੩੫. ਏਕਪਦੁਮਿਯਵਗ੍ਗੋ

੧. ਏਕਪਦੁਮਿਯਤ੍ਥੇਰਅਪਦਾਨਂ

੧. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਭਵਾਭਵੇ ਵਿਭਾਵੇਨ੍ਤੋ, ਤਾਰੇਸਿ ਜਨਤਂ ਬਹੁਂ.

੨. ‘‘ਹਂਸਰਾਜਾ ਤਦਾ ਹੋਮਿ, ਦਿਜਾਨਂ ਪਵਰੋ ਅਹਂ;

ਜਾਤਸ੍ਸਰਂ ਸਮੋਗਯ੍ਹ, ਕੀਲ਼ਾਮਿ ਹਂਸਕੀਲ਼ਿਤਂ.

੩. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਜਾਤਸ੍ਸਰਸ੍ਸ ਉਪਰਿ, ਆਗਚ੍ਛਿ ਤਾਵਦੇ ਜਿਨੋ.

੪. ‘‘ਦਿਸ੍ਵਾਨਹਂ ਦੇਵਦੇਵਂ, ਸਯਮ੍ਭੁਂ ਲੋਕਨਾਯਕਂ;

ਵਣ੍ਟੇ ਛੇਤ੍ਵਾਨ ਪਦੁਮਂ, ਸਤਪਤ੍ਤਂ ਮਨੋਰਮਂ.

੫. ‘‘ਮੁਖਤੁਣ੍ਡੇਨ ਪਗ੍ਗਯ੍ਹ, ਪਸਨ੍ਨੋ ਲੋਕਨਾਯਕੇ [ਵਿਪ੍ਪਸਨ੍ਨੇਨ ਚੇਤਸਾ (ਸ੍ਯਾ.)];

ਉਕ੍ਖਿਪਿਤ੍ਵਾਨ ਗਗਣੇ [ਉਕ੍ਖਿਪਿਤ੍ਵਾ ਨਲਾਟੇਨ (ਕ.)], ਬੁਦ੍ਧਸੇਟ੍ਠਂ ਅਪੂਜਯਿਂ.

੬. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਅਨ੍ਤਲਿਕ੍ਖੇ ਠਿਤੋ ਸਤ੍ਥਾ, ਅਕਾ ਮੇ ਅਨੁਮੋਦਨਂ.

੭. ‘‘‘ਇਮਿਨਾ ਏਕਪਦੁਮੇਨ, ਚੇਤਨਾਪਣਿਧੀਹਿ ਚ;

ਕਪ੍ਪਾਨਂ ਸਤਸਹਸ੍ਸਂ, ਵਿਨਿਪਾਤਂ ਨ ਗਚ੍ਛਸਿ’.

੮. ‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਜਲਜੁਤ੍ਤਮਨਾਮਕੋ;

ਮਮ ਕਮ੍ਮਂ ਪਕਿਤ੍ਤੇਤ੍ਵਾ, ਅਗਮਾ ਯੇਨ ਪਤ੍ਥਿਤਂ.

੯. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੦. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਪਦੁਮਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕਪਦੁਮਿਯਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਤੀਣੁਪ੍ਪਲਮਾਲਿਯਤ੍ਥੇਰਅਪਦਾਨਂ

੧੧. ‘‘ਚਨ੍ਦਭਾਗਾਨਦੀਤੀਰੇ, ਅਹੋਸਿਂ ਵਾਨਰੋ ਤਦਾ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਨਿਸਿਨ੍ਨਂ ਪਬ੍ਬਤਨ੍ਤਰੇ.

੧੨. ‘‘ਓਭਾਸੇਨ੍ਤਂ ਦਿਸਾ ਸਬ੍ਬਾ, ਸਾਲਰਾਜਂਵ ਫੁਲ੍ਲਿਤਂ;

ਲਕ੍ਖਣਬ੍ਯਞ੍ਜਨੂਪੇਤਂ, ਦਿਸ੍ਵਾ ਅਤ੍ਤਮਨੋ ਅਹੁਂ.

੧੩. ‘‘ਉਦਗ੍ਗਚਿਤ੍ਤੋ ਸੁਮਨੋ, ਪੀਤਿਯਾ ਹਟ੍ਠਮਾਨਸੋ;

ਤੀਣਿ ਉਪ੍ਪਲਪੁਪ੍ਫਾਨਿ, ਮਤ੍ਥਕੇ ਅਭਿਰੋਪਯਿਂ.

