੧੦. ਪੁਬ੍ਬਕਮ੍ਮਪਿਲੋਤਿਕਬੁਦ੍ਧਅਪਦਾਨਂ

੬੪. ‘‘ਅਨੋਤਤ੍ਤਸਰਾਸਨ੍ਨੇ, ਰਮਣੀਯੇ ਸਿਲਾਤਲੇ;

ਨਾਨਾਰਤਨਪਜ੍ਜੋਤੇ, ਨਾਨਾਗਨ੍ਧਵਨਨ੍ਤਰੇ.

੬੫. ‘‘ਮਹਤਾ ਭਿਕ੍ਖੁਸਙ੍ਘੇਨ, ਪਰੇਤੋ [ਉਪੇਤੋ (ਉਦਾਨਟ੍ਠਕਥਾਯਂ ੪ ਵਗ੍ਗੇ, ੮ ਸੁਤ੍ਤੇ)] ਲੋਕਨਾਯਕੋ;

ਆਸੀਨੋ ਬ੍ਯਾਕਰੀ ਤਤ੍ਥ, ਪੁਬ੍ਬਕਮ੍ਮਾਨਿ ਅਤ੍ਤਨੋ.

੬੬. [ਸੁਣਾਥ ਭਿਕ੍ਖਵੇ ਮਯ੍ਹਂ, ਯਂ ਕਮ੍ਮਂ ਪਕਤਂ ਮਯਾ; ਏਕਂ ਅਰਞ੍ਞਿਕਂ ਭਿਕ੍ਖੁਂ, ਦਿਸ੍ਵਾ ਦਿਨ੍ਨਂ ਪਿਲੋਤਿਕਂ; ਪਤ੍ਥਿਤਂ ਪਠਮਂ ਬੁਦ੍ਧਂ, ਬੁਦ੍ਧਤ੍ਤਾਯ ਮਯਾ ਤਦਾ; ਪਿਲੋਤਿਯਸ੍ਸ ਕਮ੍ਮਸ੍ਸ, ਬੁਦ੍ਧਤ੍ਤੇਪਿ ਵਿਪਚ੍ਚਤਿ; ਗੋਪਾਲਕੋ ਪੁਰੇ ਆਸਿਂ, ਗਾਵਿਂ ਪਾਜੇਤਿ ਗੋਚਰਂ; ਪਿਵਨ੍ਤਿਂ ਉਦਕਂ ਆਵਿਲਂ, ਗਾਵਿਂ ਦਿਸ੍ਵਾ ਨਿਵਾਰਯਿਂ; ਤੇਨ ਕਮ੍ਮਵਿਪਾਕੇਨ, ਇਧ ਪਚ੍ਛਿਮਕੇ ਭਵੇ; ਵਿਪਾਸਿਤੋ ਯਦਿਚ੍ਛਕਂ, ਨ ਹਿ ਪਾਤੁਂ ਲਭਾਮਹਂ (ਸ੍ਯਾ.)] ‘‘ਸੁਣਾਥ ਭਿਕ੍ਖਵੋ ਮਯ੍ਹਂ, ਯਂ ਕਮ੍ਮਂ ਪਕਤਂ ਮਯਾ;

