੩੬. ਸਦ੍ਦਸਞ੍ਞਕਵਗ੍ਗੋ
੧. ਸਦ੍ਦਸਞ੍ਞਕਤ੍ਥੇਰਅਪਦਾਨਂ
੧. ‘‘ਮਿਗਲੁਦ੍ਦੋ ਪੁਰੇ ਆਸਿਂ, ਅਰਞ੍ਞੇ ਕਾਨਨੇ ਅਹਂ;
ਤਤ੍ਥਦ੍ਦਸਾਸਿਂ ਸਮ੍ਬੁਦ੍ਧਂ, ਦੇਵਸਙ੍ਘਪੁਰਕ੍ਖਤਂ.
੨. ‘‘ਚਤੁਸਚ੍ਚਂ ਪਕਾਸੇਨ੍ਤਂ, ਉਦ੍ਧਰਨ੍ਤਂ ਮਹਾਜਨਂ;
ਅਸ੍ਸੋਸਿਂ ਮਧੁਰਂ ਵਾਚਂ, ਕਰਵੀਕਰੁਦੋਪਮਂ [ਰੁਤੋਪਮਂ (?)].
੩. ‘‘ਬ੍ਰਹ੍ਮਸਰਸ੍ਸ ਮੁਨਿਨੋ, ਸਿਖਿਨੋ ਲੋਕਬਨ੍ਧੁਨੋ;
ਘੋਸੇ ਚਿਤ੍ਤਂ ਪਸਾਦੇਤ੍ਵਾ, ਪਤ੍ਤੋਮ੍ਹਿ ਆਸਵਕ੍ਖਯਂ.
੪. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪਸਾਦਸ੍ਸ ਇਦਂ ਫਲਂ.
੫. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸਦ੍ਦਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਸਦ੍ਦਸਞ੍ਞਕਤ੍ਥੇਰਸ੍ਸਾਪਦਾਨਂ ਪਠਮਂ.
੨. ਯਵਕਲਾਪਿਯਤ੍ਥੇਰਅਪਦਾਨਂ
੬. ‘‘ਨਗਰੇ ਅਰੁਣਵਤਿਯਾ, ਆਸਿਂ ਯਵਸਿਕੋ ਤਦਾ;
ਪਨ੍ਥੇ ਦਿਸ੍ਵਾਨ ਸਮ੍ਬੁਦ੍ਧਂ, ਯਵਕਲਾਪਂ ਸਨ੍ਥਰਿਂ [ਯਵਕਲਾਪਮਵਤ੍ਥਰਿਂ (ਸੀ.)].
੭. ‘‘ਅਨੁਕਮ੍ਪਕੋ ਕਾਰੁਣਿਕੋ, ਸਿਖੀ ਲੋਕਗ੍ਗਨਾਯਕੋ;
ਮਮ ਸਙ੍ਕਪ੍ਪਮਞ੍ਞਾਯ, ਨਿਸੀਦਿ ਯਵਸਨ੍ਥਰੇ.
੮. ‘‘ਦਿਸ੍ਵਾ ਨਿਸਿਨ੍ਨਂ ਵਿਮਲਂ, ਮਹਾਝਾਯਿਂ ਵਿਨਾਯਕਂ;
ਪਾਮੋਜ੍ਜਂ ਜਨਯਿਤ੍ਵਾਨ, ਤਤ੍ਥ ਕਾਲਙ੍ਕਤੋ ਅਹਂ.
੯. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਯਵਤ੍ਥਰੇ ਇਦਂ ਫਲਂ.
੧੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਯਵਕਲਾਪਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਯਵਕਲਾਪਿਯਤ੍ਥੇਰਸ੍ਸਾਪਦਾਨਂ ਦੁਤਿਯਂ.
੩. ਕਿਂਸੁਕਪੂਜਕਤ੍ਥੇਰਅਪਦਾਨਂ
੧੧. ‘‘ਕਿਂਸੁਕਂ ਪੁਪ੍ਫਿਤਂ ਦਿਸ੍ਵਾ, ਪਗ੍ਗਹੇਤ੍ਵਾਨ ਅਞ੍ਜਲਿਂ;
ਬੁਦ੍ਧਂ ਸਰਿਤ੍ਵਾ ਸਿਦ੍ਧਤ੍ਥਂ, ਆਕਾਸੇ ਅਭਿਪੂਜਯਿਂ.
੧੨. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੧੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਕਿਂਸੁਕਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਕਿਂਸੁਕਪੂਜਕਤ੍ਥੇਰਸ੍ਸਾਪਦਾਨਂ ਤਤਿਯਂ.