੧੪. ‘‘ਪੁਪ੍ਫਾਨਿ ਅਭਿਰੋਪੇਤ੍ਵਾ, ਵਿਪਸ੍ਸਿਸ੍ਸ ਮਹੇਸਿਨੋ;

ਸਗਾਰਵੋ ਭਵਿਤ੍ਵਾਨ [ਗਮਿਤ੍ਵਾਨ (ਸੀ.), ਨਮਿਤ੍ਵਾਨ (ਕ.)], ਪਕ੍ਕਾਮਿਂ ਉਤ੍ਤਰਾਮੁਖੋ.

੧੫. ‘‘ਗਚ੍ਛਨ੍ਤੋ ਪਟਿਕੁਟਿਕੋ, ਵਿਪ੍ਪਸਨ੍ਨੇਨ ਚੇਤਸਾ;

ਸੇਲਨ੍ਤਰੇ ਪਤਿਤ੍ਵਾਨ [ਪਪਤਿਤ੍ਵਾ (ਸ੍ਯਾ. ਕ.)], ਪਾਪੁਣਿਂ ਜੀਵਿਤਕ੍ਖਯਂ.

੧੬. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ [ਪੁਰਿਮਂ ਜਾਤਿਂ (?) ਉਪਰਿ ੩੮ ਵਗ੍ਗੇ ਤਤਿਯਾਪਦਾਨੇ ਏਵਮੇਵ ਦਿਸ੍ਸਤਿ], ਤਾਵਤਿਂਸਮਗਚ੍ਛਹਂ.

੧੭. ‘‘ਸਤਾਨਂ ਤੀਣਿਕ੍ਖਤ੍ਤੁਞ੍ਚ, ਦੇਵਰਜ੍ਜਂ ਅਕਾਰਯਿਂ;

ਸਤਾਨਂ ਪਞ੍ਚਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ.

੧੮. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤੀਣੁਪ੍ਪਲਮਾਲਿਯੋ [ਤਿਉਪ੍ਪਲਮਾਲਿਯੋ (ਸੀ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤੀਣੁਪ੍ਪਲਮਾਲਿਯਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਧਜਦਾਯਕਤ੍ਥੇਰਅਪਦਾਨਂ

੨੦. ‘‘ਤਿਸ੍ਸੋ ਨਾਮ ਅਹੁ ਸਤ੍ਥਾ, ਲੋਕਜੇਟ੍ਠੋ ਨਰਾਸਭੋ;

ਤਯੋਪਧਿਕ੍ਖਯੇ [ਤਸ੍ਸੋਪਧਿਕ੍ਖਯੇ (ਸੀ.)] ਦਿਸ੍ਵਾ, ਧਜਂ ਆਰੋਪਿਤਂ ਮਯਾ.

੨੧. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੨੨. ‘‘ਸਤਾਨਂ ਤੀਣਿਕ੍ਖਤ੍ਤੁਞ੍ਚ, ਦੇਵਰਜ੍ਜਂ ਅਕਾਰਯਿਂ;

ਸਤਾਨਂ ਪਞ੍ਚਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ.

੨੩. ‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਅਨੁਭੋਮਿ ਸਕਂ ਕਮ੍ਮਂ, ਪੁਬ੍ਬੇ ਸੁਕਤਮਤ੍ਤਨੋ.

੨੪. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਧਜਦਾਨਸ੍ਸਿਦਂ ਫਲਂ.

੨੫. ‘‘ਇਚ੍ਛਮਾਨੋ ਚਹਂ ਅਜ੍ਜ, ਸਕਾਨਨਂ ਸਪਬ੍ਬਤਂ;

ਖੋਮਦੁਸ੍ਸੇਨ ਛਾਦੇਯ੍ਯਂ, ਤਦਾ ਮਯ੍ਹਂ ਕਤੇ ਫਲਂ.

੨੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਧਜਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਧਜਦਾਯਕਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਤਿਕਿਙ੍ਕਣਿਪੂਜਕਤ੍ਥੇਰਅਪਦਾਨਂ

੨੭. ‘‘ਹਿਮਵਨ੍ਤਸ੍ਸਾਵਿਦੂਰੇ, ਭੂਤਗਣੋ ਨਾਮ ਪਬ੍ਬਤੋ;

ਤਤ੍ਥਦ੍ਦਸਂ ਪਂਸੁਕੂਲਂ, ਦੁਮਗ੍ਗਮ੍ਹਿ ਵਿਲਗ੍ਗਿਤਂ.

