੩੯. ਅਵਟਫਲਵਗ੍ਗੋ

੧. ਅਵਟਫਲਦਾਯਕਤ੍ਥੇਰਅਪਦਾਨਂ

੧. ‘‘ਸਤਰਂਸਿ ਨਾਮ ਭਗਵਾ, ਸਯਮ੍ਭੂ ਅਪਰਾਜਿਤੋ;

ਵਿਵੇਕਕਾਮੋ ਸਮ੍ਬੁਦ੍ਧੋ, ਗੋਚਰਾਯਾਭਿਨਿਕ੍ਖਮਿ.

੨. ‘‘ਫਲਹਤ੍ਥੋ ਅਹਂ ਦਿਸ੍ਵਾ, ਉਪਗਚ੍ਛਿਂ ਨਰਾਸਭਂ;

ਪਸਨ੍ਨਚਿਤ੍ਤੋ ਸੁਮਨੋ, ਅਵਟਂ [ਅਵਣ੍ਟਂ (ਸੀ.), ਅਮ੍ਬਟਂ (ਸ੍ਯਾ.)] ਅਦਦਿਂ ਫਲਂ.

੩. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਫਲਮਦਦਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੪. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੫. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੬. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਵਟਫਲਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਵਟਫਲਦਾਯਕਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਲਬੁਜਦਾਯਕਤ੍ਥੇਰਅਪਦਾਨਂ

੭. ‘‘ਨਗਰੇ ਬਨ੍ਧੁਮਤਿਯਾ, ਆਸਿਂ ਆਰਾਮਿਕੋ ਤਦਾ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਗਚ੍ਛਨ੍ਤਂ ਅਨਿਲਞ੍ਜਸੇ.

੮. ‘‘ਲਬੁਜਸ੍ਸ ਫਲਂ ਗਯ੍ਹ, ਬੁਦ੍ਧਸੇਟ੍ਠਸ੍ਸਦਾਸਹਂ;

ਆਕਾਸੇ ਠਿਤਕੋ ਸਨ੍ਤੋ, ਪਟਿਗਣ੍ਹਿ ਮਹਾਯਸੋ.

੯. ‘‘ਵਿਤ੍ਤਿਸਞ੍ਜਨਨਂ ਮਯ੍ਹਂ, ਦਿਟ੍ਠਧਮ੍ਮਸੁਖਾਵਹਂ;

ਫਲਂ ਬੁਦ੍ਧਸ੍ਸ ਦਤ੍ਵਾਨ, ਵਿਪ੍ਪਸਨ੍ਨੇਨ ਚੇਤਸਾ.

੧੦. ‘‘ਅਧਿਗਚ੍ਛਿਂ ਤਦਾ ਪੀਤਿਂ, ਵਿਪੁਲਞ੍ਚ ਸੁਖੁਤ੍ਤਮਂ;

ਉਪ੍ਪਜ੍ਜਤੇਵ ਰਤਨਂ, ਨਿਬ੍ਬਤ੍ਤਸ੍ਸ ਤਹਿਂ ਤਹਿਂ.

੧੧. ‘‘ਏਕਨਵੁਤਿਤੋ ਕਪ੍ਪੇ, ਯਂ ਫਲਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੧੨. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੩. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਲਬੁਜਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਲਬੁਜਦਾਯਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਉਦੁਮ੍ਬਰਫਲਦਾਯਕਤ੍ਥੇਰਅਪਦਾਨਂ

੧੫. ‘‘ਵਿਨਤਾਨਦਿਯਾ ਤੀਰੇ, ਵਿਹਾਸਿ ਪੁਰਿਸੁਤ੍ਤਮੋ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਏਕਗ੍ਗਂ ਸੁਸਮਾਹਿਤਂ.