੪. ਸਕੋਸਕਕੋਰਣ੍ਡਦਾਯਕਤ੍ਥੇਰਅਪਦਾਨਂ
੧੪. ‘‘ਅਕ੍ਕਨ੍ਤਞ੍ਚ ਪਦਂ ਦਿਸ੍ਵਾ, ਸਿਖਿਨੋ ਲੋਕਬਨ੍ਧੁਨੋ;
ਏਕਂਸਂ ਅਜਿਨਂ ਕਤ੍ਵਾ, ਪਦਸੇਟ੍ਠਂ ਅਵਨ੍ਦਹਂ.
੧੫. ‘‘ਕੋਰਣ੍ਡਂ ਪੁਪ੍ਫਿਤਂ ਦਿਸ੍ਵਾ, ਪਾਦਪਂ ਧਰਣੀਰੁਹਂ;
ਸਕੋਸਕਂ [ਸਕੋਟਕਂ (ਸੀ. ਸ੍ਯਾ.)] ਗਹੇਤ੍ਵਾਨ, ਪਦਚਕ੍ਕਂ ਅਪੂਜਯਿਂ.
੧੬. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪਦਪੂਜਾਯਿਦਂ ਫਲਂ.
੧੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸਕੋਸਕ [ਸਕੋਟਕ (ਸੀ. ਸ੍ਯਾ.)] ਕੋਰਣ੍ਡਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਸਕੋਸਕਕੋਰਣ੍ਡਦਾਯਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.
੫. ਦਣ੍ਡਦਾਯਕਤ੍ਥੇਰਅਪਦਾਨਂ
੧੮. ‘‘ਕਾਨਨਂ ਵਨਮੋਗਯ੍ਹ, ਵੇਲ਼ੁਂ ਛੇਤ੍ਵਾਨਹਂ ਤਦਾ;
ਆਲਮ੍ਬਨਂ ਕਰਿਤ੍ਵਾਨ, ਸਙ੍ਘਸ੍ਸ ਅਦਦਂ ਅਹਂ.
੧੯. ‘‘ਤੇਨ ਚਿਤ੍ਤਪ੍ਪਸਾਦੇਨ, ਸੁਬ੍ਬਤੇ ਅਭਿਵਾਦਿਯ;
ਆਲਮ੍ਬਨਮ੍ਪਿ ਦਤ੍ਵਾਨ, ਪਕ੍ਕਾਮਿਂ ਉਤ੍ਤਰਾਮੁਖੋ.
੨੦. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਦਣ੍ਡਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਦਣ੍ਡਦਾਨਸ੍ਸਿਦਂ ਫਲਂ.
੨੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਦਣ੍ਡਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਦਣ੍ਡਦਾਯਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.
੬. ਅਮ੍ਬਯਾਗੁਦਾਯਕਤ੍ਥੇਰਅਪਦਾਨਂ
੨੨. ‘‘ਸਤਰਂਸੀ ਨਾਮ ਸਮ੍ਬੁਦ੍ਧੋ, ਸਯਮ੍ਭੂ ਅਪਰਾਜਿਤੋ;
ਵੁਟ੍ਠਹਿਤ੍ਵਾ ਸਮਾਧਿਮ੍ਹਾ, ਭਿਕ੍ਖਾਯ ਮਮੁਪਾਗਮਿ.
੨੩. ‘‘ਪਚ੍ਚੇਕਬੁਦ੍ਧਂ ਦਿਸ੍ਵਾਨ, ਅਮ੍ਬਯਾਗੁਂ ਅਦਾਸਹਂ;
ਵਿਪ੍ਪਸਨ੍ਨਮਨਂ ਤਸ੍ਸ, ਵਿਪ੍ਪਸਨ੍ਨੇਨ ਚੇਤਸਾ.
੨੪. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਅਮ੍ਬਯਾਗੁਯਿਦਂ ਫਲਂ.
੨੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਅਮ੍ਬਯਾਗੁਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਅਮ੍ਬਯਾਗੁਦਾਯਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.
੭. ਸੁਪੁਟਕਪੂਜਕਤ੍ਥੇਰਅਪਦਾਨਂ
੨੬. ‘‘ਦਿਵਾਵਿਹਾਰਾ ਨਿਕ੍ਖਨ੍ਤੋ, ਵਿਪਸ੍ਸੀ ਲੋਕਨਾਯਕੋ;
ਭਿਕ੍ਖਾਯ ਵਿਚਰਨ੍ਤੋ ਸੋ, ਮਮ ਸਨ੍ਤਿਕੁਪਾਗਮਿ.
