨ੍ਤਿਮੁਤ੍ਤਮਂ.

੫੨. ‘‘ਤੇਨੇਵ ਸੁਕ੍ਕਮੂਲੇਨ, ਕਪ੍ਪੇ [ਕਪ੍ਪਂ (ਸੀ.), ਕਪ੍ਪ (ਕ.)] ਨਵੁਤਿ ਸਂਸਰਿਂ;

ਦੇਵਭੂਤੋ ਮਨੁਸ੍ਸੋ ਚ, ਕਤਪੁਞ੍ਞੋ ਵਿਰੋਚਹਂ.

੫੩. ‘‘ਤਤੋ ਕਮ੍ਮਾਵਸੇਸੇਨ, ਇਧ ਪਚ੍ਛਿਮਕੇ ਭਵੇ;

ਚਮ੍ਪਾਯਂ ਅਗ੍ਗਸੇਟ੍ਠਿਸ੍ਸ, ਜਾਤੋਮ੍ਹਿ ਏਕਪੁਤ੍ਤਕੋ.

੫੪. ‘‘ਜਾਤਮਤ੍ਤਸ੍ਸ ਮੇ ਸੁਤ੍ਵਾ, ਪਿਤੁ ਛਨ੍ਦੋ ਅਯਂ ਅਹੁ;

ਦਦਾਮਹਂ ਕੁਮਾਰਸ੍ਸ, ਵੀਸਕੋਟੀ ਅਨੂਨਕਾ.

੫੫. ‘‘ਚਤੁਰਙ੍ਗੁਲਾ ਚ ਮੇ ਲੋਮਾ, ਜਾਤਾ ਪਾਦਤਲੇ ਉਭੋ;

ਸੁਖੁਮਾ ਮੁਦੁਸਮ੍ਫਸ੍ਸਾ, ਤੂਲਾਪਿਚੁਸਮਾ ਸੁਭਾ.

੫੬. ‘‘ਅਤੀਤਾ ਨਵੁਤਿ ਕਪ੍ਪਾ, ਅਯਂ ਏਕੋ ਚ ਉਤ੍ਤਰਿ;

ਨਾਭਿਜਾਨਾਮਿ ਨਿਕ੍ਖਿਤ੍ਤੇ, ਪਾਦੇ ਭੂਮ੍ਯਾ ਅਸਨ੍ਥਤੇ.

੫੭. ‘‘ਆਰਾਧਿਤੋ ਮੇ ਸਮ੍ਬੁਦ੍ਧੋ, ਪਬ੍ਬਜਿਂ ਅਨਗਾਰਿਯਂ;

ਅਰਹਤ੍ਤਞ੍ਚ ਮੇ ਪਤ੍ਤਂ, ਸੀਤਿਭੂਤੋਮ੍ਹਿ ਨਿਬ੍ਬੁਤੋ.

੫੮. ‘‘ਅਗ੍ਗੋ ਆਰਦ੍ਧਵੀਰਿਯਾਨਂ, ਨਿਦ੍ਦਿਟ੍ਠੋ ਸਬ੍ਬਦਸ੍ਸਿਨਾ;

ਖੀਣਾਸਵੋਮ੍ਹਿ ਅਰਹਾ, ਛਲ਼ਭਿਞ੍ਞੋ ਮਹਿਦ੍ਧਿਕੋ.

੫੯. ‘‘ਏਕਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਲੇਣਦਾਨਸ੍ਸਿਦਂ ਫਲਂ.

੬੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੬੧. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੬੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

੬੩. ‘‘ਥੇਰੋ ਕੋਟਿਵੀਸੋ [ਕੋਟਿਵਿਸੋ (ਸ੍ਯਾ. ਕ.), ਕੋਲ਼ਿਵਿਸੋ (ਅਞ੍ਞਟ੍ਠਾਨੇਸੁ)] ਸੋਣੋ, ਭਿਕ੍ਖੁਸਙ੍ਘਸ੍ਸ ਅਗ੍ਗਤੋ;

ਪਞ੍ਹਂ ਪੁਟ੍ਠੋ ਵਿਯਾਕਾਸਿ, ਅਨੋਤਤ੍ਤੇ ਮਹਾਸਰੇ’’ਤਿ.

ਇਤ੍ਥਂ ਸੁਦਂ ਆਯਸ੍ਮਾ ਸੋਣੋ ਕੋਟਿਵੀਸੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੋਣਕੋਟਿਵੀਸਤ੍ਥੇਰਸ੍ਸਾਪਦਾਨਂ ਨਵਮਂ.