੧੬. ‘‘ਤਸ੍ਮਿਂ ਪਸਨ੍ਨਮਾਨਸੋ, ਕਿਲੇਸਮਲਧੋਵਨੇ;

ਉਦੁਮ੍ਬਰਫਲਂ ਗਯ੍ਹ, ਬੁਦ੍ਧਸੇਟ੍ਠਸ੍ਸਦਾਸਹਂ.

੧੭. ‘‘ਏਕਨਵੁਤਿਤੋ ਕਪ੍ਪੇ, ਯਂ ਫਲਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੧੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਦੁਮ੍ਬਰਫਲਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਉਦੁਮ੍ਬਰਫਲਦਾਯਕਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਪਿਲਕ੍ਖਫਲਦਾਯਕਤ੍ਥੇਰਅਪਦਾਨਂ

੨੧. ‘‘ਵਨਨ੍ਤਰੇ ਬੁਦ੍ਧਂ ਦਿਸ੍ਵਾ, ਅਤ੍ਥਦਸ੍ਸਿਂ ਮਹਾਯਸਂ;

ਪਸਨ੍ਨਚਿਤ੍ਤੋ ਸੁਮਨੋ, ਪਿਲਕ੍ਖਸ੍ਸਾਦਦਿਂ ਫਲਂ [ਪਿਲਕ੍ਖਸ੍ਸ ਫਲਂ ਅਦਂ (ਸੀ.), ਪਿਲਕ੍ਖੁਸ੍ਸ ਫਲਂ ਅਦਂ (ਸ੍ਯਾ.)].

੨੨. ‘‘ਅਟ੍ਠਾਰਸੇ ਕਪ੍ਪਸਤੇ, ਯਂ ਫਲਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੨੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਿਲਕ੍ਖਫਲਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਿਲਕ੍ਖਫਲਦਾਯਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਫਾਰੁਸਫਲਦਾਯਕਤ੍ਥੇਰਅਪਦਾਨਂ

੨੬. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਆਹੁਤੀਨਂ ਪਟਿਗ੍ਗਹਂ;

ਰਥਿਯਂ ਪਟਿਪਜ੍ਜਨ੍ਤਂ, ਫਾਰੁਸਫਲਮਦਾਸਹਂ.

੨੭. ‘‘ਏਕਨਵੁਤਿਤੋ ਕਪ੍ਪੇ, ਯਂ ਫਲਮਦਦਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੨੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਫਾਰੁਸਫਲਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਫਾਰੁਸਫਲਦਾਯਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਵਲ੍ਲਿਫਲਦਾਯਕਤ੍ਥੇਰਅਪਦਾਨਂ

੩੧. ‘‘ਸਬ੍ਬੇ ਜਨਾ ਸਮਾਗਮ੍ਮ, ਅਗਮਿਂਸੁ ਵਨਂ ਤਦਾ;

ਫਲਮਨ੍ਵੇਸਮਾਨਾ ਤੇ, ਅਲਭਿਂਸੁ ਫਲਂ ਤਦਾ.

੩੨. ‘‘ਤਤ੍ਥਦ੍ਦਸਾਸਿਂ ਸਮ੍ਬੁਦ੍ਧਂ, ਸਯਮ੍ਭੁਂ ਅਪਰਾਜਿਤਂ;

ਪਸਨ੍ਨਚਿਤ੍ਤੋ ਸੁਮਨੋ, ਵਲ੍ਲਿਫਲਮਦਾਸਹਂ.

੩੩. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਫਲਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੩੪. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੩੫. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਵਲ੍ਲਿਫਲਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਵਲ੍ਲਿਫਲਦਾਯਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਕਦਲਿਫਲਦਾਯਕਤ੍ਥੇਰਅਪਦਾਨਂ

੩੭. ‘‘ਕਣਿਕਾਰਂਵ ਜਲਿਤਂ, ਪੁਣ੍ਣਮਾਯੇਵ [ਪੁਣ੍ਣਮਾਸੇਵ (ਸੀ. ਕ.)] ਚਨ੍ਦਿਮਂ;

ਜਲਨ੍ਤਂ ਦੀਪਰੁਕ੍ਖਂਵ, ਅਦ੍ਦਸਂ ਲੋਕਨਾਯਕਂ.