ਪਿਲੋਤਿਕਸ੍ਸ ਕਮ੍ਮਸ੍ਸ, ਬੁਦ੍ਧਤ੍ਤੇਪਿ ਵਿਪਚ੍ਚਤਿ [ਸੁਣਾਥ ਭਿਕ੍ਖਵੇ ਮਯ੍ਹਂ, ਯਂ ਕਮ੍ਮਂ ਪਕਤਂ ਮਯਾ; ਏਕਂ ਅਰਞ੍ਞਿਕਂ ਭਿਕ੍ਖੁਂ, ਦਿਸ੍ਵਾ ਦਿਨ੍ਨਂ ਪਿਲੋਤਿਕਂ; ਪਤ੍ਥਿਤਂ ਪਠਮਂ ਬੁਦ੍ਧਂ, ਬੁਦ੍ਧਤ੍ਤਾਯ ਮਯਾ ਤਦਾ; ਪਿਲੋਤਿਯਸ੍ਸ ਕਮ੍ਮਸ੍ਸ, ਬੁਦ੍ਧਤ੍ਤੇਪਿ ਵਿਪਚ੍ਚਤਿ; ਗੋਪਾਲਕੋ ਪੁਰੇ ਆਸਿਂ, ਗਾਵਿਂ ਪਾਜੇਤਿ ਗੋਚਰਂ; ਪਿਵਨ੍ਤਿਂ ਉਦਕਂ ਆਵਿਲਂ, ਗਾਵਿਂ ਦਿਸ੍ਵਾ ਨਿਵਾਰਯਿਂ; ਤੇਨ ਕਮ੍ਮਵਿਪਾਕੇਨ, ਇਧ ਪਚ੍ਛਿਮਕੇ ਭਵੇ; ਵਿਪਾਸਿਤੋ ਯਦਿਚ੍ਛਕਂ, ਨ ਹਿ ਪਾਤੁਂ ਲਭਾਮਹਂ (ਸ੍ਯਾ.)].

[੧]

੬੭. ‘‘ਮੁਨਾਲ਼ਿ ਨਾਮਹਂ ਧੁਤ੍ਤੋ, ਪੁਬ੍ਬੇ ਅਞ੍ਞਾਸੁ ਜਾਤਿਸੁ [ਅਞ੍ਞਾਯ ਜਾਤਿਯਾ (ਉਦਾਨ ਅਟ੍ਠ.)];

ਪਚ੍ਚੇਕਬੁਦ੍ਧਂ ਸੁਰਭਿਂ [ਸਰਭੁਂ (ਸੀ.)], ਅਬ੍ਭਾਚਿਕ੍ਖਿਂ ਅਦੂਸਕਂ.

੬੮. ‘‘ਤੇਨ ਕਮ੍ਮਵਿਪਾਕੇਨ, ਨਿਰਯੇ ਸਂਸਰਿਂ ਚਿਰਂ;

ਬਹੂਵਸ੍ਸਸਹਸ੍ਸਾਨਿ, ਦੁਕ੍ਖਂ ਵੇਦੇਸਿ ਵੇਦਨਂ.

੬੯. ‘‘ਤੇਨ ਕਮ੍ਮਾਵਸੇਸੇਨ, ਇਧ ਪਚ੍ਛਿਮਕੇ ਭਵੇ;

ਅਬ੍ਭਕ੍ਖਾਨਂ ਮਯਾ ਲਦ੍ਧਂ, ਸੁਨ੍ਦਰਿਕਾਯ ਕਾਰਣਾ.

[੨]

੭੦. ‘‘ਸਬ੍ਬਾਭਿਭੁਸ੍ਸ ਬੁਦ੍ਧਸ੍ਸ, ਨਨ੍ਦੋ ਨਾਮਾਸਿ ਸਾਵਕੋ;

ਤਂ ਅਬ੍ਭਕ੍ਖਾਯ ਨਿਰਯੇ, ਚਿਰਂ ਸਂਸਰਿਤਂ ਮਯਾ.

੭੧. ‘‘ਦਸਵਸ੍ਸਸਹਸ੍ਸਾਨਿ, ਨਿਰਯੇ ਸਂਸਰਿਂ ਚਿਰਂ;

ਮਨੁਸ੍ਸਭਾਵਂ ਲਦ੍ਧਾਹਂ, ਅਬ੍ਭਕ੍ਖਾਨਂ ਬਹੁਂ ਲਭਿਂ.

੭੨. ‘‘ਤੇਨ ਕਮ੍ਮਾਵਸੇਸੇਨ, ਚਿਞ੍ਚਮਾਨਵਿਕਾ ਮਮਂ;

ਅਬ੍ਭਾਚਿਕ੍ਖਿ ਅਭੂਤੇਨ, ਜਨਕਾਯਸ੍ਸ ਅਗ੍ਗਤੋ.

