੧. ਏਕਪਦੁਮਿਯਤ੍ਥੇਰਅਪਦਾਨਂ

੧. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਭਵਾਭਵੇ ਵਿਭਾਵੇਨ੍ਤੋ, ਤਾਰੇਸਿ ਜਨਤਂ ਬਹੁਂ.

੨. ‘‘ਹਂਸਰਾਜਾ ਤਦਾ ਹੋਮਿ, ਦਿਜਾਨਂ ਪਵਰੋ ਅਹਂ;

ਜਾਤਸ੍ਸਰਂ ਸਮੋਗਯ੍ਹ, ਕੀਲ਼ਾਮਿ ਹਂਸਕੀਲ਼ਿਤਂ.

੩. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਜਾਤਸ੍ਸਰਸ੍ਸ ਉਪਰਿ, ਆਗਚ੍ਛਿ ਤਾਵਦੇ ਜਿਨੋ.

੪. ‘‘ਦਿਸ੍ਵਾਨਹਂ ਦੇਵਦੇਵਂ, ਸਯਮ੍ਭੁਂ ਲੋਕਨਾਯਕਂ;

ਵਣ੍ਟੇ ਛੇਤ੍ਵਾਨ ਪਦੁਮਂ, ਸਤਪਤ੍ਤਂ ਮਨੋਰਮਂ.

੫. ‘‘ਮੁਖਤੁਣ੍ਡੇਨ ਪਗ੍ਗਯ੍ਹ, ਪਸਨ੍ਨੋ ਲੋਕਨਾਯਕੇ [ਵਿਪ੍ਪਸਨ੍ਨੇਨ ਚੇਤਸਾ (ਸ੍ਯਾ.)];

ਉਕ੍ਖਿਪਿਤ੍ਵਾਨ ਗਗਣੇ [ਉਕ੍ਖਿਪਿਤ੍ਵਾ ਨਲਾਟੇਨ (ਕ.)], ਬੁਦ੍ਧਸੇਟ੍ਠਂ ਅਪੂਜਯਿਂ.

੬. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਅਨ੍ਤਲਿਕ੍ਖੇ ਠਿਤੋ ਸਤ੍ਥਾ, ਅਕਾ ਮੇ ਅਨੁਮੋਦਨਂ.

੭. ‘‘‘ਇਮਿਨਾ ਏਕਪਦੁਮੇਨ, ਚੇਤਨਾਪਣਿਧੀਹਿ ਚ;

ਕਪ੍ਪਾਨਂ ਸਤਸਹਸ੍ਸਂ, ਵਿਨਿਪਾਤਂ ਨ ਗਚ੍ਛਸਿ’.

੮. ‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਜਲਜੁਤ੍ਤਮਨਾਮਕੋ;

ਮਮ ਕਮ੍ਮਂ ਪਕਿਤ੍ਤੇਤ੍ਵਾ, ਅਗਮਾ ਯੇਨ ਪਤ੍ਥਿਤਂ.

੯. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੦. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਪਦੁਮਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕਪਦੁਮਿਯਤ੍ਥੇਰਸ੍ਸਾਪਦਾਨਂ ਪਠਮਂ.