੩੭. ਮਨ੍ਦਾਰਵਪੁਪ੍ਫਿਯਵਗ੍ਗੋ

੧. ਮਨ੍ਦਾਰਵਪੁਪ੍ਫਿਯਤ੍ਥੇਰਅਪਦਾਨਂ

੧. ‘‘ਤਾਵਤਿਂਸਾ ਇਧਾਗਨ੍ਤ੍ਵਾ, ਮਙ੍ਗਲੋ ਨਾਮ ਮਾਣਵੋ;

ਮਨ੍ਦਾਰਵਂ ਗਹੇਤ੍ਵਾਨ, ਵਿਪਸ੍ਸਿਸ੍ਸ ਮਹੇਸਿਨੋ.

੨. ‘‘ਸਮਾਧਿਨਾ ਨਿਸਿਨ੍ਨਸ੍ਸ, ਮਤ੍ਥਕੇ ਧਾਰਯਿਂ ਅਹਂ;

ਸਤ੍ਤਾਹਂ ਧਾਰਯਿਤ੍ਵਾਨ, ਦੇਵਲੋਕਂ ਪੁਨਾਗਮਿਂ.

੩. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੪. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮਨ੍ਦਾਰਵਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਮਨ੍ਦਾਰਵਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਕਕ੍ਕਾਰੁਪੁਪ੍ਫਿਯਤ੍ਥੇਰਅਪਦਾਨਂ

੫. ‘‘ਯਾਮਾ ਦੇਵਾ ਇਧਾਗਨ੍ਤ੍ਵਾ, ਗੋਤਮਂ ਸਿਰਿਵਚ੍ਛਸਂ;

ਕਕ੍ਕਾਰੁਮਾਲਂ [ਗੋਕ੍ਖਨੁਮਾਲਂ (ਸੀ.)] ਪਗ੍ਗਯ੍ਹ, ਬੁਦ੍ਧਸ੍ਸ ਅਭਿਰੋਪਯਿਂ.

੬. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਬੁਦ੍ਧਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕਕ੍ਕਾਰੁਪੁਪ੍ਫਿਯੋ [ਗੋਕ੍ਖਨੁਪੁਪ੍ਫਿਯੋ (ਕ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕਕ੍ਕਾਰੁਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਭਿਸਮੁਲ਼ਾਲਦਾਯਕਤ੍ਥੇਰਅਪਦਾਨਂ

੮. ‘‘ਫੁਸ੍ਸੋ ਨਾਮਾਸਿ ਸਮ੍ਬੁਦ੍ਧੋ, ਸਬ੍ਬਧਮ੍ਮਾਨ ਪਾਰਗੂ;

ਵਿਵੇਕਕਾਮੋ ਸਬ੍ਬਞ੍ਞੂ [ਸਪ੍ਪਞ੍ਞੋ (ਸੀ. ਸ੍ਯਾ.)], ਆਗਞ੍ਛਿ ਮਮ ਸਨ੍ਤਿਕੇ.

੯. ‘‘ਤਸ੍ਮਿਂ ਚਿਤ੍ਤਂ ਪਸਾਦੇਤ੍ਵਾ, ਮਹਾਕਾਰੁਣਿਕੇ ਜਿਨੇ;

ਭਿਸਮੁਲ਼ਾਲਂ ਪਗ੍ਗਯ੍ਹ, ਬੁਦ੍ਧਸੇਟ੍ਠਸ੍ਸਦਾਸਹਂ.

੧੦. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਭਿਸਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਭਿਸਦਾਨਸ੍ਸਿਦਂ ਫਲਂ.

੧੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਭਿਸਮੁਲ਼ਾਲਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਭਿਸਮੁਲ਼ਾਲਦਾਯਕਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਕੇਸਰਪੁਪ੍ਫਿਯਤ੍ਥੇਰਅਪਦਾਨਂ

੧੨. ‘‘ਵਿਜ੍ਜਾਧਰੋ ਤਦਾ ਆਸਿਂ, ਹਿਮਵਨ੍ਤਮ੍ਹਿ ਪਬ੍ਬਤੇ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਚਙ੍ਕਮਨ੍ਤਂ ਮਹਾਯਸਂ.