੨੮. ‘‘ਤੀਣਿ ਕਿਙ੍ਕਣਿਪੁਪ੍ਫਾਨਿ, ਓਚਿਨਿਤ੍ਵਾਨਹਂ ਤਦਾ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਪਂਸੁਕੂਲਂ ਅਪੂਜਯਿਂ.

੨੯. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਤਿਣ੍ਣਂ ਪੁਪ੍ਫਾਨਿਦਂ ਫਲਂ.

੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਿਕਿਙ੍ਕਣਿਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਿਕਿਙ੍ਕਣਿਪੂਜਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਨਲ਼ਾਗਾਰਿਕਤ੍ਥੇਰਅਪਦਾਨਂ

੩੧. ‘‘ਹਿਮਵਨ੍ਤਸ੍ਸਾਵਿਦੂਰੇ, ਹਾਰਿਤੋ ਨਾਮ ਪਬ੍ਬਤੋ;

ਸਯਮ੍ਭੂ ਨਾਰਦੋ ਨਾਮ, ਰੁਕ੍ਖਮੂਲੇ ਵਸੀ ਤਦਾ.

੩੨. ‘‘ਨਲ਼ਾਗਾਰਂ ਕਰਿਤ੍ਵਾਨ, ਤਿਣੇਨ ਛਾਦਯਿਂ ਅਹਂ;

ਚਙ੍ਕਮਂ ਸੋਧਯਿਤ੍ਵਾਨ, ਸਯਮ੍ਭੁਸ੍ਸ ਅਦਾਸਹਂ.

੩੩. ‘‘ਚਤੁਦ੍ਦਸਸੁ ਕਪ੍ਪੇਸੁ, ਦੇਵਲੋਕੇ ਰਮਿਂ ਅਹਂ;

ਚਤੁਸਤ੍ਤਤਿਕ੍ਖਤ੍ਤੁਞ੍ਚ, ਦੇਵਰਜ੍ਜਂ ਅਕਾਰਯਿਂ.

੩੪. ‘‘ਚਤੁਸਤ੍ਤਤਿ [ਸਤ੍ਤਸਤ੍ਤਤਿ (ਸੀ.)] ਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੩੫. ‘‘ਉਬ੍ਬਿਦ੍ਧਂ ਭਵਨਂ ਮਯ੍ਹਂ, ਇਨ੍ਦਲਟ੍ਠੀਵ ਉਗ੍ਗਤਂ;

ਸਹਸ੍ਸਥਮ੍ਭਂ ਅਤੁਲਂ, ਵਿਮਾਨਂ ਸਪਭਸ੍ਸਰਂ.

੩੬. ‘‘ਦ੍ਵੇ ਸਮ੍ਪਤ੍ਤੀ ਅਨੁਭੋਤ੍ਵਾ, ਸੁਕ੍ਕਮੂਲੇਨ ਚੋਦਿਤੋ;

ਗੋਤਮਸ੍ਸ ਭਗਵਤੋ, ਸਾਸਨੇ ਪਬ੍ਬਜਿਂ ਅਹਂ.

੩੭. ‘‘ਪਧਾਨਪਹਿਤਤ੍ਤੋਮ੍ਹਿ, ਉਪਸਨ੍ਤੋ ਨਿਰੂਪਧਿ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੩੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਨਲ਼ਾਗਾਰਿਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਨਲ਼ਾਗਾਰਿਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਚਮ੍ਪਕਪੁਪ੍ਫਿਯਤ੍ਥੇਰਅਪਦਾਨਂ

੩੯. ‘‘ਹਿਮਵਨ੍ਤਸ੍ਸਾਵਿਦੂਰੇ, ਜਾਪਲੋ [ਚਾਪਲੋ (ਸੀ.), ਛਾਪਲੋ (ਸ੍ਯਾ.)] ਨਾਮ ਪਬ੍ਬਤੋ;

ਬੁਦ੍ਧੋ ਸੁਦਸ੍ਸਨੋ ਨਾਮ, ਵਿਹਾਸਿ ਪਬ੍ਬਤਨ੍ਤਰੇ.