੩੮. ‘‘ਕਦਲਿਫਲਂ ਪਗ੍ਗਯ੍ਹ, ਅਦਾਸਿਂ ਸਤ੍ਥੁਨੋ ਅਹਂ;

ਪਸਨ੍ਨਚਿਤ੍ਤੋ ਸੁਮਨੋ, ਵਨ੍ਦਿਤ੍ਵਾਨ ਅਪਕ੍ਕਮਿਂ.

੩੯. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਫਲਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੪੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੪੧. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕਦਲਿਫਲਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕਦਲਿਫਲਦਾਯਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਪਨਸਫਲਦਾਯਕਤ੍ਥੇਰਅਪਦਾਨਂ

੪੩. ‘‘ਅਜ੍ਜੁਨੋ ਨਾਮ ਸਮ੍ਬੁਦ੍ਧੋ, ਹਿਮਵਨ੍ਤੇ ਵਸੀ ਤਦਾ;

ਚਰਣੇਨ ਚ ਸਮ੍ਪਨ੍ਨੋ, ਸਮਾਧਿਕੁਸਲੋ ਮੁਨਿ.

੪੪. ‘‘ਕੁਮ੍ਭਮਤ੍ਤਂ ਗਹੇਤ੍ਵਾਨ, ਪਨਸਂ ਜੀਵਜੀਵਕਂ [ਦੇਵਗਨ੍ਧਿਕਂ (੪੧ ਵਗ੍ਗੇ, ੫ ਅਪਦਾਨੇ)];

ਛਤ੍ਤਪਣ੍ਣੇ ਠਪੇਤ੍ਵਾਨ, ਅਦਾਸਿਂ ਸਤ੍ਥੁਨੋ ਅਹਂ.

੪੫. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਫਲਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੪੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੪੭. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਨਸਫਲਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਨਸਫਲਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਸੋਣਕੋਟਿਵੀਸਤ੍ਥੇਰਅਪਦਾਨਂ

੪੯. ‘‘ਵਿਪਸ੍ਸਿਨੋ ਪਾਵਚਨੇ, ਏਕਂ ਲੇਣਂ ਮਯਾ ਕਤਂ;

ਚਾਤੁਦ੍ਦਿਸਸ੍ਸ ਸਙ੍ਘਸ੍ਸ, ਬਨ੍ਧੁਮਾਰਾਜਧਾਨਿਯਾ.

੫੦. ‘‘ਦੁਸ੍ਸੇਹਿ ਭੂਮਿਂ ਲੇਣਸ੍ਸ, ਸਨ੍ਥਰਿਤ੍ਵਾ ਪਰਿਚ੍ਚਜਿਂ;

ਉਦਗ੍ਗਚਿਤ੍ਤੋ ਸੁਮਨੋ, ਅਕਾਸਿਂ ਪਣਿਧਿਂ ਤਦਾ.

੫੧. ‘‘ਆਰਾਧਯੇਯ੍ਯਂ ਸਮ੍ਬੁਦ੍ਧਂ, ਪਬ੍ਬਜ੍ਜਞ੍ਚ ਲਭੇਯ੍ਯਹਂ;

ਅਨੁਤ੍ਤਰਞ੍ਚ ਨਿਬ੍ਬਾਨਂ, ਫੁਸੇਯ੍ਯਂ ਸਨ੍ਤਿਮੁਤ੍ਤਮਂ.

੫੨. ‘‘ਤੇਨੇਵ ਸੁਕ੍ਕਮੂਲੇਨ, ਕਪ੍ਪੇ [ਕਪ੍ਪਂ (ਸੀ.), ਕਪ੍ਪ (ਕ.)] ਨਵੁਤਿ ਸਂਸਰਿਂ;

ਦੇਵਭੂਤੋ ਮਨੁਸ੍ਸੋ ਚ, ਕਤਪੁਞ੍ਞੋ ਵਿਰੋਚਹਂ.