[੩]

੭੩. ‘‘ਬ੍ਰਾਹ੍ਮਣੋ ਸੁਤਵਾ ਆਸਿਂ, ਅਹਂ ਸਕ੍ਕਤਪੂਜਿਤੋ;

ਮਹਾਵਨੇ ਪਞ੍ਚਸਤੇ, ਮਨ੍ਤੇ ਵਾਚੇਮਿ ਮਾਣਵੇ.

੭੪. ‘‘ਤਤ੍ਥਾਗਤੋ [ਤਮਾਗਤੋ (ਕ.)] ਇਸਿ ਭੀਮੋ, ਪਞ੍ਚਾਭਿਞ੍ਞੋ ਮਹਿਦ੍ਧਿਕੋ;

ਤਂ ਚਾਹਂ ਆਗਤਂ ਦਿਸ੍ਵਾ, ਅਬ੍ਭਾਚਿਕ੍ਖਿਂ ਅਦੂਸਕਂ.

੭੫. ‘‘ਤਤੋਹਂ ਅਵਚਂ ਸਿਸ੍ਸੇ, ਕਾਮਭੋਗੀ ਅਯਂ ਇਸਿ;

ਮਯ੍ਹਮ੍ਪਿ ਭਾਸਮਾਨਸ੍ਸ, ਅਨੁਮੋਦਿਂਸੁ ਮਾਣਵਾ.

੭੬. ‘‘ਤਤੋ ਮਾਣਵਕਾ ਸਬ੍ਬੇ, ਭਿਕ੍ਖਮਾਨਂ ਕੁਲੇ ਕੁਲੇ;

ਮਹਾਜਨਸ੍ਸ ਆਹਂਸੁ, ਕਾਮਭੋਗੀ ਅਯਂ ਇਸਿ.

੭੭. ‘‘ਤੇਨ ਕਮ੍ਮਵਿਪਾਕੇਨ, ਪਞ੍ਚ ਭਿਕ੍ਖੁਸਤਾ ਇਮੇ;

ਅਬ੍ਭਕ੍ਖਾਨਂ ਲਭੁਂ ਸਬ੍ਬੇ, ਸੁਨ੍ਦਰਿਕਾਯ ਕਾਰਣਾ.

[੪]

੭੮. ‘‘ਵੇਮਾਤੁਭਾਤਰਂ ਪੁਬ੍ਬੇ, ਧਨਹੇਤੁ ਹਨਿਂ ਅਹਂ;

ਪਕ੍ਖਿਪਿਂ ਗਿਰਿਦੁਗ੍ਗਸ੍ਮਿਂ, ਸਿਲਾਯ ਚ ਅਪਿਂਸਯਿਂ.

੭੯. ‘‘ਤੇਨ ਕਮ੍ਮਵਿਪਾਕੇਨ, ਦੇਵਦਤ੍ਤੋ ਸਿਲਂ ਖਿਪਿ;

ਅਙ੍ਗੁਟ੍ਠਂ ਪਿਂਸਯੀ ਪਾਦੇ, ਮਮ ਪਾਸਾਣਸਕ੍ਖਰਾ.

[੫]

੮੦. ‘‘ਪੁਰੇਹਂ ਦਾਰਕੋ ਹੁਤ੍ਵਾ, ਕੀਲ਼ਮਾਨੋ ਮਹਾਪਥੇ;

ਪਚ੍ਚੇਕਬੁਦ੍ਧਂ ਦਿਸ੍ਵਾਨ, ਮਗ੍ਗੇ ਸਕਲਿਕਂ [ਸਕ੍ਖਲਿਕਂ (ਕ.)] ਖਿਪਿਂ [ਦਹਿਂ (ਸ੍ਯਾ.)].

੮੧. ‘‘ਤੇਨ ਕਮ੍ਮਵਿਪਾਕੇਨ, ਇਧ ਪਚ੍ਛਿਮਕੇ ਭਵੇ;

ਵਧਤ੍ਥਂ ਮਂ ਦੇਵਦਤ੍ਤੋ, ਅਭਿਮਾਰੇ ਪਯੋਜਯਿ.