੪੦. ‘‘ਪੁਪ੍ਫਂ ਹੇਮਵਨ੍ਤਂ [ਹੇਮਵਤਂ (ਸੀ.), ਹੇਮਵਣ੍ਣਂ (ਸ੍ਯਾ.)] ਗਯ੍ਹ, ਗਚ੍ਛਂ ਵੇਹਾਯਸੇਨਹਂ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਓਘਤਿਣ੍ਣਮਨਾਸਵਂ.

੪੧. ‘‘ਸਤ੍ਤ ਚਮ੍ਪਕਪੁਪ੍ਫਾਨਿ, ਸੀਸੇ ਕਤ੍ਵਾਨਹਂ ਤਦਾ;

ਬੁਦ੍ਧਸ੍ਸ ਅਭਿਰੋਪੇਸਿਂ, ਸਯਮ੍ਭੁਸ੍ਸ ਮਹੇਸਿਨੋ.

੪੨. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੪੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਚਮ੍ਪਕਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਚਮ੍ਪਕਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਪਦੁਮਪੂਜਕਤ੍ਥੇਰਅਪਦਾਨਂ

੪੪. ‘‘ਹਿਮਵਨ੍ਤਸ੍ਸਾਵਿਦੂਰੇ, ਰੋਮਸੋ ਨਾਮ ਪਬ੍ਬਤੋ;

ਬੁਦ੍ਧੋਪਿ ਸਮ੍ਭਵੋ ਨਾਮ, ਅਬ੍ਭੋਕਾਸੇ ਵਸੀ ਤਦਾ.

੪੫. ‘‘ਭਵਨਾ ਨਿਕ੍ਖਮਿਤ੍ਵਾਨ, ਪਦੁਮਂ ਧਾਰਯਿਂ ਅਹਂ;

ਏਕਾਹਂ ਧਾਰਯਿਤ੍ਵਾਨ, ਪੁਨ ਭਵਨੁਪਾਗਮਿਂ.

੪੬. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੪੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਦੁਮਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਦੁਮਪੂਜਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

ਤੇਰਸਮਂ ਭਾਣਵਾਰਂ.

੮. ਤਿਣਮੁਟ੍ਠਿਦਾਯਕਤ੍ਥੇਰਅਪਦਾਨਂ

੪੮. ‘‘ਹਿਮਵਨ੍ਤਸ੍ਸਾਵਿਦੂਰੇ, ਲਮ੍ਬਕੋ ਨਾਮ ਪਬ੍ਬਤੋ;

ਉਪਤਿਸ੍ਸੋ ਨਾਮ ਸਮ੍ਬੁਦ੍ਧੋ, ਅਬ੍ਭੋਕਾਸਮ੍ਹਿ ਚਙ੍ਕਮਿ.

੪੯. ‘‘ਮਿਗਲੁਦ੍ਦੋ ਤਦਾ ਆਸਿਂ, ਅਰਞ੍ਞੇ ਕਾਨਨੇ ਅਹਂ;

ਦਿਸ੍ਵਾਨ ਤਂ ਦੇਵਦੇਵਂ, ਸਯਮ੍ਭੁਂ ਅਪਰਾਜਿਤਂ.

੫੦. ‘‘ਵਿਪ੍ਪਸਨ੍ਨੇਨ ਚਿਤ੍ਤੇਨ, ਤਦਾ ਤਸ੍ਸ ਮਹੇਸਿਨੋ;

ਨਿਸੀਦਨਤ੍ਥਂ ਬੁਦ੍ਧਸ੍ਸ, ਤਿਣਮੁਟ੍ਠਿਮਦਾਸਹਂ.

੫੧. ‘‘ਦਤ੍ਵਾਨ ਦੇਵਦੇਵਸ੍ਸ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਸਮ੍ਬੁਦ੍ਧਂ ਅਭਿਵਾਦੇਤ੍ਵਾ, ਪਕ੍ਕਾਮਿਂ ਉਤ੍ਤਰਾਮੁਖੋ.

੫੨. ‘‘ਅਚਿਰਂ ਗਤਮਤ੍ਤਂ ਮਂ, ਮਿਗਰਾਜਾ ਅਪੋਥਯਿ [ਅਹੇਠਯਿ (ਸੀ. ਸ੍ਯਾ.)];

ਸੀਹੇਨ ਪੋਥਿਤੋ [ਪਾਤਿਤੋ (ਸੀ. ਸ੍ਯਾ.)] ਸਨ੍ਤੋ, ਤਤ੍ਥ ਕਾਲਙ੍ਕਤੋ ਅਹਂ.