੧੩. ‘‘ਤੀਣਿ ਕੇਸਰਪੁਪ੍ਫਾਨਿ [ਕੇਸਰਿਪੁਪ੍ਫਾਨਿ (ਸੀ.)], ਸੀਸੇ ਕਤ੍ਵਾਨਹਂ ਤਦਾ;

ਉਪਸਙ੍ਕਮ੍ਮ ਸਮ੍ਬੁਦ੍ਧਂ, ਵੇਸ੍ਸਭੁਂ ਅਭਿਪੂਜਯਿਂ.

੧੪. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕੇਸਰਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕੇਸਰਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਅਙ੍ਕੋਲਪੁਪ੍ਫਿਯਤ੍ਥੇਰਅਪਦਾਨਂ

੧੬. ‘‘ਪਦੁਮੋ ਨਾਮ ਸਮ੍ਬੁਦ੍ਧੋ, ਚਿਤ੍ਤਕੂਟੇ ਵਸੀ ਤਦਾ;

ਦਿਸ੍ਵਾਨ ਤਂ ਅਹਂ ਬੁਦ੍ਧਂ, ਸਯਮ੍ਭੁਂ ਅਪਰਾਜਿਤਂ [ਉਪਗਚ੍ਛਿਹਂ (ਸੀ. ਸ੍ਯਾ.)].

੧੭. ‘‘ਅਙ੍ਕੋਲਂ ਪੁਪ੍ਫਿਤਂ ਦਿਸ੍ਵਾ, ਓਚਿਨਿਤ੍ਵਾਨਹਂ ਤਦਾ;

ਉਪਗਨ੍ਤ੍ਵਾਨ ਸਮ੍ਬੁਦ੍ਧਂ, ਪੂਜਯਿਂ ਪਦੁਮਂ ਜਿਨਂ.

੧੮. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਙ੍ਕੋਲਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਙ੍ਕੋਲਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਕਦਮ੍ਬਪੁਪ੍ਫਿਯਤ੍ਥੇਰਅਪਦਾਨਂ

੨੦. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਗਚ੍ਛਨ੍ਤਂ ਅਨ੍ਤਰਾਪਣੇ;

ਕਞ੍ਚਨਗ੍ਘਿਯਸਙ੍ਕਾਸਂ, ਬਾਤ੍ਤਿਂਸਵਰਲਕ੍ਖਣਂ.

੨੧. ‘‘ਨਿਸਜ੍ਜ ਪਾਸਾਦਵਰੇ, ਅਦ੍ਦਸਂ ਲੋਕਨਾਯਕਂ;

ਕਦਮ੍ਬਪੁਪ੍ਫਂ ਪਗ੍ਗਯ੍ਹ, ਵਿਪਸ੍ਸਿਂ ਅਭਿਪੂਜਯਿਂ.

੨੨. ‘‘ਏਕਨਵੁਤਿਤੋ ਕਪ੍ਪੇ, ਯਂ ਬੁਦ੍ਧਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕਦਮ੍ਬਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕਦਮ੍ਬਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਉਦ੍ਦਾਲਕਪੁਪ੍ਫਿਯਤ੍ਥੇਰਅਪਦਾਨਂ

੨੪. ‘‘ਅਨੋਮੋ [ਸੁਜਾਤੋ (ਸ੍ਯਾ.), ਅਨੁਮੋ (ਕ.)] ਨਾਮ ਸਮ੍ਬੁਦ੍ਧੋ, ਗਙ੍ਗਾਕੂਲੇ ਵਸੀ ਤਦਾ;

ਉਦ੍ਦਾਲਕਂ ਗਹੇਤ੍ਵਾਨ, ਪੂਜਯਿਂ ਅਪਰਾਜਿਤਂ.

੨੫. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਦ੍ਦਾਲਕਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਉਦ੍ਦਾਲਕਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਏਕਚਮ੍ਪਕਪੁਪ੍ਫਿਯਤ੍ਥੇਰਅਪਦਾਨਂ

੨੭. ‘‘ਉਪਸਨ੍ਤੋ ਚ ਸਮ੍ਬੁਦ੍ਧੋ, ਵਸਤੀ ਪਬ੍ਬਤਨ੍ਤਰੇ;

ਏਕਚਮ੍ਪਕਮਾਦਾਯ, ਉਪਗਚ੍ਛਿਂ ਨਰੁਤ੍ਤਮਂ.