੫੩. ‘‘ਤਤੋ ਕਮ੍ਮਾਵਸੇਸੇਨ, ਇਧ ਪਚ੍ਛਿਮਕੇ ਭਵੇ;

ਚਮ੍ਪਾਯਂ ਅਗ੍ਗਸੇਟ੍ਠਿਸ੍ਸ, ਜਾਤੋਮ੍ਹਿ ਏਕਪੁਤ੍ਤਕੋ.

੫੪. ‘‘ਜਾਤਮਤ੍ਤਸ੍ਸ ਮੇ ਸੁਤ੍ਵਾ, ਪਿਤੁ ਛਨ੍ਦੋ ਅਯਂ ਅਹੁ;

ਦਦਾਮਹਂ ਕੁਮਾਰਸ੍ਸ, ਵੀਸਕੋਟੀ ਅਨੂਨਕਾ.

੫੫. ‘‘ਚਤੁਰਙ੍ਗੁਲਾ ਚ ਮੇ ਲੋਮਾ, ਜਾਤਾ ਪਾਦਤਲੇ ਉਭੋ;

ਸੁਖੁਮਾ ਮੁਦੁਸਮ੍ਫਸ੍ਸਾ, ਤੂਲਾਪਿਚੁਸਮਾ ਸੁਭਾ.

੫੬. ‘‘ਅਤੀਤਾ ਨਵੁਤਿ ਕਪ੍ਪਾ, ਅਯਂ ਏਕੋ ਚ ਉਤ੍ਤਰਿ;

ਨਾਭਿਜਾਨਾਮਿ ਨਿਕ੍ਖਿਤ੍ਤੇ, ਪਾਦੇ ਭੂਮ੍ਯਾ ਅਸਨ੍ਥਤੇ.

੫੭. ‘‘ਆਰਾਧਿਤੋ ਮੇ ਸਮ੍ਬੁਦ੍ਧੋ, ਪਬ੍ਬਜਿਂ ਅਨਗਾਰਿਯਂ;

ਅਰਹਤ੍ਤਞ੍ਚ ਮੇ ਪਤ੍ਤਂ, ਸੀਤਿਭੂਤੋਮ੍ਹਿ ਨਿਬ੍ਬੁਤੋ.

੫੮. ‘‘ਅਗ੍ਗੋ ਆਰਦ੍ਧਵੀਰਿਯਾਨਂ, ਨਿਦ੍ਦਿਟ੍ਠੋ ਸਬ੍ਬਦਸ੍ਸਿਨਾ;

ਖੀਣਾਸਵੋਮ੍ਹਿ ਅਰਹਾ, ਛਲ਼ਭਿਞ੍ਞੋ ਮਹਿਦ੍ਧਿਕੋ.

੫੯. ‘‘ਏਕਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਲੇਣਦਾਨਸ੍ਸਿਦਂ ਫਲਂ.

੬੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੬੧. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੬੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

੬੩. ‘‘ਥੇਰੋ ਕੋਟਿਵੀਸੋ [ਕੋਟਿਵਿਸੋ (ਸ੍ਯਾ. ਕ.), ਕੋਲ਼ਿਵਿਸੋ (ਅਞ੍ਞਟ੍ਠਾਨੇਸੁ)] ਸੋਣੋ, ਭਿਕ੍ਖੁਸਙ੍ਘਸ੍ਸ ਅਗ੍ਗਤੋ;

ਪਞ੍ਹਂ ਪੁਟ੍ਠੋ ਵਿਯਾਕਾਸਿ, ਅਨੋਤਤ੍ਤੇ ਮਹਾਸਰੇ’’ਤਿ.

ਇਤ੍ਥਂ ਸੁਦਂ ਆਯਸ੍ਮਾ ਸੋਣੋ ਕੋਟਿਵੀਸੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੋਣਕੋਟਿਵੀਸਤ੍ਥੇਰਸ੍ਸਾਪਦਾਨਂ ਨਵਮਂ.