੫੩. ‘‘ਆਸਨ੍ਨੇ ਮੇ ਕਤਂ ਕਮ੍ਮਂ, ਬੁਦ੍ਧਸੇਟ੍ਠੇ ਅਨਾਸਵੇ;

ਸੁਮੁਤ੍ਤੋ ਸਰਵੇਗੋਵ, ਦੇਵਲੋਕਂ ਅਗਞ੍ਛਹਂ.

੫੪. ‘‘ਯੂਪੋ ਤਤ੍ਥ ਸੁਭੋ ਆਸਿ, ਪੁਞ੍ਞਕਮ੍ਮਾਭਿਨਿਮ੍ਮਿਤੋ;

ਸਹਸ੍ਸਕਣ੍ਡੋ ਸਤਭੇਣ੍ਡੁ, ਧਜਾਲੁ ਹਰਿਤਾਮਯੋ.

੫੫. ‘‘ਪਭਾ ਨਿਦ੍ਧਾਵਤੇ ਤਸ੍ਸ, ਸਤਰਂਸੀਵ ਉਗ੍ਗਤੋ;

ਆਕਿਣ੍ਣੋ ਦੇਵਕਞ੍ਞਾਹਿ, ਆਮੋਦਿਂ ਕਾਮਕਾਮਹਂ.

੫੬. ‘‘ਦੇਵਲੋਕਾ ਚਵਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਆਗਨ੍ਤ੍ਵਾਨ ਮਨੁਸ੍ਸਤ੍ਤਂ, ਪਤ੍ਤੋਮ੍ਹਿ ਆਸਵਕ੍ਖਯਂ.

੫੭. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਨਿਸੀਦਨਮਦਾਸਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਤਿਣਮੁਟ੍ਠਿਯਿਦਂ ਫਲਂ.

੫੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਿਣਮੁਟ੍ਠਿਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਿਣਮੁਟ੍ਠਿਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਤਿਨ੍ਦੁਕਫਲਦਾਯਕਤ੍ਥੇਰਅਪਦਾਨਂ

੫੯. ‘‘ਕਣਿਕਾਰਂਵ ਜੋਤਨ੍ਤਂ, ਨਿਸਿਨ੍ਨਂ ਪਬ੍ਬਤਨ੍ਤਰੇ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਓਘਤਿਣ੍ਣਮਨਾਸਵਂ.

੬੦. ‘‘ਤਿਨ੍ਦੁਕਂ ਸਫਲਂ ਦਿਸ੍ਵਾ, ਭਿਨ੍ਦਿਤ੍ਵਾਨ ਸਕੋਸਕਂ [ਸਕੋਟਕਂ (ਸੀ.), ਸਕੋਟਿਕਂ (ਸ੍ਯਾ.)];

ਪਸਨ੍ਨਚਿਤ੍ਤੋ ਸੁਮਨੋ, ਸਯਮ੍ਭੁਸ੍ਸ ਮਦਾਸਹਂ [ਵੇਸ੍ਸਭੁਸ੍ਸ ਅਦਾਸਹਂ (ਸੀ.)].

੬੧. ‘‘ਏਕਨਵੁਤਿਤੋ ਕਪ੍ਪੇ, ਯਂ ਫਲਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੬੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਿਨ੍ਦੁਕਫਲਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਿਨ੍ਦੁਕਫਲਦਾਯਕਤ੍ਥੇਰਸ੍ਸਾਪਦਾਨਂ ਨਵਮਂ.

੧੦. ਏਕਞ੍ਜਲਿਯਤ੍ਥੇਰਅਪਦਾਨਂ

੬੩. ‘‘ਰੋਮਸੋ [ਰੇਵਤੋ (ਸੀ.)] ਨਾਮ ਸਮ੍ਬੁਦ੍ਧੋ, ਨਦੀਕੂਲੇ ਵਸੀ ਤਦਾ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਪੀਤਰਂਸਿਂਵ ਭਾਣੁਮਂ.

੬੪. ‘‘ਉਕ੍ਕਾਮੁਖਪਹਟ੍ਠਂਵ, ਖਦਿਰਙ੍ਗਾਰਸਨ੍ਨਿਭਂ;

ਓਸਧਿਂਵ ਵਿਰੋਚਨ੍ਤਂ, ਏਕਞ੍ਜਲਿਮਕਾਸਹਂ.