੨੮. ‘‘ਪਸਨ੍ਨਚਿਤ੍ਤੋ ਸੁਮਨੋ, ਪਚ੍ਚੇਕਮੁਨਿਮੁਤ੍ਤਮਂ;

ਉਭੋਹਤ੍ਥੇਹਿ ਪਗ੍ਗਯ੍ਹ, ਪੂਜਯਿਂ ਅਪਰਾਜਿਤਂ.

੨੯. ‘‘ਪਞ੍ਚਸਟ੍ਠਿਮ੍ਹਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਚਮ੍ਪਕਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕਚਮ੍ਪਕਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਤਿਮਿਰਪੁਪ੍ਫਿਯਤ੍ਥੇਰਅਪਦਾਨਂ

੩੧. ‘‘ਚਨ੍ਦਭਾਗਾਨਦੀਤੀਰੇ, ਅਨੁਸੋਤਂ ਵਜਾਮਹਂ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਸਾਲਰਾਜਂਵ ਫੁਲ੍ਲਿਤਂ.

੩੨. ‘‘ਪਸਨ੍ਨਚਿਤ੍ਤੋ ਸੁਮਨੋ, ਪਚ੍ਚੇਕਮੁਨਿਮੁਤ੍ਤਮਂ;

ਗਹੇਤ੍ਵਾ ਤਿਮਿਰਂ ਪੁਪ੍ਫਂ, ਮਤ੍ਥਕੇ ਓਕਿਰਿਂ ਅਹਂ.

੩੩. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੩੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਿਮਿਰਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਿਮਿਰਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਨਵਮਂ.

੧੦. ਸਲ਼ਲਪੁਪ੍ਫਿਯਤ੍ਥੇਰਅਪਦਾਨਂ

੩੫. ‘‘ਚਨ੍ਦਭਾਗਾਨਦੀਤੀਰੇ, ਅਹੋਸਿਂ ਕਿਨ੍ਨਰੋ ਤਦਾ;

ਤਤ੍ਥਦ੍ਦਸਂ ਦੇਵਦੇਵਂ, ਚਙ੍ਕਮਨ੍ਤਂ ਨਰਾਸਭਂ.

੩੬. ‘‘ਓਚਿਨਿਤ੍ਵਾਨ ਸਲ਼ਲਂ, ਪੁਪ੍ਫਂ ਬੁਦ੍ਧਸ੍ਸਦਾਸਹਂ;

ਉਪਸਿਙ੍ਘਿ ਮਹਾਵੀਰੋ, ਸਲ਼ਲਂ ਦੇਵਗਨ੍ਧਿਕਂ.

੩੭. ‘‘ਪਟਿਗ੍ਗਹੇਤ੍ਵਾ ਸਮ੍ਬੁਦ੍ਧੋ, ਵਿਪਸ੍ਸੀ ਲੋਕਨਾਯਕੋ;

ਉਪਸਿਙ੍ਘਿ ਮਹਾਵੀਰੋ, ਪੇਕ੍ਖਮਾਨਸ੍ਸ ਮੇ ਸਤੋ.

੩੮. ‘‘ਪਸਨ੍ਨਚਿਤ੍ਤੋ ਸੁਮਨੋ, ਵਨ੍ਦਿਤ੍ਵਾ ਦ੍ਵਿਪਦੁਤ੍ਤਮਂ;

ਅਞ੍ਜਲਿਂ ਪਗ੍ਗਹੇਤ੍ਵਾਨ, ਪੁਨ ਪਬ੍ਬਤਮਾਰੁਹਿਂ.

੩੯. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੪੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਲ਼ਲਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਲ਼ਲਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਦਸਮਂ.

ਮਨ੍ਦਾਰਵਪੁਪ੍ਫਿਯਵਗ੍ਗੋ ਸਤ੍ਤਤਿਂਸਤਿਮੋ.