੧੦. ਪੁਬ੍ਬਕਮ੍ਮਪਿਲੋਤਿਕਬੁਦ੍ਧਅਪਦਾਨਂ

੬੪. ‘‘ਅਨੋਤਤ੍ਤਸਰਾਸਨ੍ਨੇ, ਰਮਣੀਯੇ ਸਿਲਾਤਲੇ;

ਨਾਨਾਰਤਨਪਜ੍ਜੋਤੇ, ਨਾਨਾਗਨ੍ਧਵਨਨ੍ਤਰੇ.

੬੫. ‘‘ਮਹਤਾ ਭਿਕ੍ਖੁਸਙ੍ਘੇਨ, ਪਰੇਤੋ [ਉਪੇਤੋ (ਉਦਾਨਟ੍ਠਕਥਾਯਂ ੪ ਵਗ੍ਗੇ, ੮ ਸੁਤ੍ਤੇ)] ਲੋਕਨਾਯਕੋ;

ਆਸੀਨੋ ਬ੍ਯਾਕਰੀ ਤਤ੍ਥ, ਪੁਬ੍ਬਕਮ੍ਮਾਨਿ ਅਤ੍ਤਨੋ.

੬੬. [ਸੁਣਾਥ ਭਿਕ੍ਖਵੇ ਮਯ੍ਹਂ, ਯਂ ਕਮ੍ਮਂ ਪਕਤਂ ਮਯਾ; ਏਕਂ ਅਰਞ੍ਞਿਕਂ ਭਿਕ੍ਖੁਂ, ਦਿਸ੍ਵਾ ਦਿਨ੍ਨਂ ਪਿਲੋਤਿਕਂ; ਪਤ੍ਥਿਤਂ ਪਠਮਂ ਬੁਦ੍ਧਂ, ਬੁਦ੍ਧਤ੍ਤਾਯ ਮਯਾ ਤਦਾ; ਪਿਲੋਤਿਯਸ੍ਸ ਕਮ੍ਮਸ੍ਸ, ਬੁਦ੍ਧਤ੍ਤੇਪਿ ਵਿਪਚ੍ਚਤਿ; ਗੋਪਾਲਕੋ ਪੁਰੇ ਆਸਿਂ, ਗਾਵਿਂ ਪਾਜੇਤਿ ਗੋਚਰਂ; ਪਿਵਨ੍ਤਿਂ ਉਦਕਂ ਆਵਿਲਂ, ਗਾਵਿਂ ਦਿਸ੍ਵਾ ਨਿਵਾਰਯਿਂ; ਤੇਨ ਕਮ੍ਮਵਿਪਾਕੇਨ, ਇਧ ਪਚ੍ਛਿਮਕੇ ਭਵੇ; ਵਿਪਾਸਿਤੋ ਯਦਿਚ੍ਛਕਂ, ਨ ਹਿ ਪਾਤੁਂ ਲਭਾਮਹਂ (ਸ੍ਯਾ.)] ‘‘ਸੁਣਾਥ ਭਿਕ੍ਖਵੋ ਮਯ੍ਹਂ, ਯਂ ਕਮ੍ਮਂ ਪਕਤਂ ਮਯਾ;