[੬]

੮੨. ‘‘ਹਤ੍ਥਾਰੋਹੋ ਪੁਰੇ ਆਸਿਂ, ਪਚ੍ਚੇਕਮੁਨਿਮੁਤ੍ਤਮਂ;

ਪਿਣ੍ਡਾਯ ਵਿਚਰਨ੍ਤਂ ਤਂ, ਆਸਾਦੇਸਿਂ ਗਜੇਨਹਂ.

੮੩. ‘‘ਤੇਨ ਕਮ੍ਮਵਿਪਾਕੇਨ, ਭਨ੍ਤੋ [ਦਨ੍ਤੋ (ਕ.)] ਨਾਲ਼ਾਗਿਰੀ ਗਜੋ;

ਗਿਰਿਬ੍ਬਜੇ ਪੁਰਵਰੇ, ਦਾਰੁਣੋ ਸਮੁਪਾਗਮਿ [ਮਂ ਉਪਾਗਮਿ (ਸੀ.)].

[੭]

੮੪. ‘‘ਰਾਜਾਹਂ ਪਤ੍ਥਿਵੋ [ਪਤ੍ਤਿਕੋ (ਸ੍ਯਾ. ਕ.), ਖਤ੍ਤਿਯੋ (ਉਦਾਨ ਅਟ੍ਠ.)] ਆਸਿਂ, ਸਤ੍ਤਿਯਾ ਪੁਰਿਸਂ ਹਨਿਂ;

ਤੇਨ ਕਮ੍ਮਵਿਪਾਕੇਨ, ਨਿਰਯੇ ਪਚ੍ਚਿਸਂ ਭੁਸਂ.

੮੫. ‘‘ਕਮ੍ਮੁਨੋ ਤਸ੍ਸ ਸੇਸੇਨ, ਇਦਾਨਿ ਸਕਲਂ ਮਮ;

ਪਾਦੇ ਛਵਿਂ ਪਕਪ੍ਪੇਸਿ [ਪਕੋਪੇਸਿ (ਸੀ.)], ਨ ਹਿ ਕਮ੍ਮਂ ਵਿਨਸ੍ਸਤਿ.

[੮]

੮੬. ‘‘ਅਹਂ ਕੇਵਟ੍ਟਗਾਮਸ੍ਮਿਂ, ਅਹੁਂ ਕੇਵਟ੍ਟਦਾਰਕੋ;

ਮਚ੍ਛਕੇ ਘਾਤਿਤੇ ਦਿਸ੍ਵਾ, ਜਨਯਿਂ ਸੋਮਨਸ੍ਸਕਂ [ਸੋਮਨਸ੍ਸਹਂ (ਉਦਾਨ ਅਟ੍ਠ.)].

੮੭. ‘‘ਤੇਨ ਕਮ੍ਮਵਿਪਾਕੇਨ, ਸੀਸਦੁਕ੍ਖਂ ਅਹੂ ਮਮ;

ਸਬ੍ਬੇ ਸਕ੍ਕਾ ਚ ਹਞ੍ਞਿਂਸੁ, ਯਦਾ ਹਨਿ ਵਿਟਟੂਭੋ [ਵਿਟਟੁਭੋ (ਸ੍ਯਾ. ਕ.)].

[੯]

੮੮. ‘‘ਫੁਸ੍ਸਸ੍ਸਾਹਂ ਪਾਵਚਨੇ, ਸਾਵਕੇ ਪਰਿਭਾਸਯਿਂ;

ਯਵਂ ਖਾਦਥ ਭੁਞ੍ਜਥ, ਮਾ ਚ ਭੁਞ੍ਜਥ ਸਾਲਯੋ.

੮੯. ‘‘ਤੇਨ ਕਮ੍ਮਵਿਪਾਕੇਨ, ਤੇਮਾਸਂ ਖਾਦਿਤਂ ਯਵਂ;

ਨਿਮਨ੍ਤਿਤੋ ਬ੍ਰਾਹ੍ਮਣੇਨ, ਵੇਰਞ੍ਜਾਯਂ ਵਸਿਂ ਤਦਾ.