੨੭. ‘‘ਤਤੋ ਪਤੀਤੋ ਸੁਮਨੋ, ਬੁਦ੍ਧਸੇਟ੍ਠਸ੍ਸ ਤਾਦਿਨੋ;
ਲੋਣਸੁਪੁਟਕਂ ਦਤ੍ਵਾ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ.
੨੮. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਟਕਮਦਾਸਹਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਪੁਟਕਸ੍ਸ ਇਦਂ ਫਲਂ.
੨੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸੁਪੁਟਕਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਸੁਪੁਟਕਪੂਜਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.
੮. ਮਞ੍ਚਦਾਯਕਤ੍ਥੇਰਅਪਦਾਨਂ
੩੦. ‘‘ਵਿਪਸ੍ਸਿਨੋ ਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;
ਏਕਂ ਮਞ੍ਚਂ ਮਯਾ ਦਿਨ੍ਨਂ, ਪਸਨ੍ਨੇਨ ਸਪਾਣਿਨਾ.
੩੧. ‘‘ਹਤ੍ਥਿਯਾਨਂ ਅਸ੍ਸਯਾਨਂ, ਦਿਬ੍ਬਯਾਨਂ ਸਮਜ੍ਝਗਂ;
ਤੇਨ ਮਞ੍ਚਕਦਾਨੇਨ, ਪਤ੍ਤੋਮ੍ਹਿ ਆਸਵਕ੍ਖਯਂ.
੩੨. ‘‘ਏਕਨਵੁਤਿਤੋ ਕਪ੍ਪੇ, ਯਂ ਮਞ੍ਚਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਮਞ੍ਚਦਾਨਸ੍ਸਿਦਂ ਫਲਂ.
੩੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਮਞ੍ਚਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਮਞ੍ਚਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.
੯. ਸਰਣਗਮਨਿਯਤ੍ਥੇਰਅਪਦਾਨਂ
੩੪. ‘‘ਆਰੁਹਿਮ੍ਹ ਤਦਾ ਨਾਵਂ, ਭਿਕ੍ਖੁ ਚਾਜੀਵਕੋ ਚਹਂ;
ਨਾਵਾਯ ਭਿਜ੍ਜਮਾਨਾਯ, ਭਿਕ੍ਖੁ ਮੇ ਸਰਣਂ ਅਦਾ.
੩੫. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਞ੍ਚ ਮੇ ਸਰਣਂ ਅਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਸਰਣਾਗਮਨੇ ਫਲਂ.
੩੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸਰਣਗਮਨਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਸਰਣਗਮਨਿਯਤ੍ਥੇਰਸ੍ਸਾਪਦਾਨਂ ਨਵਮਂ.
੧੦. ਪਿਣ੍ਡਪਾਤਿਕਤ੍ਥੇਰਅਪਦਾਨਂ
੩੭. ‘‘ਤਿਸ੍ਸੋ ਨਾਮਾਸਿ ਸਮ੍ਬੁਦ੍ਧੋ, ਵਿਹਾਸਿ ਵਿਪਿਨੇ ਤਦਾ;
ਤੁਸਿਤਾ ਹਿ ਇਧਾਗਨ੍ਤ੍ਵਾ, ਪਿਣ੍ਡਪਾਤਂ ਅਦਾਸਹਂ.
੩੮. ‘‘ਸਮ੍ਬੁਦ੍ਧਮਭਿਵਾਦੇਤ੍ਵਾ, ਤਿਸ੍ਸਂ ਨਾਮ ਮਹਾਯਸਂ;
ਸਕਂ ਚਿਤ੍ਤਂ ਪਸਾਦੇਤ੍ਵਾ, ਤੁਸਿਤਂ ਅਗਮਾਸਹਂ.
੩੯. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪਿਣ੍ਡਪਾਤਸ੍ਸਿਦਂ ਫਲਂ.
੪੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਪਿਣ੍ਡਪਾਤਿਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਪਿਣ੍ਡਪਾਤਿਕਤ੍ਥੇਰਸ੍ਸਾਪਦਾਨਂ ਦਸਮਂ.
ਸਦ੍ਦਸਞ੍ਞਕਵਗ੍ਗੋ ਛਤ੍ਤਿਂਸਤਿਮੋ.