ਪਿਲੋਤਿਕਸ੍ਸ ਕਮ੍ਮਸ੍ਸ, ਬੁਦ੍ਧਤ੍ਤੇਪਿ ਵਿਪਚ੍ਚਤਿ [ਸੁਣਾਥ ਭਿਕ੍ਖਵੇ ਮਯ੍ਹਂ, ਯਂ ਕਮ੍ਮਂ ਪਕਤਂ ਮਯਾ; ਏਕਂ ਅਰਞ੍ਞਿਕਂ ਭਿਕ੍ਖੁਂ, ਦਿਸ੍ਵਾ ਦਿਨ੍ਨਂ ਪਿਲੋਤਿਕਂ; ਪਤ੍ਥਿਤਂ ਪਠਮਂ ਬੁਦ੍ਧਂ, ਬੁਦ੍ਧਤ੍ਤਾਯ ਮਯਾ ਤਦਾ; ਪਿਲੋਤਿਯਸ੍ਸ ਕਮ੍ਮਸ੍ਸ, ਬੁਦ੍ਧਤ੍ਤੇਪਿ ਵਿਪਚ੍ਚਤਿ; ਗੋਪਾਲਕੋ ਪੁਰੇ ਆਸਿਂ, ਗਾਵਿਂ ਪਾਜੇਤਿ ਗੋਚਰਂ; ਪਿਵਨ੍ਤਿਂ ਉਦਕਂ ਆਵਿਲਂ, ਗਾਵਿਂ ਦਿਸ੍ਵਾ ਨਿਵਾਰਯਿਂ; ਤੇਨ ਕਮ੍ਮਵਿਪਾਕੇਨ, ਇਧ ਪਚ੍ਛਿਮਕੇ ਭਵੇ; ਵਿਪਾਸਿਤੋ ਯਦਿਚ੍ਛਕਂ, ਨ ਹਿ ਪਾਤੁਂ ਲਭਾਮਹਂ (ਸ੍ਯਾ.)].

[੧]

੬੭. ‘‘ਮੁਨਾਲ਼ਿ ਨਾਮਹਂ ਧੁਤ੍ਤੋ, ਪੁਬ੍ਬੇ ਅਞ੍ਞਾਸੁ ਜਾਤਿਸੁ [ਅਞ੍ਞਾਯ ਜਾਤਿਯਾ (ਉਦਾਨ ਅਟ੍ਠ.)];

ਪਚ੍ਚੇਕਬੁਦ੍ਧਂ ਸੁਰਭਿਂ [ਸਰਭੁਂ (ਸੀ.)], ਅਬ੍ਭਾਚਿਕ੍ਖਿਂ ਅਦੂਸਕਂ.

੬੮. ‘‘ਤੇਨ ਕਮ੍ਮਵਿਪਾਕੇਨ, ਨਿਰਯੇ ਸਂਸਰਿਂ ਚਿਰਂ;

ਬਹੂਵਸ੍ਸਸਹਸ੍ਸਾਨਿ, ਦੁਕ੍ਖਂ ਵੇਦੇਸਿ ਵੇਦਨਂ.

੬੯. ‘‘ਤੇਨ ਕਮ੍ਮਾਵਸੇਸੇਨ, ਇਧ ਪਚ੍ਛਿਮਕੇ ਭਵੇ;

ਅਬ੍ਭਕ੍ਖਾਨਂ ਮਯਾ ਲਦ੍ਧਂ, ਸੁਨ੍ਦਰਿਕਾਯ ਕਾਰਣਾ.

[੨]

੭੦. ‘‘ਸਬ੍ਬਾਭਿਭੁਸ੍ਸ ਬੁਦ੍ਧਸ੍ਸ, ਨਨ੍ਦੋ ਨਾਮਾਸਿ ਸਾਵਕੋ;

ਤਂ ਅਬ੍ਭਕ੍ਖਾਯ ਨਿਰਯੇ, ਚਿਰਂ ਸਂਸਰਿਤਂ ਮਯਾ.

੭੧. ‘‘ਦਸਵਸ੍ਸਸਹਸ੍ਸਾਨਿ, ਨਿਰਯੇ ਸਂਸਰਿਂ ਚਿਰਂ;

ਮਨੁਸ੍ਸਭਾਵਂ ਲਦ੍ਧਾਹਂ, ਅਬ੍ਭਕ੍ਖਾਨਂ ਬਹੁਂ ਲਭਿਂ.

੭੨. ‘‘ਤੇਨ ਕਮ੍ਮਾਵਸੇਸੇਨ, ਚਿਞ੍ਚਮਾਨਵਿਕਾ ਮਮਂ;