[੧੦]

੯੦. ‘‘ਨਿਬ੍ਬੁਦ੍ਧੇ ਵਤ੍ਤਮਾਨਮ੍ਹਿ, ਮਲ੍ਲਪੁਤ੍ਤਂ ਨਿਹੇਠਯਿਂ [ਨਿਸੇਧਯਿਂ (ਸ੍ਯਾ. ਕ.)];

ਤੇਨ ਕਮ੍ਮਵਿਪਾਕੇਨ, ਪਿਟ੍ਠਿਦੁਕ੍ਖਂ ਅਹੂ ਮਮ.

[੧੧]

੯੧. ‘‘ਤਿਕਿਚ੍ਛਕੋ ਅਹਂ ਆਸਿਂ, ਸੇਟ੍ਠਿਪੁਤ੍ਤਂ ਵਿਰੇਚਯਿਂ;

ਤੇਨ ਕਮ੍ਮਵਿਪਾਕੇਨ, ਹੋਤਿ ਪਕ੍ਖਨ੍ਦਿਕਾ ਮਮ.

[੧੨]

੯੨. ‘‘ਅਵਚਾਹਂ ਜੋਤਿਪਾਲੋ, ਸੁਗਤਂ ਕਸ੍ਸਪਂ ਤਦਾ;

ਕੁਤੋ ਨੁ ਬੋਧਿ ਮੁਣ੍ਡਸ੍ਸ, ਬੋਧਿ ਪਰਮਦੁਲ੍ਲਭਾ.

੯੩. ‘‘ਤੇਨ ਕਮ੍ਮਵਿਪਾਕੇਨ, ਅਚਰਿਂ ਦੁਕ੍ਕਰਂ ਬਹੁਂ;

ਛਬ੍ਬਸ੍ਸਾਨੁਰੁਵੇਲ਼ਾਯਂ, ਤਤੋ ਬੋਧਿਮਪਾਪੁਣਿਂ.

੯੪. ‘‘ਨਾਹਂ ਏਤੇਨ ਮਗ੍ਗੇਨ, ਪਾਪੁਣਿਂ ਬੋਧਿਮੁਤ੍ਤਮਂ;

ਕੁਮ੍ਮਗ੍ਗੇਨ ਗਵੇਸਿਸ੍ਸਂ, ਪੁਬ੍ਬਕਮ੍ਮੇਨ ਵਾਰਿਤੋ.

੯੫. ‘‘ਪੁਞ੍ਞਪਾਪਪਰਿਕ੍ਖੀਣੋ, ਸਬ੍ਬਸਨ੍ਤਾਪਵਜ੍ਜਿਤੋ;

ਅਸੋਕੋ ਅਨੁਪਾਯਾਸੋ, ਨਿਬ੍ਬਾਯਿਸ੍ਸਮਨਾਸਵੋ.

੯੬. ‘‘ਏਵਂ ਜਿਨੋ ਵਿਯਾਕਾਸਿ, ਭਿਕ੍ਖੁਸਙ੍ਘਸ੍ਸ ਅਗ੍ਗਤੋ;

ਸਬ੍ਬਾਭਿਞ੍ਞਾਬਲਪ੍ਪਤ੍ਤੋ, ਅਨੋਤਤ੍ਤੇ ਮਹਾਸਰੇ’’ਤਿ.

ਇਤ੍ਥਂ ਸੁਦਂ ਭਗਵਾ ਅਤ੍ਤਨੋ ਪੁਬ੍ਬਚਰਿਤਂ ਕਮ੍ਮਪਿਲੋਤਿਕਂ ਨਾਮ ਬੁਦ੍ਧਾਪਦਾਨਧਮ੍ਮਪਰਿਯਾਯਂ ਅਭਾਸਿਤ੍ਥਾਤਿ.

ਪੁਬ੍ਬਕਮ੍ਮਪਿਲੋਤਿਕਂ ਨਾਮ ਬੁਦ੍ਧਾਪਦਾਨਂ ਦਸਮਂ.

ਅਵਟਫਲਵਗ੍ਗੋ ਏਕੂਨਚਤ੍ਤਾਲੀਸਮੋ.